1, 2. Tanbasá mak Jesus hadomi Marta, maibé saida mak hatudu katak Marta mós ema la perfeitu hanesan ita?

BAINHIRA ita lee ka rona kona-ba Marta nia naran, ita hanoin kedas kona-ba saida? Marta mak feto ida deʼit neʼebé Bíblia temi ho naran katak Jesus hadomi nia. Maibé iha mós feto seluk neʼebé Jesus hatudu domin no respeitu ba sira, hanesan Maria, Marta nia alin-feto, no Maria, Jesus nia inan. (João 11:5; 19:25-27) Entaun, tanbasá mak Bíblia temi deʼit Marta?

² Jesus hadomi Marta tanba nia mak feto neʼebé laran-luak no badinas, no tanba nia ema neʼebé hadomi tebes Jeová. Nia fiar ho laran buat hotu neʼebé Jesus hanorin, nia mós fiar metin katak Jesus mak Mesias. (João 11:21-27) Maski nuneʼe, nia mós ema la perfeitu hanesan ita, dala ruma halo sala. Porezemplu, loron ida Jesus ba vizita sira iha uma, nia hirus ho ninia alin-feto Maria no nia husu Jesus atu korrije Maria. Nia dehan: “Naʼi, Ita la haree katak haʼu-nia alin husik haʼu mesak atu halo serbisu oioin ka? Tan neʼe, favór ida haruka nia atu ajuda haʼu.” (Lee Lucas 10:38-42.) Ita bele aprende saida husi istória neʼe?

3, 4. Iha dalan saida mak Maria hili buat neʼebé diʼak, no Marta aprende saida? (Haree dezeñu iha pájina 18.)

³ Tanba Marta no Maria hatudu laran-luak ba Jesus, Jesus mós hakarak fó fali prezente furak ida ba sira, prezente neʼe mak hanorin lia-loos ba sira. Maria aproveita oportunidade neʼe hodi aprende husi Mestre Boot nia matenek no “tuur besik iha Naʼi nia ain hodi rona didiʼak ba buat neʼebé nia koʼalia”. Tuir loloos Marta mós bele husik hotu ninia serbisu hodi tuur rona ba Jesus. Se nia halo hanesan neʼe, Jesus mós sei gaba nia.

⁴ Marta preokupa liu ho prepara teʼin hahán diʼak ba Jesus no nia halo tan buat barak hodi Jesus iha vizita neʼebé diʼak. Maibé neʼe halo nia estrese no sai nervozu ho Maria. Jesus nota katak Marta preokupa liu, tan neʼe ho laran-diʼak nia hatete: “Marta, Marta, ó hanoin resin kona-ba buat barak.” Depois, Jesus fó-hanoin ba Marta katak hahán bikan ida deʼit mós toʼo ona. Maibé tanba Maria rona ba Jesus, nia gaba nia no dehan: “Maria hili buat neʼebé diʼak, no ema ida sei la foti ida-neʼe husi nia.” Ba Maria, karik han liutiha, nia sei haluha saida mak sira han iha momentu neʼe, maibé nia nunka sei haluha kona-ba Jesus nia liafuan hodi gaba nia, ka lia-loos neʼebé nia rona husi Jesus. Liutiha tinan 60, apóstolu João hatete: “Jesus hadomi Marta no nia alin.” (João 11:5) João nia liafuan neʼe hatudu katak Marta rona duni Jesus nia konsellu no serbí Jeová iha ninia moris tomak.

5. Oinsá mak ita-nia tempu la hanesan ho Bíblia nia tempu, no neʼe hamosu pergunta saida ba ita?

⁵ Se kompara ho Bíblia nia tempu, ohin loron iha buat barak tebes mak bele fahe ita-nia hanoin hodi ita la bele serbí Jeová ho laran. The Watchtower (Livru Haklaken) 15 Setembru 1958 fó avizu ba irmaun-irmán iha tempu neʼebá atu la bele husik teknolojia hanetik sira hodi serbí Jeová. Iha sira-nia tempu, loroloron iha buat foun barak no ema gosta moris ho livru, rádiu, filme, ka televizaun deʼit. Livru neʼe mós hatete katak “nuʼudar ita besik liu ba mundu nia rohan, sasán barak liután mak bele preokupa ita-nia neon”. Ohin loron ita haree ida-neʼe mak akontese duni! Neʼe hamosu pergunta importante ida: Oinsá mak ita bele sai hanesan Maria atu la husik buat neʼebé la importante atu preokupa ita-nia moris hodi ita bele serbí Jeová ho laran?

6. Iha dalan saida mak Jeová nia povu aproveita uza mundu nia teknolojia?

⁶ Jeová nia organizasaun aproveita duni mundu nia teknolojia atu habelar adorasaun neʼebé loos. Porezemplu, antes no tama toʼo tempu Funu Mundiál Primeiru nian, ita uza “Foto-Drama kona-ba Kriasaun” hodi haklaken ba ema iha mundu tomak. Ekipamentu neʼe bele leno foto no filme badak ho lian no kór kona-ba tempu dame iha Jesus Kristu nia Ukun ba Tinan Rihun Ida iha futuru. Tuir fali mai, ita uza rádiu hodi haklaken ba ema iha mundu tomak. Ohin loron, tanba ema uza ona teknolojia ho komputadór, ita mós aproveita uza internét atu haklaken iha dalan neʼebé diʼak tebes ba mundu tomak, no ema neʼebé hela iha illa sira ka fatin izoladu seluk mós bele rona kona-ba ita-nia mensajen.

7. (a) Tanbasá mak perigu atu uza tempu barak liu ba sasán mundu nian? (b) Saida mak buat neʼebé importante liu hotu ba ita? (Haree nota iha kraik.)

⁷ Bíblia fó avizu katak se ita gasta ita-nia tempu barak liu ba mundu nia sasán sira, bele lori perigu. (Lee 1 Korinto 7:29-31.)  Fasil ba ita atu estraga ita-nia tempu ba buat neʼebé karik la sala atu halo, hanesan ita-nia hobby, lee halimar, haree televizaun, pasiar haree rai, fase matan iha loja, buka-hatene teknolojia foun ka sasán foun saida mak foin sai. Koʼalia ba kolega sira liuhusi internét, haruka mensajen ba malu, haruka e-mail ba malu, buka-hatene beibeik notísias foun no notísias desportu sira, buat sira-neʼe mós bele estraga ita-nia tempu no bele halo ita hakarak tan. * (Haree nota iha kraik.) (Eclesiastes [Pengkhotbah] 3:1, 6) Se ita mak la kuidadu didiʼak atu uza ita-nia tempu ba buat la importante sira-neʼe, neʼe bele hanetik ita atu halo buat neʼebé importante liu ba ita, neʼe mak ita-nia adorasaun ba Jeová.—Lee Éfeso 5:15-17.

8. Tanbasá mak Bíblia nia konsellu kona-ba keta hadomi buat mundu nian importante ba ita atu halo tuir?

⁸ Satanás forma ninia mundu iha dalan neʼebé atu dada no atu preokupa ita-nia moris. Se ema iha apóstolu sira-nia tempu mak sente hanesan neʼe ona, sá tan ho ita ohin loron. (2 Timóteo 4:10) Tan neʼe mak ita tenke rona ba konsellu neʼe: “Keta hadomi . . . buat sira neʼebé mundu nian.” Ita tenke hadiʼa beibeik ita-nia moris hodi halo tuir konsellu neʼe, atu ita la husik buat mundu nian fahe ita-nia hanoin hodi ita-nia “domin ba Aman” bele sai buras ba nafatin. Neʼe sei sai fasil liután ba ita atu halo tuir Maromak nia hakarak, hodi nia kontente ho ita ba nafatin.—1 João 2:15-17.

9. Tanbasá mak Jesus hakarak ita iha matan neʼebé haree momoos, no Jesus hatudu ezemplu diʼak saida?

⁹ Jesus nia hanorin no ninia ezemplu moris nian hatudu duni katak nia rasik mós halo tuir konsellu neʼebé nia fó ba Marta. Nia anima ninia dixípulu sira atu iha matan neʼebé “haree momoos”, hodi sira bele fó laran tomak atu serbí Jeová no ninia Ukun. (Lee Mateus 6:22, 33.) Jesus la iha uma ka rai, la iha sasán barak mak hatodan ninia moris.—Lucas 9:58; 19:33-35.

10. Jesus hatudu ezemplu diʼak saida iha serbisu haklaken?

¹⁰ Iha buat barak mak akontese daudaun iha tempu Jesus halaʼo ninia haklaken iha mundu, maibé nia nunka husik buat sira-neʼe atu fahe ninia atensaun. Bainhira nia hanorin ema lubun ida no halo tiha milagre  oioin iha Kafarnaum, ema husu nia atu hela nafatin iha sidade neʼe, maibé Jesus tau fokus nafatin ba ninia serbisu. Jesus hatete: “Haʼu tenke haklaken mós liafuan diʼak kona-ba Maromak nia Ukun iha sidade seluk, basá tan neʼe mak Maromak haruka haʼu mai.” (Lucas 4:42-44) Jesus halo tuir duni ninia liafuan neʼe. Nia laʼo toʼo fatin dook sira iha rai-Palestina laran hodi haklaken no hanorin ema. Maski nia perfeitu, maibé nia mós iha presiza hanesan ita ema baibain. Dala ruma nia halo tiha serbisu makaʼas ba Maromak, nia mós sente kole.—Lucas 8:23; João 4:6.

11. Jesus hatete saida ba mane neʼebé iha hela problema família nian, no nia fó avizu kona-ba saida?

¹¹ Iha loron ida Jesus hanorin hela ninia dixípulu kona-ba oinsá atu tahan hasoru terus neʼebé mai husi ema, derrepente mane ida korta ninia liafuan hodi dehan: “Mestre, haruka haʼu-nia maun atu fahe liman-rohan ho haʼu.” Maibé Jesus lakohi mete ho problema neʼe, no nia dehan ba mane neʼe: “Sé mak hili haʼu nuʼudar juis atu tesi lia kona-ba imi-nia sasán?” Tuirmai Jesus kontinua hanorin buat neʼebé nia hanorin daudauk, nia fó avizu ba ema neʼebé rona hela nia katak perigu tebes se sira husik hakarak atu iha sasán barak fahe sira-nia atensaun hodi la bele halo Maromak nia serbisu.—Lucas 12:13-15.

12, 13. (a) Tanbasá mak ema gregu sira hakarak hasoru Jesus? (b) Saida mak Jesus halo bainhira Filipe husu nia atu hasoru ema gregu sira?

¹² Semana ikus antes Jesus mate mak tempu neʼebé lori estrese boot ba nia. (Mateus 26:38; João 12:27) Nia hatene katak nia sei iha serbisu barak atu halo antes nia mate, no nia mós hatene katak ema sei halo aat ba nia toʼo nia mate. Porezemplu, iha domingu loron 9 Nisan, Jesus saʼe kuda-burru ida tama ba Jeruzalein. No ema barak simu nia hanesan liurai hodi dehan katak nia mak “Ida neʼebé mai nuʼudar Liurai hodi Jeová nia naran!” (Lucas 19:38) Loron tuirmai, Jesus tama ba Maromak nia templu no ho aten-brani nia duni sai hotu ema sira neʼebé faʼan sasán iha laran.—Lucas 19:45, 46.

¹³ Ema gregu balu neʼebé bá Jeruzalein haree tiha buat neʼebé Jesus halo, sira admira tebes, tan neʼe, sira bá husu apóstolu Filipe atu hasoru Jesus. Tuir loloos Jesus bele buka ema sira-neʼe atu apoia nia hodi ninia inimigu la bele oho nia, maibé nia la halo hanesan neʼe. Jesus fokus nafatin ba knaar importante seluk husi Maromak neʼebé nia atu halo. Tan neʼe bainhira nia esplika tiha ba André no Filipe katak lakleur tan nia sei mate, nia hatete ba sira: “Ema neʼebé hadomi nia moris sei lakon nia moris, maibé ema neʼebé odi ninia moris iha mundu neʼe sei salva nia moris hodi hetan moris rohan-laek.” Duké atu buka-hatene saida mak ema gregu sira hakarak, Jesus anima sira atu halo tuir ninia ezemplu no nia promete ba sira: “Se ema ruma serbí haʼu, haʼu-nia Aman sei fó bensaun ba nia.” Ita fiar katak Filipe mós hatoʼo fali Jesus nia liafuan sira-neʼe ba ema gregu sira.—João 12:20-26.

14. Maski Jesus tau uluk serbisu haklaken iha ninia moris, saida tan mak nia la haluha atu halo?

¹⁴ Maski Jesus lakohi husik buat seluk atu dada ninia atensaun hodi nia bele haklaken nafatin, maibé neʼe la dehan katak kalan loron Jesus nia hanoin mak serbisu deʼit. Nia bá asiste kazamentu bainhira ema konvida nia, no nia mós halo milagre iha festa neʼe hodi halo bee nakfila ba tua. (João 2:2, 6-10) Bainhira Jesus nia belun diʼak no ema neʼebé atu sai ninia dixípulu konvida nia bá atu han kalan, nia mós  bá. (Lucas 5:29; João 12:2) Maibé buat importante liu ba Jesus mak atu buka tempu hodi halo orasaun, hanoin kleʼan, no deskansa.—Mateus 14:23; Marcos 1:35; 6:31, 32.

15. Apóstolu Paulo fó konsellu saida, no oinsá mak nia rasik mós halo tuir?

¹⁵ Apóstolu Paulo kompara ita ema kristaun nia moris hanesan halai taru, no nia hatete katak ita presiza “soe tiha buat hotu neʼebé hatodan ita”. (Lee Ebreu 12:1.) Paulo halo tuir duni buat neʼebé mak nia haklaken ba ema. Tuir loloos nia bele sai riku no iha naran boot se nia mak buka atu sai ema judeu nia amlulik ida, maibé tanba nia hakarak tau fokus ba “buat sira neʼebé importante liu” hodi serbí Jeová, nia husik hotu oportunidade diʼak neʼe. Nia haklaken bá-mai iha rai hanesan Síria, Ázia Menór, Masedónia, no Judeia. Bainhira nia hakerek kona-ba ninia esperansa atu moris iha lalehan, nia dehan: “Haʼu haluha ona buat neʼebé iha kotuk no hakaʼas an atu hetan buat neʼebé iha oin. Haʼu kontinua halai ho hakarak atu simu kolen.” (Filipe 1:10; 3:8, 13, 14) Apóstolu Paulo mós aproveita ho ninia situasaun neʼebé laiha feen atu ‘kontinua fó adorasaun deʼit ba Maromak hodi la fahe ninia hanoin’.—1 Korinto 7:32-35.

16, 17. Atu kaben ona ka klosan, oinsá mak ita hotu bele halo tuir apóstolu Paulo nia ezemplu? Konta toʼok esperiénsia ida.

¹⁶ Maromak nia atan balu mós hili atu moris klosan deʼit hanesan Paulo hodi la simu responsabilidade barak família nian, hodi sira bele uza tempu barak liu atu serbí Jeová. (Mateus 19:11, 12) Maibé, atu kaben ona ka seidauk, ita hotu bele “soe tiha buat hotu neʼebé hatodan ita” hodi ita bele serbí Jeová ho laran tomak. Atu bele halo nuneʼe, karik ita presiza hamenus tempu neʼebé ita baibain uza ba atividade neʼebé soe deʼit ita-nia tempu. Halo planu atu ita bele aumenta liután tempu atu serbí Jeová.

¹⁷ Porezemplu irmaun Marcos no irmán Klara, sira husi rai-Gales, sira ida-idak remata tiha eskola foti kedas pioneiru. No bainhira sira hola malu, sira mós kontinua pioneiru. Marcos hatete: “Atu bele halo simples ami-nia moris, ami presiza faʼan tiha ami-nia uma kuartu tolu no mós para tiha husi ami-nia serbisu part-time hodi ami bele tuir serbisu konstrusaun iha mundu tomak.” Iha tinan 20 nia laran, sira laʼo-lemo iha rai-Áfrika hodi ajuda harii Reuniaun-Fatin sira. Iha tempu ida, sira-nia osan menus toʼo dolar 15 deʼit, no Jeová tau matan nafatin ba sira. Klara dehan: “Bele uza ami-nia moris atu serbí Jeová loroloron, neʼe halo ami-nia laran kontente tebes. Tinan sira-neʼe ami hetan mós kolega foun barak, no ami nunka falta buat ida. Se kompara ho solok neʼebé ami hetan husi serbí Jeová tempu-tomak, buat neʼebé ami husik mak kiʼik tebes.” Neʼe laʼós sira deʼit mak sente hanesan neʼe, ema barak mós sente hanesan neʼe duni. *—Haree nota iha kraik.

18. Ita bele husu pergunta saida ba Ita-nia an?

¹⁸ Oinsá ho Ita? Saida mak Ita bele halo se Ita sente katak Ita la laran-manas hanesan uluk ona tanba Ita-nia hanoin fahe ona? Karik resposta mak hadiʼa dalan neʼebé Ita lee Bíblia no estuda mesak. Oinsá? Lisaun tuirmai sei esplika kona-ba ida-neʼe.