BAINHIRA haʼu toʼo tiha tinan sia, haʼu-nia ain la sai aas tan ona. Iha tempu neʼebá ami hela iha rai-Kosta Marfín. Agora haʼu tinan 34, no haʼu-nia aas mak metru ida deʼit. Iha tempu haʼu-nia inan-aman hatene katak haʼu la bele sai aas tan ona, sira anima haʼu atu serbisu ho badinas hodi haʼu la bele hanoin beibeik kona-ba haʼu-nia an. Haʼu rona tuir no nahe meza ida iha ami-nia uma oin hodi faʼan ai-fuan. Haʼu hamoos fatin neʼe ho didiʼak no neʼe dada kliente barak mai sosa.

Maski haʼu serbisu ho badinas ona, maibé haʼu sei hasoru difikuldade seluk iha haʼu-nia moris. Porezemplu, tanba haʼu ain-badak, bainhira haʼu bá sosa sasán iha loja, haʼu hamriik la toʼo meza iha loja atu selu osan. Ba haʼu, buat hotu haree hanesan ema halo ba ema ain aas sira deʼit. Haʼu sente triste tebes kona-ba haʼu-nia an, maibé bainhira haʼu tama ba tinan 14, haʼu-nia moris troka.

Iha loron ida, feto naʼin-rua mai hola ai-fuan, sira mak Testemuña ba Jeová. Sira husu atu estuda ho haʼu. Estuda tiha mak haʼu foin hatene katak atu hatene kona-ba Jeová ho ninia hakarak mak importante liu haʼu-nia an. Neʼe ajuda tebes haʼu. Eskritura neʼebé haʼu gosta liu mak Salmo (Mazmur) 73:28. Parte primeiru husi eskritura neʼe hatete katak: “Atu hakbesik ba Maromak mak diʼak mai haʼu.”

Derrepente deʼit ami-nia família presiza muda husi Kosta Marfín bá rai viziñu ida naran Burkina Faso. Toʼo tiha neʼebá, haʼu-nia moris troka fali. Uluk iha ami-nia rai, ema toman haree haʼu hamriik iha faʼan ai-fuan fatin. Maibé agora iha fatin foun neʼe, ema ida mós la koñese haʼu, no ema haree haʼu hanesan ema komik. Bainhira liu, sira sempre hateke haʼu. Neʼe halo haʼu sente an no haʼu subar an deʼit iha uma laran ba semana barak. Maibé ikusmai haʼu hanoin-hetan fali katak uluk buat neʼebé diʼak mai haʼu mak hakbesik ba Jeová. Entaun haʼu hakerek karta ida ba sukursál no sira haruka misionária ida mak mai vizita haʼu. Ninia naran Nani no nia mai ho motór bebek ida.

Dalan atu mai ami-nia uma namdoras tebes, no iha tempu udan, tahu makaʼas. Bainhira Nani atu mai estuda ho haʼu, iha dalan, nia monu dala barak husi ninia motór, maibé nia mai nafatin. Tuirmai, nia husu atu lori haʼu bá tuir reuniaun sira. Ba haʼu, haʼu hatene katak bainhira sai husi uma ema sei fihir haʼu. No tuur iha motór nia kotuk mós sei halo todan motór no neʼe sei halo susar ba motór namdoras iha dalan. Maski nuneʼe, haʼu hakaʼas an bá deʼit tanba haʼu gosta liafuan  tuirmai husi eskritura neʼebé haʼu gosta, neʼe dehan: “Haʼu halo Naʼi Jeová, Ukun-Naʼin Boot Liu, sai haʼu-nia fatin protesaun.”

Dala ruma ami monu ba tahu laran, maibé neʼe la hapara ami atu bá tuir reuniaun sira. Diʼak atu tama ba Reuniaun-Fatin tanba iha laran ema hotu iha oin-midar no domin, maibé iha liʼur haʼu haree mak ema hamnasa haʼu deʼit! Liutiha fulan sia, haʼu mós hetan batizmu.

Liafuan parte ikus husi eskritura neʼebé haʼu gosta mak, “Hodi fó sai Ita-nia hahalok hotu.” Haʼu hatene katak haklaken mak susar neʼebé boot tebes ba haʼu. Haʼu sei hanoin-hetan primeiravés haʼu bá haklaken husi uma ba uma. Labarik ho ema boot sira sempre fihir haʼu, bá neʼebé mós sira tuir haʼu no sira hasara dalan neʼebé haʼu laʼo. Neʼe halo haʼu sente kanek tebes, maibé haʼu fó-hanoin beibeik ba haʼu-nia an katak ema sira-neʼe mós hakarak moris iha Paraízu hanesan haʼu, tan neʼe haʼu tahan deʼit.

Atu halo fasil ba haʼu, haʼu buka bisikleta roda tolu ida neʼebé hean ho liman. Atu saʼe dalan subida, ema neʼebé haklaken ho haʼu dudu haʼu ho bisikleta saʼe toʼo dalan tun fali mak nia haksoit ba bisikleta leten ho haʼu. Serbisu haklaken neʼebé uluk susar mai haʼu agora sai fali haʼu-nia solok. Haʼu gosta tebes haklaken toʼo haʼu foti pioneiru regulár iha tinan 1998.

Haʼu estuda Bíblia ho ema barak, haat hetan ona batizmu. Haʼu mós kontente tanba haʼu-nia alin-feto ida mós hetan lia-loos! Rona kona-ba ema seluk laʼo ba oin iha lia-loos anima tebes haʼu bainhira haʼu sente laran-tun. Loron ida haʼu moras hela ho malária, no haʼu simu karta ida husi Kosta Marfín. Uluk haʼu hahú estuda Bíblia ho estudante ida husi universidade ida iha Burkina Faso no ikusmai haʼu fó ba irmaun ida mak estuda ho ema neʼe. Estudante neʼe ikusmai muda ba Kosta Marfín. Haʼu kontente tebes atu hatene katak agora nia sai ona haklaken-naʼin ida neʼebé seidauk hetan batizmu.

Oinsá mak haʼu tau matan ba haʼu-nia moris? Iha organizasaun ida neʼebé fó ajuda ba ema aleijadu hanorin haʼu suku ropa. Haree tiha dalan neʼebé haʼu halaʼo haʼu-nia serbisu, mestra ida hatete: “Ami tenke hanorin Ita oinsá atu halo sabaun.” Sira hanorin duni haʼu. Haʼu halo rasik iha uma sabaun fase ropa no sabaun uza ba uma laran nian. Ema gosta hola haʼu-nia sabaun no sira mós promove fali ba ema seluk. Haʼu lori rasik sabaun ho motór roda-tolu ba toʼo ema nia uma.

Triste mak iha tinan 2004 haʼu presiza para husi pioneiru tanba haʼu-nia ruin kotuk moras toʼo tahan la bele. Maibé haʼu sei hakaʼas an nafatin atu uza tempu bá haklaken.

Ema seluk hatete katak haʼu-nia oin-midar hadaʼet tebes sira tanba haʼu sempre hatudu oin-midar. Haʼu iha duni razaun atu kontente, tanba hakbesik ba Maromak mak diʼak mai haʼu.—Esperiénsia husi Sarah Maiga.