1, 2. Sé mak kria konxiénsia, no tanbasá mak ita agradese ita iha konxiénsia?

MAROMAK JEOVÁ kria ita ema ho liberdade, hodi nuneʼe mak ita iha kbiit atu hili. Maibé atu ajuda ita hili atu halo buat neʼebé loos, Jeová mós kria ita ho konxiénsia, neʼe mak ita-nia sentimentu husi laran neʼebé ajuda ita atu hatene katak buat balu sala no buat balu loos. Konxiénsia neʼe sai hanesan matadalan ida ba ita hotu. Se ita uza didiʼak ita-nia konxiénsia, neʼe bele ajuda ita halo buat neʼebé loos no sees husi halo buat neʼebé sala. Ho konxiénsia neʼebé nia kria, Maromak hatudu mai ita katak nia hadomi tebes ita, tanba nia hakarak ita hotu atu halo buat neʼebé loos.

² Tanba konxiénsia nia kbiit mak ema barak ohin loron hatene halo buat neʼebé loos no odi buat neʼebé sala maski sira rasik la hatene Bíblia nia matadalan sira. (Lee Roma 2:14, 15.) Hanoin toʼok se ema mak la iha konxiénsia, mundu neʼe sei sai oinsá? Karik ita sei rona kona-ba ema nia hahalok neʼebé aat liu ohin loron, loos ka lae? Tan neʼe ita agradese tebes ba Jeová tanba nia kria ema ho konxiénsia ida-idak.

3. Oinsá mak konxiénsia bele fó impaktu diʼak ba kongregasaun tomak?

 ³ Nuʼudar Jeová nia atan, ita la hanesan ho ema seluk, tanba ita hakarak treinu ita-nia konxiénsia. Ita hakarak uza ita-nia konxiénsia tuir Bíblia nia matadalan kona-ba sala no loos, aat no diʼak. Konxiénsia hanesan neʼe bele fó impaktu diʼak ba kongregasaun tomak. Maibé, atu fó treinu ka uza ita-nia konxiénsia, la toʼo ba ita atu hatene deʼit saida mak Bíblia hanorin, tanba Bíblia liga konxiénsia neʼebé diʼak hamutuk ho fiar no domin. Apóstolu Paulo dehan: “Mandamentu neʼe hanorin ita atu hatudu domin ho laran neʼebé moos no ho laran [ka, konxiénsia] neʼebé diʼak no ho fiar neʼebé la laran-makerek.” (1 Timóteo 1:5, nota-rodapé) Tan neʼe mak bainhira ita treinu didiʼak no rona ba ita-nia konxiénsia, neʼe bele halo ita hadomi no fiar liután ba Jeová. Neʼe mós bele hatudu katak ita nia relasaun ho Jeová kleʼan ka lae, ita-nia laran mak hanesan saida, no ita hakarak halo tuir Jeová toʼo iha neʼebé. Loos duni, ita-nia konxiénsia mak hatudu ba ema katak husi laran ita neʼe ema hanesan saida.

4. Oinsá mak ita bele treinu ita-nia konxiénsia?

⁴ Maibé oinsá mak ita bele treinu ita-nia konxiénsia? Liuhusi estuda beibeik Bíblia, medita ka hanoin didiʼak buat neʼebé ita estuda, no husu Jeová ajuda ita atu aplika husi buat neʼebé ita foin aprende. Bainhira ita estuda, ita lakohi buka-hatene matenek deʼit ka aprende kona-ba ukun-fuan deʼit. Ita-nia estuda tenkesér ajuda ita atu koñese liután Jeová, nia mak Maromak hanesan saida, nia iha hahalok saida deʼit, no saida mak nia gosta ka la gosta. Hodi nuneʼe, ita bele afina ita-nia konxiénsia hodi iha hanoin neʼebé hanesan ho Maromak nian no halo tuir ninia dalan sira.

5. Lisaun neʼe sei koʼalia kona-ba saida?

⁵ Karik ita bele husu: Oinsá mak konxiénsia neʼebé diʼak bele ajuda ita atu halo desizaun sira? Oinsá mak ita bele hatudu respeitu ba irmaun-irmán sira-nia konxiénsia husi desizaun neʼebé sira halo? No oinsá mak ita-nia konxiénsia bele book ita atu serbisu ho badinas liután? Mai ita uza pergunta sira-neʼe atu koʼalia kona-ba buat tolu tuirmai neʼe: (1) tau matan ba saúde, (2) atividade halimar nian, no (3) haklaken.

6. Baibain ema husu pergunta kona-ba saida?

⁶ Bíblia fó avizu ba ita atu hasees an husi buat sira neʼebé mak bele estraga ita no tenke kontrola ita-nia toman sira, hanesan han no hemu. (Provérbios [Amsal] 23:20; 2 Korinto 7:1) Se ita aplika Bíblia nia matadalan sira, maski ita sei sai katuas ka ferik, maibé matadalan sira-neʼe sei ajuda ita atu tau matan didiʼak ba ita-nia saúde. Iha rai balu, ema bele uza ai-moruk baibain ka tratamentu tradisionál atu kura moras. Irmaun-irmán barak hakerek karta ba sukursál atu husu beibeik kona-ba tratamentu sira-neʼe. Sira barak husu, “Jeová nia atan ida bele simu tratamentu hanesan neʼe ka lae?”

7. Saida mak bele ajuda ita atu halo desizaun kona-ba tratamentu saúde?

⁷ Sukursál ka katuas kongregasaun sira laiha lisensa atu halo desizaun ba Testemuña ida kona-ba tratamentu saúde nian, fó sai opiniaun deʼit mós labele. (Galásia 6:5) Maibé, buat neʼebé sira bele halo mak ajuda ita haree kona-ba Jeová hanoin oinsá se ita foti desizaun ruma. Porezemplu, Bíblia hatete katak ema kristaun ida tenkesér hasees an husi raan. (Apóstolu 15:29) Tan neʼe ita labele buka tratamentu saúde neʼebé uza raan ka parte haat prinsipál husi raan. Hatene ona informasaun neʼe mós bele ajuda ema kristaun ida atu foti desizaun rasik tuir  ninia konxiénsia, kona-ba tratamentu ruma neʼebé uza parte kiʼik-kiʼik husi parte haat raan nian. * (Haree nota iha kraik.) Bíblia nia matadalan saida tan mak bele ajuda ita atu foti desizaun neʼebé diʼak kona-ba tratamentu?

8. Oinsá mak Filipe 4:5 ajuda ita kona-ba tau matan ba saúde?

⁸ Provérbios (Amsal) 14:15 hatete: “Ema neʼebé la iha esperiénsia tau fiar ba liafuan hotu, maibé ema neʼebé matenek hanoin uluk kona-ba nia hakat sira.” Iha moras balu mak toʼo agora laiha ai-moruk bele kura. Tan neʼe mak ita tenkesér kuidadu tebes atu la buka tratamentu neʼebé ita rona deʼit katak neʼe bele kura moras, maibé seidauk iha prova. Apóstolu Paulo hatete: “Halo ema hotu haree imi-nia haraik-an.” (Filipe 4:5) Se ita haraik-an, ita sei la uza hotu ita-nia tempu atu tau matan ba saúde deʼit hodi haluha tiha ita-nia adorasaun ba Jeová. Se ita hanoin demais liu kona-ba saúde, ita bele sai ema neʼebé mak hanoin an deʼit. (Filipe 2:4) Ita tenke haraik-an no rekoñese katak ita la bele iha saúde neʼebé perfeitu iha mundu neʼe. Tan neʼe mak ita lakohi uza hotu ita-nia tempu ba saúde, maibé diʼak atu tau uluk Jeová iha ita-nia moris.—Lee Filipe 1:10.

9. Oinsá mak Roma 14:13, 19 ajuda ita halo desizaun kona-ba saúde, no saida mak bele sobu ita-nia unidade?

⁹ Ema kristaun neʼebé haraik an la obriga ema seluk atu simu ninia hanoin. Iha feen-la’en ida iha rai-Europa, sira naʼin-rua dada ema seluk atu uza ai-moruk balu. Tanba sira hamaus beibeik, entaun irmaun-irmán balu mós halo tuir sira, maibé seluk lakohi. Ikusmai sira neʼebé uza ai-moruk neʼe la sente katak neʼe ajuda sira, entaun sira hirus tebes. Ba feen-la’en neʼe, sira iha direitu atu hili rasik hahán ka ai-moruk saida mak sira hakarak han no hemu. Maibé se sira promove sasán kona-ba saúde ba ema seluk, neʼe bele sobu kongregasaun nia unidade. Neʼe hatudu haraik-an ka lae? Iha tempu antigu, ema kristaun sira iha Roma mós iha hanoin neʼebé la hanesan kona-ba hahán balu no kona-ba loron boot sira. Tan neʼe apóstolu Paulo presiza fó konsellu ba sira, nia hatete: “Ema ida hanoin katak loron ida folin liu fali loron seluk; ema seluk hanoin katak loron hotu mak hanesan deʼit; ema ida-idak tenke laran-metin ba buat neʼebé nia deside ona.” Loos duni, importante tebes ba sira atu la halo ema seluk sidi.—Lee Roma 14:5, 13, 15, 19, 20.

10. Tanbasá mak ita tenke respeitu ema seluk nia desizaun neʼebé sira halo ba sira-nia an rasik? (Haree dezeñu iha pájina 8.)

¹⁰ Se ita la komprende tansá mak irmaun ka irmán ida nia konxiénsia husik nia atu foti desizaun ruma, ita nunka bele iha hanoin aat kona-ba ninia desizaun ka obriga nia atu troka ninia desizaun neʼe. Nia foti desizaun neʼe tanba karik ninia konxiénsia sei  fraku no presiza treinu tan, ka tanba ninia konxiénsia mak makaʼas liu. (1 Korinto 8:11, 12) Ka dala ruma ita rasik nia konxiénsia mak presiza hadiʼa tan hodi bele halo tuir Bíblia nia prinsípiu sira. Kona-ba tau matan ba saúde, ita mak tenke halo desizaun rasik no lori todan husi desizaun neʼebé ita rasik halo.

11, 12. Bíblia nia matadalan saida mak bele ajuda ita bainhira atu hili atividade halimar nian?

¹¹ Jeová kria ita ema ho presiza atu halimar no haksolok liuhusi atividade halimar nian. Salomão hatete katak iha tempu atu hamnasa no mós tempu atu dansa. (Eclesiastes [Pengkhotbah] 3:4) Maibé laʼós atividade halimar nian hotu diʼak ba ita, ka bele halo ita sente kmaan ka halo ita fresku fali. Ita halimar demais liu ka halimar beibeik mós ladiʼak. Se nuneʼe, oinsá mak ita-nia konxiénsia bele ajuda ita atu bele uza tempu halimar ho didiʼak no halo ita kontente?

¹² Bíblia fó avizu kona-ba isin nia hahalok sira. Hahalok sira-neʼe mak hanesan “sala-foʼer, hahalok la moos, hahalok neʼebé la iha moe, adora estátua, envolve an ho anju aat, odi malu, istori malu, laran-moras ba malu, sai hirus, buka atu manán deʼit, haketak malu, tuir deʼit ema nia hanorin, kaan-teen, lanu-teen, festa arbiru, no buat sira seluk neʼebé hanesan neʼe”. Apóstolu Paulo hatete katak “sira neʼebé halo buat sira-neʼe sei la simu Maromak nia Ukun nuʼudar liman-rohan”. (Galásia 5:19-21) Tan neʼe mak diʼak atu husu ba ita-nia an: ‘Haʼu-nia konxiénsia bandu haʼu ka lae atu halimar desportu neʼebé bele hakanek malu, buka manán malu deʼit, nasionalizmu, ka desportu violénsia seluk? Bainhira haʼu-nia laran tenta haʼu atu haree filme neʼebé lori pornografia ka filme neʼebé hatudu hahalok la morál, book ema atu sai lanu, ka matan-dook nia atividade, haʼu-nia konxiénsia fó avizu haʼu ka lae?

13. Oinsá mak konsellu husi 1 Timóteo 4:8 no Provérbios (Amsal) 13:20 bele ajuda ita atu hili atividade halimar nian?

¹³ Bíblia mós fó matadalan atu ajuda treinu ita-nia konxiénsia kona-ba atividade halimar nian. Porezemplu, eskritura hatete katak “treinu ita-nia isin lori buat diʼak uitoan”. (1 Timóteo 4:8) Ema barak dehan katak halaʼo atividade desportu sei fó saúde neʼebé diʼak no halo kmaan ita-nia isin no neon. Maibé se desportu neʼe presiza halo ho grupu ida, diʼak ka lae atu halo ho ema naran deʼit? Provérbios 13:20 hatete: “Ema neʼebé laʼo hamutuk ho ema matenek sei sai matenek, maibé ema neʼebé hamutuk ho ema beik sira sei hetan buat aat.” Eskritura neʼe hatudu mai ita katak importante duni atu uza Bíblia nia matadalan hodi ajuda ita-nia konxiénsia atu hili atividade halimar nian.

14. Oinsá mak Roma 14:2-4 ajuda família ida?

¹⁴ Kristian ho Daniela iha oan joven naʼin-rua. Kristian hatete: “Iha kalan Adorasaun Família nian, ami koʼalia kona-ba atividade halimar nian. Ami hotu konkorda katak dalan atu halimar balu diʼak maibé balu lae. Entaun, sé mak ita bele halimar hamutuk? Ami-nia oan-feto ida dehan katak iha tempu rekreiu iha eskola, irmaun-irmán sira-nia oan balu halimar iha dalan neʼebé, tuir ami-nia oan-feto nia hanoin, la diʼak. No nia sente katak haree hanesan neʼe halo nia mós atu halimar tuir sira. Ami koʼalia didiʼak ba nia katak ita ida-idak iha ita-nia konxiénsia rasik no bainhira atu hili halo buat ruma no atu halo ho sé, ita tenke rona ba ita-nia konxiénsia rasik.”—Lee Roma 14:2-4.

15. Oinsá mak Mateus 6:33 bele ajuda ita atu halo planu ba atividade halimar nian?

¹⁵ Ita mós tenke hanoin kona-ba iha tempu saida mak ita halo atividade halimar  nian. Porezemplu, ita halo planu ba atividade halimar nian iha tempu atu tuir reuniaun sira ka lae, ka tempu atu bá haklaken nian, ka iha tempu ita atu estuda Bíblia mesak? Ba ita rasik, saida mak importante liu, uza tempu ba ita-nia adorasaun ka atividade halimar nian? Jesus hatete: “Kontinua buka uluknanain Maromak nia Ukun no ninia hakarak, no buat sira seluk nia sei fó mós ba imi.” (Mateus 6:33) Ita-nia konxiénsia book ita atu halo tuir Jesus nia konsellu neʼe ka lae?

16. Oinsá mak konxiénsia liga ho haklaken?

¹⁶ Konxiénsia neʼebé diʼak laʼós deʼit atu fó avizu ba ita kona-ba la bele halo buat neʼebé sala, maibé mós book ita atu halo buat diʼak oioin. Buat diʼak hanesan haklaken husi uma ba uma ka haklaken iha dalan la formál sira. Apóstolu Paulo rekoñese duni nuneʼe, tan neʼe mak nia hatete: “Tuir loloos, se haʼu la fó sai liafuan diʼak neʼe, susar boot mai haʼu!” (1 Korinto 9:16) Se ita mak halo tuir apóstolu Paulo nia ezemplu, ita-nia konxiénsia mós sei sente diʼak tanba ita hatene katak ita halo buat neʼebé diʼak. No bainhira ita haklaken ba ema, neʼe hanesan ita fanu ema nia konxiénsia. Paulo hatete: “Ami fó sai lia-loos hodi hatudu ezemplu diʼak ba ema hotu [ka, ema hotu nia konxiénsia] iha Maromak nia oin.”—2 Korinto 4:2, nota-rodapé.

17. Oinsá mak irmán joven ida halo desizaun tuir ninia konxiénsia?

¹⁷ Iha tempu Jacqueline tinan 16, nia estuda biolojia iha eskola. Iha tempu neʼebá eskola hanorin hela teoria evolusaun. Nia hatete: “Haʼu sente susar tebes ho haʼu-nia konxiénsia atu partisipa iha klase laran. Haʼu la konkorda ho teoria neʼe. Haʼu bá buka haʼu-nia profesora hodi esplika ba nia kona-ba haʼu-nia fiar. Haʼu hakfodak tebes tanba nia la hirus, maibé fó fali oportunidade ba haʼu atu esplika ba klase tomak kona-ba moris mai husi neʼebé.” Jacqueline sente laran kmaan tebes tanba nia rona ba ninia konxiénsia neʼebé halo tuir Bíblia nia matadalan sira. Ita-nia konxiénsia mós book ita atu halo buat neʼebé diʼak ka lae?

18. Tanbasá mak ita hakarak atu iha konxiénsia neʼebé diʼak?

¹⁸ Konxiénsia bele ajuda ita atu moris tuir Jeová nia matadalan no prinsípiu sira. Ita bele fó treinu ba ita-nia konxiénsia hodi estuda beibeik Maromak nia Liafuan, hanoin kleʼan no aplika buat neʼebé ita estuda. Se ita halo nuneʼe, ita sei haree katak konxiénsia mak prezente furak duni husi Jeová ba ita-nia moris loroloron nian!