Hanoin kleʼan kona-ba Jeová nia domin neʼebé hela ba nafatin
“Haʼu sei hanoin kleʼan kona-ba Ita-nia serbisu hotu.”—SALMO (MAZMUR) 77:12.
KNANANUK: 18, 29
1, 2. (a) Tanbasá mak Ita la iha duvida katak Jeová hadomi ninia povu? (b) Jeová kria ita ema ho presiza saida?
TANBASÁ mak ita la iha duvida katak Jeová hadomi ninia povu? Antes ita hatán, diʼak atu haree toʼok ezemplu balu tuirmai neʼe. Iha irmán ida naran Taylene. Tinan barak ona ema fó anima beibeik ba nia katak nia la presiza hanoin demais no keta obriga ninia an demais. Ho ida-neʼe nia dehan katak: “Se Jeová mak la hadomi haʼu karik, ema la bele fó konsellu haʼu beibeik hanesan neʼe.” Irmán seluk ida naran Brigitte. Nia presiza tau matan ba oan rua mesamesak tanba ninia laʼen mate ona. Nia dehan: “Buat ida neʼebé susar tebes mai haʼu mak haboot oan iha Satanás nia mundu neʼe, liuliu tanba haʼu mesak deʼit. Maibé haʼu la iha duvida katak Jeová hadomi haʼu. Tanba iha tempu neʼebé haʼu presiza tebes nia, nia sempre hatudu matadalan mai haʼu, no nia nunka husik haʼu atu tahan ho haʼu-nia kbiit rasik.” (1 Korinto 10:13) Iha irmán ida seluk tan naran Sandra. Nia hetan moras ida neʼebé kura la hetan. Bainhira nia bá tuir reuniaun boot ba loron tolu, irmán ida bá buka nia atu koʼalia ho nia. Sandra nia laʼen dehan: “Maski irmán neʼe laʼós ami-nia kolega diʼak, maibé tanba nia hatudu interese mai ami, neʼe halo ami haksolok tebes iha ami-nia laran. Domin neʼebé irmaun-irmán sira hatudu mai ami, maski kiʼik deʼit, maibé neʼe hatudu duni katak Jeová hadomi tebes ami.”
2 Jeová kria ita ema ho presiza ida, presiza neʼe mak atu ita hadomi ema seluk no ita mós presiza ema seluk nia domin. Maibé dala ruma ita sente laran-tun bainhira ita hetan moras ruma ka kona problema ekonomia ka la hetan rezultadu diʼak husi serbisu haklaken. Se ita komesa hanoin katak Jeová la hadomi tan ita ona, diʼak atu hanoin nafatin katak ita iha folin boot ba nia no nia sempre prontu atu ‘kaer ita-nia liman loos’ hodi ajuda ita. Nia sei nunka haluha ita se ita laran-metin ba nia.—Isaías (Yesaya) 41:13; 49:15.
3. Saida mak bele hametin ita-nia fiar ba Jeová katak nia iha domin neʼebé hela ba nafatin mai ita?
3 Ema sira neʼebé temi iha parágrafu ida fiar duni katak bainhira sira hasoru hela susar, Maromak mak iha sira-nia sorin hodi ajuda sira. Ita mós bele konfia katak Maromak sempre iha ita-nia sorin atu ajuda ita. (Salmo [Mazmur] 118:6, 7) Iha lisaun neʼe, ita sei koʼalia kona-ba buat haat neʼebé fó prova katak Jeová hadomi tebes ita. (1) Ninia kriasaun, (2) Bíblia, (3) orasaun, (4) Jesus nia sakrifísiu. Hanoin kleʼan kona-ba buat sira neʼebé Jeová halo mai ita bele aumenta ita-nia agradese ba ninia domin neʼebé hela ba nafatin.—Lee Salmo (Mazmur) 77:11, 12. *
HANOIN KLEʼAN KONA-BA JEOVÁ NIA KRIASAUN
4. Ita aprende saida kona-ba Jeová liuhusi buat neʼebé kria?
4 Liuhusi buat neʼebé Jeová kria, ita bele haree duni Jeová nia domin neʼebé hela ba nafatin mai ita. (Roma 1:20) Porezemplu, dalan neʼebé Jeová kria mundu neʼe laʼós atu fó ita hela deʼit, maibé mós atu ita bele goza ita-nia moris. Ezemplu ida mak kona-ba hahán. Jeová la kria ita ema ho presiza atu han deʼit, maibé nia mós kria ai-han oioin atu ita bele goza no sente haksolok. (Eclesiastes [Pengkhotbah] 9:7) Irmán ida naran Catherine, nia gosta tebes haree Jeová nia kriasaun sira, liuliu iha fulan-Abríl iha rai-Kanadá. Nia hatete: “Iha tempu hanesan neʼe ita sente fresku duni hodi haree buat hotu moris fali. Ai-funan sira loke fali no manu fuik sira neʼebé bá tiha rai dook, semo fila fali uma, manu-oan sira mai fali buka hahán iha janela liʼur. Karik Jeová hadomi tebes ita mak nia kria buat sira-neʼe mai ita.” Jeová hadomi tebes buat hotu neʼebé nia kria, no nia mós hakarak ita atu goza buat sira-neʼe.—Apóstolu 14:16, 17.
5. Oinsá mak dalan Jeová kria ema hatudu katak nia iha domin?
5 Jeová kria ita ho kbiit atu halo serbisu neʼebé diʼak no iha folin, neʼe mós fó solok ba ita-nia moris. (Eclesiastes [Pengkhotbah] 2:24) Nia fó knaar ba ema atu halo nakonu mundu neʼe ho sira-nia jerasaun, tau matan ba mundu no animál sira iha rai. (Gênesis [Kejadian] 1:26-28) Buat furak liután mak nia kria ita ho kbiit atu bele banati-tuir ninia hahalok sira!—Éfeso 5:1.
HAFOLIN MAROMAK NIA LIAFUAN
6. Tanbasá mak ita tenke hafolin Maromak nia Liafuan?
6 Jeová fó ninia Liafuan mai ita tanba nia hadomi tebes ita. Liuhusi ninia Liafuan nia fó-hatene ita kona-ba nia an no nia sente oinsá kona-ba ema. Porezemplu, eskritura sira koʼalia barak kona-ba ema Izraél kontra beibeik Jeová, maibé Jeová sente oinsá kona-ba sira? Salmo (Mazmur) 78:38 hatete: “Nia laran-sadiʼa tebes; nia perdua sira no nia la halakon sira. Nia sempre tahan ninia hirus duké sai laran-nakali ba sira.” Bainhira Ita lee eskritura hanesan neʼe no hanoin didiʼak kona-ba Jeová, neʼe bele ajuda Ita atu komprende diʼak liután kona-ba Jeová katak nia hadomi no hanoin tebes Ita. Loos duni, Jeová iha hanoin ba ita hotu.—Lee 1 Pedro 5:6, 7.
7. Tanbasá mak Bíblia folin boot mai ita?
7 Ita tenke hafolin Bíblia tanba Bíblia mak dalan importante neʼebé Maromak uza atu koʼalia ho ita. Bainhira inan-aman ho oan koʼalia nakloke ba malu, sira-nia domin no fiar ba malu sai metin liu. Maski ita nunka haree Jeová no rona ninia lian, maibé nia koʼalia ho ita liuhusi ninia Liafuan, Bíblia, no ita tenke rona ba nia tanba nia mak ita-nia Aman domin nian. (Isaías [Yesaya] 30:20, 21) Jeová hakarak tebes atu dirije no proteje ita husi perigu. Nia mós hakarak ita atu koñese no tau fiar ba nia.—Lee Salmo (Mazmur) 19:7-11; Provérbios (Amsal) 1:33. *
Maski Jeosafát tenke simu konsellu husi Jeú, maibé Jeová hatene katak liurai neʼe “mós iha buat diʼak barak” (Haree parágrafu 8, 9)
8, 9. Jeová hakarak ita hatene kona-ba saida? Konta toʼok ezemplu ida husi Bíblia.
8 Jeová hakarak ita atu hatene katak nia hadomi tebes ita no nia sempre buka atu haree buat neʼebé diʼak iha ita-nia laran, laʼós ita-nia sala. (2 Crônicas [Tawarikh] 16:9) Ita bele haree ida-neʼe husi Liurai Jeosafát husi Judá nia ezemplu. Iha loron ida Jeosafát halo desizaun la matenek hodi bá hamutuk ho Liurai Akabe husi Izraél no funu hasoru rai-Síria iha Ramot-Gilead. Iha profeta falsu naʼin-400 mak hatete ba liurai aat Akabe katak sira sei manán funu neʼe, maibé Jeová nia profeta neʼebé loos, Mikaías, hatete katak sira sei lakon. Akabe mate duni iha funu neʼe, no Jeosafát mós besik mate. Funu hotu tiha Jeosafát fila fali ba Jeruzalein. No Jeová uza Jeú bá hodi fó konsellu ba desizaun sala neʼebé nia halo, no maski nia halo sala, Jeú hatete ba nia: “Ó mós iha buat diʼak barak.”—2 Crônicas (Tawarikh) 18:4, 5, 18-22, 33, 34; 19:1-3.
9 Uluk, Jeosafát haruka liurai nia oan sira, ema Levi, no amlulik sira hodi bá sidade hotu iha Judá laran atu hanorin povu kona-ba Jeová nia Ukun-Fuan sira. Neʼe lori rezultadu diʼak tebes, tanba povu no mós ema husi nasaun viziñu sira komesa ona sai taʼuk ba Jeová. (2 Crônicas [Tawarikh] 17:3-10) Maski ikusmai Jeosafát halo desizaun neʼebé ladún diʼak, maibé Jeová la taka matan ba buat diʼak neʼebé uluk Jeosafát halo ona. Husi ezemplu neʼe ita bele aprende katak, maski ita ema sala-naʼin, maibé se ita hakaʼas an atu buka nafatin Jeová, nia sei hatudu domin neʼebé hela ba nafatin mai ita, tanba nia nunka haluha kona-ba buat diʼak neʼebé uluk ita halo.
HAFOLIN ORASAUN
10, 11. (a) Tanbasá mak orasaun prezente furak ida husi Jeová? (b) Oinsá mak Jeová bele hatán ita-nia orasaun? (Haree foto iha pájina 9.)
10 Aman ida neʼebé hadomi ninia oan rona ninia oan ho pasiénsia bainhira oan koʼalia ho nia. No tanba nia hanoin nia oan, nia hakarak hatene oan neʼe preokupa ho hanoin saida iha laran. Hanesan neʼe mós ho ita-nia Aman iha lalehan, Jeová, nia rona ita bainhira ita koʼalia ho nia liuhusi orasaun.
11 Ita bele koʼalia ho Jeová iha tempu naran deʼit. Nia nunka bandu ita atu koʼalia ho nia. Jeová mak ita-nia Belun neʼebé sempre prontu atu rona ita. Irmán Taylene hatete: “Ita bele koʼalia ho nia kona-ba buat naran deʼit no iha tempu naran deʼit.” Bainhira ita hatoʼo ita-nia sentimentu ruma ba Jeová, karik nia bele hatán ita-nia orasaun liuhusi eskritura balu, ita-nia livru, ka liafuan diʼak sira neʼebé irmaun-irmán sira koʼalia ba ita. Jeová rona bainhira ita husu buat ruma ba nia no nia komprende ita, maski susar ba ema atu komprende ita-nia sentimentu neʼe. Dalan neʼebé nia hatán ba ita-nia orasaun hatudu duni katak ninia domin mai ita sei nunka mohu.
12. Tanbasá mak ita tenke estuda orasaun sira neʼebé hakerek iha Bíblia laran? Fó toʼok ezemplu.
12 Ita bele aprende buat barak husi orasaun sira neʼebé hakerek iha Bíblia laran. Dala ruma, diʼak atu estuda ka koʼalia kona-ba orasaun sira-neʼe iha tempu halaʼo adorasaun família nian. Husi orasaun sira-neʼe, ita bele aprende oinsá mak Maromak nia atan sira fakar sai sira-nia sentimentu ba Jeová, no ida-neʼe bele ajuda ita atu hatene oinsá ita bele hadiʼa ita rasik nia orasaun. Porezemplu, ita bele estuda kona-ba Jonas nia orasaun neʼebé nia halo bainhira nia iha hela ikan nia kabun. (Jonas [Yunus] 1:17–2:10) Salomão nia orasaun neʼebé nia halo ho sentimentu bainhira inaugura Jeová nia templu. (1 Reis [Raja-Raja] 8:22-53) Hanoin kleʼan kona-ba orasaun neʼebé Jesus hanorin ema atu halo mós bele duni ajuda ita. (Mateus 6:9-13) Ita rasik mós presiza hatoʼo beibeik ita-nia laran-susar ba Maromak liuhusi orasaun no harohan, hodi nuneʼe mak ‘Maromak nia dame neʼebé aas liu ema nia hanoin hotu sei proteje ita-nia laran no ita-nia kbiit atu hanoin’. Se ita halo hanesan neʼe, ita-nia agradese ba Jeová nia domin neʼebé hela ba nafatin sei aumenta liután.—Filipe 4:6, 7.
HATUDU AGRADESE BA JESUS NIA SAKRIFÍSIU
13. Jesus nia sakrifísiu loke dalan saida ba ema?
13 Jesus nia sakrifísiu mak hanesan prezente ida husi Jeová “atu ita bele hetan moris”. (1 João 4:9) Bainhira koʼalia kona-ba Jeová nia domin boot neʼe, apóstolu Paulo hatete: “Kristu mate ba ema sala-naʼin hodi tuir tempu neʼebé Maromak hili ona. Tuir loloos, karik la iha ema ida neʼebé sei mate ba ema laran-loos; no kona-ba ema diʼak, karik sei iha ema ida neʼebé brani atu mate ba nia. Maibé Maromak hatudu nia domin ba ita nuneʼe: Kristu mate ba ita kuandu ita sei sala-naʼin hela.” (Roma 5:6-8) Maromak nia domin neʼebé boot liu hotu neʼe loke dalan ba ema atu bele iha relasaun neʼebé diʼak ho nia.
14, 15. Jesus nia sakrifísiu loke dalan saida ba (a) ema kose-mina sira? (b) ema neʼebé iha esperansa atu moris iha rai?
14 Jeová hatudu nia domin ba ema kristaun balu iha dalan espesiál ida. (João 1:12, 13; 3:5-7) Dalan neʼe mak nia uza nia espíritu santu hili ema sira-neʼe sai “Maromak nia oan”. (Roma 8:15, 16) Apóstolu Paulo hatete katak ema kristaun kose-mina sira-neʼe Maromak hili atu moris ‘hamutuk ho Kristu no fó fatin ba sira atu tuur hamutuk ho nia iha lalehan’. (Éfeso 2:6) Maski sira balu sei moris hela iha rai, maibé Maromak uza ninia espíritu santu neʼebé nia promete ona hodi tau sinál ba sira atu sai hanesan garantia ida neʼebé hatudu katak sira sei simu sira-nia liman-rohan. Neʼe mak esperansa neʼebé rai hela ba sira iha lalehan.—Éfeso 1:13, 14; Koloso 1:5.
15 Ba ema restu sira neʼebé tau fiar ba Jesus nia sakrifísiu, Jeová sei fó oportunidade ba sira atu sai ninia belun, no iha mundu foun, sira sei sai Maromak nia oan hodi moris ba nafatin iha rai. Liuhusi Jesus nia sakrifísiu duni mak Jeová hatudu ninia domin ba ema. (João 3:16) Se ita-nia esperansa mak atu moris ba nafatin iha rai, ita sei fiar katak Jeová sei halo moris iha mundu foun sai kapás tebes ba ita. Tan neʼe mak ita hakarak hafolin Jesus nia sakrifísiu, tanba liuhusi ida-neʼe mak Jeová hatudu ninia domin neʼebé hela ba nafatin mai ita!
HATUDU KATAK ITA HADOMI JEOVÁ
16. Hanoin didiʼak ba dalan neʼebé Jeová hatudu domin mai ita book ita atu halo saida?
16 Se atu sura, ita sura la bele dalan neʼebé Jeová hatudu ninia domin mai ita. Iha knananuk, David dehan: “Ita-nia hanoin sira mak iha folin-boot duni! Oh, Maromak, no sira barak tebes! Se karik haʼu koko atu sura, neʼe barak liu fali rai-henek.” (Salmo [Mazmur] 139:17, 18) Bainhira ita uza tempu hodi hanoin didiʼak kona-ba dalan sira neʼebé Jeová hatudu ninia domin mai ita, neʼe sei book ita-nia laran atu hatudu fali domin ba nia. Tan neʼe, mai ita hatudu ita-nia domin neʼebé diʼak liu hotu ba Jeová.
17, 18. Liuhusi dalan saida deʼit mak ita bele hatudu domin ba Maromak?
17 Ita bele hatudu ita-nia domin ba Jeová iha dalan oioin. Porezemplu, ita bele hatudu domin ba Jeová no ita-nia maluk sira liuhusi badinas atu haklaken kona-ba Maromak nia Ukun. (Mateus 24:14; 28:19, 20) Ita bele hatudu ita-nia domin liuhusi tahan terus sira hodi laran-metin ba Jeová. (Lee Salmo [Mazmur] 84:11; * Tiago 1:2-5.) Se terus neʼebé ita hasoru mak makaʼas tebes, ita bele fiar katak Jeová hatene no nia sei ajuda ita, tanba nia hafolin tebes ita.—Salmo (Mazmur) 56:8.
18 Domin ba Jeová book ita atu hanoin kleʼan kona-ba ninia kriasaun no hahalok diʼak sira. Ita hatudu katak ita hadomi Maromak no hafolin ninia Liafuan liuhusi estuda Bíblia ho badinas. Tanba domin ba Jeová mak ita hakarak hakbesik liután ba nia liuhusi orasaun. No se ita hanoin didiʼak kona-ba Jesus nia sakrifísiu neʼebé Jeová fó mai ita atu kasu ita-nia sala, neʼe sei halo ita hadomi nia liután. (1 João 2:1, 2) Neʼe mak razaun balu deʼit ba ita atu hatudu domin ba Jeová tanba ninia domin neʼebé hela ba nafatin.
[Nota-rodapé]
^ par. 3 Salmo 77:11, 12: “11 Haʼu sei hanoin-hetan Jah nia serbisu sira; haʼu sei hanoin-hetan Ita-nia hahalok furak husi tempu uluk. 12 No haʼu sei hanoin kleʼan kona-ba Ita-nia serbisu hotu, no haʼu sei hanoin beibeik kona-ba Ita-nia hahalok sira.”
^ par. 7 Salmo 19:7-11: “7 Jeová nia lei mak perfeitu, halo ema iha kbiit fali. Jeová nia liafuan neʼebé fó-hanoin ema, ita bele fiar, halo ema neʼebé la iha esperiénsia sai matenek. 8 Jeová nia ukun-fuan sira mak loos, halo ema nia laran haksolok; Jeová nia lei moos, halo matan nabilan. 9 Taʼuk ba Jeová mak moos, no tahan ba nafatin. Jeová nia tesi-lia mak loos; desizaun sira-neʼe sempre loos. 10 Sira diʼak liu fali osan-mean, sin, diʼak liu fali osan-mean neʼebé sunu ona; No midar liu fali bani-been neʼebé suli husi bani-ulun. 11 Liuhusi buat sira-neʼe, Ita-nia atan simu avizu; Hodi halo tuir sira-neʼe mak nia bele hetan bensaun boot.”
Provérbios 1:33: “Maibé, kona-ba ida neʼebé rona ba haʼu, nia sei hela ho seguru no sei la hanoin resin kona-ba taʼuk ba susar.”
^ par. 17 Salmo 84:11: “Tanba Maromak Jeová mak loro-matan no eskudu ida; nia hatudu laran-diʼak no glória. Jeová nunka hanetik atu fó buat neʼebé diʼak ba sira neʼebé hatudu laran-metin ba nia.”
