1. Bainhira haklaken, oinsá mak ita bele uza Mateus 6:9-13?

EMA barak bele taka matan hodi dekór orasaun Ami Aman. Bainhira bá haklaken, dala barak ita uza orasaun neʼe atu ajuda ema komprende katak Maromak nia Reinu mak governu ida neʼebé atu halo mudansa furak iha futuru ba rai. Ita mós uza liafuan “ami hakarak atu Ita-nia naran sai santu” hodi hatudu ba ema katak Maromak iha ninia naran rasik neʼebé nia hakarak ita atu uza iha dalan neʼebé santu.—Mateus 6:9.

2. Oinsá mak ita hatene katak Jesus lakohi ita repete liafuan ida-idak husi orasaun Ami Aman?

² Jesus hakarak ita repete liafuan ida-idak husi orasaun Ami Aman hanesan ema halo baibain ka lae? Lae, tanba Jesus hatete: “Kuandu halo orasaun, keta dehan beibeik liafuan neʼebé hanesan.” (Mateus 6:7) Hanesan neʼe mak iha tempu seluk bainhira Jesus hanorin ninia dixípulu oinsá atu halo orasaun, nia la repete fali liafuan ida-idak husi orasaun Ami Aman nian. (Lucas 11:1-4) Tuir loloos Jesus atu ajuda ita hodi haree katak  bainhira halo orasaun, saida mak importante atu ita koʼalia uluk.

3. Bainhira ita hanoin didiʼak ba liafuan sira iha orasaun Ami Aman, ita bele husu pergunta saida deʼit ba ita-nia an?

³ Iha lisaun neʼe no ida tuirmai, ita sei haree didiʼak ba liafuan sira husi orasaun Ami Aman. No husu ba ita-nia an: ‘Oinsá mak orasaun Ami Aman bele ajuda haʼu atu hadiʼa haʼu-nia orasaun?’ No importante liu mak atu husu: ‘Haʼu moris tuir orasaun Ami Aman ka lae?’

4. Liafuan “ami Aman” fó-hanoin ita kona-ba saida, no tanbasá mak ema sira neʼebé iha esperansa atu moris iha rai bele bolu Jeová nuʼudar sira-nia Aman?

⁴ Jesus uza liafuan “ami Aman”, laʼós “haʼu-nia Aman”, neʼe atu hatudu katak ita mak família ida deʼit ho “maluk fiar-naʼin hotu”. (1 Pedro 2:17) Ba ema kose-mina sira, Jeová hili ona sira sai ninia oan, tan neʼe sira sai ona oan loloos ba “Aman” Jeová. (Roma 8:15-17) Maibé ba ema sira neʼebé iha esperansa atu moris ba nafatin iha rai, sira seidauk sai oan loloos ba Jeová. Maski nuneʼe, sira bele bolu Jeová nuʼudar Aman tanba Jeová mak moris nia hun, nia mak fó buat hotu neʼebé sira presiza atu bele moris. Maibé, bainhira sira sai perfeitu no liu tiha koko ikus nian mak sira foin sai Maromak nia oan loloos.—Roma 8:21; Apokalipse 20:7, 8.

5, 6. Buat diʼak saida mak inan-aman bele fó ba oan, no oan sira iha responsabilidade saida? (Haree foto iha pájina 20.)

⁵ Buat diʼak neʼebé inan-aman bele fó ba oan mak hanorin sira oinsá atu halo orasaun hodi sira rasik bele sente Jeová hanesan sira-nia Aman. Irmaun ida neʼebé agora serbí nuʼudar katuas área nian iha Áfrika Súl hatete: “Husi loron neʼebé haʼu-nia oan-feto sira moris, haʼu nunka falta halo orasaun kalan-kalan hamutuk ho sira, só haʼu dook husi uma mak haʼu falta. Agora haʼu-nia oan-feto sira dehan katak sira haluha ona liafuan ida-idak husi haʼu-nia orasaun sira, maibé buat neʼebé sira sei hanoin-hetan nafatin mak tempu halo orasaun, sira sente kalma no la taʼuk ba buat ida, sira mós bele haree katak koʼalia ho ita-nia Aman Jeová mak buat neʼebé sagradu tebes. Bainhira sira hatene ona, haʼu anima sira atu halo orasaun iha haʼu-nia oin hodi haʼu bele hatene sira hanoin saida ka sente oinsá kona-ba Jeová. Hodi nuneʼe, se presiza, haʼu bele ajuda sira uza liafuan sira husi orasaun Ami Aman atu hadiʼa sira-nia orasaun.”

⁶ Ikusmai irmaun neʼe nia oan-feto sira mós laʼo ba oin iha lia-loos. Agora sira kaben hotu ona, no sira-nia kaben mós serbí Jeová ba tempu tomak. Husi neʼe ita bele haree katak la iha buat seluk neʼebé inan-aman bele fó ba oan mak diʼak liu fali ajuda oan atu iha relasaun neʼebé diʼak no besik ho Jeová. Maibé ita mós presiza komprende katak oan ida-idak mak tenke iha responsabilidade atu proteje ninia relasaun ho Jeová, atu hatudu domin no respeitu ba Maromak nia naran.—Salmo (Mazmur) 5:11, 12; 91:14.

7. Maromak nia povu iha priviléjiu saida, maibé ita tenke halo saida?

⁷ Atu bele hatene Maromak nia naran no sai “povu ida ba nia naran” mak priviléjiu boot ida mai ita. (Apóstolu 15:14; Isaías [Yesaya] 43:10) Bainhira halo orasaun, ita husu ba Aman Jeová iha lalehan atu ninia naran sai santu. Ita husu hanesan neʼe tanba ita hakarak Jeová ajuda ita hasees an husi hahalok ka koʼalia buat neʼebé mak  bele hafoʼer ninia naran. Ita lakohi sai hanesan ema balu iha apóstolu sira-nia tempu neʼebé la halo tuir buat neʼebé sira haklaken ba ema. Tan neʼe mak apóstolu Paulo hakerek ba sira katak: “Ema koʼalia kontra Maromak nia naran iha nasaun seluk nia leet tanba imi-nia hahalok.”—Roma 2:21-24.

8, 9. Fó toʼok ezemplu ida neʼebé hatudu katak Jeová haraik bensaun ba ema neʼebé hakarak halo santu Jeová nia naran.

⁸ Ita hakarak duni atu hatudu respeitu ba Maromak nia naran. Iha irmán ida husi rai-Noruega, ninia laʼen mate derrepente no husik hela nia no oan-mane ida ho tinan rua. Nia hatete: “Neʼe mak tempu susar liu hotu iha haʼu-nia moris. Loroloron, kuaze oras ida-idak haʼu halo orasaun ba Jeová atu fó forsa mai haʼu hodi la bele halo desizaun sala ka halo buat ruma neʼebé bele estraga haʼu-nia laran-metin ba Jeová. Haʼu lakohi husik Satanás atu iha oportunidade hodi koʼalia aat Jeová. Haʼu hakarak tebes atu proteje Jeová nia naran santu no haʼu mós hakarak haʼu-nia oan atu bele haree fali ninia apá iha mundu foun.”—Provérbios (Amsal) 27:11.

⁹ Oinsá mak Jeová hatán irmán neʼe nia orasaun? Liuhusi ransu ho irmaun-irmán sira. Ransu beibeik ho sira fó duni konsola ba nia. Tinan lima liutiha, nia kaben fali irmaun katuas kongregasaun ida. Agora ninia oan-mane tinan 20 no hetan batizmu ona. Irmán neʼe hatete: “Haʼu kontente tebes tanba haʼu-nia laʼen foun ajuda haʼu haboot haʼu-nia oan hamutuk.”

10. Atu halo ninia naran sai santu loloos, Maromak sei halo saida?

¹⁰ Atu halo ninia naran sai santu loloos, Jeová sei halakon hotu kriatura sira neʼebé mak ho neon kontra ninia ukun. (Lee Ezequiel [Yehezkiel] 38:22, 23. *) Tuirmai, neineik-neineik ema sei sai perfeitu fali, no kriatura hotu iha lalehan no rai sei adora Jeová mesak deʼit no hahiʼi ninia naran santu. Ikusmai, ita-nia Aman iha lalehan sei “sai buat hotu ba ema hotu”.—1 Korinto 15:28.

11, 12. Iha tinan 1876, Jeová ajuda ninia povu komprende kona-ba saida?

¹¹ Antes Jesus saʼe ba lalehan, ninia apóstolu sira husu nia: “Naʼi, Ita-Boot sei hadiʼa fali Izraél nia ukun iha tempu neʼe ka lae?” Sira hakarak atu hatene bainhira loos mak Maromak harii ninia ukun, maibé Jesus la fó-hatene sira tempu, nia haruka sira atu fó atensaun deʼit ba haklaken, serbisu importante neʼebé sira presiza atu halo. (Lee Apóstolu 1:6-8.) Maski nuneʼe, nia anima sira hein no harohan nafatin atu Maromak nia Ukun toʼo mai. Tan neʼe mak komesa husi apóstolu sira-nia tempu, ema kristaun kontinua halo orasaun atu husu Maromak nia Ukun toʼo mai.

¹² Bainhira tempu atu toʼo ona ba Jesus hahú ukun iha lalehan, Jeová ajuda ninia povu hodi hatene tinan saida mak Ukun neʼe hahú. Iha tinan 1876, Charles Taze Russell iha livru ida, fó sai katak tinan 1914 mak tinan importante ida. Iha livru neʼe, nia esplika katak “tinan hitu” neʼebé temi iha Daniel nia profesia no “tempu nasaun sira-nian” neʼebé Jesus temi mak tinan 1914. * (Haree nota iha kraik.)—Daniel 4:16; Lucas 21:24.

13. Saida mak akontese iha tinan 1914, no akontesimentu sira iha mundu iha tempu neʼebá hatudu saida?

 ¹³ Iha tinan 1914, funu akontese iha rai-Europa no la kleur deʼit mundu tomak mós envolve iha funu neʼe. Toʼo tiha tinan 1918, bainhira funu neʼe remata, ema barak mate tanba rai-hamlaha no moras gripe. Ema neʼebé mate, barak liu fali mate iha funu laran. Akontesimentu sira-neʼe mak sinál neʼebé Jesus hatete sei hatudu katak nia komesa ukun nuʼudar Liurai foun ida iha Maromak nia Ukun. (Mateus 24:3-8; Lucas 21:10, 11) Sinál sira-neʼe akontese duni iha tinan 1914 neʼebé hatudu katak Jesus Kristu “bá hodi manán ninia inimigu sira hotu”. (Apokalipse 6:2) Iha tinan neʼe mós Jesus halo funu iha lalehan hasoru Satanás ho ninia anju aat sira no soe sira tun mai rai. Hahú husi tempu neʼebá mak ema komesa haree Bíblia nia profesia sai loos neʼebé hatete katak: “Susar ba rai no tasi, basá Diabu tun tiha ona ba imi, no nia hirus makaʼas, tanba nia hatene katak nia tempu hela uitoan deʼit.”—Apokalipse 12:7-12.

14. (a) Tanbasá mak importante nafatin ba ita ohin loron atu harohan Maromak nia Ukun toʼo mai rai? (b) Serbisu importante saida mak ita tenke halo ohin loron?

¹⁴ Profesia husi Apokalipse 12:7-12 ajuda ita komprende tansá mak buat aat barak mosu iha rai, komesa husi tempu neʼebé Jesus hahú ninia ukun iha lalehan. Lakleur tan Jesus atu halakon ninia inimigu no buat aat hotu husi mundu neʼe. Maski Jesus ukun daudaun iha lalehan, maibé Satanás mak kontrola hela mundu tomak. Tan neʼe mak ita presiza harohan nafatin atu Maromak nia Ukun toʼo mai rai, no kontinua haklaken kona-ba Maromak  nia Ukun ho badinas. Tanba Jesus hatete: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, no depois neʼe mundu nia rohan sei mai.”—Mateus 24:14.

15, 16. Oinsá mak ita hatudu katak ita moris tuir ita-nia orasaun kona-ba husu Maromak nia Ukun toʼo mai rai?

¹⁵ Maizumenus tinan 6.000 liubá, Maromak nia hakarak laʼo diʼak tebes iha rai, tan neʼe mak Jeová hatete katak buat hotu “diʼak tebes”. (Gênesis [Kejadian] 1:31) Maibé, ikusmai Satanás kontra Maromak, no komesa husi tempu neʼebá ema barak mós hahú la halo tuir tan Maromak nia hakarak iha rai. Maski nuneʼe, ohin loron iha ema maizumenus naʼin-8.000.000 iha mundu tomak mak harohan hela ba Maromak nia hakarak atu sai loos iha rai. Sira hakaʼas an atu moris tuir sira-nia orasaun liuhusi sira-nia hahalok no haklaken ho badinas atu ajuda ema sai Jesus nia dixípulu.

¹⁶ Porezemplu, iha irmán misionáriu ida iha rai-Áfrika neʼebé hetan batizmu iha tinan 1948 hatete: “Haʼu halo orasaun beibeik atu ema laran-loos hotu bele rona uluk ita-nia mensajen no aprende kona-ba Jeová antes ninia loron toʼo mai. No antes atu haklaken ba ema ida, haʼu halo orasaun atu iha matenek hodi koʼalia buat neʼebé mak bele kona ema nia laran. Haʼu mós halo orasaun ba Jeová atu haraik bensaun ba ita hotu nia hakaʼas-an atu tau matan ba ema laran-loos neʼebé ita hetan ona.” Tan neʼe mak irmán ho idade 80 neʼe ajuda ona ema barak aprende kona-ba Jeová. Karik Ita rasik mós koñese irmaun-irmán idade balu neʼebé badinas hanesan irmán neʼe atu halo tuir Jeová nia hakarak.—Lee Filipe 2:17.

17. Ita sente oinsá kona-ba buat sira neʼebé Jeová sei halo ba ema no rai iha futuru?

¹⁷ Ita hakarak kontinua harohan nafatin atu Maromak halo ninia hakarak sai loos iha rai toʼo tempu neʼebé nia halakon hotu ninia inimigu sira. Bainhira ida-neʼe akontese tiha, mundu tomak sei sai paraízu ida, no ema rihun ba rihun mós sei hetan moris-hiʼas iha rai. Jesus hatete: “Keta hakfodak kona-ba neʼe, tanba oras sei toʼo mai kuandu ema hotu neʼebé iha rate laran sei rona [haʼu-nia] lian no sai husi rate.” (João 5:28, 29) Hanoin toʼok ita-nia esperansa furak atu bele simu fali ita-nia família sira neʼebé hetan moris-hiʼas husi mate! Iha tempu neʼebá Maromak ‘sei hamaran ita-nia matan-been hotu husi ita-nia matan’. (Apokalipse 21:4) Ema sira neʼebé sei moris-hiʼas, barak mak “ema aat”, sira mak ema neʼebé uluk mate maibé seidauk hetan oportunidade atu aprende lia-loos kona-ba Jeová no Jesus. Neʼe sei sai oportunidade espesiál tebes mai ita atu bele hanorin sira kona-ba Maromak no ninia hakarak hodi sira mós bele hetan “moris rohan-laek”.—Apóstolu 24:15; João 17:3.

18. Buat tolu neʼebé importante liu hotu husi orasaun Ami Aman mak saida deʼit?

¹⁸ Bainhira Maromak nia Ukun toʼo mai, ukun neʼe sei halo Maromak nia naran sai santu no neʼe sei lori dame no hakmatek ba Jeová nia kriatura hotu. Ita bele fiar duni katak Jeová sei hatán ba ita-nia orasaun atu husu nia halo buat tolu neʼebé importante tebes husi orasaun Ami Aman. Iha mós buat importante seluk tan neʼebé ita bele husu Jeová atu halo husi orasaun Ami Aman nian. Iha lisaun tuirmai ita sei koʼalia kona-ba buat sira-neʼe.