Tinan barak ona ita-nia livru sira esplika katak Gog husi rai-Magog mak naran neʼebé Diabu Satanás simu husi tempu neʼebé Maromak duni tun nia husi lalehan. Razaun ida uluk ita esplika nuneʼe tanba iha livru Apokalipse hatete katak Diabu Satanás mak lori ema iha mundu tomak atu ataka Maromak nia povu. (Apokalipse 12:1-17) Tan neʼe uluk ita hanoin katak Gog mak naran seluk neʼebé Satanás simu.

Maibé, dalan esplika neʼe hamosu pergunta balu. Hanoin toʼok pontu hirak tuirmai neʼe: Iha tempu neʼebé Jeová halakon tiha Gog, nia hatete katak nia sei fó Gog “nuʼudar hahán ba manu-makikit sira no ba animál fuik sira iha rai luan”. (Ezequiel [Yehezkiel] 39:4) Tuirmai Jeová hatete tan: “Iha loron neʼebá haʼu sei fó Gog fatin ida atu hakoi nia iha Izraél.” (Ezequiel [Yehezkiel] 39:11) Entaun, se Satanás mak kriatura espíritu ida, no ema nia matan la bele haree, oinsá mak manu no animál fuik sira bele han nia? No oinsá mak bele hakoi nia? Bíblia hatete ona katak aban-bainrua Satanás sei sulan iha rai-kuak neʼebé kleʼan ba tinan 1.000, laʼós buat ida mak sei han nia ka hakoi nia.—Apokalipse 20:1, 2.

Bíblia mós hatete katak iha tinan 1.000 nia rohan, Satanás sei saʼe fali husi rai-kuak neʼebé kleʼan “no nia sei bá hodi lohi nasaun sira iha rai nia sikun haat, katak Gog no Magog, atu halibur sira hamutuk ba funu ida”. (Apokalipse 20:8) Maibé, se Satanás mak Gog, oinsá mak nia bele bá lohi fali ninia an rasik? Husi neʼe ita bele haree momoos katak Gog neʼebé temi iha Ezequiel ka iha livru Apokalipse laʼós Satanás.

Se nuneʼe, sé loos mak Gog husi rai-Magog neʼe? Atu hatán ba pergunta neʼe, mai ita buka-hatene husi Eskritura sira kona-ba sé mak atu ataka Maromak nia povu iha futuru. Bíblia hatete katak sira neʼebé atu ataka Maromak nia povu laʼós Gog husi rai-Magog deʼit, maibé mós “liurai parte norte” no mós “mundu tomak nia liurai sira”. (Ezequiel [Yehezkiel] 38:2, 10-13; Daniel 11:40, 44, 45; Apokalipse 17:14; 19:19) Entaun, sira-nia ataka sei akontese iha tempu ketaketak ka lae? Karik lae. Tanba haree hanesan Bíblia mak uza naran neʼebé la hanesan, maibé koʼalia kona-ba ataka iha tempu ida deʼit. Tanbasá mak ita bele hatete hanesan neʼe? Tanba Bíblia hatete katak nasaun sira iha mundu tomak sei ataka Maromak nia povu no ataka neʼe sei lori sira ba funu Armajedón.—Apokalipse 16:14, 16.

 Bainhira ita kompara eskritura sira hamutuk kona-ba ataka ikus neʼebé ema halo ba Maromak nia povu, ita bele haree ho momoos katak Gog husi rai-Magog laʼós refere ba Satanás, maibé nasaun sira husi mundu tomak. Se nuneʼe, “liurai parte norte” mak sei lori sira atu halo ataka neʼe ka lae? Neʼe seidauk sai moos. Maibé ideia neʼe han ho buat neʼebé Jeová hatete kona-ba Gog: “Ó sei mai husi ó-nia fatin, husi parte norte neʼebé dook liu, ó no povu barak neʼebé hamutuk ho ó, sira hotu saʼe kuda, ema-lubun boot ida, forsa militár neʼebé boot.”—Ezequiel (Yehezkiel) 38:6, 15.

Neʼe hanesan ho buat neʼebé profeta Daniel hatete kona-ba liurai parte norte nian: “Mensajen husi leste no norte sei halo nia satiadu, ho neʼe nia sei bá ho hirus boot atu hamoos no halakon ema sira. Nia sei harii ninia tenda neʼebé hanesan liurai nian iha tasi boot no foho santu Enfeita nia klaran; no nia sei mai toʼo nia mak sei sai lakon, no sei la iha ema ida mak atu fó ajuda nia.” (Daniel 11:44, 45) Akontesimentu neʼe hanesan deʼit ho buat neʼebé Gog atu halo neʼebé temi iha livru Ezequiel nian.—Ezequiel (Yehezkiel) 38:8-12, 16.

Bainhira sira ataka ona Maromak nia povu, saida mak sei akontese? Profeta Daniel hatete: “Durante tempu neʼe Miguel [Jesus Kristu] sei hamriik [iha tempu Armajedón], liurai-oan boot neʼebé hamriik hela [husi 1914] ba ó-nia povu. No sei mosu tempu susar ida [tempu terus boot] neʼebé seidauk akontese komesa husi nasaun ida harii toʼo tempu neʼe. No iha tempu neʼebá ó-nia ema sira sei hetan salvasaun, ema sira neʼebé ninia naran hakerek tiha ona iha livru laran.” (Daniel 12:1) Iha Apokalipse 19:11-21 mós koʼalia kona-ba buat hanesan neʼe neʼebé Jesus sei halo iha futuru.

Maibé “Gog no Magog” neʼebé temi iha Apokalipse 20:8 koʼalia kona-ba sé? Toʼo tiha tinan 1.000 nia rohan, Satanás sei koko ema ba dala ikus atu kontra Jeová. No ema sira neʼebé monu ba Satanás nia lasu neʼe mak bolu nuʼudar ‘Gog no Magog’. Ema sira-neʼe sei hatudu hahalok neʼebé hanesan ho nasaun sira neʼebé uluk ataka Maromak nia povu iha tempu terus boot nia rohan. Hanesan ema sira neʼebé mate iha Armajedón, ema sira-neʼe mós sei mate ba nafatin! (Apokalipse 19:20, 21; 20:9) Tan neʼe la sala atu bolu mós ema hotu neʼebé kontra Jeová iha tinan 1.000 nia rohan nuʼudar “Gog no Magog”.

Nuʼudar estudante Bíblia, ita hein namanas atu buka-hatene sé loos mak atu sai “liurai parte norte” nian iha futuru. Maski ita la hatene sé loos mak atu lori nasaun sira mai ataka Maromak nia povu, maibé ita hatene buat rua mak sei akontese: (1) Gog husi rai-Magog ho ninia tropa sira sei lakon no rahun ba nafatin, no (2) ita-nia Liurai, Jesus Kristu, sei salva Maromak nia povu no lori sira tama ba mundu foun neʼebé nakonu ho dame.—Apokalipse 7:14-17.