TINAN rua antes neʼe, haʼu no haʼu-nia kolega Evelyn Trabert foin ramata ami-nia treinu iha eskola Gilead kuarta klase, iha Novaiorke. Ami hetan knaar atu serbí iha Santa Ana. Maibé antes haʼu konta kona-ba haʼu-nia esperiénsia durante tinan 29 hodi serbí nuʼudar misionáriu, haʼu hakarak konta uluk kona-ba saida mak book haʼu atu foti knaar neʼe.

Iha tinan 1923, haʼu-nia inan-aman John no Eva Olson hela iha Spokane, Washington, iha Estadus Unidus. Iha tinan neʼe mak haʼu moris. Haʼu-nia inan-aman ema protestante maibé la simu hanorin kona-ba infernu tanba sira sente Maromak neʼebé domin nian la bele fó kastigu ba ema hanesan neʼe. (1 João 4:8) Haʼu-nia aman mak padeiru ida no kalan ida, ninia kolega serbisu dehan ba nia katak Bíblia la hanorin kona-ba infernu. Lakleur, haʼu-nia inan-aman komesa estuda ho Testemuña ba Jeová no sira aprende saida mak Bíblia loloos hanorin kona-ba ema mate nia kondisaun.

Haʼu hanoin-hetan fali ba tempu neʼebé uluk haʼu sei kiʼik, haʼu rona haʼu-nia inan-aman koʼalia ho laran-manas kona-ba buat neʼebé sira aprende husi Bíblia. Sira sai laran-manas liután bainhira sira aprende Maromak nia naran Jeová, no sira la sente  ona konfuzaun tanba sira hatene Trindade nia hanorin la loos. Maski haʼu tinan 9 deʼit maibé haʼu-nia hanoin ba lia-loos neʼebé halo ita livre mak hanesan esponja neʼebé xupa bee. (João 8:32) Haʼu nunka sente baruk atu estuda Bíblia, haʼu sempre gosta uza tempu hodi hanoin kona-ba Maromak nia Liafuan. No maski haʼu ema moedór, maibé haʼu sempre haklaken hamutuk ho haʼu-nia inan-aman. Sira hetan batizmu iha tinan 1934 no iha 1939 bainhira haʼu tinan 16, haʼu mós hetan batizmu.

Iha fulan-Jullu 1940, haʼu-nia inan-aman faʼan ami-nia uma, no ami naʼin-tolu komesa pioneiru iha Coeur d’Alene, Idaho. Ami aluga uma ida iha bengkel nia leten no ami-nia uma neʼe ami uza hodi halaʼo reuniaun sira. Iha tempu neʼebá, kongregasaun barak la iha sira-nia Reuniaun-Fatin rasik, entaun sira halibur malu iha ema nia uma ka sala neʼebé sira aluga.

Iha tinan 1941 ami tuir reuniaun boot iha São Louis, Missouri. Loron-domingu mak loron liuliu kona-ba labarik sira. Entaun labarik no joven sira ho tinan 5 toʼo 18 tuur hotu iha kadeira oin. Irmaun Joseph Rutherford mak hatoʼo diskursu no antes nia ramata, nia hatete hanesan neʼe: “Imi labarik no joven sira hotu neʼebé hakarak halo tuir Maromak no ninia Liurai, hamriik lai!” Ami hotu hamriik no tuirmai irmaun Rutherford hatete: “Haree! Ema naʼin-15.000 tan atu haklaken kona-ba Maromak nia Ukun!” Irmaun Rutherford nia liafuan sira-neʼe halo haʼu hametin haʼu-nia desizaun atu uza haʼu-nia moris tomak hodi pioneiru.

Fulan balu liutiha, ami muda ba Kalifórnia. Iha sidade Oxnard ami hetan knaar atu harii kongregasaun foun. Ami hela iha uma-karreta kiʼik ida neʼebé iha kama ida deʼit. Haʼu-nia toba-fatin mak iha meza han nian nia leten! Neʼe la hanesan duni ami-nia uma uluk neʼebé haʼu iha kuartu rasik.

Tempu neʼe mak Funu Mundiál Segundu no foin antes ami muda ba Kalifórnia, Japaun ataka Pearl Harbor iha rai-Hawai iha loron 7 Dezembru 1941. Loron tuirmai, Estadus Unidus mós envolve iha funu neʼe. Japaun nia ró submarinu sira kontrola bá-mai iha tasi Kalifórnia no sidade tomak tenkesér taka ahi iha kalan hodi ró submarinu sira la hatene atu tiru iha neʼebé.

Fulan balu liutiha neʼe, iha fulan-Setembru 1942, ami tuir reuniaun boot iha Cleveland, Ohio ho títulu, New World Theocratic Assembly. Irmaun Nathan Knorr hatoʼo diskursu “Dame sei tahan ba tempu kleur ka lae?” Nia koʼalia kona-ba Apokalipse kapítulu 17 no esplika kona-ba “animál fuik” neʼebé ‘mosu uluk, maibé agora la iha, no besik ona atu sai husi rai-kuak neʼebé kleʼan’. (Apokalipse 17:8, 11) Irmaun Knorr esplika katak “animál fuik” mak Liga Nasaun sira-nian neʼebé ramata iha tinan 1939. Bíblia fó-hatene nanis katak Liga Nasaun sira-nian neʼe sei troka, no sei iha dame ba tempu uitoan. Iha tinan 1945, ida-neʼe mak akontese duni. Funu Mundiál Segundu ramata no “animál fuik” neʼe mosu fali nuʼudar “Nasoins Unidas”. Testemuña ba Jeová komesa aumenta sira-nia serbisu haklaken, no husi tempu neʼebá ema barak tama ona lia-loos! Profesia neʼe ajuda haʼu komprende saida mak sei akontese iha futuru.

Bainhira haʼu rona katak eskola Gilead sei komesa iha tinan tuirmai, neʼe hamosu hakarak iha haʼu-nia laran atu sai misionáriu. Iha tinan 1943,  haʼu hetan knaar atu bá iha sidade Portland, Oregon. Iha tempu neʼebá, ami uza fonógrafu atu loke diskursu neʼebé grava tiha ona hodi uma-naʼin bele rona, depois ami husu hodi fó livru sira kona-ba Maromak nia Ukun. Durante tinan neʼe tomak, haʼu hanoin beibeik kona-ba knaar misionáriu nian.

Iha tinan 1944 haʼu simu konvite atu tuir eskola Gilead hamutuk ho haʼu-nia belun diʼak Evelyn Trabert. Haʼu kontente tebes hodi simu konvite neʼe! Ba fulan lima, ami-nia mestre sira hanorin ami oinsá atu estuda Bíblia ho didiʼak. Sira haraik-an tebes. Porezemplu dala ruma kuandu ami han hamutuk, irmaun sira-neʼe mak serbí ami. Ikusmai, ami ramata ami-nia eskola iha loron 22 Janeiru 1945.

Haʼu no Evelyn, hamutuk ho Leo no Esther Mahan hetan knaar atu ba rai-Elsalvadór, no ami toʼo iha neʼebá iha fulan-Juñu 1946. Ami haree katak situasaun “prontu ona atu koʼa”. (João 4:35) Bainhira ami atu halaʼo reuniaun boot ba loron rua iha Santa Ana ba dala primeiru, ami konvida ema hotu atu tuir hodi rona diskursu públiku. Ami haksolok tebes hodi haree ema maizumenus naʼin-500 tuir reuniaun boot neʼe. Semana ida liutiha neʼe mak padre sira halo problema mai ami, hanesan haʼu konta tiha ona iha parágrafu primeiru. Maibé ami la taʼuk sira no tuir loloos ami sente laran-manas liután atu hela iha fatin neʼe hodi ajuda ema neʼebé interese. Maski padre sira bandu ema lee Bíblia, no dala ruma ema nia osan rasik la toʼo atu sosa Bíblia, maibé sira la husik razaun sira-neʼe hapara sira buka lia-loos. Sira hafolin ami tanba ami hakaʼas an aprende sira-nia língua hodi bele hanorin sira kona-ba Maromak Jeová no ninia promesa furak ba futuru.

Rosa Ascencio mak haʼu-nia estudante ida. Bainhira nia komesa estuda Bíblia, nia fahe malu ho mane neʼebé nia hela hamutuk. Lakleur, mane neʼe mós komesa estuda Bíblia. Sira rua kaben no hetan batizmu, no sai haklaken-naʼin neʼebé badinas loos. Rosa mak ema primeiru sai pioneiru iha Santa Ana. b

Rosa sempre tau fiar ba Maromak atu fó buat neʼebé nia presiza. Porezemplu, bainhira nia atu sai ba haklaken nia taka deʼit ninia loja. Bainhira nia fila, nia loke fali ninia loja no ema barak mai atu hola sasán. Nia fiar duni katak liafuan iha Mateus 6:33 mak loos, no nia laran-metin ba Jeová toʼo nia mate.

Loron ida, padre iha ami-nia fatin bá koʼalia ho mane ida neʼebé fó aluga ninia uma ba ami misionáriu sira. Nia ameasa nia katak se nia fó aluga nafatin uma neʼe ba ami, igreja sei hasai mane neʼe ho ninia feen. Uma-naʼin neʼe mak ema riku ida iha ami-nia bairro no kleur ona nia la gosta padre sira-nia hahalok. Tan neʼe, nia la rona ba padre no nia hatete ba padre se igreja hasai nia karik, ba nia la iha buat ida. Uma-naʼin neʼe dehan ba ami katak ami bele kontinua hela deʼit iha uma neʼe.

Iha sidade San Salvadór, misionáriu ida estuda ho feto ida neʼebé ninia laʼen mak enjeñeiru. Mane neʼe nia naran mak Baltasar Perla no nia mak ema laran-diʼak ida. Nia la gosta padre sira-nia laran-makerek no neʼe halo nia lakon fiar ba Maromak. Maski Baltasar seidauk tama lia-loos, maibé bainhira Testemuña sira atu harii sukursál ida, Baltasar dehan katak nia bele arranju atu harii sukursál hodi la husu Testemuña sira atu selu.

Bainhira Baltasar serbisu hamutuk ho Testemuña sira iha projetu neʼe, nia sente katak nia hetan ona relijiaun neʼebé loos. Nia hetan batizmu iha loron 22 fulan-Jullu 1955, no lakleur ninia feen Paulina, mós hetan batizmu. Sira-nia oan naʼin-rua serbí Jeová daudaun. Sira-nia oan-mane serbí iha Betel iha Brooklyn ba tinan 49 ona no agora nia mak membru husi Grupu Koordenadór ba Sukursál iha Estadus Unidus. c

Bainhira ami komesa arranja reuniaun boot sira ba loron tolu nian, irmaun Baltasar ajuda hodi hetan fatin ba ami hodi uza. Ami uza estádiu ida no foufoun ami okupa fatin uitoan deʼit, tanba ami Testemuña sira seidauk barak. Maibé ho Jeová nia bensaun, tinan ba tinan ami aumenta beibeik toʼo fatin iha estádiu neʼe mós la toʼo ba ami! Haʼu kontente tebes iha reuniaun boot sira-neʼe tanba haʼu bele hasoru ho ema neʼebé uluk haʼu estuda Bíblia. Hanoin toʼok, kuandu Ita-nia estudante uluk nian fó koñese sira-nia estudante sira neʼebé batizmu ona, Ita sente oinsá? Ida-neʼe mak akontese ba haʼu no haʼu sente sira mak hanesan haʼu-nia bei-oan espirituál nian!

Iha reuniaun boot ida, irmaun ida hakbesik haʼu tanba nia hakarak husu deskulpa. Haʼu la hatene nia mak sé. Nia hatete: “Uluk iha Santa Ana, bainhira labarik-mane sira tuda fatuk ba irmán sira, husi sira-neʼe ida mak haʼu.” Agora mane neʼe mós serbí Jeová. Haʼu-nia laran haksolok tebes hodi rona neʼe. Ida-neʼe halo haʼu fiar metin katak serbí Jeová tempu-tomak mak desizaun diʼak liu hotu.

Ba tinan 29 nia laran haʼu kontinua ho haʼu-nia serbisu misionáriu iha rai-Elsalvadór. Primeiru  mak iha Santa Ana, depois mak Sonsonate, Santa Tecla, no ikusliu mak iha San Salvadór. Tuirmai, haʼu-nia inan-aman presiza haʼu-nia ajuda tanba idade ona. Haʼu halo orasaun barak no deside atu fila fali ba Spokane iha tinan 1975 hodi bele tau matan ba sira.

Iha tinan 1979 haʼu-nia aman mate. Komesa husi tempu neʼebá, haʼu-nia inan mós sai fraku ba beibeik no tinan 8 liutiha, nia mós mate ho idade 94. Iha tempu susar neʼe haʼu-nia saúde sai fraku no haʼu sai moras tanba estrese. Maibé haʼu halo orasaun no Jeová lolo nia liman hodi haʼu bele tahan situasaun neʼe. Jeová nia liafuan mak loos duni. Nia hatete: “Toʼo ó-nia fuuk mutin mós . . . , haʼu sei koʼus ó no lori ó no salva ó, hanesan uluk.”—Isaías (Yesaya) 46:4.

Iha tinan 1990 haʼu muda ba sidade Omak iha Washington. Haʼu serbí iha fatin neʼebé ema koʼalia lia-españól no haʼu-nia estudante balu mós hetan batizmu. Iha fulan-Novembru 2007, haʼu muda ba Chelan iha Washington tanba haʼu la iha kbiit ona atu tau matan ba haʼu-nia uma iha Omak. Husi tempu neʼebá, kongregasaun españól nian ajuda tebes haʼu no haʼu agradese tebes ba sira hotu. Iha neʼe, só haʼu deʼit mak Testemuña neʼebé idade ona, no irmaun-irmán sira haree haʼu hanesan sira-nia avó-feto.

Maski haʼu mak hili rasik atu la kaben no iha família hodi haʼu bele serbí liután Jeová, maibé haʼu iha oan espirituál barak tebes. (1 Korinto 7:34, 35) Haʼu hatene katak haʼu la bele iha buat hotu neʼebé haʼu hakarak iha mundu neʼe. Tan neʼe, haʼu tau ulukliu buat neʼebé importante liu, neʼe mak haʼu-nia desizaun atu serbí Maromak ho laran tomak. Iha mundu foun sei iha tempu barak atu halo buat hotu neʼebé haʼu hakarak. Eskritura neʼebé haʼu gosta liu mak Salmo (Mazmur) 145:16. Jeová dehan katak nia sei “halo kontente buat hotu neʼebé moris nia hakarak”.

Agora haʼu tinan 91 ona maibé haʼu pioneiru nafatin tanba haʼu-nia saúde sei diʼak uitoan. Hodi halo serbisu neʼe, haʼu sente hanesan joven nafatin no haʼu kontente tebes iha haʼu-nia moris. Bainhira haʼu foin toʼo iha Elsalvadór, serbisu haklaken foin komesa iha neʼebá. Maibé agora, maski Satanás hakaʼas an nafatin atu hapara serbisu neʼe, maibé iha ona haklaken-naʼin hamutuk 39.000 liu iha rai neʼe. Hodi haree ida-neʼe hametin duni haʼu-nia fiar. Haʼu la duvida katak Jeová uza ninia espíritu santu hodi apoia ninia povu!