1, 2. Tanbasá mak feto nia bei-oan presiza protesaun? Atu bele proteje feto-nia bei-oan, Jeová halo saida?

 SE ITA hakarak hatene oinsá mak Maromak nia hakarak atu sai loos, ita tenkesér komprende uluk profesia primeiru iha Bíblia. Profesia neʼe naran promesa Eden nian. Iha profesia neʼe Maromak hatete: “Haʼu sei halo ó [Satanás] ho feto neʼe odi malu, no ó-nia bei-oan no feto neʼe nia bei-oan sei odi malu. Nia [feto nia bei-oan] sei harahun ó-nia [Satanás nia] ulun no ó sei hakanek ninia ain-tuban.” (Gênesis [Kejadian] 3:15) Satanás ho feto neʼe sei odi malu tebetebes toʼo Satanás hakarak buka dalan oioin atu halo moos hotu feto nia bei-oan.

² Tan neʼe mak ema neʼebé hakerek Salmo husu ba Maromak kona-ba Ninia ema hanesan neʼe: “Haree, Ita-Boot nia inimigu sira laran-nakali; sira neʼebé odi Ita-Boot hatudu hahalok foti-an loos. Sira bobar lia hamutuk hodi hasoru Ita-Boot nia povu; sira halo planu aat hodi hasoru Ita-Boot nia ema neʼebé Ita-Boot estima. Sira hatete: ‘Mai, mai ita halakon sira hamutuk ho sira-nia nasaun tomak.’” (Salmo [Mazmur] 83:2-4) Satanás nia planu mak atu halakon totál no halo feto nia bei-oan nia liña jerasaun sai merak ka malahuk hodi ema la bele koñese didiʼak bei-oan  neʼe. Tan neʼe Jeová halo aliansa seluk tan hodi bele proteje bei-oan neʼe.

3, 4. (a) Bainhira mak aliansa Ukun-Fuan nian komesa laʼo? No ema Izraél simu atu halo tuir saida? (b) Aliansa Ukun-Fuan nian fó protesaun ba saida?

³ Bainhira Jeová halo Abraão, Isaac, no Jacob nia oan no bei-oan sai nasaun Izraél, nia uza Moisés hodi halo aliansa úniku ida hodi fó ninia Ukun-Fuan ba nasaun neʼe. Aliansa neʼe mak aliansa Ukun-Fuan nian. Ema Izraél sira mós simu hodi hakarak halo tuir Ukun-Fuan sira-neʼe. Bíblia hatete katak Moisés “foti livru aliansa nian no lee ba povu sira. No povu sira hatán: ‘Liafuan hotu neʼebé Jeová hatete ona, ami prontu atu rona no halo tuir.’ Tan neʼe Moisés foti [karau-aman nia] raan hodi hisik ba povu sira no hatete: ‘Ho raan neʼe mak Jeová halo aliansa ho imi kona-ba liafuan sira hotu neʼebé imi foin rona.’”—Êxodo (Keluaran) 24:3-8.

⁴ Aliansa Ukun-Fuan nian ka bele bolu mós Moisés nia Ukun-Fuan, komesa laʼo iha tinan 1513 molok Kristu. Liuhusi Moisés nia Ukun-Fuan ka aliansa neʼe, Jeová hili nasaun Izraél sai hanesan nasaun espesiál ida ba nia. No hahú husi tempu neʼebá, Jeová mós sai sira-nia Juíz, Lei-Naʼin, no Liurai. (Isaías [Yesaya] 33:22) Jeová fó Moisés nia Ukun-Fuan atu proteje Abraão nia liña jerasaun hodi la bele kahur ho raan seluk. Entaun, ema Izraél tenke halo tuir Moisés nia Ukun-Fuan hodi la bele kaben ho ema jentiu ka ema neʼebé adora maromak seluk.—Êxodo (Keluaran) 20:4-6; 34:12-16.

5. (a) Aliansa Ukun-Fuan nian fó oportunidade saida ba nasaun Izraél? (b) Tanbasá mak Maromak lakohi simu tan Izraél?

⁵ Aliansa Ukun-Fuan nian mós halo arranju hodi forma amlulik sira atu serbí ema Izraél seluk. Arranju neʼe sai hanesan lalatak ida ba arranju foun ida iha futuru. (Ebreu 7:11; 10:1) Aliansa Ukun-Fuan nian mós fó oportunidade ba nasaun Izraél hodi sai “amlulik no liurai”. Atu hetan priviléjiu neʼe, ema Izraél tomak tenke halo tuir Maromak nia ukun-fuan sira. (Lee Êxodo [Keluaran] 19:5, 6. a) Maibé sira lakohi halo tuir. Sira lakohi simu Abraão nia bei-oan prinsipál, Mesias. Tan neʼe, Maromak mós la simu tan sira.

6. Moisés nia Ukun-Fuan nia objetivu mak saida?

⁶ Nasaun Izraél lakon sira-nia oportunidade atu sai nasaun amlulik nian tanba Maromak lakohi simu tan sira. Maibé ida-neʼe la dehan katak Maromak nia Ukun-Fuan mak iha failla ruma, ka la susesu ona, tanba Ukun-Fuan neʼe proteje hela feto nia bei-oan toʼo Mesias mosu mai no mós ajuda  ema atu koñese didiʼak sé mak bei-oan neʼe. Bainhira ema hatene ona Kristu mak sé, Ukun-Fuan neʼe kotu ona. Tan neʼe Bíblia hatete: “Kristu mak Ukun-Fuan nia rohan.” (Roma 10:4) Entaun, iha futuru sé mak atu sai fali grupu amlulik sira-neʼe? Jeová halo arranju seluk tan hodi forma nasaun foun ida hodi troka nasaun Izraél antigu neʼe.

7. Liuhusi Jeremias, Jeová fó sai saida?

⁷ Liuhusi profeta Jeremias, Jeová fó sai katak Nia atu halo “aliansa foun ida” ho nasaun Izraél. (Lee Jeremias [Yeremia] 31:31-33. b) Aliansa ida-neʼe sei la hanesan ho aliansa Ukun-Fuan nian tanba aliansa foun neʼe la presiza atu hasaʼe animál hodi ema bele hetan perdua ba sira-nia sala.

8, 9. (a) Jesus nia raan loke dalan ba saida? (b) Ema sira neʼebé tama iha aliansa foun hetan oportunidade saida? (Haree dezeñu iha pájina 13.)

⁸ Tinan atus hirak liutiha, Jesus halaʼo Naʼi nia Han-Kalan iha loron 14 Nisan tinan 33. Jesus dehan ba ninia apóstolu naʼin-11: “Kopu neʼe reprezenta aliansa foun liuhusi haʼu-nia raan, neʼebé sei fakar tanba imi.” (Lucas 22:20) Iha evanjellu Mateus hakerek hanesan neʼe: “Ida-neʼe reprezenta haʼu-nia ‘raan aliansa nian’, neʼebé sei fakar atu ema barak hetan perdua husi sala.”—Mateus 26:27, 28.

⁹ Jesus nia raan mak legaliza aliansa foun ida-neʼe. Raan neʼe fakar ba rai dala ida deʼit hodi ema bele hetan perdua ba sala ba nafatin. Jesus la tama iha aliansa foun nia laran, tanba nia la iha sala entaun la presiza hetan perdua husi ninia raan rasik. Liuhusi espíritu santu, Jeová uza Jesus nia raan nia folin hodi foti ema balu sai Ninia “oan-hakiak”. (Lee Roma 8:14-17.) Jeová ‘fó liman-rohan ba sira hanesan nia fó ba Kristu’ hodi ukun hamutuk ho Jesus. Sira mós sei hetan oportunidade ka priviléjiu neʼebé ema Izraél halo lakon tiha hodi sai “amlulik no liurai”. Apóstolu Pedro hakerek kona-ba sira hanesan neʼe: “Imi mak ‘suku neʼebé Maromak hili ona, no imi mak amlulik sira neʼebé serbí nuʼudar liurai, nasaun santu ida, no povu neʼebé nia hili ba nia an rasik, atu nuneʼe imi tenke fó sai kona-ba kmanek’ husi ida neʼebé bolu imi atu sai husi nakukun hodi tama fali ba naroman neʼebé furak.” (1 Pedro 2:9) Tan neʼe mak aliansa foun importante tebes. Tanba aliansa neʼe fó oportunidade ba Jesus nia dixípulu sira hodi sai Abraão nia bei-oan parte segundu nian.

10. Bainhira mak aliansa foun nian komesa? Tanbasá mak tenke hein toʼo tempu neʼebá?

¹⁰ Maibé neʼe la dehan katak aliansa foun komesa laʼo ona husi loron Naʼi nia Han-Kalan nian. Tanbasá seidauk? Tanba Jesus seidauk saʼe fali ba lalehan hodi lori ninia sakrifísiu nia folin hodi fó ba Maromak. No mós espíritu santu seidauk tun ba ema sira neʼebé atu simu liman-rohan ho Kristu. Toʼo tiha tinan 33, iha loron Pentekostes nian mak Jesus nia dixípulu sira foin simu Maromak nia espíritu santu. Husi momentu neʼe mak aliansa foun nian foin komesa.

11. Tanbasá mak aliansa foun bele fó oportunidade ba ema Judeu no mós ema jentiu sira hodi sai Izraél espirituál? No ema naʼin-hira mak tama iha aliansa foun neʼe?

¹¹ Bainhira Jeová fó sai liuhusi Jeremias  katak Nia sei halo aliansa foun ida ho ema Izraél, neʼe signifika katak loron ida Moisés nia Ukun-Fuan mós sei la presiza tan. Loron neʼe mak bainhira aliansa foun komesa laʼo. (Ebreu 8:13) Aliansa foun neʼe fó oportunidade ba ema Judeu no mós ema jentiu sira hodi bele ukun iha lalehan. Tanba agora Maromak haree liuliu ba “sirkunsizaun neʼebé loloos mak iha ema nia laran liuhusi espíritu, laʼós liuhusi ukun-fuan”. (Roma 2:29) Liuhusi aliansa foun neʼe mak Jeová tau ninia ukun-fuan iha ema naʼin-144.000 nia neon no laran. (Ebreu 8:10; Apokalipse 14:1, 4) Sira mak sei sai nasaun foun ida neʼebé bolu “Izraél Maromak nian”, ka Izraél espirituál.—Galásia 6:16.

12. Oinsá mak ita kompara aliansa Ukun-Fuan ho aliansa foun nian?

¹² Ita bele kompara aliansa Ukun-Fuan ho aliansa foun iha dalan tuirmai neʼe. (1) Jeová halo aliansa Ukun-Fuan entre nia ho nasaun Izraél, no nia halo aliansa foun entre nia ho Izraél espirituál. (2) Nia halo aliansa Ukun-Fuan nian liuhusi Moisés, no halo aliansa foun liuhusi Jesus. (3) Animál nia raan mak legaliza aliansa Ukun-Fuan nian, no Jesus nia raan legaliza aliansa foun. (4) Iha aliansa Ukun-Fuan nian, Jeová foti Moisés sai Ulun ba nasaun Izraél, no iha aliansa foun, nia foti Jesus sai Ulun ba kongregasaun.—Éfeso 1:22.

13, 14. (a) Oinsá mak aliansa foun iha relasaun ho Maromak nia Ukun? (b) Presiza saida tan hodi Izraél espirituál nian bele ukun hamutuk ho Kristu iha lalehan?

¹³ Oinsá mak aliansa foun nian iha relasaun ho Maromak nia Ukun? Buat neʼe hanesan neʼe: aliansa foun mak kria nasaun santu ida hodi fó oportunidade ba ema atu sai liurai no amlulik iha Maromak nia Ukun iha lalehan. Nasaun neʼe mak forma parte segundu husi Abraão nia bei-oan. (Galásia 3:29) Tan neʼe, aliansa foun fó garantia katak aliansa Abraão nian sei sai loos duni.

¹⁴ Aliansa foun neʼe kria nasaun Izraél espirituál nian hodi fó ema kose-mina sira fundasaun legál hodi bele simu liman-rohan hamutuk ho Kristu. Maibé, oinsá mak ema kose-mina sira-neʼe bele ukun hamutuk ho Jesus nuʼudar liurai no amlulik iha lalehan? Presiza aliansa legál ida tan.

15. Aliansa saida mak Jesus halo rasik ho ninia apóstolu sira?

¹⁵ Bainhira halaʼo tiha Naʼi nia Han Kalan, Jesus halo aliansa ida ho ninia dixípulu sira neʼebé bolu aliansa Ukun nian. (Lee Lucas 22:28-30.) Aliansa neʼe la hanesan ho aliansa sira seluk, tanba Jesus rasik mak halo aliansa neʼe ho ema kose-mina sira, laʼós Jeová. Entaun, tansá mak Jesus hatete: “Hanesan haʼu-nia Aman halo aliansa ho haʼu”? Neʼe karik tanba Jesus koʼalia kona-ba aliansa neʼebé Jeová halo ho nia atu sai “amlulik ba nafatin tuir dalan Melkizedek nian”.—Ebreu 5:5, 6.

16. Aliansa Ukun nian loke dalan saida ba ema kose-mina sira?

¹⁶ Maski Jesus hetan terus oioin, maibé ninia apóstolu naʼin-11 nunka husik ka fila kotuk ba Jesus. Tan neʼe mak aliansa Ukun nian fó garantia ba sira katak sira sei tuur iha kadunan hamutuk ho Jesus iha lalehan hodi ukun nuʼudar liurai no amlulik sira. Maibé laʼós sira naʼin-11 deʼit mak hetan priviléjiu neʼe. Tanba iha vizaun ida Jesus hatete ba apóstolu João: “Ba ema neʼebé manán, haʼu sei fó lisensa ba nia atu tuur hamutuk ho haʼu iha haʼu-nia kadunan, nuʼudar haʼu mós manán no tuur hamutuk ho haʼu-nia Aman iha ninia kadunan.” (Apokalipse 3:21) Tan neʼe aliansa Ukun nian neʼe Jesus mós halo ho ema kose-mina naʼin-144.000. (Apokalipse 5:9, 10; 7:4) Aliansa  Ukun nian neʼe mak sai fundasaun legál ba ema kose-mina sira hodi bele ukun hamutuk ho Jesus iha lalehan. Neʼe kompara hanesan ho feto ida neʼebé kaben ho liurai ida. Kaben hotu tiha, liurai-feto neʼe mós iha direitu hodi ukun hamutuk ho ninia laʼen, liurai neʼe. Bíblia mós bolu ema kose-mina sira nuʼudar Kristu nia “noiva”, ka virjen santa ida neʼebé fó ona liman atu kaben ho Kristu.—Apokalipse 19:7, 8; 21:9; 2 Korinto 11:2.

17, 18. (a) Esplika badak deʼit kona-ba aliansa neen neʼebé iha relasaun ho Maromak nia Ukun. (b) Tansá mak ita bele iha fiar neʼebé metin kona-ba Maromak nia Ukun?

¹⁷ Iha lisaun sira neʼe ita koʼalia tiha ona kona-ba aliansa sira neʼebé iha relasaun importante ho Maromak nia Ukun. (Haree “Dalan Maromak atu kumpre ninia hakarak.”) Ita bele haree katak liuhusi aliansa legál sira neʼe, la iha buat ida mak bele hanetik Maromak nia Ukun atu sai susesu. Ita bele tau fiar tomak katak Maromak sei uza Mesias nia Ukun hodi kumpre ninia hakarak hotu ba ema no rai.—Apokalipse 11:15.

¹⁸ La iha buat ida mak bele halo ita duvida katak só Maromak nia Ukun deʼit mak bele rezolve ema-nia problema hotu. Ita mós bele fiar ho laran tomak katak Ukun neʼe sei lori bensaun ba ema hotu. Entaun, mai ita fó sai ba ema hotu kona-ba lia-loos furak neʼe!—Mateus 24:14.