1. Iha ita-nia adorasaun, saida mak espesiál tebes mai ita?

 IHA rai balu, ita bele bá haree uma antigu neʼebé tau Jeová nia naran. Muzeu balu mós iha sasán ruma neʼebé hakerek Jeová nia naran. Kuandu haree buat sira-neʼe, ita sai kontente loos. Sin, ba ita Testemuña ba Jeová, Maromak nia naran mak buat neʼebé espesiál tebes. Iha mundu tomak, la iha relijiaun seluk neʼebé fó sai Maromak nia naran hanesan ita halo daudaun. Maibé, ita hatene katak ita-nia knaar furak nuʼudar Jeová nia Testemuña mós lori responsabilidade boot.

2. Nuʼudar Maromak nia povu neʼebé lori ninia naran, ita tenke halo saida?

² Atu bele halo Maromak kontente, la toʼo hodi temi deʼit ninia naran. Ita mós tenke halo tuir Jeová nia matadalan sira kona-ba morál no “hadook an husi buat neʼebé aat”. (Salmo [Mazmur] 34:14) Apóstolu Paulo mós temi matadalan neʼe, hodi hatete: “Sira hotu neʼebé bolu Jeová nia naran tenke husik tiha buat sira neʼebé la loos.” (Lee 2 Timóteo 2:19.) Tan neʼe, nuʼudar Maromak nia povu, oinsá mak ita bele ‘husik buat sira neʼebé la loos’?

3, 4. Matenek-naʼin balu kona-ba Bíblia iha konfuzaun kona-ba eskritura saida? Tanbasá?

³ Iha 2 Timóteo 2:19, Paulo hatete kona-ba “uma hun neʼebé metin” neʼebé Maromak rasik mak tau. Iha uma hun neʼe bahat tiha lia-menon rua. Lia-menon primeiru mak “Jeová hatene sira neʼebé ninian”, neʼebé foti husi Números (Bilangan) 16:5. (Haree ba lisaun uluk nian.) Maibé matenek-naʼin balu kona-ba Bíblia iha konfuzaun uitoan kona-ba lia-menon segundu neʼebé dehan: “Sira hotu neʼebé bolu Jeová nia naran tenke husik tiha buat sira neʼebé la loos.”

⁴ Lia-menon segundu neʼe rona hanesan Paulo foti husi Eskritura Lia-Ebraiku, maibé liafuan neʼe la bele hetan iha versu ida. Entaun, bainhira Paulo hakerek: “Sira hotu neʼebé bolu Jeová nia naran tenke husik tiha buat sira neʼebé la loos”, nia hanoin kona-ba akontesimentu saida? Paulo temi fali lia-menon primeiru husi Números (Bilangan) kapítulu 16, neʼebé koʼalia kona-ba Kora nia hahalok aat neʼebé kontra hasoru Moisés. Se nuneʼe, lia-menon segundu mós iha relasaun ruma ho istória kona-ba Kora ka lae?

5-7. Bainhira Paulo hakerek 2 Timóteo 2:19, nia koʼalia kona-ba akontesimentu saida iha Moisés nia tempu? (Haree dezeñu iha pájina 12.)

⁵ Datan no Abiram mós tuir Kora hodi kontra hasoru Moisés no Aarão. (Números [Bilangan] 16:1-5) Sira la respeitu Moisés nuʼudar ulun neʼebé Maromak hili. Tanba sira sei hela iha povu Izraél nia leet, sira-nia hahalok neʼe lori perigu boot ba povu. Ikusmai, kuandu tempu toʼo ba Jeová atu fó-hatene kona-ba sé mak ninia atan neʼebé loos, nia fó mandamentu ida ba povu.

⁶ Bíblia konta: “Jeová hatete ba Moisés: ‘Koʼalia ba ema-lubun hodi hatete ba sira: “Hasees an husi Kora, Datan, no Abiram nia tenda!”’ Tuirmai, Moisés hamriik no bá Datan no Abiram, no katuas sira husi povu Izraél mós bá hamutuk ho nia. Nia hatete ba ema-lubun: ‘Favór ida, sees husi ema aat sira-neʼe nia tenda no keta kona buat ida neʼebé sira-nian, hodi imi labele lakon mohu tanba sira-nia sala.’ Sira hasees an kedas husi Kora, Datan, no Abiram nia tenda sira, husi sorin-sorin hotu.” (Números [Bilangan] 16:23-27) Ikusmai, Jeová halakon ema hotu neʼebé kontra hasoru nia. Maibé ema neʼebé “husik tiha buat neʼebé la loos” hodi hatudu laran-metin ba Jeová, sira la lakon sira-nia moris.

⁷ Jeová haree duni ema ida-idak nia laran! Jeová hatene ema neʼebé laran-metin ba nia. Maibé, sira mós tenke hatudu ida-neʼe liuhusi sira-nia hahalok hodi haketak an husi ema aat sira. Tan neʼe, ita bele fiar katak Paulo hanoin hela kona-ba istória husi Números (Bilangan) 16:5, 23-27 bainhira nia hakerek: “Sira hotu neʼebé bolu Jeová nia naran tenke husik tiha buat sira neʼebé la loos.” Ida-neʼe laʼo tuir Paulo nia lia-menon primeiru neʼebé dehan: “Jeová hatene sira neʼebé ninian.”—2 Timóteo 2:19.

8. Maski ita lori Maromak nia naran no sai parte ona iha kongregasaun, saida tan mak ita presiza halo?

⁸ Paulo uza akontesimentu iha Moisés nia tempu hodi hatete ba Timóteo atu proteje ninia relasaun ho Jeová. Iha Moisés nia tempu, hodi bolu deʼit Jeová nia naran, neʼe la toʼo. Nuneʼe mós ho ema kristaun iha apóstolu sira-nia  tempu. Hodi sai parte iha kongregasaun, ida-neʼe la toʼo. Sin, Maromak nia atan sira hotu tenkesér “husik tiha buat sira neʼebé la loos”. Ba Timóteo, liafuan sira-neʼe katak sá? Saida mak ita bele aprende husi Paulo nia konsellu neʼe?

9. Oinsá mak “liafuan sira neʼebé la iha folin” kona kongregasaun iha apóstolu sira-nia tempu?

⁹ Bíblia fó konsellu kona-ba hahalok aat saida deʼit mak ema kristaun tenke hadook an. Porezemplu, Paulo haruka Timóteo atu “labele haksesuk malu kona-ba liafuan sira” ka “hasees an husi liafuan sira neʼebé la iha folin”. (Lee 2 Timóteo 2:14, 16, 23.) Ema balu iha kongregasaun laran habelar hanorin falsu sira neʼebé kontra hasoru lia-loos. Ema balu tan fó sai sira-nia ideia oioin neʼebé maski ladún kontra Bíblia, maibé ikusmai hamosu haksesuk-malu hodi halakon unidade iha kongregasaun. Tan neʼe mak Paulo fó laran-manas ba Timóteo hodi “hasees an husi pergunta folin-laek sira”.

10. Saida mak ita tenke halo kona-ba ema neʼebé kontra hasoru lia-loos?

¹⁰ Ohin loron, ita ladún hetan ema neʼebé kontra lia-loos iha kongregasaun laran. Maibé kuandu ita hetan informasaun ruma neʼebé kontra Bíblia, ita presiza hadook an kedas husi neʼe. La diʼak duni atu koʼalia liuhusi internét ka husi dalan seluk ba sira neʼebé uluk iha lia-loos maibé agora habelar lia falsu kona-ba ita-nia fiar. Karik ita hakarak ajuda sira, maibé se ita koʼalia ho sira, neʼe katak ita la halo tuir Maromak Jeová. Loos duni, Jeová haruka ita atu hadook an husi ema sira hanesan neʼe.

11. Buat saida mak bele estraga dame iha kongregasaun laran? Oinsá mak katuas kristaun sira hatudu ezemplu diʼak?

¹¹ Maibé iha tan buat seluk neʼebé bele estraga dame iha kongregasaun laran. Porezemplu, se ita fó sai ita-nia opiniaun rasik kona-ba halimar, filme, ka múzika, ida-neʼe bele “hamosu deʼit haksesuk malu”. Se irmaun ka irmán ruma fó laran-manas ba ema seluk atu halimar iha dalan neʼebé kontra Maromak nia matadalan, katuas kristaun sira sei la husik hahalok neʼe tan deʼit lakohi haksesuk malu ho sira. (Salmo [Mazmur] 11:5; Éfeso 5:3-5) Maibé, katuas sira mós sei kuidadu atu la hakaʼas ema seluk atu simu sira-nia opiniaun rasik. Duké halo ida-neʼe, sira halo tuir Bíblia nia konsellu neʼebé dehan: “Tau matan ba Maromak nia bibi sira neʼebé iha imi-nia liman, . . . laʼós hodi domina sira neʼebé Maromak nian, maibé sai nuʼudar ezemplu ba bibi-lubun.”—1 Pedro 5:2, 3; lee 2 Korinto 1:24.

12, 13. (a) Testemuña ba Jeová uza saida atu halo desizaun kona-ba halimar no filme? Ita halo tuir Bíblia nia matadalan saida? (b) Bíblia nia matadalan sira-neʼe bele mós kona buat saida deʼit iha ita-nia moris?

¹² Ita-nia organizasaun la fó lista kona-ba filme, vídeo game, livru no múzika sira neʼebé diʼak ka ladiʼak ba ema kristaun. Tanbasá? Tanba Bíblia haruka ema kristaun ida-idak atu uza “sira-nia kbiit atu hanoin . . . atu hatene buat diʼak husi buat aat”. (Ebreu 5:14) Bíblia fó sai matadalan balu neʼebé ajuda ita atu hili halimar no filme. Porezemplu, kuandu ita halo desizaun ruma, ita presiza “buka-hatene kona-ba buat neʼebé halo Naʼi kontente”. (Éfeso 5:10) Bíblia mós hanorin ita katak família ida-idak nia ulun mak tau matan ba família ho desizaun sira kona-ba buat neʼebé sira bele simu ka labele simu.—1 Korinto 11:3; Éfeso 6:1-4.

¹³ Bíblia nia matadalan sira-neʼe mós ajuda ita atu halo desizaun diʼak kona-ba  buat seluk tan iha ita-nia moris. Porezemplu, ema bele iha hanoin neʼebé la hanesan kona-ba hatais, ai-moruk no tratamentu, no se sira obriga ema seluk atu tuir sira-nia opiniaun, ida-neʼe bele hamosu haksesuk-malu. Maibé se ema kristaun ida halo buat ruma neʼebé la kontra Bíblia nia matadalan, ita la iha razaun atu haksesuk malu kona-ba neʼe. Bíblia hatete: “Naʼi nia atan la presiza haksesuk malu, maibé tenke hatudu laran-diʼak ba ema hotu.”—2 Timóteo 2:24.

14. Hodi fó-hatene ema kristaun atu labele ransu ho ema aat, Paulo uza ai-knanoik saida?

¹⁴ Iha dalan saida tan mak ita bele “husik tiha buat sira neʼebé la loos”? Hodi la ransu ho ema neʼebé halo hahalok neʼebé la loos. Oinsá mak Paulo esplika kona-ba ida-neʼe? Bainhira nia temi “uma hun neʼebé metin”, nia mós konta ai-knanoik kona-ba “uma boot ida”. Iha uma neʼe, iha “bikan sira neʼebé halo husi osan-mean no osan-mutin, no iha mós bikan sira neʼebé halo husi ai no rai-mean, balu uza ba tempu neʼebé espesiál no balu uza ba tempu baibain”. (2 Timóteo 2:20, 21) Tuirmai, Paulo fó laran-manas ba ema kristaun atu “hasees an husi ema neʼebé hanesan ho bikan baibain”.

15, 16. Ita bele aprende saida husi ai-knanoik kona-ba “uma boot”?

¹⁵ Paulo nia ai-knanoik neʼe dehan saida? “Uma boot” mak hanesan ho kongregasaun kristaun. “Bikan” iha uma laran neʼe mak ema ida-idak iha kongregasaun laran. Se bikan balu sai foʼer, uma-naʼin tenke haketak bikan foʼer sira-neʼe husi bikan neʼebé moos hela.

¹⁶ Nuneʼe mós ho Maromak nia povu ohin loron. Se ita hakarak sai moos kona-ba buat hotu iha ita-nia moris, ita labele ransu beibeik ho ema iha kongregasaun neʼebé lakohi halo tuir Jeová nia  matadalan sira. (Lee 1 Korinto 15:33.) Se ita la ransu ho ema balu iha kongregasaun laran neʼebé la halo tuir Maromak, sá tan ho ema iha kongregasaun liʼur, neʼebé ‘hadomi osan, la halo tuir inan-aman, la laran-metin, konta ema nia vida, siʼak, la hadomi buat neʼebé diʼak, traidór, hadomi deʼit ksolok duké hadomi Maromak’!—2 Timóteo 3:1-5.

17. Ema Izraél neʼebé laran-metin sees husi buat neʼebé la loos hodi halo saida deʼit?

¹⁷ Bainhira Jeová haruka povu Izraél atu “hasees an husi Kora, Datan, no Abiram nia tenda sira”, ema sira neʼebé laran-metin “hasees an kedas”. (Números [Bilangan] 16:24, 27) Sira la laran-rua no la demora atu sees husi ema neʼebé kontra hasoru Jeová nia arranju. Sira “hasees an . . . husi sorin-sorin hotu”. Sin, sira hakarak duni atu halo tuir Jeová ho laran tomak. Sira hatudu sai ho sira-nia hahalok rasik katak sira apoia Jeová no kontra hasoru buat neʼebé la loos. Saida mak ita bele aprende husi ezemplu ida-neʼe?

18. Tanbasá mak Paulo hatete ba Timóteo atu “halai-sees husi hakarak joven nian”?

¹⁸ Ita mós labele demora atu proteje ita-nia relasaun ho Jeová neʼebé folin-boot. Apóstolu Paulo fó-hanoin Timóteo kona-ba neʼe hodi dehan: “Halai-sees husi hakarak joven nian.” (2 Timóteo 2:22) Iha tempu neʼebá, Timóteo maizumenus tinan 30 liu ona. Maibé, ema boot mós bele iha “hakarak joven nian”. Kuandu “hakarak joven nian” mak mosu iha Timóteo nia laran, nia tenkesér “halai-sees” husi ida-neʼe, ka “husik tiha buat neʼebé la loos”. Jesus mós hatete: “Se ó-nia matan halo ó sidi, losu tiha nia no soe ba dook.” (Mateus 18:9) Ohin loron, ema kristaun neʼebé hakarak halo tuir konsellu neʼe sei hasees an kedas husi perigu naran deʼit neʼebé bele estraga sira-nia relasaun ho Jeová.

19. Oinsá mak ema kristaun balu proteje sira-nia relasaun ho Jeová?

¹⁹ Oinsá mak ema kristaun balu proteje sira-nia relasaun ho Jeová? Antes tama lia-loos, sira balu iha problema kona-ba hemu tua, tan neʼe sira deside ona katak sira sei la hemu tua tan. Irmaun-irmán balu tan deside atu sees husi halimar ruma neʼebé bele haburas hakarak aat isin nian. (Salmo [Mazmur] 101:3) Porezemplu, antes atu sai Testemuña, irmaun ida gosta dansa iha dalan neʼebé la tuir morál. Maibé bainhira nia aprende lia-loos, nia deside atu la dansa tan maski iha festa neʼebé Testemuña deʼit mak halibur, tanba ida-neʼe bele hamosu fali hanoin no hakarak neʼebé ladiʼak iha ninia laran. Neʼe la dehan katak Bíblia bandu ema kristaun atu labele hemu tua ka dansa. Maibé ita hotu presiza sai prontu kedas hodi proteje ita-nia relasaun ho Jeová.

20. Maski dala ruma la fasil ba ita atu ‘husik buat sira neʼebé la loos’, ita sente kmaan hodi hatene saida?

²⁰ Ita-nia naran Testemuña ba Jeová mak buat neʼebé espesiál tebes, maibé ida-neʼe mós lori responsabilidade atu “husik tiha buat sira neʼebé la loos” no “hadook an husi buat neʼebé aat”. (Salmo [Mazmur] 34:14) Neʼe laʼós buat neʼebé fasil deʼit. Maibé, ita bele sente kmaan hodi hatene katak Jeová sei hadomi “sira neʼebé ninian” no kaer metin ba buat neʼebé loos.—2 Timóteo 2:19; lee 2 Crônicas (Tawarikh) 16:9a. a