1, 2. Loron selebrasaun importante saida mak ema kristaun sira hakarak liu atu hatene? No tanbasá?

 KUANDU Ita rona liafuan “aniversáriu”, saida mak Ita hanoin? Se Ita mak ema kaben-naʼin, karik Ita hanoin kona-ba Ita-nia loron kazamentu nia aniversáriu. Ema balu karik hanoin fila-fali kona-ba loron boot nasaun nia istória, hanesan loron independénsia. Maibé husi tempu uluk toʼo agora iha loron espesiál neʼebé povu ida komemora ba tinan 3.500. Ita hatene loron neʼe mak kona-ba saida?

² Loron neʼe mak Páskua, ka Festa Salvasaun nian. Neʼe mak ema Israel nia festa atu selebra tempu neʼebé sira sai livre husi Egiptu. Tuir loloos, selebrasaun neʼe importante ba Ita. Tanbasá? Tanba ida-neʼe kona Ita-nia moris iha dalan importante. Karik ita hanoin: ‘Haʼu mak ema kristaun, maibé Festa Salvasaun nian mak ema judeu sira-nia festa. Oinsá mak festa neʼe importante ba haʼu?’ Bele hetan resposta iha liafuan sira-neʼe husi Bíblia: “Kristu neʼebé nuʼudar bibi-oan ba festa salvasaun nian, mate tiha ona nuʼudar sakrifísiu.” (1 Korinto 5:7, MF) Neʼe katak sá loos? Atu hetan resposta, ita presiza hatene liután kona-ba ema judeu nia Festa Salvasaun nian, no oinsá selebrasaun neʼe liga ho ukun-fuan ida ba ema kristaun sira.

3, 4. Saida mak akontese iha rai-Egiptu antes Festa Salvasaun ba dala primeiru?

³ Maski ema rihun ba rihun iha mundu tomak laʼós ema judeu, maibé sira hatene istória kona-ba buat neʼebé akontese antes ema judeu selebra Páskua, ka Festa Salvasaun nian ba dala primeiru. Karik sira lee kona-ba neʼe iha livru Êxodo, ka rona ema seluk konta istória neʼe, ka karik sira haree filme. Ita hanoin-hetan ka lae, saida mak akontese iha istória neʼe?

⁴ Ema Israel sira mak hanesan dadur iha rai-Egiptu ba tinan barak ona, no Jeová haruka Moisés no Aarão atu husu ba Faraun hodi husik Ninia povu sai livre. Maibé tanba Faraun mak foti-an, nia la husik sira sai. Tan neʼe, Jeová fó kastigu ba ema iha Egiptu hodi fó malisan  sanulu. Durante malisan ikus, Maromak nia anju oho ema Egiptu nia oan primeiru. Depois malisan ikus neʼe mak Faraun hatán hodi husik ema Israel sai livre.—Êxodo (Keluaran) 1:11; 3:9, 10; 5:1, 2; 11:1, 5.

5. Ema Israel sira presiza halo saida antes sira bele sai livre husi rai-Egiptu? (Haree dezeñu iha pájina 17.)

⁵ Maibé antes ema Israel sira bele sai livre, sira presiza halo tuir matadalan balu. Tempu neʼe mak tinan 1513 molok Kristu, iha fulan Abib, neʼebé ikusmai bolu Nisan. Tuir ita-nia kalendáriu, neʼe mak iha fulan Marsu, maizumenus loron 21/22. Maromak haruka sira atu komesa prepara ba selebrasaun iha loron 10 Nisan neʼebé sei halaʼo iha loron 14 Nisan kuandu loro-matan monu. Tanbasá mak tenke komesa iha tempu neʼe? Tanba ema ebreu nia loron foun komesa no ramata kuandu loro-matan monu. Iha loron 14 Nisan, família ida-idak tenke oho bibi-aman ida no hisik ninia raan iha uma nia odamatan-riin no leten. (Êxodo [Keluaran] 12:3-7, 22, 23) Depois família neʼe sei han bibi tunu hamutuk ho bumbu no paun neʼebé la iha fermentu. Maromak nia anju sei liu iha rai-Egiptu no oho ema Egiptu nia oan primeiru. Maibé ema Israel sira neʼebé halo tuir mandamentu neʼe, sira-nia oan primeiru sei la mate. Ikusmai, Maromak sei husik ninia povu sai livre.—Êxodo (Keluaran) 12:8-13, 29-32.

6. Razaun saida mak ema Israel sira presiza selebra Festa Salvasaun nian tinan-tinan?

⁶ Ema Israel sira labele haluha loron neʼebé Maromak halo sira livre husi rai-Egiptu. Maromak hatete ba sira: “Loron neʼe tenke sai nuʼudar memoriál ba imi, no imi tenke selebra ida-neʼe nuʼudar festa ba Jeová husi jerasaun ba jerasaun. Nuʼudar ukun-fuan ba tempu neʼebé labele sura imi tenke selebra ida-neʼe.” Depois Festa Salvasaun nian neʼebé sira halaʼo iha loron 14 Nisan, ema Israel sira mós selebra festa seluk neʼebé halaʼo ba loron hitu tan. Festa neʼe bolu Selebrasaun Paun Fermentu-Laek nian. Loron sira-neʼe hamutuk loron ualu, no mós bele bolu loron hotu sira-neʼe nuʼudar Festa Salvasaun nian. (Êxodo [Keluaran] 12:14-17; Lucas 22:1; Joao 18:28; 19:14) Festa Salvasaun nian mak festa, ka aniversáriu ida neʼebé ema Israel tenke halaʼo tinan-tinan.—2 Crônicas (Tawarikh) 8:13.

7. Selebrasaun foun saida mak Jesus haruka ninia dixípulu sira atu halaʼo?

⁷ Tanba Jesus no apóstolu sira mak ema judeu neʼebé halo tuir Moisés nia Ukun-Fuan, sira selebra Festa Salvasaun nian. (Mateus 26:17-19) Kuandu sira halaʼo ida-neʼe ba dala ikus, Jesus hatete katak nia hakarak sira atu halaʼo selebrasaun neʼebé foun tinan-tinan. Selebrasaun neʼe mak bolu Naʼi nia Han Kalan. Maibé sira presiza halaʼo ida-neʼe iha loron saida?

8. Pergunta saida mak ema balu husu kona-ba Festa Salvasaun nian no Naʼi nia Han Kalan?

⁸ Kuandu Jesus fó matadalan kona-ba Naʼi nia Han Kalan, nia halo ida-neʼe kuandu nia selebra tiha Festa Salvasaun nian hamutuk ho ninia apóstolu sira. Tan neʼe, Naʼi nia Han Kalan no Festa Salvasaun nian mak halaʼo iha loron hanesan. Maibé tanbasá mak ohin loron ema judeu la selebra Festa Salvasaun nian iha loron neʼebé ita komemora Jesus nia mate? Maromak nia ukun-fuan ba ema Israel kona-ba bainhira atu hahú Festa Salvasaun nian ajuda ita atu hetan resposta. Maromak hatete ba ninia povu bainhira loos mak atu oho bibi iha loron 14 Nisan, no iha tempu neʼe mak Festa Salvasaun nian sei hahú.—Lee Êxodo (Keluaran) 12:5, 6. a

9. Tuir Êxodo (Keluaran) 12:6, bainhira mak ema Israel tenke oho bibi? (Haree mós kaixa “ Hasaʼe sakrifísiu iha tempu saida?”

⁹ Ema judeu nia livru ida (The Pentateuch and Haftorahs) hatete katak tuir Êxodo (Keluaran) 12:6, sira tenke oho bibi “iha rai-nakaras,  no antes nakukun”. Bíblia balu mós tradús liafuan neʼe nuʼudar “rai-nakaras”. Tan neʼe, sira tenke oho bibi kuandu loron 14 Nisan foin hahú, katak depois loro-matan monu, maibé kuandu sei naroman uitoan hela.

10. Bainhira mak ema balu fiar katak ema Israel oho bibi? Maibé neʼe lori ita ba pergunta saida?

¹⁰ Liutiha tempu naruk uitoan, ema judeu balu hanoin katak presiza oras barak atu lori bibi sira hotu ba templu no halo sakrifísiu. Tan neʼe sira komesa hanoin katak “rai-nakaras antes nakukun” neʼebé temi iha Êxodo (Keluaran) 12:6, koʼalia kona-ba kuandu loron 14 Nisan ramata, husi tempu neʼebé loro-matan tun iha loraik toʼo nakukun. Maibé hanoin toʼok, se sira oho bibi kuandu loron 14 Nisan atu ramata, bainhira loos mak sira sei han bibi Festa Salvasaun nian? Tuir profesór Jonathan Klawans, sira han iha loron 15 Nisan. Maski nia hatete nuneʼe, tuir loloos nia la hatene buat ida tanba nia mós fó sai katak livru Êxodo la esplika nuneʼe. Nia mós hatete katak ema Rabbi nia livru sira la esplika ho klaru oinsá mak ema Israel selebra Festa Salvasaun nian antes templu naksobu iha tinan 70.

11. (a) Saida mak akontese ba Jesus durante loron Festa Salvasaun nian iha tinan 33? (b) Tanbasá mak loron 15 Nisan iha tinan 33 bolu nuʼudar Sábadu “loron-boot ida”? (Haree nota iha kraik.)

¹¹ Se nuneʼe, iha loron saida mak Jesus no apóstolu sira selebra Festa Salvasaun nian iha tinan 33? Iha loron 13 Nisan, neʼebé loron ida antes Festa Salvasaun nian, Jesus hatete ba Pedro no João: “Bá no prepara hahán ba Festa Salvasaun nian atu ita han.” (Lucas 22:7, 8, MF) Depois, iha loron 14 Nisan, neʼe mak loron kinta kuandu loro-matan monu, Jesus han bibi Festa Salvasaun nian hamutuk ho ninia apóstolu sira. Depois han tiha, nia fó ba sira matadalan kona-ba oinsá atu halaʼo Naʼi nia Han Kalan. (Lucas 22:14, 15) Iha kalan neʼe kedas, ema kaer Jesus no lori nia ba tribunál. Sira hedi nia ba ai-riin terus nian besik meiudia iha loron 14 Nisan, no iha loraik neʼe mak nia mate. (Joao 19:14) Tan neʼe Kristu, ita-nia bibi-oan ba festa salvasaun nian, fó ninia moris iha loron hanesan neʼebé ema Israel oho bibi Festa Salvasaun nian. (1 Korinto 5:7; 11:23; Mateus 26:2) Sira hakoi Jesus antes loron 15 Nisan komesa. b (Haree nota iha kraik.)—Levítico (Imamat) 23:5-7; Lucas 23:54.

12, 13. Oinsá mak ema Israel nia oan sira hola parte iha Festa Salvasaun nian?

¹² Iha tempu neʼebé ema Israel halaʼo Festa  Salvasaun nian primeiru iha rai-Egiptu, Maromak haruka sira atu selebra ida-neʼe tinan-tinan toʼo “tempu neʼebé la bele sura”. Tinan-tinan, durante selebrasaun neʼe, oan sira sei husu ba sira-nia inan-aman tanbasá mak sira selebra. (Lee Êxodo [Keluaran] 12:24-27; c Deuteronômio [Ulangan] 6:20-23) Nuneʼe, Festa Salvasaun nian mak hanesan “memoriál” neʼebé bele hanorin mós labarik kiʼik sira.—Êxodo (Keluaran) 12:14.

¹³ Husi jerasaun ba jerasaun, ema Israel sira hanorin sira-nia oan buat neʼebé importante kona-ba Festa Salvasaun nian. Ida mak Jeová bele proteje ninia atan sira. Labarik sira aprende katak Jeová mak Maromak neʼebé moris no nia hanoin no tau matan ba ninia povu. Nia hatudu ida-neʼe kuandu nia salva ema Israel nia oan primeiru durante malisan númeru 10 iha rai-Egiptu.

14. Buat importante saida mak inan-aman sira bele hanorin sira-nia oan kona-ba Festa Salvasaun nian?

¹⁴ Nuʼudar inan-aman kristaun sira, maski Maromak la haruka Ita atu fó-hatene ba Ita-nia oan sira kona-ba Festa Salvasaun nian tinan-tinan, maibé Ita mós bele hanorin sira buat importante kona-ba selebrasaun neʼe, katak Maromak proteje ninia povu. Ita-nia oan sira bele haree ho klaru katak Ita fiar Maromak proteje ita ohin loron ka lae? (Salmo [Mazmur] 27:11; Isaías [Yesaya] 12:2) Ita hakarak hanorin Ita-nia oan iha dalan neʼebé la halo sira baruk, maibé halo sira kontente atu rona. Buat neʼebé ita aprende husi Festa Salvasaun nian sei ajuda Ita-nia família atu tau fiar liután ba Jeová.

15, 16. Saida mak ita bele aprende kona-ba Jeová husi istória iha Êxodo (Keluaran) kapítulu 12-15?

¹⁵ Buat ida tan neʼebé ita bele aprende husi Festa Salvasaun nian mak, Jeová laʼós deʼit bele proteje ninia povu, maibé nia mós bele fó salvasaun ba sira. Hanoin toʼok kona-ba dalan neʼebé Jeová salva ema Israel husi rai-Egiptu. Jeová uza koluna ahi no kalohan nian atu dirije sira toʼo Tasi Mean. Depois, sira haree kuandu Jeová fahe tasi ba rua hodi halo bee sai moru neʼebé aas iha sira-nia sorin-sorin. Sira bele laʼo iha rai neʼebé maran hodi hakur tasi. Kuandu sira hakur ona, sira haree tasi baku fila ba tropa Egiptu nian. Ema Israel hahiʼi Jeová tanba nia salva sira no sira kanta: “Haʼu sei kanta ba Jeová . . . Kuda no ema neʼebé saʼe kuda, nia soe tiha ba tasi. Jah mak haʼu-nia forsa no kbiit, tanba nia mak fó salvasaun mai haʼu.”—Êxodo (Keluaran) 13:14, 21, 22; 15:1, 2; Salmo (Mazmur) 136:11-15.

¹⁶ Se Ita mak iha oan, Ita ajuda sira ka lae atu haree Jeová nuʼudar Maromak forsa boot neʼebé sei salva ninia povu? Kuandu Ita foti desizaun ruma, ka koʼalia ba Ita-nia oan, sira bele haree ka lae katak Ita tau fiar ba Jeová atu fó salvasaun ba Ita no Ita-nia família?  Se bele, koʼalia hamutuk durante adorasaun família nian kona-ba oinsá Jeová salva ninia povu iha istória sira iha Êxodo (Keluaran) kapítulu 12-15 no iha Apostolu 7:30-36 ka Daniel 3:16-18, 26-28. Maski ita idade kiʼik ka boot, ita hotu bele fiar duni katak Jeová sei salva ita iha futuru, hanesan nia halo ba ninia povu iha tempu uluk.—Lee 1 Tesalonika 1:9, 10.

17, 18. Tanbasá mak Jesus nia raan folin-boot liu fali bibi Festa Salvasaun nian?

¹⁷ Ema kristaun loos la selebra Festa Salvasaun nian. Tanbasá? Tanba ida-neʼe mak parte husi Moisés nia Ukun-Fuan neʼebé ohin loron ita la halo tuir. (Roma 10:4; Koloso 2:13-16) Maibé ita komemora loron importante seluk, neʼe mak loron neʼebé Maromak nia Oan mate. Maski nuneʼe, ita bele aprende buat barak husi Festa Salvasaun nian neʼebé hahú iha rai-Egiptu.

¹⁸ Bibi-oan nia raan neʼebé ema Israel hisik ba sira-nia odamatan-riin no leten, salva sira-nia oan primeiru nia moris. Ohin loron, ita nunka fó animál nia raan ba Maromak iha tempu Festa Salvasaun nian, ka iha tempu seluk mós. Maibé iha raan ida husi sakrifísiu seluk neʼebé iha folin boot liu. No ema neʼebé hetan salvasaun husi raan neʼe bele moris ba nafatin. Apóstolu Paulo esplika katak Jesus nia raan, “raan neʼebé hisik tiha ona”, loke dalan ba ema kose-mina sira atu moris ba nafatin iha lalehan. Sira mak “sira neʼebé moris uluk neʼebé sira-nia naran hakerek ona iha lalehan”. (Ebreu 12:23, 24, MF) Jesus nia raan mós loke dalan ba bibi seluk atu hetan moris rohan-laek iha rai. Ita hotu tenke hanoin-hetan nafatin ba promete neʼe: “Iha Kristu, ho nia raan, ita hetan maksoin no perdua ba ita-nia sala.”—Efeso 1:7.

19. Oinsá mak dalan neʼebé Jesus mate hametin ita-nia fiar ba Bíblia nia profesia?

¹⁹ Kuandu ema Israel oho bibi-oan ba Festa Salvasaun nian, sira la bele hatohar bibi nia ruin. (Êxodo 12:46; Números 9:11, 12) Oinsá ho Jesus “Maromak nia bibi-oan”, nia ruin? (Joao 1:29) Ema hedi nia ba ai-riin terus nian ho ema naʼok-teen iha ninia sorin-sorin. Ema judeu sira husu ba Pilatos atu hatohar Jesus nia ruin, no mós naʼok-teen sira-nia ruin hodi sira bele mate lalais. Hodi nuneʼe, sira bele hatún sira-nia mate-isin antes loron 15 Nisan hahú, tanba neʼe mak Sábadu loron-boot ida. Soldadu sira hatohar naʼok-teen sira-nia ain maibé “toʼo tiha Jesus, tan haree nia mate tiha ona, sira la hatohar nia ain.” (Joao 19:31-34) Sin, Jesus nia ruin sira la tohar, hanesan ho bibi-oan Festa Salvasaun nian. Tan neʼe bibi-oan Festa Salvasaun nian mak hanesan “ilas deʼit” kona-ba Jesus nia sakrifísiu iha loron 14 Nisan, tinan 33. (Ebreu 10:1) Ho ida-neʼe, liafuan iha Salmo (Mazmur) 34:20 sai loos. Neʼe hametin ita-nia fiar ba buat neʼebé Bíblia fó sai nanis, loos ka lae?

20. Saida mak buat ida neʼebé la hanesan entre Festa Salvasaun nian no Naʼi nia Han Kalan?

²⁰ Maibé iha buat balu neʼebé la hanesan entre dalan neʼebé ema judeu halaʼo Festa Salvasaun nian no oinsá Jesus haruka ninia dixípulu sira atu halaʼo Naʼi nia Han Kalan. Porezemplu, maski ema Israel sira han bibi nia naan maibé sira la hemu nia raan. Ida-neʼe la hanesan ho buat neʼebé Jesus haruka ninia dixípulu sira atu halo. Nia hatete katak sira neʼebé atu ukun iha lalehan tenke han paun no hemu tua-uvas neʼebé reprezenta Jesus nia isin no raan. Ita sei aprende tan kona-ba Memoriál ba Kristu nia mate iha lisaun tuirmai.—Marcos 14:22-25.

21. Tanbasá mak ita presiza hatene kona-ba Festa Salvasaun nian?

²¹ Festa Salvasaun nian mak buat neʼebé importante tebes iha Maromak nia povu nia istória, no ita bele aprende buat barak husi selebrasaun neʼe. Tan neʼe, maski Festa Salvasaun nian mak nuʼudar “memoriál” ba ema judeu sira, maibé ita nuʼudar ema kristaun presiza hatene no aprende kona-ba neʼe tanba “Maromak leno Eskritura hotu”.—2 Timoteo 3:16.