1. Oinsá mak “sai atan ba Jeová” neʼebé temi iha Roma 12:11 la hanesan ho sai atan baibain?

 KUANDU ita rona liafuan “atan”, baibain ita hanoin kona-ba ema ida neʼebé ninia naʼi kontrola no fó terus. Maibé sai atan ba Maromak mak la hanesan duni. Maromak nia liafuan hatete katak ema kristaun ida bele hili atu sai atan ba naʼi ida neʼebé hatudu domin. Kuandu apóstolu Paulo hatete ba ema kristaun sira atu “sai atan ba Jeová” nia hatete ba sira atu serbí Maromak tanba sira hadomi nia. (Roma 12:11) Sai atan ba Jeová katak sá loos? Saida mak ita bele halo hodi ita la sai atan ba Satanás no ninia mundu? Buat diʼak saida mak ita hetan tanba ita sai atan ba Jeová no serbí nia ho laran-metin?

2. (a) Tanbasá mak atan ida bele deside atu hela nafatin ho nia naʼi? (b) Se atan ida hetan tuu iha ninia tilun, neʼe hatudu saida?

² Maromak nia Ukun-Fuan ba povu Israel ajuda ita komprende saida mak ita tenke halo nuʼudar Jeová nia atan. Iha tempu antigu neʼebá, kuandu atan ida serbí nia naʼi ba tinan hitu ona, atan neʼe bele sai livre se nia hakarak. (Êxodo [Keluaran] 21:2) Maibé se atan neʼe hadomi ninia naʼi no lakohi husik nia, atan bele hili atu hela nafatin ho nia. Se nuneʼe, tuir Maromak nia ukun-fuan, naʼi sei lori nia atan besik odamatan nia riin no tuu ninia tilun. (Êxodo [Keluaran] 21:5, 6) Tanbasá mak nia halo hanesan neʼe? Iha lia-ebraiku, liafuan “halo tuir” mós iha arti katak “see tilun” ka “rona”. Tan neʼe, kuandu atan ida hetan tuu iha ninia tilun, neʼe hatudu katak atan neʼe hakarak atu serbí nafatin ninia naʼi ho laran tomak. Neʼe hanesan ho ita-nia dedikasaun ba Maromak. Kuandu ita dedika an ba Jeová, ita hatudu katak ita hakarak halo tuir tanba ita hadomi nia.

3. Tanbasá mak ita dedika ita-nia an ba Maromak?

³ Antes ita hetan batizmu, ita halo desizaun atu serbí Jeová no sai ninia atan. Kuandu ita dedika ita-nia an ba nia, ita promete katak ita sei halo tuir nia no halo buat hotu neʼebé nia hakarak ita atu halo. Ema ida la  obriga ita atu halo desizaun neʼe. Joven sira mós, kuandu hetan batizmu, sira halo nuneʼe laʼós atu halo sira-nia inan-aman sira kontente, maibé tanba sira rasik mak hakarak. Ita hotu halo desizaun atu dedika ita-nia an ba ita-nia Naʼi Jeová tanba ita hadomi nia. Apóstolu João hatete: “Ita-nia domin ba Maromak mak neʼe: katak ita halo tuir nia ukun-fuan sira.”—1 Joao 5:3.

4. Saida mak ita presiza halo atu sai “atan ba justisa”?

⁴ Ita agradese tebes ba Jeová tanba nia loke dalan ba ita atu sai ninia atan. Ita-nia fiar ba Jesus nia sakrifísiu bele halo ita la sai atan ba sala ka la husik sala atu ukun ita. Ida-neʼe katak maski ita sala-naʼin, maibé ita hili atu tuir Jeová no Jesus nuʼudar ita-nia Naʼi sira. Apóstolu Paulo esplika kona-ba neʼe iha ninia karta ida. Nia hatete: “Imi mós tenke haree imi-nia an nuʼudar mate ona ba sala no moris daudaun ba Maromak iha Kristu Jesus.” Depois, nia fó avizu ida-neʼe: “Imi la hatene katak imi saran an karik ba ema ruma nuʼudar nia atan, imi mak ema neʼebé imi tuir nia atan: atan sala nian, neʼebé lori ba mate; ka atan halo tuir nian neʼebé lori ba moris? Maibé, agradese ba Maromak katak, maski uluk imi sala nia atan, ohin imi, ho laran, halo tuir ona hanorin neʼebé ba nia imi saran an ona. Sai tiha husi sala nia ukun, imi sai atan ba justisa.” (Roma 6:11, 16-18) Paulo nia liafuan neʼe hatudu katak ita tenke halo tuir “ho laran”. Tan neʼe, kuandu ita dedika ita-nia an ba Maromak, ita sai “atan ba justisa”.

5. Ita hotu presiza luta hasoru saida, no tanbasá?

⁵ Nuʼudar atan ba Maromak, ita presiza luta hasoru buat rua. Primeiru mak ita-nia sala rasik. Apóstolu Paulo mós luta hasoru ida-neʼe. Nia hatete: “Iha haʼu-nia laran, haʼu haksolok iha Maromak nia ukun-fuan, maibé haʼu haree iha haʼu-nia liman ain buat seluk tan neʼebé halo funu hasoru ukun-fuan iha haʼu-nia laran, hodi kesi haʼu metin ba ukun-fuan sala nian neʼebé horik iha haʼu-nia liman ain.” (Roma 7:22, 23) Tanba ita ema sala-naʼin, ita presiza luta hasoru ita-nia hakarak isin nian neʼebé dada ita atu halo buat neʼebé Maromak la gosta. Apóstolu Paulo hatete: “Moris bá hanesan imi rasik nia naʼin, maibé keta uza imi-nia liberdade atu halo aat; imi moris hanesan Maromak nia atan.”—1 Pedro 2:16.

6, 7. Oinsá mak Satanás halo mundu neʼe dada ita-nia atensaun?

⁶ Buat segundu neʼebé ita tenke luta hasoru mak mundu neʼe neʼebé anju aat sira mak kontrola. Satanás mak ukun-naʼin ba mundu neʼe, no nia uza buat oioin atu estraga ita-nia laran-metin ba Jeová no Jesus. Satanás tenta ita atu sai parte ba ninia mundu, hodi halo ita sai ninia atan. (Lee Efeso 6:11, 12.) Dalan ida neʼebé nia halo nuneʼe mak hodi halo mundu haree hanesan kapás hodi dada ita-nia atensaun toʼo ita hakarak sai parte ba mundu neʼe. Apóstolu João fó avizu neʼe hodi hatete: “Ema neʼebé hadomi mundu, nia la hadomi Aman. Basá buat hotu neʼebé mundu neʼe nian—hakarak aat isin nian, hakarak aat matan nian, no loko-an moris nian—buat sira-neʼe la mai husi Aman, maibé mai husi mundu neʼe.”—1 Joao 2:15, 16.

⁷ Iha mundu tomak, ema hakarak atu hetan sasán barak. Satanás koko atu halo ema fiar katak ita bele kontente hodi hetan osan. Ohin loron, iklan sira neʼebé ita haree halo ema hanoin katak buat neʼebé importante liu mak atu hetan sasán barak no atu goza moris. Porezemplu, programa sira hatudu katak ita-nia moris bele kontente liu se ita hetan serbisu neʼebé diʼak iha rai seluk. No dala ruma ida-neʼe envolve ransu barak ho ema mundu sira. Sin, mundu neʼe hakaʼas ita atu troka ita-nia moris hodi tuir mundu neʼe nia hakarak.

8, 9. Saida mak perigu ba ita hotu, no tanbasá?

 ⁸ Apóstolu Pedro fó avizu kona-ba ema balu iha kongregasaun neʼebé komesa atu hanoin hanesan mundu nian. Nia hatete: “Sira hanoin atu haksolok iha loron. Sira hanesan buat foʼer no aat, haksolok iha sira-nia moris aat, halimar ho imi. Basá, hodi gaba an makaʼas ho liafuan beik, sira buka, ho hakarak aat ema laran foʼer nian, atu dada ema neʼebé foin halai husi sira neʼebé moris tuir hanorin neʼebé la loos. Sira hakotu liberdade ba sira-neʼe, maibé sira rasik mak laran-dodok nia atan.”—2 Pedro 2:13, 18, 19.

⁹ Se ita halo tuir “hakarak aat matan nian”, katak, hakaʼas an atu hetan buat hotu neʼebé ita hakarak, ita sei la livre ona no sei sai atan ba Diabu Satanás. (1 Joao 5:19) Atu sai atan ba hakarak aat neʼe mak perigu ba ita hotu, no se ida-neʼe akontese karik, susar tebes atu sai livre.

10, 11. Satanás gosta liuliu atu lasu sé? Eskola boot bele hanetik joven kristaun sira atu halo saida?

¹⁰ Hanesan Satanás halo iha jardín Eden, nia lasu ema neʼebé ladún iha esperiénsia. Liuliu, sira neʼebé nia gosta atu ataka mak joven sira. Nia la kontente duni kuandu joven ida, ka ema seluk, foti desizaun atu sai atan ba Jeová. Satanás lakohi sira neʼebé dedika sira-nia moris ba Jeová ho laran atu kumpre sira-nia promete ba Maromak.

¹¹ Hanoin fila fali kona-ba atan iha tempu antigu. Kuandu ninia naʼi tuu nia tilun, karik nia sente moras uitoan. Maibé depois neʼe, nia iha marka neʼebé hatudu ba ema hotu katak nia hili atu hela nafatin ho ninia naʼi. Hanesan neʼe mós, dala ruma susar ba joven sira atu foti desizaun neʼebé la hanesan ho sira-nia kolega sira. Porezemplu, Satanás halo ema hanoin katak, atu sai kontente iha mundu neʼe, presiza hetan serbisu neʼebé diʼak. Maibé tuir loloos, dalan atu sai kontente mak hodi tau Jeová uluk iha ita-nia moris. Jesus hatete: “Ksolok ba sira neʼebé hamlaha no hamrook ba justisa, basá sira sei bosu.” (Mateus 5:6) Ema kristaun sira dedika sira-nia moris atu halo Maromak Jeová nia hakarak, laʼós Satanás nian. Sira lee Bíblia no hanoin kleʼan kona-ba buat neʼebé sira lee “loron no kalan”. (Lee Salmo [Mazmur] 1:1-3. a) Maibé kuandu  ema ida hili atu tuir eskola boot, neʼe bele hamenus ninia tempu atu estuda Maromak nia liafuan no atu serbí Jeová.

12. Joven sira ohin loron tenke foti desizaun saida?

¹² Iha apóstolu Paulo nia tempu, se atan ida mak ema kristaun maibé ninia naʼi laʼós ema kristaun, ida-neʼe bele halo susar ba atan neʼe. Iha ninia karta primeiru ba ema Korinto, nia hatete: “Ó atan wainhira Maromak bolu ó? La halo buat ida. Maibé ó bele sai laʼós atan ona karik, buka atu sai ema neʼebé laʼós atan.” (1 Korinto 7:21) Se atan iha naʼi neʼebé fó terus ba nia, nia sei kontente liu se nia livre. Hanesan ho ohin loron, hodi tuir governu nia lei, joven sira tenke tuir eskola ba tinan balu. Maibé depois neʼe, joven sira rasik mak sei hili atu tuir eskola boot ka lae. Se sira hili eskola boot, tan deʼit hakarak atu hetan serbisu neʼebé diʼak iha mundu neʼe, ida-neʼe bele lori susar ba sira atu halaʼo serbisu tempu-tomak ba Maromak Jeová.—Lee 1 Korinto 7:23.

13. Saida mak edukasaun neʼebé sei ajuda liu Maromak nia atan sira?

¹³ Apóstolu Paulo mós fó avizu ba ema kristaun sira iha Koloso hodi dehan: “Haree bá katak ema ida la halo imi sai atan hodi lohi imi ho liafuan neʼebé mai husi matenek ema nian, no husi neon sira neʼebé ukun mundu neʼe, laʼós husi Kristu.” (Koloso 2:8) Ohin loron, iha eskola boot, mestre sira hanorin “liafuan neʼebé mai husi matenek ema nian” hanesan filozofia ka ema nia tradisaun sira. No baibain, ema neʼebé tuir eskola boot la aprende buat neʼebé bele ajuda sira iha sira-nia moris loroloron nian. Maibé ema kristaun sira hili edukasaun neʼebé bele fó ba sira matenek neʼebé sira presiza atu halaʼo moris neʼebé simples hodi bele serbí Maromak. Sira rona didiʼak apóstolu Paulo nia konsellu ba Timóteo: “Relijiaun lori duni mai moris diʼak, maibé ba sira deʼit neʼebé laran-haksolok ho buat neʼebé sira iha ona. Maibé wainhira ita iha ai-han no hatais, ita haksolok ona ho sira-neʼe.” (1 Timoteo 6:6, 8) Duké buka atu hetan surat ka diploma, ema kristaun neʼebé loos, buka atu badinas iha sira-nia serbisu haklaken hodi ajuda ema seluk atu sai Jesus nia dixípulu.—Lee 2 Korinto 3:1-3.

14. Tuir Filipe 3:8, oinsá mak apóstolu Paulo haree ninia knaar nuʼudar atan ba Maromak no Kristu?

¹⁴ Hanoin toʼok kona-ba apóstolu Paulo nia ezemplu. Mestre ida kona-ba ema judeu nia ukun-fuan naran Gamaliel mak  hanorin nia. Edukasaun neʼebé Paulo simu bele kompara ho edukasaun iha universidade. Maibé kuandu nia hanoin kona-ba ninia serbisu ba Maromak no Kristu, oinsá mak Paulo haree edukasaun neʼe? Nia hatete: “Wainhira haʼu hatene ona Kristu, haʼu-nia Naʼi, haʼu hahú haree buat hotu nuʼudar folin-laek.” Depois nia hatutan tan: “Tan nia, haʼu husik lakon deʼit buat hotu, hodi haree buat seluk hotu hanesan buat mesak foʼer, wainhira haʼu bele manán Kristu.” (Filipe 3:8) Paulo nia hanoin kona-ba neʼe bele ajuda joven sira no sira-nia inan-aman atu foti desizaun neʼebé matenek kona-ba edukasaun. (Haree dezeñu sira.)

15, 16. Maromak Jeová nia organizasaun fó edukasaun saida? Ho razaun saida mak ita simu edukasaun?

¹⁵ Universidade iha mundu mak fatin hanesan saida? Baibain, alunu sira neʼebé iha universidade hakarak hatudu sai sira-nia opiniaun hodi kontra hasoru governu no ema boot sira. (Efeso 2:2) Maibé kongregasaun laran mak fatin neʼebé hakmatek, no iha-neʼe mak Maromak Jeová nia organizasaun fó edukasaun neʼebé diʼak liu. Ita ida-idak bele aprende husi Eskola Serbisu Kristaun no iha mós eskola sira seluk neʼebé bele ajuda ita. Porezemplu, iha eskola ida ba irmaun pioneiru sira (Eskola Bíblia nian ba Irmaun sira neʼebé Laiha Kaben) no ida ba kaben-naʼin sira (Eskola Bíblia ba Kaben-Naʼin Kristaun). Eskola sira-neʼe bele ajuda ita atu halo tuir ita-nia Naʼi Jeová.

¹⁶ Ita bele keʼe kleʼan atu buka lia-loos barak hodi uza Indeks Publikasi Menara Pengawal ka hodi uza Watchtower Library iha CD-ROM ka Livru Haklaken Biblioteka Online. Ita simu edukasaun kona-ba Bíblia hodi ita bele adora Maromak Jeová. Neʼe mós hanorin ita oinsá ita bele ajuda ema seluk atu sai Maromak nia belun. (2 Korinto 5:20) Ikusmai, ema neʼebé ita hanorin bele hanorin fali ema seluk.—2 Timoteo 2:2.

17. Saida mak bensaun sira neʼebé ita hetan se ita hili edukasaun neʼebé diʼak liu?

¹⁷ Jesus nia ai-knanoik kona-ba talenta sira, iha atan rua neʼebé laran-metin no hetan gaba husi sira-nia naʼi. Ida-neʼe halo sira hotu kontente no sira-nia naʼi fó serbisu tan. (Lee Mateus 25:21, 23.) Ita mós bele sai kontente iha ita-nia moris se ita hili edukasaun neʼebé diʼak liu. Porezemplu, mane ida naran Michael mak alunu neʼebé hetan susesu iha eskola. Ninia mestre-mestra sira koʼalia hamutuk ho Michael hodi halo planu ho nia kona-ba universidade, maibé sira hakfodak atu hatene katak nia lakohi atu tuir eskola boot. Michael deside atu tuir kursu neʼebé badak deʼit hodi nia bele hetan treinu. Ho treinu neʼe, nia hetan serbisu neʼebé ajuda nia atu tau matan ba ninia presiza sira no bele foti pioneiru. Michael sente katak nia halo desizaun neʼebé loos ka lae? Nia hatete katak edukasaun neʼebé nia simu husi Bíblia no nuʼudar katuas iha kongregasaun mak ajuda tebes nia. Nia hatete: “Bensaun sira neʼebé haʼu simu mak folin boot liu fali osan neʼebé haʼu simu se karik haʼu tuir universidade. Haʼu kontente tebes tanba haʼu hili atu la tuir eskola boot.”

18. Tanbasá mak ita hakarak hili edukasaun neʼebé diʼak liu?

¹⁸ Edukasaun neʼebé diʼak liu hotu mak hanorin ita kona-ba Maromak nia hakarak no ajuda ita atu sai Jeová nia atan sira. Neʼe fó esperansa ba ita atu “sai husi situasaun atan nian neʼebé sei dodok, hodi halo parte, nuʼudar Maromak nia oan, iha ema neʼebé laʼós atan nia kmanek.” (Roma 8:21) No buat neʼebé importante liu mak liuhusi dalan neʼe mak ita bele hatudu katak ita hadomi ita-nia Naʼi Jeová.—Êxodo [Keluaran] 21:5.