1, 2. Esplika toʼok saida mak Jesus halo depois selebra Páskua ho ninia apóstolu sira iha tinan 33?

 IHA kalan 14 Nisan, iha tinan 33, Jesus no ninia belun diʼak sira foin selebra Páskua. Selebrasaun neʼe fó-hanoin ba sira tempu uluk neʼebé Jeová halo ema Israel sai livre husi rai-Egiptu. Maibé Jesus nia dixípulu sira atu hetan salvasaun iha dalan boot liu tanba loron tuirmai, Jesus nia inimigu sira oho nia. Maibé Jesus nia moris perfeitu neʼebé nia fó nuʼudar sakrifísiu loke dalan ba ema hotu atu sai livre husi sala no mate.—Ebreu 9:12-14.

² Atu ita la haluha buat neʼebé Maromak halo mai ita, Jesus hahú selebrasaun foun atu troka Páskua. Nia foti paun neʼebé la iha fermentu, silu tiha paun, nia fó ba ninia apóstolu naʼin-11 neʼebé laran-metin ba nia. Nia dehan ba sira: “Neʼe haʼu-nia isin saran tanba imi; halo ida-neʼe hodi hanoin haʼu.” Nia halo hanesan ho kalis tua mean, no hatete ba sira: “Neʼe kalis moruk foun nian [“aliansa foun”, MF] iha haʼu-nia raan nakfakar tanba imi.”—Lucas 22:19, 20.

3. (a) Jesus nia mate lori mudansa boot saida? (b) Nuʼudar ita lee kona-ba Jesus nia orasaun, pergunta saida deʼit mak ita hanoin?

³ Lakleur tan, aliansa Ukun-Fuan nian entre Maromak no nasaun Israel sei ramata hodi troka ho aliansa foun entre Jeová no Jesus nia dixípulu sira neʼebé Jeová hili atu moris iha lalehan. Jesus lakohi ninia dixípulu sira atu sai hanesan nasaun Israel. Nasaun Israel la adora Jeová ho unidade, no ida-neʼe la hatudu respeitu ba Maromak nia naran. (Joao 7:45-49; Apostolu 23:6-9) Jesus hakarak ninia dixípulu sira atu serbisu hamutuk ho unidade hodi sira bele fó glória ba Maromak nia naran. Tan neʼe, Jesus halo saida? Nia husu  ninia Aman nia ajuda iha orasaun ida neʼebé furak tebes iha ema nia istória. Hodi lee orasaun neʼe mak espesiál ba ita hotu. (Haree dezeñu iha pájina 26.) Orasaun neʼe bele lee iha Joao 17:1-26. Nuʼudar ita koʼalia kona-ba orasaun neʼe, hanoin toʼok kona-ba pergunta sira neʼe: “Maromak Jeová hatán Jesus nia orasaun ka lae? Haʼu halo tuir Jesus nia orasaun ka lae?”

4, 5. (a) Saida mak ita aprende husi parte primeiru iha Jesus nia orasaun? (b) Oinsá mak Jeová hatán buat neʼebé Jesus husu ba ninia an?

⁴ Jesus koʼalia ba ninia dixípulu sira toʼo kalan hodi hanorin sira buat furak barak. Depois, nia foti ninia matan ba lalehan hodi halo orasaun. Nia hatete: “Aman, oras toʼo ona mai. Fó glória ba Ita Oan-Mane, atu Ita Oan-Mane bele fó glória ba Ita; nuʼudar Ita fó ona ba nia kbiit atu ukun ema tomak, atu fó moris rohan-laek ba sira hotu neʼebé Ita tau iha nia liman.” Nia hatutan tan: “Haʼu hahiʼi ona Ita iha rai hodi halo toʼo rohan serbisu neʼebé Ita haruka haʼu atu halo. Aman, oras neʼe hahiʼi fali haʼu bá ho glória neʼebé haʼu iha ho Ita, molok mundu mosu mai.”—Joao 17:1-5.

⁵ Jesus komesa ninia orasaun hodi temi buat neʼebé importante liu ba nia. Primeiru, Jesus harohan katak ninia Aman bele hetan glória. Kuandu Jesus hanorin ninia dixípulu sira atu halo orasaun nia mós temi uluk ida-neʼe. (Lucas 11:2) Segundu, nia halo orasaun kona-ba ninia apóstolu sira-nia presiza. Nia husu katak “nia bele fó ba sira moris rohan laek”. Ikusmai, Jesus husu buat ruma ba ninia an rasik. Nia husu: “Aman, oras neʼe hahiʼi fali haʼu bá ho glória neʼebé haʼu iha ho Ita, molok mundu mosu mai.” Maromak Jeová rona ba ninia Oan nia orasaun hodi fó kolen neʼebé furak liután. Maromak fó ba nia naran neʼebé “kmanek liu anju sira-nian”.—Ebreu 1:4.

6. Saida mak apóstolu sira presiza halo atu simu moris rohan-laek? Oinsá mak ita hatene katak sira halo nuneʼe duni?

⁶ Iha Jesus nia orasaun, nia mós temi buat neʼebé ita presiza halo atu bele simu moris ba nafatin. (Lee Joao 17:3.) Nia hatete katak ita presiza “hatene” kona-ba Maromak no Kristu. Oinsá mak ita bele halo ida-neʼe? Ulukliu, ita presiza hakaʼas an hodi aprende kona-ba Jeová no Jesus. Segundu, ita presiza halo tuir iha ita-nia moris buat neʼebé ita aprende ona. Jesus nia apóstolu sira halo buat rua neʼe, tanba Jesus hatete iha ninia orasaun: “Haʼu haklaken tiha ba sira lia hirak neʼebé Ita fó mai haʼu. Sira simu ona lia hirak-neʼe.” (Joao 17:8) Maibé atu bele simu moris rohan-laek, sira presiza hanoin kleʼan nafatin kona-ba Maromak nia Liafuan no halo tuir buat neʼebé sira aprende iha sira-nia moris loroloron nian. Apóstolu sira halo ida-neʼe nafatin iha sira-nia moris iha mundu ka lae? Sin. Ita hatene ida-neʼe tanba sira-nia naran ida-idak hakerek iha fatuk boot 12 nia leten neʼebé hun ba Jerusalém Foun lalehan nian.—Apokalipse 21:14.

7. Atu “hatene” Maromak, neʼe katak sá? No tanbasá mak ida-neʼe importante tebes?

⁷ Se ita hakarak atu moris ba nafatin, ita mós presiza “hatene” kona-ba Maromak. Neʼe katak sá loos? Liafuan husi lia-gregu neʼebé tradús nuʼudar “hatene” mós bele iha arti “kontinua atu hatene”. Tan neʼe, atu “hatene” Maromak, neʼe katak ita tenke aprende nafatin kona-ba nia. Maibé neʼe laʼós deʼit katak ita hatene kona-ba ninia hahalok no hakarak. Tuir loloos,  ita tenke hadomi nia ho laran tomak no sai ninia belun. No ita mós presiza hatudu domin ba ita-nia irmaun-irmán sira. Bíblia hatete: “Ema neʼebé la hadomi la hatene Maromak, basá Maromak mak domin.” (1 Joao 4:8) Atu hatene Maromak, neʼe mós envolve halo tuir nia. (Lee 1 Joao 2:3-5.) Ita sente espesiál tebes tanba ita iha oportunidade atu hatene Jeová, loos ka lae? Maibé ita tenke kuidadu atu ita la lakon ita-nia relasaun ho Jeová, hanesan Judas Iscariotes. Nuneʼe, mai ita hakaʼas an atu haburas liután ita-nia relasaun ho Jeová. Se ita halo nuneʼe, Jeová sei fó ba ita prezente moris rohan-laek.—Mateus 24:13.

8, 9. Kuandu Jesus hela iha rai, saida mak importante liu ba nia? Hanorin saida mak Jesus odi tebes?

⁸ Nuʼudar ita lee Jesus nia orasaun iha Joao kapítulu 17, ita bele haree katak Jesus la hadomi deʼit ninia apóstolu sira, maibé nia mós hadomi ita. (Joao 17:20) Maibé tuir loloos, ita-nia salvasaun laʼós buat neʼebé importante liu ba Jesus. Durante ninia moris iha rai, buat neʼebé importante liu ba Jesus mak atu hahiʼi ninia Aman nia naran. Porezemplu, kuandu Jesus esplika kona-ba tanbasá mak nia mai toʼo mundu, nia lee liafuan sira-neʼe husi livru Isaías: “Naʼi [Jeová, MF] nia espíritu iha haʼu, basá nia foti tiha haʼu atu haklaken lia-foun diʼak ba kiak sira.” Ita bele fiar katak Jesus temi ho momoos Jeová nia naran kuandu nia lee ida-neʼe.—Lucas 4:16-21.

⁹ Kleur antes Jesus mai toʼo mundu, ulun-naʼin judeu sira hanorin ema katak la bele uza Maromak nia naran. Ita bele fiar katak Jesus odi tebes kostume neʼe. Nia hatete ba ulun-naʼin sira-neʼe: “Haʼu mai hodi haʼu Aman nia naran, no imi la simu haʼu; ema seluk mai karik hodi nia naran rasik, imi sei simu nia.” (Joao 5:43) Depois, loron balu antes nia mate, dala ida tan nia hatete saida mak importante liu ba nia. Iha ninia orasaun nia hatete: “Aman hahiʼi Ita-nia naran!” (Joao 12:28) No iha orasaun neʼebé agora ita estuda, ita  bele haree katak buat neʼebé importante liu iha Jesus nia moris mak atu fó glória ba ninia Aman nia naran.

10, 11. (a) Hodi haklaken ninia Aman nia naran, Jesus halo saida? (b) Tanbasá mak ema neʼebé banati-tuir Jesus haklaken Jeová nia naran?

¹⁰ Jesus harohan hodi hatete: “Haʼu haklaken tiha Ita naran ba ema sira neʼebé Ita haraik mai haʼu husi mundu. Sira Ita-nian no Ita fó sira mai haʼu; sira moris tuir ona Ita-nia liafuan. Ohin haʼu la hela ona iha mundu, maibé sira sei hela iha mundu, no haʼu bá hasoru Ita. Aman Santu, tau matan ba sira iha Ita naran neʼebé Ita haraik mai haʼu, atu sira sai ida deʼit nuʼudar Ita ho haʼu ida deʼit.”—Joao 17:6, 11.

¹¹ Kuandu Jesus haklaken ninia Aman nia naran ba ninia dixípulu sira, nia uza Maromak Jeová nia naran. Maibé liután neʼe, Jesus mós ajuda sira atu komprende kona-ba Jeová mak sé. Nia hanorin sira kona-ba Jeová nia hahalok furak sira no kona-ba oinsá nia tau matan ba ita ho domin. (Êxodo [Keluaran] 34:5-7) Agora daudaun, Jesus mak Liurai iha lalehan, no nia ajuda nafatin ninia dixípulu sira ohin loron atu haklaken kona-ba Jeová nia naran. Tanbasá mak serbisu neʼe halaʼo iha mundu? Hodi bele ajuda ema atu aprende kona-ba Maromak Jeová antes mundu aat neʼe ramata. Iha tempu neʼe, Jeová sei salva ninia atan sira neʼebé laran-metin ba nia, no ema hotu sei hatene Jeová nia naran neʼebé furak!—Ezequiel (Yehezkiel) 36:23.

12. Ita presiza halo buat tolu saida atu halo hotu serbisu neʼebé Jesus hahú?

¹² Jesus haruka ninia dixípulu sira atu halo hotu serbisu neʼebé Jesus mak hahú. Iha ninia orasaun nia hatete: “Nuʼudar Ita haruka haʼu mai iha mundu, nuneʼe mós haʼu haruka sira ba mundu.” Maibé Jesus hatene katak sira presiza ajuda atu halo serbisu neʼe. Kuandu Jesus hamutuk ho sira, nia hakaʼas an atu ajuda sira manán sira-nia fraku. No iha ninia orasaun nia husu ba Jeová atu ajuda ninia dixípulu sira atu halo buat tolu neʼebé importante. Primeiru, nia husu katak ninia dixípulu sira la hola parte iha Satanás nia mundu. Segundu, nia husu katak sira halo tuir Maromak nia Liafuan hodi sai santu nafatin. Terseiru, Jesus husu makaʼas katak ninia dixípulu sira bele sai ida deʼit, hanesan nia ho ninia Aman mós iha unidade. Ita ida-idak presiza husu ba ita-nia an: “Haʼu rasik halo buat tolu neʼe neʼebé Jesus temi iha ninia orasaun ka lae?” Jesus iha fiar katak, se ninia dixípulu sira halo buat sira-neʼe, ema barak sei simu sira-nia mensajen.—Lee Joao 17:15-21.

13. Oinsá mak Jeová hatán Jesus nia orasaun iha apóstolu sira-nia tempu?

¹³ Ita bele fiar katak Jeová hatán Jesus nia orasaun kuandu ita estuda livru Apóstolu. Tanbasá? Tanba ema kristaun sira iha apóstolu nia tempu mak ema judeu, ema jentiu, ema neʼebé riku no ema neʼebé kiak, atan sira no atan naʼin. Tanba iha ema oioin iha kongregasaun laran, fasil atu la iha unidade. Maibé tuir loloos, sira iha unidade neʼebé metin hodi apóstolu Paulo hatete katak sira hanesan parte oioin iha isin-lolon ida deʼit ho Jesus nuʼudar sira-nia ulun. (Efeso 4:15, 16) Sira bele adora Maromak nuʼudar ida deʼit iha Satanás nia mundu neʼebé la iha unidade, tanba Jeová fó ninia espíritu santu ba sira.—1 Korinto 3:5-7.

14. Oinsá mak Jeová hatán Jesus nia orasaun iha ita-nia tempu?

¹⁴ Maibé triste tebes katak depois apóstolu sira mate, hanorin falsu sira tama iha kongregasaun. Ema barak kontra lia-loos toʼo ikusmai relijiaun kristaun neʼebé falsu  barak mak mosu no unidade la iha ona. (Apostolu 20:29, 30) Maibé iha tinan 1919, Jesus halo ema kristaun kose-mina sira sai livre husi relijiaun falsu no nia ‘kesi metin sira atu sai buat furak ida deʼit’. (Koloso 3:14) Saida mak rezultadu husi sira-nia serbisu haklaken neʼebé sira halaʼo ho unidade? Agora daudaun, ema naʼin-7.000.000 “husi nasaun, rasa, umakain no lia hotu-hotu” serbí Maromak hamutuk ho ema kose-mina sira. (Apokalipse 7:9; Joao 10:16) Neʼe hatudu katak Jeová fó resposta ba Jesus nia orasaun katak “mundu sei hatene katak Ita mak haruka haʼu mai, no mós katak Ita hadomi sira nuʼudar Ita hadomi haʼu”.—Joao 17:23.

15. Jesus husu katak Maromak halo saida ba ninia dixípulu sira?

¹⁵ Iha kalan 14 Nisan, Jesus fó glória ba ninia apóstolu sira hodi halo aliansa ho sira atu sira bele ukun hamutuk ho nia iha lalehan. (Lucas 22:28-30; Joao 17:22) Agora, iha ninia orasaun, nia temi kona-ba sira hotu neʼebé sei ukun hamutuk ho nia: “Aman, haʼu hakarak katak sira mós neʼebé Ita fó mai haʼu, hela hamutuk ho haʼu iha fatin neʼebé haʼu hela; atu sira bele haree haʼu-nia glória neʼebé Ita fó tiha mai haʼu tan Ita hadomi haʼu molok mundu hahú.” (Joao 17:24) Duké sente laran-moras kona-ba ema kose-mina sira-nia kolen, bibi seluk sente kontente kona-ba neʼe. Ida-neʼe mós hatudu katak ema kristaun sira neʼebé loos ohin loron mak iha unidade.

16, 17. (a) Iha Jesus nia orasaun parte ikus, nia hatete katak nia sei kontinua halo saida? (b) Ita mós hakarak kontinua atu halo saida?

¹⁶ Ohin loron ema barak iha mundu neʼe lakohi atu haree katak Jeová iha povu neʼebé iha unidade no hatene didiʼak nia. Baibain, ida-neʼe akontese tanba ulun-naʼin relijiaun sira hanorin buat neʼebé falsu, hanesan mós iha Jesus nia tempu. Tan neʼe ikusmai Jesus dehan: “Aman Santu, mundu neʼe la hatene Ita; maibé sira-neʼe hatene katak Ita mak haruka haʼu mai. Haʼu fó-hatene tiha ba sira Ita-nia naran, no haʼu sei fó-hatene liután, atu domin neʼebé Ita hadomi haʼu bele hela iha sira, no haʼu hela iha sira.”—Joao 17:25, 26.

¹⁷ Sin, Jesus fó-hatene Maromak nia naran duni. Nuʼudar ulun ba kongregasaun, Jesus kontinua ajuda ita habelar ninia Aman nia naran no hakarak. Mai ita hakruʼuk ba nia nuʼudar ita-nia ulun no halo tuir nia ukun-fuan ho laran-manas hodi haklaken no halo dixípulu sira. (Mateus 28:19, 20; Apostolu 10:42) Ita hotu mós hakarak atu hakaʼas an hodi haburas unidade. Kuandu ita halo buat hirak-neʼe, ita mós sei halo tuir Jesus nia orasaun hodi hahiʼi Jeová nia naran no ikusmai hetan ksolok ba nafatin.