‘Haʼu sei hamutuk ho imi’
‘Haʼu sei hamutuk ho imi’
“Ema barak sei buka-hatene ho didiʼak, no koñesimentu neʼebé loos sei sai barak.”—DAN 12:4.
OINSÁ ITA HATÁN?
Iha tempu modernu, oinsá mak “koñesimentu neʼebé loos” sai klaru?
Oinsá mak ema neʼebé simu lia-loos sai “barak”?
Iha dalan saida deʼit mak koñesimentu neʼebé loos sai “barak”?
1, 2. (a) Saida mak hatudu katak Jesus hamutuk ho ita agora no sei hamutuk ho ita iha futuru? (b) Tuir Daniel 12:4, estuda didiʼak Bíblia lori rezultadu saida?
HANOIN toʼok katak ita iha ona iha mundu foun. Dadeer-dadeer, kuandu ita hadeer, ita sente kontente no prontu atu halo serbisu oioin iha loron neʼe. Moras hotu la iha ona. Ita-nia matan la sai aat, tilun la sai diuk, no bele han ai-han sira neʼebé gostu. Ita iha forsa no kontente atu halo serbisu. Ita mós iha kolega barak, no la iha buat ida neʼebé halo ita sente laran-susar. Sin, ita bele haksolok ho bensaun hanesan neʼe iha Maromak nia Ukun nia okos. Ita-nia Liurai, Jesus Kristu, sei haraik bensaun ba ema hotu iha rai no hanorin sira kona-ba Maromak Jeová.
2 Iha tempu neʼebá, Maromak no ninia Oan sei ajuda atan sira neʼebé laran-metin atu sira bele hanorin ema seluk kona-ba Jeová. Tuir loloos, Jeová no Jesus sempre ajuda ema kristaun atu halo serbisu neʼe. Antes Jesus atu saʼe ba lalehan, nia promete ba ninia dixípulu sira katak nia sei nafatin hamutuk ho sira. (Lee Mateus 28:19, 20.) Atu hametin ita-nia fiar kona-ba neʼe, mai ita haree eskritura ida husi Maromak nia Liafuan neʼebé profeta Daniel hakerek iha sidade Babilónia maizumenus tinan 2.500 liubá. Daniel koʼalia kona-ba “tempu nia rohan” neʼebé ita moris daudauk, hodi dehan: “Ema barak sei buka-hatene ho didiʼak, no koñesimentu neʼebé loos sei sai barak.” (Dan 12:4) Profesia neʼe hatudu katak kuandu ita buka-hatene ka estuda didiʼak Bíblia, ida-neʼe lori rezultadu diʼak tanba ita hetan bensaun hodi hatene ho loloos no momoos kona-ba Maromak nia Liafuan. Daniel nia liafuan mós hatudu katak ema barak sei hetan “koñesimentu neʼebé loos”. Neʼe katak sira neʼebé simu koñesimentu neʼe mós hanorin fali ema seluk. Kuandu ita haree ho didiʼak kona-ba oinsá mak profesia neʼe sai loos, ita bele hatene ho klaru katak Jesus hamutuk ho ninia dixípulu sira ohin loron no katak Jeová mak Maromak neʼebé kumpre buat hotu neʼebé nia promete.
“KOÑESIMENTU NEʼEBÉ LOOS” SAI KLARU
3. Depois apóstolu sira mate tiha, saida mak akontese?
3 Depois apóstolu sira mate tiha, ema kristaun balu komesa sees husi hanorin neʼebé loos, no hanorin falsu sira habelar lalais hanesan ahi han rai. (Apos 20:28-30; 2 Tes 2:1-3) Durante tinan atus ba atus husi tempu neʼebá, ema barak neʼebé temi sira-nia an nuʼudar kristaun mós la iha “koñesimentu neʼebé loos”. Maski ulun-naʼin igreja sira hatete katak sira fiar Bíblia, maibé sira fó sai hanorin bosok, ka “diabu nia hanorin” neʼebé la fó glória ba Maromak. (1 Tim 4:1) Rezultadu mak ema barak la iha oportunidade atu hatene lia-loos kona-ba Maromak. Hanorin bosok sira-neʼe inklui kona-ba Trindade, mate-klamar, no mós kastigu ba nafatin iha infernu.
4. Oinsá mak grupu ema kristaun ida komesa buka “koñesimentu neʼebé loos” maizumenus tinan 140 liubá?
4 Maibé, maizumenus tinan 140 liubá, ka tinan 40 antes “loron ikus sira” hahú, grupu kiʼik ida husi ema kristaun sira neʼebé laran-moos iha Pennsylvania, iha Estadus Unidus Amérika, komesa halibur hamutuk atu estuda didiʼak Bíblia no buka “koñesimentu neʼebé loos”. (2 Tim 3:1) Sira bolu sira-nia an nuʼudar Estudante Bíblia. Sira haraik an no prontu atu halo tuir Maromak nia hakarak ho laran. Sira laʼós “ema matenek no neon-naʼin sira”, neʼebé Jesus uluk hatete katak Maromak sei subar hela matenek husi sira. (Mt 11:25) Sira lee, koʼalia ba malu, no hanoin didiʼak kona-ba eskritura sira iha Bíblia no halo ida-neʼe ho badinas no hodi halo orasaun. Sira mós kompara eskritura sira hodi hatene oinsá mak eskritura ida liga malu ho eskritura seluk, no buka-hatene buat neʼebé ema seluk hakerek tiha ona kona-ba neʼe. Neineik-neineik, Estudante Bíblia sira-neʼe hetan lia-loos neʼebé kleur ona la klaru.
5. Tanbasá mak Estudante Bíblia sira halo tratu The Old Theology?
5 Maski Estudante Bíblia sira sente kontente kona-ba lia-loos neʼebé sira aprende daudauk, maibé sira la husik ida-neʼe atu halo sira sai foti-an. Sira komprende katak lia-loos sempre iha ona iha Bíblia laran. Entaun, sira nunka hatete ba ema seluk katak sira hetan buat foun ida. (1 Kor 8:1) Duké halo nuneʼe, sira halo tratu ho títulu The Old Theology atu ajuda ema hatene lia-loos neʼebé hakerek ona iha Bíblia laran. Edisaun primeiru husi tratu neʼe hatete katak sira halo tratu neʼe tanba sira hakarak ajuda ema seluk atu estuda Bíblia, hodi nuneʼe sira la simu tan “ema nia tradisaun falsu hotu”, maibé simu fali hanorin loos ka “hanorin uluk nian” husi Jesus no apóstolu sira.—The Old Theology, No. 1, Abríl 1889, pájina 32.
6, 7. (a) Maizumenus husi tinan 140 liubá, lia-loos saida deʼit mak ita komprende? (b) Lia-loos saida deʼit mak halo ita kontente?
6 Maizumenus husi tinan 140 liubá, Testemuña ba Jeová aprende ona lia-loos barak neʼebé furak loos! * Kuandu ita estuda lia-loos sira-neʼe, tuir loloos ita laʼós deʼit aprende kona-ba informasaun ruma, maibé ita aprende lia-loos neʼebé halo ita-nia moris iha folin liu no iha esperansa. Lia-loos sira-neʼe ajuda ita atu hatene Jeová, ninia hahalok furak sira no ninia hakarak. Lia-loos sira-neʼe mós esplika kona-ba Jesus nia knaar, tanbasá mak nia moris no mate, no saida mak nia halo daudauk. Liuhusi lia-loos sira-neʼe, ita bele hatene tanbasá mak Maromak husik buat aat atu akontese, tanbasá mak ita mate, oinsá atu halo orasaun, no oinsá mak ita bele hetan moris kontente.
7 Maski profesia sira sai hanesan “segredu” durante tinan atus ba atus, maibé ohin loron, ita bele komprende kona-ba profesia sira-neʼe tanba sira sai loos daudauk iha loron ikus sira-neʼe. (Dan 12:9) Profesia sira-neʼe barak hakerek iha Evanjellu sira no mós iha livru Apokalipse. Liután neʼe, Jeová ajuda ita atu komprende kona-ba buat neʼebé akontese iha lalehan neʼebé ita-nia matan la bele haree, hanesan Jesus sai liurai, funu iha lalehan, no duni tun Satanás ba mundu. (Apok 12:7-12) Maromak mós ajuda ita atu komprende kona-ba buat neʼebé ita-nia matan bele haree. Porezemplu, ita komprende tanbasá mak iha funu, rai-nakdoko, moras-peste, rai-hamlaha, no mós tanbasá mak ema hatudu hahalok aat oioin hodi aumenta “susar barak” iha loron ikus sira-neʼe.—2 Tim 3:1-5; Lc 21:10, 11.
8. Sé mak ajuda ita atu hatene lia-loos?
8 Jesus hatete ba ninia dixípulu sira: “Ksolok ba matan sira neʼebé haree buat neʼebé imi haree, basá haʼu dehan ba imi katak profeta no liurai sira barak uluk nian hakarak haree buat neʼebé imi haree, maibé sira la haree; no rona buat neʼebé imi rona, maibé sira la rona.” (Lc 10:23, 24) Ohin loron, ita mós sente hanesan neʼe. Ita “haree” no “rona” ka komprende lia-loos tanba Jeová ajuda ita. No ita mós agradese tebes tanba Maromak uza “ksolok-naʼin”, ka ninia espíritu santu atu ajuda ita komprende didiʼak “lia-loos tomak”. (Lee Joao 16:7, 13.) Tan neʼe, mai ita hafolin nafatin “koñesimentu neʼebé loos” no kontinua fahe ida-neʼe ba ema seluk!
“EMA BARAK” SIMU “KOÑESIMENTU NEʼEBÉ LOOS”
9. Livru Watch Tower, fulan-Abríl 1881, fó konvite saida ba lee-naʼin sira?
9 Tinan rua liutiha depois Estudante Bíblia sira halo livru Watch Tower edisaun primeiru, livru neʼe fó sai konvite ida iha edisaun fulan-Abríl 1881, ho tema: “Presiza haklaken-naʼin 1.000.” Livru neʼe konvida sira neʼebé bele halo serbisu haklaken ba tempu balu ka tempu-tomak nuʼudar kolportór, ka pioneiru. Sira hetan knaar atu bá fatin hotu hodi buka ema neʼebé hadomi Maromak maibé seidauk iha koñesimentu loos, hodi hanorin ema sira-neʼe lia-loos kona-ba Maromak no Bíblia.
10. Oinsá mak ema barak hatán ba konvite atu halo serbisu haklaken?
10 Estudante Bíblia konvida ema seluk atu haklaken tanba sira hatene katak ema kristaun loos tenke haklaken lia-foun diʼak. Maibé, tanba iha tempu neʼebá ema naʼin-atus balu deʼit mak tuir reuniaun Estudante Bíblia nian, entaun klaru katak susar atu hetan ema naʼin-1.000 hodi haklaken. Maski nuneʼe, ema barak neʼebé lee tratu ida ka livru ida husi Estudante Bíblia, sira rekoñese katak neʼe mak lia-loos, no sira prontu atu simu konvite atu halo serbisu haklaken. Porezemplu, iha tinan 1882, ema ida iha Londres lee livru Watch Tower ida no livru kiʼik ida husi Estudante Bíblia, depois neʼe nia hakerek karta neʼebé dehan: “Favór ida, hanorin haʼu oinsá mak haʼu bele haklaken no saida mak haʼu sei koʼalia atu halaʼo serbisu furak neʼebé Maromak hakarak ita atu halo.”
11, 12. (a) Tanbasá mak kolportór sira no mós ita halaʼo serbisu haklaken? (b) Oinsá mak kolportór sira harii kongregasaun foun?
11 Iha tinan 1885, maizumenus iha Estudante Bíblia naʼin-300 mak halaʼo serbisu haklaken nuʼudar kolportór, ka pioneiru. Hanesan ohin loron, sira-nia serbisu mak atu ajuda ema seluk sai Jesus Kristu nia dixípulu. Maibé, dalan neʼebé sira halaʼo sira-nia serbisu la hanesan. Ohin loron, ita estuda Bíblia ho ema ida-idak, hodi nuneʼe ita bele hanorin sira tuir ida-idak nia presiza. Depois neʼe, ita konvida ita-nia estudante Bíblia atu tuir reuniaun kristaun sira iha kongregasaun. Maibé, iha tempu uluk, kolportór sira fahe livru sira no depois halibur ema neʼebé hakarak hatene liután atu estuda Bíblia hamutuk nuʼudar grupu ida. Hanesan neʼe kolportór sira harii kongregasaun foun, neʼebé uluk bolu “klase”.
12 Porezemplu, iha tinan 1907, grupu kolportór ida bá sidade ida atu buka ema neʼebé iha ona livru Millennial Dawn (bolu mós nuʼudar Studies in the Scriptures). Tuirmai, kolportór sira halibur ema sira-neʼe atu tuir reuniaun iha ema ida nia uma. Iha loron-domingu neʼe tomak, kolportór ida hatoʼo diskursu kona-ba buat neʼebé Maromak hakarak. No iha domingu tuirmai, nia fó laran-manas ba sira neʼebé tuir reuniaun neʼe atu halo ida-neʼe beibeik. Iha tinan 1911, irmaun sira halo mudansa kona-ba dalan neʼebé sira buka dixípulu. Sira fó knaar ba irmaun naʼin-58 atu laʼo rai hodi fó diskursu públiku iha Estadus Unidus no Kanadá. Irmaun sira-neʼe husu ema neʼebé hakarak hatene liután kona-ba lia-loos atu fó-hatene sira-nia naran no hela-fatin, no halo arranju atu sira bele halibur hamutuk iha sira-nia uma hodi forma “klase” foun. Iha tinan 1914, Estudante Bíblia iha ona kongregasaun hamutuk 1.200 iha mundu tomak.
13. Saida mak halo ita hakfodak ho serbisu haklaken?
13 Ohin loron, iha kongregasaun hamutuk maizumenus 109.400 iha mundu tomak, no irmaun-irmán sira hamutuk maizumenus naʼin-895.800 mak serbí nuʼudar pioneiru. Ema besik 8.000.000 mak simu ona “koñesimentu neʼebé loos” no moris tuir koñesimentu neʼe. (Lee Isaías 60:22. *) * Ita hakfodak no kontente atu haree ema barak tan sai Jesus nia dixípulu maski ‘ema odi sira’ hanesan Jesus fó-hatene nanis ona. Jesus hatete katak ema sei fó-terus ninia dixípulu sira, hatama sira iha dadur laran, no oho sira balu. (Lc 21:12-17) Maski Satanás, anju aat sira, no ema barak neʼebé kontra lia-loos, koko atu hapara serbisu haklaken, maibé Jeová nia povu kontinua hetan susesu hodi ajuda ema seluk sai Jesus nia dixípulu. Ohin loron, ita haklaken duni iha “mundu tomak”, iha fatin neʼebé manas toʼo fatin neʼebé malirin, iha rai-maran, iha foho, iha sidade, no mós iha fatin neʼebé iha ema uitoan deʼit. (Mt 24:14) Se laʼós ho Maromak Jeová nia ajuda, ita la bele hetan susesu hanesan neʼe.
“KOÑESIMENTU NEʼEBÉ LOOS” SAI “BARAK”
14. Oinsá mak ita-nia livru sira ajuda atu habelar “koñesimentu neʼebé loos”?
14 Ohin loron, “koñesimentu neʼebé loos” sai barak iha mundu neʼe tanba ema barak haklaken kona-ba lia-foun diʼak no mós tanba livru sira neʼebé esplika kona-ba Bíblia. Iha fulan-Jullu 1879, Estudante Bíblia halo livru ho títulu Zionʼs Watch Tower and Herald of Christʼs Presence edisaun primeiru. Iha tempu neʼebá, liuhusi kompañia ida Estudante Bíblia halo livru 6.000 iha lia-inglés deʼit. Editór ba livru neʼe mak irmaun Charles Taze Russell, neʼebé tinan 27, no iha mós irmaun naʼin-lima seluk neʼebé iha knaar atu hakerek informasaun ba livru neʼe. Ohin loron, ita iha Livru Haklaken iha língua 195. Kompara ho livru sira seluk iha mundu tomak, livru neʼe mak livru neʼebé halo barak liu, edisaun ida halo 42.182.000. Livru ida tan neʼebé mós halo barak liu livru seluk mak Sedarlah! neʼebé halo hamutuk 41.042.000 iha língua 84. Liután neʼe, ita halo livru sira no Bíblia hamutuk maizumenus 100.000.000 tinan-tinan.
15. Osan atu halo livru sira mai husi neʼebé?
15 Osan neʼebé uza atu halo livru sira-neʼe mai husi kontribuisaun neʼebé ema fó ho laran. (Lee Mateus 10:8.) Ema husi kompañia sira neʼebé halo livru, sira hakfodak ho ida-neʼe tanba sira hatene katak mákina, surat-tahan, tinta, no mós buat oioin mak karun tebes. Irmaun ida neʼebé iha knaar atu sosa sasán ba Betel atu halo livru sira hatete: “Kontratu-naʼin sira neʼebé vizita ita-nia fatin atu halo livru sira, sira hakfodak kuandu sira hatene katak ho kontribuisaun neʼebé ema fó ho laran mak ita iha teknolojia foun no mákina diʼak. Sira mós hakfodak kona-ba serbisu-naʼin iha Betel tanba sira barak mak joven no kontente.”
KOÑESIMENTU KONA-BA MAROMAK SEI SAI NAKONU IHA MUNDU
16. Tanbasá mak Jeová halo “koñesimentu neʼebé loos” sai barak?
16 Maromak Jeová halo “koñesimentu neʼebé loos” sai barak tanba nia hakarak atu “ema hotu hetan maksoin no simu matenek kona-ba lia-loos”. (1 Tim 2:3, 4) Jeová hakarak ema atu hatene lia-loos atu nuneʼe sira bele adora nia iha dalan neʼebé loos no simu ninia bensaun. Liuhusi serbisu haklaken, Jeová halibur ona grupu ema kristaun kose-mina. Nia mós halibur daudauk “ema-lubun boot ida . . . husi nasaun, rasa, umakain no lia hotu-hotu”, neʼebé iha esperansa atu moris ba nafatin iha mundu.—Apok 7:9.
17. Tanba ema neʼebé adora Maromak loos aumenta ba beibeik, ida-neʼe hatudu saida?
17 Durante tinan 130 nia laran, ema neʼebé halaʼo adorasaun loos aumenta ba beibeik. Ida-neʼe hatudu ho klaru katak Maromak no mós Liurai neʼebé nia hili ona, Jesus Kristu, mak ajuda Jeová nia atan sira iha mundu hodi dirije sira, proteje sira, organiza sira, no hanorin sira. Tanba Jeová halo tuir buat neʼebé nia promete kona-ba ajuda ema barak atu hetan lia-loos, ida-neʼe halo ita fiar duni katak Jeová mós sei kumpre buat neʼebé nia promete ona kona-ba futuru. Bíblia dehan: “Rai sei nakonu ho matenek husi Jeová hanesan bee neʼebé taka tasi.” (Isa 11:9) Sin, iha tempu neʼebá, ita sei hetan duni bensaun neʼebé furak tebes!
[Nota–rodapé]
^ par. 6 Atu aprende liután, bele haree DVD Saksi-Saksi Yehuwa—Beraksi dengan Iman, Bagian 1: Keluar dari Kegelapan, no Saksi-Saksi Yehuwa—Beraksi dengan Iman, Bagian 2: Biarlah Terang Bersinar.
^ par. 13 Isaías 60:22: “Buat neʼebé uitoan sei sai rihun ida, no buat neʼebé kiʼik sei sai nasaun neʼebé forte. Haʼu Jeová rasik mak sei halo ida-neʼe ho lalais tuir ninia tempu.”
^ par. 13 Haree livru Nubuat Yesaya—Terang bagi Seluruh Umat Manusia Jilid II, pájina 320.
[Pergunta estudu nian]
[Dezeñu iha pájina 6]
Estudante Bíblia hatudu haraik-an hodi buka atu halo tuir Maromak nia hakarak
[Dezeñu iha pájina 7]
Jeová hafolin ita-nia hakaʼas-an atu habelar “koñesimentu neʼebé loos” kona-ba nia
