Ita hafolin duni Maromak nia arranju kaben nian ka lae?
Ita hafolin duni Maromak nia arranju kaben nian ka lae?
“Haʼu hein katak Jeová haraik bensaun ba imi, no imi sei hetan fatin hakmatek iha imi ida-idak nia laʼen nia uma.”—RUTE 1:9.
BUKA TOʼOK RESPOSTA:
Iha tempu uluk, oinsá mak Maromak nia atan sira hatudu katak sira hafolin moris kaben nian?
Saida mak hatudu katak ita-nia desizaun kona-ba hili kaben bele kona mós Jeová?
Bíblia nia konsellu saida deʼit mak ita hakarak halo tuir iha ita-nia moris?
1. Kuandu Adão iha ona feen, nia sente oinsá?
KUANDU Jeová kria feto bonita ida ba Adão, ida-neʼe halo Adão kontente tebes toʼo nia hatete: “Ida-neʼe mak ruin husi haʼu-nia ruin no isin husi haʼu-nia isin. Nia sei hanaran Feto, tanba nia mai husi mane.” (Gên 2:23) Antes ida-neʼe akontese, Jeová halo Adão toba-dukur no foti ninia ruin sorin atu kria feto neʼe, neʼebé ikusmai Adão hanaran Eva. Maromak fó-kaben ba sira naʼin-rua atu moris haksolok nuʼudar kaben-naʼin. Tanba Jeová foti Adão nia ruin rasik atu kria Eva, sira-nia relasaun nuʼudar feen-laʼen besik liu fali kaben-naʼin sira ohin loron.
2. Tanbasá mak mane no feto hakbesik ba malu no hakarak kaben?
2 Iha tempu neʼebé Jeová kria ema, nia tau ona domin romántiku iha ema nia laran. Tan neʼe, domin neʼe book mane no feto atu hakbesik ba malu no hakarak kaben. Ema barak hakarak katak kuandu sira kaben, sira sei hadomi malu ba nafatin.
SIRA HAFOLIN ARRANJU KABEN NIAN
3. Oinsá mak Isaac hetan feen?
3 Maromak nia atan Abraão hafolin duni arranju kaben nian. Tan neʼe, Abraão haruka ninia atan ida atu bá rai-Mesopotámia hodi buka feen ida ba ninia oan Isaac. Atan neʼe husu Jeová nia ajuda no ida-neʼe lori rezultadu diʼak. Nia hetan feto ida neʼebé hamtaʼuk Maromak, naran Rebeca, no nia sai Isaac nia feen, no ikusmai nia sai Jesus nia beiʼala. (Gên 22:18; 24:12-14, 67) Ohin loron, ema barak foti desizaun rasik kona-ba sé mak sei sai sira-nia kaben. Maibé dala ruma, ema balu gosta atu ajuda sira-nia família ka kolega atu buka kaben, maibé se ema neʼe la husu atu halo ida-neʼe, sira labele mete kona-ba neʼe. Klaru katak Maromak la hili sé mak sei sai ita-nia kaben. Maibé se ita husu Ninia ajuda kona-ba kaben no kona-ba buat seluk iha ita-nia moris no husik ninia espíritu santu lori ita, Nia sei fó matadalan mai ita.—Gal 5:18, 25.
4, 5. Saida mak hatudu katak feto sulamita no bibi-atan iha domin neʼebé espesiál ba malu?
4 Iha tempu Israel antigu, feto-klosan sulamita ida neʼebé bonita, nia lakohi ninia kolega sira atu hakaʼas nia atu kaben ho Liurai Salomão neʼebé iha ona feen barak. Nia hatete: “Haʼu haruka imi atu halo juramentu, oh, Jerusalém nia oan-feto sira, katak imi labele koko atu hamosu domin iha haʼu-nia laran toʼo tempu neʼebé haʼu rasik hakarak.” (Cân 8:4) Feto sulamita neʼe hadomi ona bibi-atan ida. Ho haraik-an, nia hatete: “Haʼu hanesan ai-funan fuik iha rai-tetuk besik tasi-ibun, no ai-funan líriu iha rai-tetuk.” Maibé bibi-atan hatán: “Haʼu-nia doben feto neʼebé iha joven feto sira-nia leet, nia hanesan ho ai-funan líriu neʼebé iha ai-tarak sira-nia leet.” (Cân 2:1, 2) Sin, sira naʼin-rua hadomi malu duni.
5 Tanba feto sulamita no bibi-atan hadomi ulukliu Maromak, bainhira sira kaben, sira-nia relasaun sai metin liután. Feto sulamita hatete ba ninia doben neʼebé bibi-atan: “Tau haʼu iha ó-nia laran, no sempre hanoin-hetan haʼu; tanba domin iha forsa boot tebes hanesan mate, no la rende an hanesan rate, nia husu nafatin laran-metin. Domin lakan hanesan ahi-lakan, ahi-lakan Jah nian. Bee barak labele hamate domin, mota sira mós labele halakon ida-neʼe. Se mane ida fó buat hotu neʼebé folin husi ninia uma tanba domin, ema sira sei hakribi nia.” (Cân 8:6, 7) Kuandu Jeová nia atan sira neʼebé hakarak atu kaben, sira mós hakarak sira-nia kaben atu hatudu domin hanesan feto sulamita neʼe.
ITA-NIA DESIZAUN KONA MÓS JEOVÁ
6, 7. Saida mak hatudu katak ita-nia desizaun kona-ba hili kaben bele kona mós Jeová?
6 Ita-nia desizaun kona-ba hili kaben kona mós Jeová. Porezemplu, nia fó avizu ba ema Israel kona-ba ema neʼebé hela iha rai-Kanaan, hodi dehan: “Ó labele halo aliansa kaben nian ho sira. Keta fó ó-nia oan-feto ba ninia oan-mane, no keta foti ninia oan-feto ba ó-nia oan-mane. Tanba nia sei halo ó-nia oan-mane atu la tuir haʼu, no sira sei serbí maromak seluk; no Jeová nia laran-nakali sei sai makaʼas hasoru imi, no nia sei halakon lalais ó.” (Deut 7:3, 4) Liutiha tinan barak, amlulik Esdras hatete: “Imi rasik nia hahalok la hatudu laran-metin tanba imi fó hela-fatin ba feen sira husi rai seluk hodi aumenta Israel nia sala.” (Esd 10:10) Apóstolu Paulo mós hatete ba ema kristaun: “Feen ida metin ba nia laʼen wainhira nia sei moris. Maibé nia laʼen mate karik, nia bele hola fali ema neʼebé nia hakarak, naran nia halo neʼe iha Naʼi.”—1 Kor 7:39.
7 Se Jeová nia atan ida neʼebé dedika ona ninia an halo desizaun atu kaben ho ema neʼebé fiar la hanesan, nia halo hahalok neʼebé kontra Jeová nia hakarak. Iha Esdras nia tempu, ema Israel sira la hatudu laran-metin ba Jeová hodi kaben ho feto sira husi rai seluk. Bíblia hatudu ho klaru katak ema kristaun tenke kaben ho maluk kristaun deʼit, nia labele buka razaun oioin atu la halo tuir Maromak nia hakarak. (Esd 10:10; 2 Kor 6:14, 15) Ema kristaun ida neʼebé deside atu kaben ho ema neʼebé seidauk hetan batizmu, nia la hatudu ezemplu diʼak hodi la hafolin Maromak nia arranju kaben nian no bele lakon ninia knaar espesiál iha kongregasaun. No mós, ema neʼe la bele husu Jeová nia bensaun tanba ida-neʼe hanesan nia dehan: ‘Jeová, haʼu la halo tuir Ita-nia matadalan, maibé favór ida, haraik nafatin bensaun mai haʼu.’
JEOVÁ HATENE BUAT NEʼEBÉ DIʼAK BA ITA
8. Tanbasá mak ita tenke halo tuir Maromak nia matadalan kona-ba moris kaben nian?
8 Ema neʼebé halo mákina ruma, nia hatene loloos oinsá mak mákina neʼe laʼo. Nia mós fó matadalan kona-ba oinsá atu uza mákina neʼe. Maibé, se ita lakohi halo tuir matadalan neʼe, saida mak bele akontese? Karik mákina neʼe la laʼo ho loloos no la tahan ba tempu kleur. Nuneʼe mós ho ita-nia moris kaben nian, se ita hakarak moris kontente nuʼudar kaben-naʼin, ita tenke halo tuir Jeová nia matadalan kona-ba moris kaben nian tanba Nia mak hahú arranju neʼe.
9. Tanbasá mak Jeová hahú arranju kaben nian?
9 Maromak Jeová hatene buat hotu kona-ba ema no mós kona-ba moris kaben nian. Nia kria ema ho presiza seksuál nian tanba nia hakarak sira atu ‘iha oan no bei-oan no sai barak’. (Gên 1:28) Maromak hatene oinsá ema sente mesak. Tan neʼe, antes nia kria Eva, nia hatete: “La diʼak atu mane neʼe kontinua hela mesak. Haʼu sei halo ba nia ajuda-naʼin ida atu halo nia sai kompletu.” (Gên 2:18) Jeová hakarak kaben-naʼin sira atu moris kontente.—Lee Provérbios 5:15-18. *
10. Kona-ba relasaun seksuál, oinsá mak feen-laʼen bele halo tuir Jeová nia matadalan?
10 Tanba ema hotu sala-naʼin, susar ba kaben-naʼin sira atu halaʼo moris kaben nian iha dalan neʼebé perfeitu. Maski nuneʼe, Jeová nia atan sira bele halaʼo moris kaben nian neʼebé kontente bainhira sira halo tuir matadalan husi Ninia Liafuan. Porezemplu, Paulo fó konsellu neʼebé klaru kona-ba relasaun seksuál iha kaben laran. (Lee 1 Korinto 7:1-5.) Feen-laʼen neʼebé la hakarak atu iha oan, Bíblia la bandu sira atu halo relasaun seksuál. Tanba relasaun seksuál mak parte husi feen-laʼen nia presiza isin nian no emosionál, ida-neʼe bele lori haksolok ba sira. Maibé, Maromak la kontente kuandu sira halo relasaun seksuál iha dalan neʼebé la normál no la hatudu respeitu. Tanba ida-neʼe mak parte importante husi moris kaben nian, feen-laʼen kristaun presiza halo ida-neʼe iha dalan neʼebé hatudu domin no laran-diʼak ba malu.
11. Tanba Rut halo tuir Jeová nia dalan, nia hetan bensaun saida?
11 Loos duni, moris kaben nian tenke lori haksolok ba família. Liuliu ba kaben-naʼin kristaun, sira-nia moris família nian tenkesér nakonu ho dame no hakmatek. Hanoin toʼok kona-ba buat neʼebé akontese maizumenus tinan 3.000 liubá. Feto-faluk Noemi ho ninia feto-foun naʼin-rua neʼebé mós faluk ona, Orpa no Rut, sira laʼo husi rai-Moab ba rai-Judá. Noemi haruka feto-foun naʼin-rua neʼe atu fila fali ba sira-nia povu Moab. Maibé Rut hatudu laran-metin ba Noemi no mós ba Maromak Jeová. Tan neʼe, mane katuas ida neʼebé mós serbí Jeová, naran Boaz, nia hatete ba Rut: “Haʼu hein katak . . . sei iha kolen neʼebé diʼak tebes ba ó husi Jeová, neʼebé iha nia liras okos ó mai atu buka protesaun.” (Rute 1:9; 2:12) Rut hafolin tebes Maromak nia arranju kaben nian, no nia kaben ho Boaz. Kuandu Rut moris hiʼas fali iha mundu foun, nia sei sente kontente hodi hatene katak nia sai Jesus Kristu nia beiʼala. (Mt 1:1, 5, 6; Lc 3:23, 32) Rut hetan bensaun boot tanba nia halo tuir Jeová nia dalan!
KONSELLU KONA-BA MORIS KABEN NIAN
12. Iha neʼebé mak ita bele hetan konsellu diʼak kona-ba moris kaben nian?
12 Maromak neʼebé hahú arranju kaben nian fó-hatene ba ita buat neʼebé ita presiza hatene kona-ba oinsá atu halaʼo moris kaben nian ho kontente. La iha ema ida neʼebé matenek liu Jeová. Liafuan husi Bíblia sempre loos, tan neʼe ema neʼebé fó konsellu kona-ba moris kaben nian tenke halo ida-neʼe tuir Bíblia nia matadalan. Porezemplu, apóstolu Paulo hatete: “Mane ida-ida sei hadomi nia kaben; hadomi nia hanesan nia an rasik, no feto mós sei hamtaʼuk nia laʼen.” (Ef 5:33) Konsellu hanesan neʼe klaru no la susar ba kaben-naʼin kristaun atu komprende, maibé ita halo tuir ka lae? Se ita hafolin duni arranju kaben nian nuʼudar prezente husi Jeová, ita sei halo tuir konsellu husi Bíblia. *
13. Saida mak bele akontese se laʼen la halo tuir konsellu husi 1 Pedro 3:7?
13 Laʼen kristaun tenke hatudu domin ba ninia feen. Apóstolu Pedro hatete: “Imi laʼen sira, buka moris hodi hanoin imi-nia feen, hodi hamtaʼuk feto sira nuʼudar ema kbiit-laek, basá imi naʼin-rua sei simu hamutuk liman-rohan grasa moris nian, atu nuneʼe imi-nia orasaun bele laʼo loloos.” (1 Ped 3:7) Se laʼen ida la halo tuir Jeová nia konsellu, karik Jeová la rona ninia orasaun. Ida-neʼe bele halo nia no ninia feen nia relasaun ho Jeová sai fraku, no ikusmai lori rezultadu aat hanesan estrese, istori-malu, no trata aat malu.
14. Feen neʼebé matenek bele lori rezultadu saida ba ninia família?
14 Feen neʼebé halo tuir konsellu husi Bíblia no husik espíritu santu hatudu dalan ba nia, feen neʼe bele halo buat barak atu ninia uma-laran sai nakonu ho dame no haksolok. Laʼen neʼebé hamtaʼuk Jeová hadomi ninia feen no tau matan ba nia. Feen hakarak laʼen atu hadomi nia, tan neʼe feen mós presiza hatudu hahalok neʼebé diʼak hodi ajuda ninia laʼen atu hadomi nia liután. Provérbios 14:1 hatete: “Feto neʼebé loloos matenek harii ona ninia umakain, maibé feto neʼebé beik sei estraga ninia umakain ho nia liman rasik.” Sin, feen neʼebé matenek no hadomi ninia família halo buat barak atu halo ninia família hetan susesu no haksolok. Nia mós hatudu katak nia hafolin duni Maromak nia arranju kaben nian.
15. Iha Efeso 5:22-25, konsellu saida mak ita hetan?
15 Kaben-naʼin sira neʼebé halo tuir ezemplu kona-ba oinsá Jesus tau matan ba kongregasaun no oinsá kongregasaun simu Jesus nuʼudar ulun, sira hafolin arranju kaben nian nuʼudar prezente husi Maromak. (Lee Efeso 5:22-25.) Jeová haraik bensaun ba kaben-naʼin sira neʼebé hadomi malu ho loloos no la husik hahalok foti-an, nonook ba malu, ka hahalok aat ruma seluk atu estraga sira-nia relasaun nuʼudar kaben-naʼin!
EMA KETA HAKETAK
16. Tanbasá mak ema kristaun balu klosan nafatin?
16 Maski ema barak iha hanoin atu kaben iha futuru, maibé iha mós Jeová nia atan balu neʼebé klosan nafatin tanba seidauk hetan ema neʼebé diʼak ba sira no mós ba Jeová. Iha mós irmaun-irmán sira neʼebé sente katak la presiza atu kaben. Sira bele uza sira-nia tempu barak atu serbí Jeová no sente kontente atu moris nuʼudar ema klosan.—Mt 19:10-12; 1 Kor 7:1, 6, 7, 17.
17. (a) Ita hotu presiza hanoin kona-ba Jesus nia liafuan saida? (b) Se ema kristaun ida komesa gosta ema seluk nia kaben, saida mak nia tenke halo kedas?
17 Maski ita seidauk kaben ka kaben ona, ita hotu presiza hanoin didiʼak kona-ba Jesus nia liafuan neʼebé dehan: “Imi la lee katak horiuluk kedas Maromak halo mane ho feto hodi dehan: ‘Tan neʼe mak mane sei husik nia aman ho nia inan hodi moris hamutuk ho nia feen; sira naʼin-rua sei sai isin ida deʼit’? Nuneʼe, sira laʼós naʼin-rua tan, maibé isin ida deʼit ona. Neʼe duni buat neʼebé Maromak tau hamutuk ema keta haketak.” (Mt 19:4-6) Hakarak ema seluk nia kaben mak hahalok neʼebé sala. (Deut 5:21) Se ema kristaun ida komesa gosta ema seluk nia kaben, ema neʼe tenkesér halakon kedas hakarak aat hanesan neʼe husi nia laran. Ida-neʼe bele halo ema neʼe nia laran kanek tanba nia husik ninia an atu kaan ema seluk nia kaben hodi hanoin ninia an rasik. (Mt 5:27-30) Maski nuneʼe, nia tenkesér troka ninia hanoin no soe ninia hanoin aat neʼe.—Jer 17:9.
18. Ita sente oinsá kona-ba Maromak nia arranju kaben nian?
18 Ema barak, maski sira seidauk hatene kona-ba Maromak Jeová no kona-ba ninia arranju kaben nian, sira hafolin moris kaben nian. Oinsá tan ho ita neʼebé dedika ona ita-nia an ba Jeová, “Maromak neʼebé kontente”! Tan neʼe, mai ita hotu haksolok ho Jeová nia arranju kaben nian no hatudu katak ita hafolin duni arranju ida-neʼe nuʼudar prezente furak husi nia.—1 Tim 1:11, MF.
[Nota–rodapé]
^ par. 9 Provérbios 5:15-18: “15 Hemu bee husi ó-nia bee-posu rasik, no bee-turuk husi ó rasik nia bee-matan. 16 Tansá ó-nia bee-matan tenke suli ba odamatan liʼur? No tansá ó-nia bee-matan tenke suli iha fatin públiku? 17 Husik ida-neʼe ba ó deʼit, laʼós ba ema foun neʼebé hamutuk ho ó. 18 Husik ó-nia bee-matan hetan bensaun, no haksolok bá ho ó-nia feen husi tempu joven nian.”
^ par. 12 Atu hetan informasaun liután kona-ba moris kaben nian, haree livru “Hela Nafatin iha Maromak nia Domin”, kapítulu 10 no 11.
[Pergunta estudu nian]
[Dezeñu iha pájina 6]
Kuandu feen-laʼen halaʼo moris kaben nian ho kontente, ida-neʼe fó hahiʼi ba Jeová no lori haksolok ba família tomak
[Dezeñu iha pájina 5]
Rut hafolin Maromak nia arranju kaben nian
[Dezeñu iha pájina 7]
Ita hatudu katak ita hafolin duni moris kaben nian nuʼudar prezente husi Jeová ka lae?
