Ukun-fuan hanorin saida mai ita?
“Ukun-Fuan hanorin matenek no lia-loos tomak.”—ROM 2:20.
1. Tanbasá mak ita presiza hatene buat neʼebé Paulo esplika kona-ba Moisés nia Ukun-Fuan?
BUAT neʼebé apóstolu Paulo hakerek iha Bíblia ajuda ita atu komprende buat barak kona-ba Moisés nia Ukun-Fuan. Porezemplu, iha ninia karta ba ema ebreu, Paulo esplika katak Jesus nuʼudar “amlulik boot neʼebé laran-metin”, nia fó sakrifísiu dala ida deʼit ba nafatin, no ema neʼebé tau fiar ba sakrifísiu neʼe bele iha relasaun diʼak ho Maromak no hetan “maksoin rohan-laek”. (Ebr 2:17; 9:11, 12) Paulo mós esplika katak tabernákulu mak “lalatak ka ilas husi buat neʼebé mosu iha lalehan” no Jesus mak Lia-Naʼin ba “aliansa neʼebé diʼak liu” duké Moisés nia Ukun-Fuan. (Ebr 7:22; 8:1-5) Buat neʼebé Paulo esplika kona-ba Moisés nia Ukun-Fuan ajuda ema kristaun iha tempu neʼebá, no ajuda mós ema kristaun ohin loron atu hafolin liután buat neʼebé Maromak halo mai ita.
2. Tanbasá mak ema kristaun judeu hatene kona-ba Maromak diʼak liu fali ema seluk?
2 Iha Paulo nia karta ba ema kristaun iha Roma, nia hatoʼo liafuan balu ba ema kristaun judeu sira no ema neʼebé hatene ona Moisés nia Ukun-Fuan. Tanba sira hatene ona Ukun-Fuan neʼe, sira iha “matenek no lia-loos tomak” kona-ba Maromak Jeová no ninia matadalan sira. Tan neʼe, sira neʼebé komprende no hafolin Ukun-Fuan neʼe bele hanorin ema seluk neʼebé seidauk hatene lia-loos kona-ba Jeová.—Lee Roma 2:17-20.
ILAS KONA-BA JESUS NIA SAKRIFÍSIU
3. Tanbasá mak ita presiza estuda kona-ba sakrifísiu sira neʼebé ema judeu hasaʼe?
3 Matenek no lia-loos husi Ukun-Fuan neʼebé Paulo temi, ida-neʼe ajuda ita atu komprende Maromak nia hakarak. Matadalan sira neʼebé Jeová hanorin ninia povu liuhusi Moisés nia Ukun-Fuan sei iha folin ba ita. Tan neʼe, mai ita koʼalia kona-ba oinsá mak sakrifísiu neʼebé Ukun-Fuan haruka ajuda ema judeu sira neʼebé haraik-an atu simu Kristu no ajuda sira atu komprende saida mak Maromak hakarak sira atu halo. Tanba Jeová nia hakarak ba ninia atan sira nunka troka, hodi estuda ninia ukun-fuan ba ema Israel kona-ba hasaʼe sakrifísiu, ida-neʼe bele ajuda ita atu hanoin kona-ba ita-nia serbisu ba Maromak.—Mal 3:6.
4, 5. (a) Moisés nia Ukun-Fuan fó-hanoin saida ba ema judeu? (b) Sakrifísiu sira reprezenta saida?
4 Moisés nia Ukun-Fuan fó-hanoin beibeik ba ema judeu sira katak sira ema sala-naʼin. Porezemplu, se sira kona ona ema nia mate-isin, sira presiza hasaʼe sakrifísiu atu sai moos fali. Tan neʼe, sira lori karau-inan neʼebé diʼak ba amlulik hodi nia bele oho no sunu, depois halibur ahi-kadesan husi sakrifísiu neʼe atu halo “bee hamoos nian”. Depois, liutiha loron tolu no loron hitu, sira hisik bee neʼe ba ema neʼebé presiza sai moos fali. (Núm 19:1-13) Liután neʼe, atu fó-hanoin ba ema judeu katak sira moris mai nuʼudar sala-naʼin, feto neʼebé tuur ahi sai lamoos durante loron balu, no kuandu loron neʼe ramata, nia tenke hasaʼe sakrifísiu hodi sai moos fali.—Lev 12:1-8.
5 Iha mós situasaun barak tan neʼebé ema judeu tenke hasaʼe animál nuʼudar sakrifísiu atu taka sira-nia sala. Sira hasaʼe sakrifísiu sira-neʼe iha tabernákulu, no ikusmai iha Jeová nia templu. Maski ema judeu sira hatene ka la hatene, sakrifísiu sira-neʼe mak “ilas” neʼebé reprezenta Jesus nia sakrifísiu neʼebé perfeitu.—Ebr 10:1-10.
HALO SAKRIFÍSIU HO LARAN
6, 7. (a) Ema Israel sira presiza hasaʼe sakrifísiu hanesan saida? Sakrifísiu diʼak reprezenta saida? (b) Pergunta saida deʼit mak ita bele husu ba ita-nia an?
6 Buat neʼebé importante kona-ba animál neʼebé atu hasaʼe ba Jeová mak animál tenkesér “diʼak”, labele matan-aat, ain-aat, kanek, ka moras. (Lev 22:20-22) Kuandu ema Israel hasaʼe ai-fuan ka fini nuʼudar sakrifísiu ba Jeová, buat sira-neʼe tenkesér “ai-fuan uluk nian”, no mós buat neʼebé “diʼak liu” husi ai-fuan ka fini neʼebé sira koʼa. (Núm 18:12, 29) Jeová la simu sakrifísiu neʼebé ladún diʼak. Sakrifísiu diʼak neʼebé sira hasaʼe reprezenta Jesus nia sakrifísiu neʼebé sala-laek, no hatudu katak Jeová mós sei hili buat neʼebé diʼak liu no folin liu ba nia atu fó nuʼudar sakrifísiu atu salva ema husi sala no mate.—1 Ped 1:18, 19.
7 Se ema ida agradese duni ba Jeová nia laran-diʼak, ema neʼe kontente atu hili buat neʼebé diʼak liu atu hasaʼe nuʼudar sakrifísiu. Kona-ba hili sakrifísiu neʼebé diʼak ka ladiʼak, neʼe depende ba ema ida-idak. Maibé, sira hatene katak Maromak sei la kontente ho sakrifísiu neʼebé ladiʼak tanba ida-neʼe hatudu katak sira fó sakrifísiu tan deʼit sira tuir sira-nia toman, ka ho laran-todan. (Lee Malaquias 1:13. *) Oinsá ho ita? Diʼak atu ita hanoin kona-ba ita-nia serbisu ba Jeová hodi husu ba ita-nia an: ‘Tanbasá mak haʼu serbí Jeová? Haʼu bele halo diʼak liután haʼu-nia serbisu ba nia ka lae? Haʼu fó buat neʼebé diʼak liu ba Jeová ka lae?’
8, 9. Tanbasá mak diʼak ba ita atu hanoin kona-ba ema Israel neʼebé hasaʼe sakrifísiu?
8 Kuandu ema Israel ida hasaʼe sakrifísiu husi ninia hakarak rasik atu hatudu agradese ba Jeová, ka husu ba Jeová atu simu nia hodi hasaʼe sakrifísiu sunu nian, la susar ba ema neʼe atu hili animál neʼebé diʼak. Ema neʼe kontente atu fó buat neʼebé diʼak liu ba Jeová. Ita nuʼudar ema kristaun ohin loron la hasaʼe sakrifísiu oioin hodi tuir Moisés nia Ukun-Fuan, maibé ita mós halo sakrifísiu, hanesan uza ita-nia tempu, forsa, no rikusoin atu serbí Jeová. Apóstolu Paulo hatete katak “liafuan sira husi ibun” hodi haklaken kona-ba ita-nia esperansa no “halo hahalok diʼak” mak hanesan sakrifísiu neʼebé halo Maromak kontente. (Ebr 13:15, 16) Hodi halaʼo atividade sira-neʼe ho laran, ita hatudu katak ita agradese ba buat hotu neʼebé Jeová fó mai ita, hanesan ho ema Israel iha tempu uluk neʼebé hasaʼe sakrifísiu ho laran.
9 Maibé se ema Israel halo sala ruma, tuir Moisés nia Ukun-Fuan, sira tenkesér hasaʼe sakrifísiu sala nian. Iha situasaun neʼe, susar ba sira atu hasaʼe sakrifísiu neʼe ho laran-kontente ka lae? (Lev 4:27, 28) Se sira hakarak duni atu iha relasaun diʼak ho Jeová, sira hasaʼe sakrifísiu neʼe ho laran.
10. Ema kristaun dala ruma presiza halo “sakrifísiu” saida atu hadiʼa hahalok sala?
10 Hanesan neʼe mós ho ohin loron, dala ruma ita halo maluk kristaun ida laran-kanek la ho neon, no ikusmai, ita hanoin fali kona-ba ita-nia hahalok sala. Tanba ita hakarak serbí Jeová ho laran moos, ita hakaʼas an atu hadiʼa ita-nia hahalok sala neʼe, loos ka lae? Porezemplu, ita bá husu deskulpa ba ema neʼe, ka se ita halo sala boot ruma, ita buka ajuda husi katuas kristaun sira. (Mt 5:23, 24; Tgo 5:14, 15) Sin, ita presiza halo buat ruma atu hadiʼa ita-nia sala hasoru ita-nia maluk no mós Maromak rasik. Maski susar atu halo ida-neʼe, maibé “sakrifísiu” hanesan neʼe bele hadiʼa ita-nia relasaun ho Jeová no ho ita-nia maluk, no bele mós halo ita sente laran moos fali. Ida-neʼe halo ita fiar duni katak Jeová nia matadalan mak diʼak liu.
11, 12. (a) Esplika toʼok kona-ba sakrifísiu dame nian. (b) Saida mak ita bele aprende husi sakrifísiu dame nian?
11 Moisés nia Ukun-Fuan mós koʼalia kona-ba sakrifísiu dame nian. Sakrifísiu neʼe mak atu iha dame ho Jeová. Ema neʼebé hasaʼe sakrifísiu neʼe hamutuk ho ninia família, sira han naʼan balu husi animál neʼebé fó nuʼudar sakrifísiu, karik iha han-fatin ida iha templu. Amlulik neʼebé hasaʼe sakrifísiu neʼe no amlulik seluk neʼebé serbí iha templu mós simu naʼan balu. (Lev 3:1; 7:31-33) Ema hasaʼe sakrifísiu hanesan neʼe tanba sira hakarak haksolok ho relasaun diʼak ho Maromak. Ida-neʼe hanesan ema neʼebé hasaʼe sakrifísiu han hamutuk ho ninia família, amlulik sira, no Jeová rasik ho ksolok no dame.
12 Nuneʼe, hasaʼe sakrifísiu dame nian mak hanesan konvida Jeová hodi han hamutuk. Kuandu Jeová simu konvite neʼe, ida-neʼe buat neʼebé espesiál tebes. Tan neʼe, ema neʼebé hasaʼe sakrifísiu hakarak fó buat neʼebé diʼak liu ba Jeová. Moisés nia Ukun-Fuan kona-ba hasaʼe sakrifísiu dame nian hanorin lia-loos katak ema hotu neʼebé hakarak, sira bele iha relasaun diʼak no dame ho sira-nia Kriadór liuhusi Jesus nia sakrifísiu. Ohin loron, kuandu ita halo sakrifísiu ho laran ba Jeová, hanesan hodi uza ita-nia rikusoin no forsa atu halo ninia serbisu, ita bele haksolok ho relasaun diʼak ho Jeová nuʼudar belun.
SAKRIFÍSIU NEʼEBÉ MAROMAK LA SIMU
13, 14. Tanbasá mak Jeová la simu sakrifísiu neʼebé Liurai Saul hanoin atu hasaʼe?
13 Klaru katak Jeová simu sakrifísiu sira neʼebé ema hasaʼe ho hanoin no laran neʼebé loos. Maibé Bíblia mós konta istória balu neʼebé sai nuʼudar avizu mai ita kona-ba sakrifísiu neʼebé Maromak la simu. Tanbasá mak Jeová la simu sakrifísiu sira-neʼe? Mai ita haree ezemplu rua.
14 Profeta Samuel hatete ba Liurai Saul katak tempu toʼo ona atu Jeová fó kastigu ba ema Amalec. Tan neʼe, Jeová haruka Saul atu oho nasaun Amalec ho sira-nia animál hotu. Maibé, Saul ho ninia soldadu sira la oho liurai Amalec, naran Agag. Saul mós la oho animál balu neʼebé diʼak liu hotu hodi hanoin atu hasaʼe nuʼudar sakrifísiu ba Jeová. (1 Sam 15:2, 3, 21) Oinsá Jeová nia hanoin? Nia la simu Saul tanba nia la halo tuir. (Lee 1 Samuel 15:22, 23. *) Ita bele aprende saida husi istória neʼe? Atu Maromak bele simu ita-nia sakrifísiu, ita presiza halo tuir ninia mandamentu sira.
15. Tanbasá mak Jeová la simu ema Israel nia sakrifísiu?
15 Iha livru Isaías mós konta istória neʼebé hanesan. Iha Isaías nia tempu, ema Israel sira hasaʼe sakrifísiu ba Jeová. Maibé sira-nia hahalok aat halo sira-nia sakrifísiu la iha folin. Nuneʼe, Jeová husu ba sira: “Husi imi-nia sakrifísiu barak, buat diʼak saida mak haʼu hetan?” Nia hatete: “Haʼu baruk ona ho bibi-malae nuʼudar sakrifísiu sunu nian no mina husi animál neʼebé bokur; no haʼu la haksolok ho raan husi karau-aman oan no bibi-malae aman oan no bibi-timur aman. . . . Keta lori tan sakrifísiu fini nian neʼebé la iha folin. Insensu mak buat ida neʼebé haʼu hakribi.” Tanbasá mak Jeová la simu sakrifísiu sira-neʼe? Nia hatete ba sira: “Maski imi halo orasaun beibeik, haʼu la rona; imi-nia liman nakonu ona ho raan neʼebé fakar. Fase imi-nia an; hamoos imi-nia an; hasai tiha imi-nia hahalok aat husi haʼu-nia oin; keta halo tan buat neʼebé aat.”—Isa 1:11-16.
16. Ema neʼebé hakarak Jeová atu simu ninia sakrifísiu presiza halo saida deʼit?
16 Jeová la simu sakrifísiu husi ema neʼebé la arrepende an husi sira-nia sala. Maibé, nia simu orasaun no sakrifísiu husi ema neʼebé hakaʼas an atu halo tuir ninia mandamentu sira. Moisés nia Ukun-Fuan hanorin ema Israel katak sira ema sala-naʼin no presiza Jeová atu fó perdua. (Gal 3:19) Kuandu sira komprende hanorin neʼe, ida-neʼe book sira atu arrepende an. Nuneʼe mós ho ohin loron, ita presiza hatene katak liuhusi Kristu nia sakrifísiu deʼit mak ita bele hetan perdua husi Jeová. Se ita komprende lia-loos neʼe no hafolin Jesus nia sakrifísiu, Jeová sei “haksolok” ho buat neʼebé ita halo iha ninia serbisu.—Lee Salmo 51:17, 19. *
HATUDU FIAR BA JESUS NIA SAKRIFÍSIU!
17-19. (a) Oinsá mak ita bele hatudu katak ita hafolin Jesus nia sakrifísiu? (b) Iha lisaun tuirmai, ita sei koʼalia kona-ba saida?
17 Tanba Ukun-Fuan mak “buat sira neʼebé atu mai nia ilas deʼit”, ema Israel hatene uitoan deʼit kona-ba Maromak nia hakarak. Maibé ohin loron, ita hatene diʼak liután kona-ba Maromak nia hakarak. (Ebr 10:1) Iha tempu uluk, lei sira kona-ba sakrifísiu hanorin ema Israel katak atu bele iha relasaun diʼak ho Maromak, sira presiza hatudu agradese ba Jeová ho laran, fó buat neʼebé diʼak liu ba nia, no komprende katak sira presiza ninia perdua. Ohin loron, Eskritura Lia-Gregu ajuda ita atu komprende katak liuhusi Jesus nia sakrifísiu mak Jeová sei halakon sala no mate ba nafatin. Liuhusi sakrifísiu neʼe, Jeová fó perdua ba ita-nia sala atu ita mós bele iha laran neʼebé moos. Sin, Jesus nia sakrifísiu mak prezente neʼebé folin boot tebes husi Jeová!—Gal 3:13; Ebr 9:9, 14.
18 Klaru katak atu Jesus nia sakrifísiu bele lori buat diʼak mai ita, la toʼo atu hatene deʼit kona-ba neʼe. Apóstolu Paulo hatete: “Ukun-Fuan tau matan mai ita toʼo tempu neʼebé Kristu mosu mai, atu ita bele sai loos iha Maromak futar oin tanba fiar.” (Gal 3:24) Ita tenke hatudu fiar liuhusi ita-nia hahalok. (Tgo 2:26) Tan neʼe, Paulo fó laran-manas ba ema kristaun sira neʼebé iha matenek kona-ba Moisés nia Ukun-Fuan atu halo tuir buat neʼebé sira hatene ona. Hodi halo nuneʼe, sira bele moris tuir lia-loos neʼebé sira hanorin ba ema seluk.—Lee Roma 2:21-23.
19 Maski ohin loron ita la iha Moisés nia Ukun-Fuan nia okos, maibé ita presiza nafatin halo “sakrifísiu” ba Jeová. Iha lisaun tuirmai, ita sei koʼalia kona-ba oinsá mak ita bele halo sakrifísiu neʼebé Jeová bele simu.
[Nota–rodapé]
^ par. 7 Malaquias 1:13: “‘No imi hatete: “Haree! Ida-neʼe halo ita kole tebes!” no imi la simu ida-neʼe,’ Jeová, Naʼi funu-naʼin hatete. ‘No imi lori buat neʼebé hadau tiha, no ain-aat, no moras; sin, imi lori buat neʼe nuʼudar prezente. Haʼu bele haksolok hodi simu buat neʼe husi imi-nia liman ka lae?’ Jeová hatete.”
^ par. 14 1 Samuel 15:22, 23: “22 Nuneʼe, Samuel hatete: ‘Jeová haksolok ho buat karan no sakrifísiu liu fali halo tuir Jeová nia liafuan ka lae? Haree! Halo tuir diʼak liu fali sakrifísiu, see tilun diʼak liu fali bibi-malae sira-nia bokur; 23 . . . Tanba ó la simu Jeová nia liafuan, nuneʼe nia mós la simu ó atu sai liurai.’”
^ par. 16 Salmo 51:17, 19: “17 Sakrifísiu ba Maromak mak laran neʼebé tun; laran neʼebé tun no kanek, oh, Maromak, Ita sei la hakribi.” “19 Se nuneʼe, Ita sei haksolok ho sakrifísiu hahalok loos nian. . . .”
[Pergunta estudu nian]
[Liafuan neʼebé foti husi pájina 17]
Jeová nia hakarak ba ninia atan sira nunka troka
[Dezeñu iha pájina 18]
Se ita mak ema Israel, animál ida-neʼebé mak ita sei hili atu fó nuʼudar sakrifísiu ba Jeová?
[Dezeñu iha pájina 19]
Jeová simu ema neʼebé hasaʼe sakrifísiu ho laran
