Ema kristaun loos hafolin Maromak nia Liafuan
“Ita-nia liafuan mak lia-loos.”—JOAO 17:17.
1. Tuir Ita rasik nia esperiénsia, saida mak halo Testemuña ba Jeová la hanesan ho relijiaun seluk?
HANOIN toʼok kuandu primeiravés Ita koʼalia ho Testemuña ba Jeová. Ita hanoin-hetan saida? Karik ita barak hatete: ‘Haʼu hakfodak kuandu sira uza Bíblia atu hatán pergunta hotu neʼebé haʼu husu.’ Karik ita mós kontente tebes atu aprende kona-ba Maromak nia hakarak ba mundu neʼe, kona-ba saida mak akontese ba ema mate, no mós kona-ba esperansa ba família ka kolega neʼebé mate ona!
2. Tanba saida mak ita hafolin Bíblia?
2 Maibé nuʼudar ita kontinua estuda Bíblia, ita hatene katak Bíblia la fó resposta deʼit ba pergunta sira kona-ba moris, mate, no futuru. Ita mós komesa hatene katak la iha livru ida seluk iha mundu tomak neʼebé bele ajuda ita iha ita-nia moris hanesan Bíblia. Bíblia nia konsellu sempre ajuda ema atu moris ho haksolok. (Lee Salmo 1:1-3. *) Husi tempu uluk toʼo ohin loron, ema kristaun loos sempre simu Bíblia “laʼós nuʼudar ema nia liafuan, maibé nuʼudar Maromak nia liafuan”. (1 Tes 2:13) Agora, mai ita haree istória balu kona-ba ema neʼebé hafolin duni Maromak nia Liafuan no mós sira neʼebé la hafolin.
REZOLVE PROBLEMA BOOT
3. Iha apóstolu sira-nia tempu, problema saida mak mosu? Tanbasá mak problema neʼe la fasil atu rezolve?
3 Durante tinan 13, komesa husi tempu neʼebé ema jentiu primeiru naran Cornélio hetan kose-mina, ema jentiu barak mós sai kristaun. Ida-neʼe hamosu problema ida neʼebé bele estraga kongregasaun kristaun nia unidade. Problema neʼe mak: Ema jentiu sira tenke hetan sirkunsizaun tuir ema judeu nia kostume antes atu hetan batizmu ka lae? Neʼe laʼós problema neʼebé fasil atu rezolve. Ema judeu sira neʼebé halo tuir Moisés nia Ukun-Fuan, sira lakohi tama iha ema jentiu ka ema husi nasaun seluk nia uma, no sira nunka ransu malu ho sira. Ema judeu sira mós fó-terus barak ba ema kristaun judeu sira tanba sira husik ona relijiaun judeu nian. Se ema kristaun judeu sira simu jentiu sira neʼebé la hetan sirkunsizaun, ema judeu sira sei hakribi no fó-terus makaʼas liután ba ema kristaun.—Gal 2:11-14.
4. Sé mak halibur atu rezolve problema? Ida-neʼe hamosu pergunta saida deʼit?
4 Iha tinan 49, apóstolu no katuas sira iha Jerusalém “halibur atu haree didiʼak [kona-ba] buat neʼe”. (Apos 15:6) Iha enkontru neʼe, sira la diskute malu, maibé sira buka-hatene Maromak nia hanoin iha ninia Liafuan. Sira ida-idak fó sai sira-nia hanoin. Balu hatete katak ema tenke hetan sirkunsizaun no balu dehan la presiza. Maibé, sira kaer metin nafatin ba sira-nia hanoin rasik no lakohi rona ba malu ka lae? Ka sira sente katak diʼak liu hein toʼo situasaun manas entre ema judeu no ema kristaun sai kalma fali mak sira bele rezolve problema neʼe? Ka sira buka deʼit atu halo desizaun neʼebé halo kontente ba parte rua neʼe ka lae?
5. Saida deʼit mak la hanesan entre enkontru iha Jerusalém no igreja nia ulun-naʼin sira-nia enkontru?
5 Iha enkontru sira neʼebé igreja nia ulun-naʼin sira halaʼo, baibain sira buka atu halo kontente sira-nia an no sira mós buka ema seluk atu apoia sira-nia hanoin. Maibé apóstolu no katuas sira neʼebé halibur iha Jerusalém la halo hanesan neʼe no sira mós la halo desizaun hodi halo vota. Sira hotu neʼebé tuir enkontru neʼe ikusmai foti desizaun ho hanoin ida deʼit. Saida mak ajuda sira atu halo nuneʼe? Maski sira ida-idak iha sira rasik nia hanoin, maibé sira hotu hafolin Maromak nia Liafuan. Sin, xave atu rezolve problema kona-ba sirkunsizaun mak simu liafuan husi eskritura sira.—Lee Salmo 119:97, 100. *
6, 7. Oinsá mak Maromak nia Liafuan ajuda apóstolu no katuas sira atu rezolve problema kona-ba sirkunsizaun?
6 Eskritura neʼebé ajuda apóstolu no katuas sira atu rezolve problema neʼe mak Amós 9:11, 12. Liafuan neʼe temi fali iha Apostolu 15:16, 17, dehan: “Haʼu sei fila fali mai no harii fali David nia uma neʼebé monu tiha; husi nia rahun sira Haʼu sei harii nia no foti nia fali, atu ema sira neʼebé sei hela sei buka Naʼi [Jeová], no mós jentiu sira [“ema husi nasaun hotu”, MF] neʼebé tan sira ema bolu Haʼu naran. Naʼi [Jeová] . . . dehan nuneʼe.”
7 Maibé ema balu karik hatete: ‘Eskritura neʼe la dehan katak ema jentiu neʼebé sai ema kristaun la presiza hetan sirkunsizaun.’ Neʼe loos. Maibé ema kristaun judeu komprende oinsá mak eskritura neʼe iha relasaun ho sirkunsizaun, tanba tuir ema judeu nia hanoin ema husi nasaun seluk neʼebé hetan ona sirkunsizaun, sira laʼós jentiu tan maibé sira sai ona maluk ema judeu. (Êx 12:48, 49) Porezemplu, iha tradusaun Bíblia Septuajinta neʼebé Bagster tradús, Ester 8:17 hatete: “Ema jentiu barak hetan sirkunsizaun no sai ema judeu.” Nuneʼe, kuandu eskritura iha Amós fó-hatene nanis katak “ema sira neʼebé sei hela” iha Israel nia umakain sei sai povu ida ba Maromak nia naran hamutuk ho “jentiu” ka ema husi nasaun hotu, ida-neʼe katak ema judeu rasik no mós ema seluk neʼebé hetan ona sirkunsizaun, sira sei sai hamutuk ho ema neʼebé la hetan sirkunsizaun. Ida-neʼe hatudu ho klaru katak ema jentiu, ka ema husi nasaun seluk, la presiza hetan sirkunsizaun atu sai ema kristaun.
8. Tanbasá mak ema kristaun judeu presiza aten-brani atu apoia desizaun neʼe?
8 Maromak nia Liafuan no espíritu santu ajuda apóstolu no katuas sira atu rezolve problema hodi “hanoin ho laran ida deʼit”. (Apos 15:25) Maski desizaun neʼe bele halo ema kristaun judeu atu hetan terus liután husi ema neʼebé tuir relijiaun judeu nian, maibé ho aten-brani sira apoia desizaun neʼebé bazeia husi Maromak nia Liafuan.—Apos 16:4, 5.
HAHALOK NEʼEBÉ LA HANESAN
9. Oinsá mak ema kristaun sira-nia fiar komesa kahur ho doutrina falsu? Hanorin importante saida mak sai la moos?
9 Apóstolu Paulo fó-hatene nanis katak depois apóstolu sira mate, doutrina falsu sei tama iha kongregasaun hodi hafoʼer ema kristaun nia fiar. (Lee 2 Tesalonika 2:3, 7.) Nia mós hatete katak ema kristaun balu neʼebé iha knaar atu tau matan ba kongregasaun sei hadook an husi “hanorin loloos”. (2 Tim 4:3) Tan neʼe, Paulo fó avizu ba katuas sira hodi dehan: “Husi imi rasik, ema balun sei hamriik hodi hateten buat aat oioin atu dada sai eskolante sira ba sira-nia sorin.” (Apos 20:30) Livru ida (The New Encyclopædia Britannica) fó sai razaun ida tansá ema kristaun sira-nia fiar komesa kahur ho doutrina falsu. Tuir livru neʼe, ema kristaun balu neʼebé aprende kona-ba filozofia gregu nian, sira uza filozofia neʼe atu esplika sira-nia fiar. Ida-neʼe halo sira sente katak sira matenek, no sira mós hanoin katak ida-neʼe bele dada ema matenek-naʼin jentiu sira atu sai ema kristaun. Hanorin importante ida neʼebé sai la moos mak kona-ba Jesus Kristu mak sé. Bíblia bolu Jesus nuʼudar Maromak nia Oan, maibé ema neʼebé hafolin liu filozofia gregu nian hanorin katak Jesus mak Maromak.
10. Igreja nia ulun-naʼin sira presiza halo saida atu rezolve problema kona-ba Jesus mak sé?
10 Iha tempu uluk, igreja nia ulun-naʼin sira halo enkontru beibeik atu rezolve problema kona-ba Jesus mak sé. Problema neʼe bele rezolve lalais se sira buka-hatene buat neʼebé Bíblia hatete kona-ba neʼe, maibé sira barak la halo ida-neʼe. Tuir loloos, sira ida-idak iha ona sira rasik nia hanoin antes atu tuir enkontru hanesan neʼe no sira la prontu atu rona ema seluk nia hanoin. Kuandu sira foti desizaun iha enkontru hanesan neʼe, dala barak sira la temi eskritura husi Bíblia.
11. Igreja nia ulun-naʼin sira hafolin liu sé-nia hanorin? Tanbasá?
11 Tanbasá mak igreja nia ulun-naʼin sira ladún uza Bíblia? Matenek-naʼin ida naran Charles Freeman hatete katak sira ladún uza Bíblia tanba Bíblia la tuir sira-nia hanoin katak Jesus mak Maromak. Tanba ulun-naʼin sira la bele nega Jesus rasik nia liafuan neʼebé hatete katak Maromak boot liu fali nia, rezultadu mak toʼo ohin loron, igreja nia ulun-naʼin barak hafolin liu doutrina no tradisaun neʼebé igreja nia ema-boot sira hanorin duké hafolin Maromak nia Liafuan! Karik ita koʼalia ona ho seminarista kona-ba doutrina Trindade no haree katak hanesan neʼe duni.
12. Tanba nasaun Roma nia liurai sira mós envolve an iha igreja, ida-neʼe lori rezultadu aat saida?
12 Buat ida neʼebé akontese beibeik iha enkontru sira-neʼe mak nasaun Roma nia liurai sira mós envolve an. Porezemplu, profesór ida naran Richard E. Rubenstein hakerek kona-ba buat neʼebé akontese iha enkontru boot iha sidade Niseia. Nia dehan katak antes tuir enkontru neʼe, Liurai Constantino hatudu laran-diʼak ba bispu sira no halo sira sai riku tebes. Iha tinan ida deʼit nia laran, Constantino fó fali buat neʼebé uluk nasaun Roma nia liurai sira seluk hadau tiha husi sira, hanesan sira-nia igreja, serbisu no pozisaun. Nuneʼe Constantino halo diʼak ba sira hanesan nia halo ona ba amlulik sira husi relijiaun jentiu nian. Rezultadu mak kuandu Constantino tuir enkontru boot iha Niseia, nia iha pozisaun atu fó sai ninia ideia ka domina enkontru boot neʼe. Charles Freeman mós hatete: “Buat neʼebé [Constantino] halo loke dalan ba liurai sira seluk neʼebé tuir nia laʼós atu fó apoiu ba igreja deʼit maibé hodi envolve an atu forma igreja nia doutrina.”—Lee Tiago 4:4.
13. Saida deʼit mak hanetik igreja nia ulun-naʼin sira atu hafolin Bíblia?
13 Maski susar ba igreja nia ulun-naʼin sira atu hatene loos Jesus Kristu mak sé, maibé ida-neʼe la susar ba ema barak neʼebé moris baibain tanba sira simu buat neʼebé sira lee iha Bíblia. Maibé, tanba igreja nia ulun-naʼin sira buka osan husi liurai ka buka pozisaun boot iha igreja, ida-neʼe halo sira la hafolin Bíblia. Porezemplu, igreja nia ulun-naʼin ida iha tempu neʼebá, naran Gregorius husi Nissa, nia hatún ema baibain, hanesan ema neʼebé faʼan roupa, troka osan, no loja-naʼin tanba sira koʼalia beibeik kona-ba relijiaun. Gregorius la gosta katak sira barak esplika Oan la hanesan Aman, Aman boot liu Oan, no Maromak mak kria Oan. Sin, la hanesan ho igreja nia ulun-naʼin sira, ema neʼebé moris baibain hatene esplika lia-loos sira-neʼe hodi uza Bíblia. Diʼak se Gregorius no ninia maluk sira rona ba ema baibain hanesan neʼe!
“TRIGU” NO “DUʼUT AAT” MORIS HAMUTUK
14. Tanbasá mak ita bele fiar katak husi apóstolu sira-nia tempu toʼo ohin loron sempre iha ema kristaun loos neʼebé hetan kose-mina?
14 Iha Jesus nia ai-knanoik ida, nia kompara ema kose-mina sira ho “trigu” neʼebé moris hamutuk ho “duʼut aat”. (Mt 13:30) Ai-knanoik neʼe hatudu katak husi apóstolu sira-nia tempu toʼo ohin loron sempre iha ema kristaun loos neʼebé hetan kose-mina. Klaru katak ita la hatene sé loos mak sai parte iha grupu “trigu” neʼe, maibé ita bele fiar katak husi tempu uluk toʼo agora sempre iha ema neʼebé hatudu aten-brani hodi kaer metin ba Maromak nia Liafuan no fó sai igreja nia hanorin neʼebé la tuir Bíblia. Mai ita haree ezemplu balu.
15, 16. Fó toʼok ezemplu kona-ba ema neʼebé hafolin Maromak nia Liafuan.
15 Porezemplu, arsebispu Agobard husi Lyons iha rai-Fransa (tinan 779-840), nia hatete katak sala atu adora imajen, adora santu-santa sira, no halaʼo serimónia sira neʼebé la tuir Bíblia. Bispu Claudius neʼebé moris iha tempu hanesan mós la simu igreja nia tradisaun no koʼalia katak ema labele halo orasaun ba santu-santa sira no labele adora igreja nia sasán lulik. Maizumenus iha tinan 1000, igreja hasai ninia ulun-naʼin boot ida naran Berengarius husi Tour iha rai-Fransa tanba nia la simu igreja nia hanorin kona-ba tua-uvas no paun neʼebé nakfila sai fali Jesus nia raan no isin. Berengarius mós hatete katak Bíblia mak importante liu duké igreja nia tradisaun.
16 Maizumenus iha tinan 1100, iha ema naʼin-rua tan neʼebé hafolin Bíblia, sira naran Pedro husi Bruys no Henry husi Lausanne. Pedro husik ninia knaar nuʼudar amlulik tanba nia fiar katak buat neʼebé Igreja Katólika hanorin kona-ba fó sarani bebé, tua-uvas no paun neʼebé nakfila ba Jesus nia raan no isin, orasaun hodi husu ema mate saʼe ba lalehan, no adora krús, buat sira-neʼe la tuir Bíblia. Ikusmai iha tinan 1140, ema sunu mate Pedro tanba ninia fiar. Henry mós fó sai igreja nia hahalok sala no serimónia sira neʼebé la tuir Bíblia. Tan neʼe, iha tinan 1148, igreja kaer no hatama nia iha kadeia laran toʼo mate.
17. Valdo no ema neʼebé tuir nia halo saida?
17 Kuandu Pedro husi Bruys mate, ema ida naran Valdès, ka Valdo moris mai, no nia halo serbisu barak atu habelar lia-loos husi Bíblia. Maski Valdo mak ema baibain deʼit, maibé tanba nia hafolin duni Bíblia, Valdo fó ninia rikusoin ba ema seluk no organiza serbisu atu tradús Bíblia ba língua neʼebé ema baibain koʼalia iha parte súl iha rai-Fransa. Ema balu neʼebé rona mensajen husi Bíblia iha sira rasik nia língua sente kontente tebes toʼo sira mós fó sira-nia rikusoin ba ema seluk no uza sira-nia moris atu haklaken lia-loos husi Bíblia. Igreja la gosta hahalok hanesan neʼe, nuneʼe iha tinan 1184, amu-papa hasai sira husi igreja no bispu mós duni sira sai husi sira rasik nia rai. Maibé ida-neʼe ajuda sira atu habelar liután mensajen husi Bíblia iha fatin seluk. Neineik-neineik iha rai-Europa iha grupu barak neʼebé tuir Valdo, Pedro husi Bruys, no Henry husi Lausanne no mós grupu seluk neʼebé haketak an husi igreja. Ema seluk tan neʼebé kaer metin ba lia-loos husi Bíblia mak John Wycliffe (maizumenus tinan 1330-1384), William Tyndale (maizumenus tinan 1494-1536), Henry Grew (tinan 1781-1862), no George Storrs (tinan 1796-1879).
“EMA SIRA LA BELE KESI METIN EVANJELLU”
18. Husi tinan 1870, oinsá mak estudante Bíblia sira estuda Bíblia? Tansá mak ida-neʼe lori rezultadu diʼak?
18 Maski ema koko makaʼas atu hapara lia-loos husi Bíblia atu habelar iha mundu tomak, maibé sira la bele halo nuneʼe. 2 Timoteo 2:9 hatete: “Ema sira la bele kesi metin evanjellu.” Iha tinan 1870, grupu estudante Bíblia ida komesa buka-hatene lia-loos. Oinsá mak sira estuda? Primeiru, sira ida husu pergunta kona-ba tópiku ida. Depois, sira koʼalia hamutuk kona-ba neʼe. Tuirmai, sira buka eskritura hotu kona-ba tópiku neʼe. Kuandu sira iha hanoin hanesan kona-ba oinsá eskritura sira-neʼe liga malu, sira hakerek desizaun neʼebé sira halo kona-ba resposta ba pergunta neʼe. Hodi estuda hanesan neʼe, sira halo tuir ezemplu husi apóstolu no katuas sira iha tempu uluk. Ita kontente tebes katak husi tinan 1870, ita-nia “avó sira” neʼebé iha lia-loos, sira buka-hatene didiʼak katak buat hotu neʼebé sira fiar mai husi Maromak nia Liafuan.
19. Saida mak eskritura tinan nian ba 2012? Tanbasá mak eskritura neʼe diʼak mai ita?
19 Sin, Bíblia mak ita-nia fiar nia hun. Tan neʼe, nuʼudar eskritura tinan nian ba tinan 2012, Grupu Administradór husi Testemuña ba Jeová hili liafuan neʼebé Jesus hatete ba ninia Aman hodi dehan: “Ita-nia liafuan mak lia-loos.” (Joao 17:17) Ita hotu neʼebé hakarak monu loos ba Maromak nia laran tenke moris tuir lia-loos. Tan neʼe, mai ita hakaʼas an nafatin atu husik Maromak nia Liafuan sai matadalan mai ita.
[Nota–rodapé]
^ par. 2 Salmo 1:1-3: “1 Ksolok ba ema neʼebé . . . 2 gosta Jeová nia ukun-fuan, no ukun-fuan neʼe, nia lee ho lian neineik loron no kalan. 3 . . . No nia sei hetan susesu iha buat hotu neʼebé nia halo.”
^ par. 5 Salmo 119:97, 100: “97 Haʼu hadomi tebes Ita-nia ukun-fuan! Loron tomak ida-neʼe mak haʼu hanoin.” “100 Haʼu-nia hahalok hatudu matenek liu fali ema katuas sira, tanba haʼu halo tuir Ita-nia mandamentu sira.”
[Pergunta estudu nian]
[Liafuan neʼebé foti husi pájina 8]
Eskritura tinan nian ba 2012: “Ita-nia liafuan mak lia-loos.” —Joao 17:17
[Dezeñu iha pájina 7]
Valdo
[Dezeñu iha pájina 7]
Wycliffe
[Dezeñu iha pájina 7]
Tyndale
[Dezeñu iha pájina 7]
Grew
[Dezeñu iha pájina 7]
Storrs
