Keta husik moras halakon ita-nia ksolok

HANOIN toʼok, iha dadeer kuandu ita foin hadeer, ita hakarak tebes atu kalan lalais tanba ita lakohi atu terus ho ita-nia moras todan ba loron ida tan. Karik ita sente hanesan Job, neʼebé hatete: “Diʼak liu haʼu mate duké tahan haʼu-nia susar sira hotu.” (Jó 7:15, The New English Bible) Saida mak ita sei halo se ita tenke tahan moras neʼe tinan ba tinan?

Ida-neʼe mak buat neʼebé akontese ba Mefiboset, Liurai David nia kolega Jónatas nia oan. Kuandu Mefiboset tinan lima, nia “monu no sai aleijadu”. (2 Sam 4:4) Depois nia sai boot, ema duun matak nia hodi hatete katak nia kontra hasoru liurai, no nia mós lakon rikusoin barak, ida-neʼe halo ninia susar aumenta. Maski nuneʼe, nia tahan hasoru susar sira-neʼe hotu hodi la husik buat ida atu halakon ninia ksolok, no ida-neʼe sai nuʼudar ezemplu diʼak ba ita.—2 Sam 9:6-10; 16:1-4; 19:24-30.

Ezemplu diʼak ida tan mak apóstolu Paulo. Iha ninia karta ida, nia hakerek kona-ba ‘ai-tarak iha ninia isin’ neʼebé nia tenke tahan. (2 Kor 12:7) Ai-tarak neʼe karik kona-ba moras ruma, ka karik kona-ba maluk kristaun neʼebé kontra hasoru nia no la simu nia nuʼudar apóstolu. Maski ita la hatene loloos ninia problema mak saida, maibé nia iha duni problema neʼebé susar atu halakon, tan neʼe nia tenke tahan problema neʼe ba tempu kleur.—2 Kor 12:9, 10.

Ohin loron, moras todan neʼebé la bele kura mós kona Maromak nia atan sira. Porezemplu, kuandu irmán Magdalena tinan 18, nia hetan moras todan naran lupus. Nia hatete: “Foufoun, haʼu taʼuk tebes. Nuʼudar tempu laʼo daudauk, haʼu-nia moras neʼe sai boot ba beibeik, haʼu-nia kabun moras, fisur iha ibun laran, kakorok bubu.” Ita mós bele kona moras oin seluk neʼebé susar ba ema seluk atu hatene. Porezemplu, irmán ida naran Izabela hatete: “Husi kiʼik, haʼu iha moras depresaun. Tan neʼe, haʼu pániku lalais, dada iis ladiʼak, no kabun moras. Haʼu sempre sente kole.”

Hasoru realidade

Moras ka aleijadu bele halo susar ba ema nia moris. Kuandu problema hanesan neʼe kona ita, diʼak atu hanoin didiʼak kona-ba ita-nia situasaun. Karik la fasil ba ita atu simu katak agora ita la bele halo buat neʼebé uluk ita halo. Irmán Magdalena hatete: “Haʼu-nia moras sai aat ba beibeik. Dala barak haʼu la bele tun husi kama no book an. Tanba haʼu la hatene aban haʼu sei sente oinsá, ida-neʼe halo susar ba haʼu atu halo planu kona-ba buat ruma. Buat neʼebé halo haʼu estrese liu mak haʼu la bele ona atu serbí Jeová hanesan uluk.”

Irmaun Zbigniew hatete: “Neineik-neineik, haʼu-nia moras artrite halo haʼu la iha forsa no halo haʼu-nia ruin fukun bubu. Dala ruma,  kuandu bubu makaʼas, haʼu la bele halo buat ida. Ida-neʼe halo haʼu sente haʼu la iha folin.”

Tinan balu liubá, doutór fó-hatene irmán Barbara katak nia iha tumór iha ninia kakutak. Irmán Barbara hatete: “Derrepente deʼit haʼu-nia isin komesa ladiʼak. Haʼu sente isin-baruk, ulun moras beibeik, no haʼu-nia hanoin halai bá-mai deʼit. Agora haʼu la bele halo buat barak hanesan uluk, tan neʼe haʼu presiza tetu didiʼak buat neʼebé haʼu bele no la bele halo.”

Buat neʼebé importante liu ba irmaun-irmán sira-neʼe mak halo tuir Jeová nia hakarak. Hodi tau sira-nia fiar tomak ba Maromak, sira hetan ninia ajuda.—Prov 3:5, 6.

Oinsá Jeová ajuda ita?

Ita labele hanoin katak ita hetan susar tanba Maromak la kontente ho ita. (Lam 3:33) Hanoin toʼok kona-ba terus oioin neʼebé Job tahan maski nia ema neʼebé loos. (Jó 1:8) Maromak nunka koko ema ho buat neʼebé aat. (Tgo 1:13) Moras hotu neʼebé kona ema, neʼe tanba Adão ho Eva nia sala.—Rom 5:12.

Maibé, Maromak Jeová no Jesus sei la husik ema neʼebé loos. (Sal 34:15) Maromak sai ‘ita-nia mahon no ita-nia abrigu’ iha tempu naran deʼit, liuliu kuandu ita hasoru susar boot. (Sal 91:2) Entaun, saida deʼit mak bele ajuda ita atu haksolok nafatin maski hasoru susar neʼebé la bele halakon kedas?

Orasaun: Hodi halo tuir Maromak nia atan sira-nia ezemplu iha tempu uluk, ita mós bele soe ita-nia todan ba ita-nia Aman iha lalehan liuhusi orasaun. (Sal 55:22) Kuandu ita halo nuneʼe, ita bele hetan dame husi Maromak, no ida-neʼe sei halo ita-nia laran no ita-nia hanoin hakmatek. (Flp 4:6, 7) Hodi tau fiar ba Maromak liuhusi orasaun, irmán Magdalena tahan ninia moras. Nia hatete: “Hodi fó sai buat hotu neʼebé iha haʼu-nia laran ba Jeová, ida-neʼe halo haʼu sente kmaan no haksolok fali. Agora, haʼu hatene duni oinsá atu tau fiar ba Maromak loron-loron.”—2 Kor 1:3, 4.

Hodi hatán ba ita-nia orasaun, Jeová bele fó forsa mai ita liuhusi ninia espíritu santu, ninia Liafuan, no mós maluk kristaun sira. Ita la hein katak Maromak sei halo milagre hodi halakon kedas ita-nia moras. Maibé, ita bele fiar  katak nia sei fó matenek no forsa ba ita atu bele tahan susar naran deʼit neʼebé ita hasoru. (Prov 2:7) Sin, nia bele fó “kbiit makaʼas” neʼebé la hanesan baibain.—2 Kor 4:7.

Família: Família neʼebé hatudu domin no laran-diʼak ajuda ita atu tahan hasoru ita-nia moras. Maibé, ita-nia família mós sente terus tanba ita moras. Karik sira sente triste tanba la bele halo buat ida atu halakon ita-nia moras. Maski nuneʼe, sira sempre prontu atu ajuda ita. Halo orasaun hamutuk sei ajuda ita atu laran hakmatek hodi bele tahan ita-nia moras.—Prov 14:30.

Irmán Barbara koʼalia kona-ba ninia oan-feto, hodi dehan: ‘Nia ajuda haʼu atu hola parte iha serbisu haklaken. Ninia laran-manas halo haʼu sente kontente.’ Irmaun Zbigniew mós hafolin tebes ninia feen nia ajuda. Nia dehan: “Nia halo serbisu uma nian hotu. Nia mós ajuda haʼu atu hatais, no dala barak nia lori haʼu-nia pasta kuandu ami bá reuniaun no bá haklaken.”

Maluk kristaun sira: Kuandu ita hamutuk ho ita-nia maluk kristaun sira, sira bele fó laran-manas no haksolok ba ita. Maibé oinsá kuandu ita moras demais no la bele tuir reuniaun? Irmán Magdalena hatete: “Irmaun-irmán sira iha kongregasaun sempre grava programa iha reuniaun atu haʼu bele rona. Haʼu-nia maluk kristaun sira telefone haʼu beibeik atu buka-hatene saida deʼit mak sira bele halo atu ajuda haʼu. Sira mós haruka karta neʼebé halo haʼu haksolok. Hodi hatene katak sira hanoin haʼu, ida-neʼe ajuda haʼu atu tahan haʼu-nia moras.”

Irmán Izabela, neʼebé moras depresaun, hatete: “Iha kongregasaun laran, haʼu iha ‘aman’ no ‘inan’ barak, sira prontu atu rona haʼu no sempre buka atu komprende haʼu-nia situasaun. Irmaun-irmán iha kongregasaun mak haʼu-nia família, no hamutuk ho sira mak haʼu sente dame no haksolok.”

Se ita hasoru susar oioin, diʼak liu atu la hakarak “mesamesak” hodi haketak an husi irmaun-irmán sira. Duké halo ida-neʼe, ita hafolin irmaun-irmán sira iha kongregasaun no buka atu hamutuk ho sira. (Prov 18:1) Hodi halo nuneʼe mak ita bele hetan laran-manas  husi sira. Karik foufoun ita sente katak ita lakohi fó-hatene kona-ba ita-nia susar. Maibé, ita-nia maluk sira sei kontente se ita la subar ita-nia problema. Ida-neʼe sei fó oportunidade ba sira atu hatudu domin neʼebé loos ba ita nuʼudar maluk kristaun. (1 Ped 1:22) Tan neʼe, se ita presiza ema ruma atu tula ba reuniaun, atu bá haklaken hamutuk, ka atu koʼalia ba malu, diʼak atu fó-hatene. Klaru katak ita lakohi sai hanesan ema husudór, maibé ita hakarak hatudu agradese ba sira-nia ajuda.

Hanoin deʼit ba buat neʼebé diʼak: Atu haksolok nafatin maski tahan moras todan ruma, neʼe depende ba ema ida-idak nia hanoin. Se ita triste hela deʼit, ida-neʼe halo ita hanoin deʼit kona-ba buat neʼebé ladiʼak. Bíblia hatete: “Ema ida neʼebé haksolok iha laran bele tahan nia moras, maibé sira neʼebé laran-kraik, sé mak bele tahan?”—Prov 18:14.

Irmán Magdalena hatete: “Haʼu hakaʼas an atu la hanoin barak kona-ba haʼu-nia problema. Kuandu haʼu sente diʼak uitoan, haʼu hakaʼas an atu haksolok iha loron neʼe. Hodi lee esperiénsia husi irmaun-irmán sira neʼebé laran-metin nafatin maski sira iha moras todan, ida-neʼe fó laran-manas mai haʼu.” Irmán Izabela mós hanoin kona-ba oinsá Jeová hatudu domin no hafolin nia, no ida-neʼe fó forsa ba irmán neʼe. Nia hatete: “Haʼu sente haʼu iha folin, no ida-neʼe halo haʼu iha hakarak atu moris. Haʼu mós iha esperansa neʼebé kapás iha futuru.”

Irmaun Zbigniew hatete: “Haʼu-nia moras hanorin haʼu atu hatudu haraik-an no halo tuir, hanorin haʼu atu hatudu matenek no fó perdua husi laran. Haʼu mós aprende oinsá atu serbí Jeová ho haksolok hodi la hanoin demais kona-ba haʼu-nia an. Tuir loloos, moras neʼe book haʼu atu kontinua laʼo ba oin iha haʼu-nia serbisu ba Jeová.”

Diʼak atu hanoin nafatin katak Jeová sempre haree oinsá ita tahan ita-nia moras. Maromak hanoin ita no nia hatene ita-nia terus. Nia sei la ‘haluha ita-nia hahalok sira no ita-nia domin neʼebé ita hatudu ba Nia’. (Ebr 6:10) Tan neʼe, mai ita la haluha Maromak nia liafuan ba ninia atan sira hotu neʼebé laran-metin ba nia, neʼebé dehan: “Haʼu sei la husik ka hadook an husi imi.”—Ebr 13:5.

Se dala ruma ita sente laran-tun, diʼak atu hanoin nafatin kona-ba ita-nia esperansa kapás atu moris iha mundu foun. Sin, lakleur tan, ho ita-nia matan rasik ita sei haree bensaun neʼebé mai husi Maromak nia Ukun!

[Kaixa/Dezeñu iha pájina 28, 29]

Sira haklaken nafatin maski moras todan

“Haʼu la bele laʼo mesak, tan neʼe haʼu-nia feen ka irmaun-irmán sira lori haʼu atu bá haklaken. Antes bá haklaken, haʼu prepara didiʼak oinsá atu koʼalia ho ema no dekór eskritura sira.”—Jerzy, matan-delek.

“Haʼu haklaken liuhusi telefone, no mós hakerek karta ba ema neʼebé gosta atu hatene lia-loos. Kuandu haʼu baixa iha ospitál, haʼu sempre tau Bíblia no ita-nia livru sira iha haʼu-nia kama sorin. Ida-neʼe loke dalan ba haʼu atu koʼalia kona-ba lia-loos.”—Magdalena, moras lupus.

“Haʼu gosta haklaken husi uma ba uma, maibé kuandu haʼu la bele, haʼu haklaken liuhusi telefone.”—Izabela, moras depresaun.

“Haʼu kontente atu vizita fali ema no ajuda estudante Bíblia. Kuandu haʼu ladún moras, haʼu bá haklaken husi uma ba uma.”—Barbara, moras tumór iha kakutak.

“Haʼu lori pasta neʼebé kmaan. Haʼu haklaken toʼo haʼu la bele laʼo tan tanba haʼu-nia ruin moras.”—Zbigniew, moras artrite.

[Dezeñu iha pájina 30]

Ita hotu bele fó ksolok no kmaan ba ita-nia maluk neʼebé moras