Pergunta husi lee-naʼin

Ita bele hatene ho loloos oras neʼebé ema hedi Jesus ba ai-riin?

Ema balu husu pergunta neʼe tanba sira hanoin katak informasaun neʼebé Marcos hakerek kona-ba Jesus nia mate la hanesan ho buat neʼebé apóstolu João hakerek. Livru Marcos dehan katak soldadu sira hedi Jesus ba ai-riin iha “tuku sia dadeer”. (Mc 15:25) Maibé tuir livru Joao, oras neʼebé Pilatos saran Jesus ba ema judeu sira atu hedi nia mak “besik meiudia”. (Joao 19:14-16) Liafuan sira-neʼe haree hanesan kontra malu, no matenek-naʼin sira kona-ba Bíblia iha hanoin oioin atu esplika kona-ba neʼe. Tanba Bíblia la fó informasaun barak, ita la hatene ho loloos tansá mak livru rua neʼe temi oras neʼebé la hanesan. Maski nuneʼe, hodi hatene oinsá mak ema iha tempu uluk sura oras, ida-neʼe sei ajuda ita atu hatene kona-ba neʼe.

Iha Jesus nia tempu, ema la iha relójiu hanesan ita uza ohin loron. Sira buka-hatene oras hodi haree ba loro-matan nia aas iha lalehan. Liután neʼe, oras neʼebé loro-matan saʼe no monu muda beibeik durante tinan ida nia laran. Tan neʼe, sira hatene oras maizumenus deʼit. Iha Eskritura Lia-Gregu, kuandu ema hakerek kona-ba oras neʼebé buat ruma akontese, dala barak sira temi deʼit “tuku sia”, “meiudia” ka “loron fahe-rua”, no “tuku tolu loraik” hodi hatudu oras mak maizumenus dadeer, meiudia, no lokraik. (Mt 20:3, 5; Apos 10:3, 9, 30) Maibé kuandu sira presiza fó informasaun kona-ba oras neʼebé loos, sira temi oras ho klaru, porezemplu “tuku ida”.—Joao 4:52.

Evanjellu haat fó sai informasaun neʼebé hanesan kona-ba buat neʼebé akontese durante Jesus nia loron ikus iha rai. Livru haat neʼe hatete katak amlulik no katuas sira halibur malu iha dadeer-saan, no depois neʼe sira lori Jesus ba governadór Roma nian naran Pôncio Pilatos. (Mt 27:1; Mc 15:1; Lc 22:66; Joao 18:28) Livru Mateus, Marcos, no Lucas hatete katak depois ema hedi Jesus ba ai-riin, nakukun taka rai tomak husi loron fahe-rua “toʼo tuku tolu loraik”.—Mt 27:45, 46; Mc 15:33, 34; Lc 23:44.

Maibé oinsá kona-ba oras neʼebé ema hedi Jesus? Atu hatán ba pergunta neʼe, ita presiza hatene katak iha tempu neʼebá prosesu atu fó kastigu-mate hodi hedi ema inklui mós baku ho xikote. Dala ruma, sira baku makaʼas toʼo mate. Ita bele fiar katak ema baku Jesus makaʼas tebes toʼo nia la bele lori mesak ninia ai-riin no presiza ema seluk atu ajuda nia. (Lc 23:26; Joao 19:17) Tan neʼe, kuandu Marcos dehan katak ema hedi Jesus “iha tuku sia dadeer”, karik nia temi oras neʼebé ema komesa baku Jesus, no João fali, kuandu nia dehan katak ema hedi Jesus “besik meiudia”, nia koʼalia kona-ba oras neʼebé ema hedi duni Jesus ba ai-riin. Karik tan neʼe mak sira naʼin-rua temi oras neʼebé la hanesan.

Mateus, Marcos, no Lucas hakerek sira-nia Evanjellu tinan tolunulu liu antes apóstolu João hakerek ninia Evanjellu. Tan neʼe, João karik lee buat neʼebé sira naʼin-tolu hakerek ona. Maski nuneʼe, João temi oras neʼebé la hanesan ho livru Marcos kona-ba tempu neʼebé ema hedi Jesus ba ai-riin. Ida-neʼe hatudu ho klaru katak João la kopia tuir deʼit buat neʼebé Marcos hakerek. Maromak mak leno Marcos no mós João atu hakerek kona-ba Jesus. Sin, maski Bíblia la fó informasaun barak kona-ba tansá mak sira temi oras neʼebé la hanesan, maibé ita bele tau fiar tomak ba istória neʼebé ita lee iha Evanjellu sira.