Ita hanoin-hetan ka lae?

Ita gosta lee Livru Haklaken husi fulan balu liubá ka lae? Se nuneʼe, haree toʼok se Ita bele hatán pergunta sira tuirmai neʼe:

• Bíblia fó matadalan saida deʼit kona-ba joga osan?

Ema neʼebé taru osan ba buat ruma maski seidauk hatene rezultadu, dala barak tau fiar ba “sorte”, ka forsa ruma neʼebé bele kontrola sira-nia moris. Tuir Maromak nia haree, sira neʼebé fiar ba sorte mak hanesan ema neʼebé adora lulik, no hahalok neʼe kontra hasoru adorasaun neʼebé loos. Ema hanesan neʼe fiar liu ba buat neʼebé falsu duké fiar ba Maromak loos. (Isa 65:11) Joga la hanesan fó osan atu hola buat ruma, tanba ema neʼebé joga hakarak manán deʼit ema seluk nia osan. Tuir Maromak nia haree, hakarak ema seluk nia sasán no osan mak sala neʼebé boot hanesan hakarak ema seluk nia feen. (Êx 20:17; Rom 7:7) Ema hanesan neʼe mehi katak sira bele sai riku maski sira la hakaʼas an atu halo buat ruma. Klaru katak hanoin hanesan neʼe kontra Bíblia nia konsellu neʼebé haruka ema kristaun atu halo “serbisu ho liman”. (Ef 4:28; 2 Tes 3:10, 12)—1/4, pájina 29-31.

• Buat tolu saida mak ajuda ita tahan hasoru hakarak atu la hatudu laran-moos?

(1) Taʼuk ba Maromak. (1 Ped 3:12) (2) Laran neʼebé hetan treinu husi Bíblia. (3) Hakaʼas an atu haksolok ho buat neʼebé ita iha ona.—15/4, pájina 6-7.

• Oinsá mak ita bele hatene katak, sai ema neʼebé sériu, neʼe la dehan katak ita sempre hatudu oin-buis ka labele iha tempu diʼak ho ema seluk?

Ita bele hanoin kona-ba Jesus nia ezemplu. Nia iha tempu haksolok hodi han hamutuk ho ema seluk. Ita mós hatene katak nia laʼós ema neʼebé sériu demais. Tan neʼe, labarik sira mós gosta atu hakbesik ba Jesus.—15/4, pájina 10.

• Ai-knanoik kona-ba ai-oliveira iha Roma kapítulu 11 katak sá?

Ai-oliveira neʼe hatudu parte segundu husi Abraão nia bei-oan, katak Israel espirituál. Iha ai-knanoik neʼe, Jeová mak hanesan abut no Jesus mak ai-lolon. Kuandu ema Israel barak la simu Jesus, ema jentiu sira neʼebé sai fiar-naʼin sai hanesan ai-sanak neʼebé tutan ba ai-oliveira diʼak. Ho nuneʼe, ema jentiu sira bele fó fuan diʼak hodi halo kompletu parte segundu ba Abraão nia bei-oan.—15/5, pájina 22-25.

• Se Jesus neʼebé la iha sala iha oan no bei-oan, sira mós bele sai parte ba Jesus nia sakrifísiu ka lae?

Lae. Maski Jesus iha kbiit atu hetan oan no bei-oan rihun ba rihun neʼebé la iha sala, maibé, Bíblia la hatete katak Jesus nia bei-oan sira sai parte husi ninia sakrifísiu atu salva ema husi sala. Jesus nia moris neʼebé perfeitu deʼit mak iha folin neʼebé hanesan ho Adão nia moris. (1 Tim 2:6)—15/6, pájina 13.

• Kuandu Jesus hatete ba Marta “buat ida deʼit mak folin loos”, ninia liafuan neʼe katak sá? (Lc 10:41, 42)

Jesus la dehan katak Marta hanoin demais kona-ba sasán mundu neʼe nian. Liafuan neʼe mós la dehan katak Jesus la hafolin Marta nia hakaʼas-an atu prepara hahán neʼebé diʼak. Maibé, Jesus fó-hanoin Marta kona-ba buat neʼebé importante liu. Marta hanoin barak liu kona-ba prepara hahán oioin no la uza oportunidade diʼak atu hametin ninia fiar.—1/7, pájina 12-13.

• Ema kristaun hotu neʼebé laran-metin bá lalehan kuandu mate ka lae?

Ema ida-idak neʼebé laran-metin hodi adora Maromak Jeová iha tempu uluk no ohin loron iha esperansa atu simu prezente moris ba nafatin. (Roma 6:23) Ema balu sei moris iha lalehan atu halaʼo knaar espesiál ida, maibé ema-lubun boot sei simu moris iha mundu neʼebé sei sai furak hanesan jardín Eden.—1/7, pájina 18.

• Oinsá mak ema kristaun sira hatudu katak sira halo tuir avizu iha Apostolu 20:29, 30 kona-ba mestre bosok sira?

Sira la simu iha sira-nia uma no la kumprimenta mestre bosok sira. (Rom 16:17; 2 Joao 9-11) Ema kristaun lakohi lee mestre bosok nia livru sira, la haree sira-nia programa iha televizaun, ka la lee informasaun kona-ba sira iha internét.—15/7, pájina 15-16.