“Halo tuir diʼak liu fali sakrifísiu”

NASAUN Israel nia liurai primeiru mak Saul. Maski Maromak loos rasik mak hili nia, maibé ikusmai Saul la halo tuir Maromak hodi halo sala boot.

Sala saida deʼit mak Saul halo? Saida mak nia presiza halo atu hasees an husi sala sira-neʼe? Saida mak ita bele aprende husi Saul nia istória?

Maromak Jeová hili liurai ida

Antes tempu neʼebé Maromak hili Saul atu sai liurai, profeta Samuel mak reprezenta Maromak iha nasaun Israel. Maibé, agora Samuel idade boot ona, no ninia oan sira la laran-metin ba Maromak. Iha tempu neʼebá, inimigu sira mós ameasa nasaun Israel. Kuandu katuas sira husi Israel husu Samuel atu foti liurai ida atu ukun sira, hodi bele tesi lia ba sira no lori sira ba funu, Maromak Jeová haruka profeta Samuel atu kose mina ba Saul nuʼudar sira-nia ulun, no nia dehan: “Nia tenke salva haʼu-nia povu husi ema Filístia nia liman.”—1 Sam 8:4-7, 20; 9:16.

Saul mak mane “joven [neʼebé] bonitu”. Liután neʼe, Saul mós iha hahalok neʼebé diʼak. Nia ema haraik-an. Porezemplu, Saul hatete ba Samuel: “Haʼu ema Benjamim, suku neʼebé kiʼik liu husi suku Israel hotu, no haʼu-nia família mak kiʼik liu husi família Benjamim hotu. Nuneʼe, tanbasá mak Ita hatete ida-neʼe mai haʼu?” Sin, Saul la hanoin katak nia ka ninia família mak boot liu ema seluk, maski ninia aman, Cis, “iha rikusoin barak”.—1 Sam 9:1, 2, 21.

Hanoin mós kona-ba buat neʼebé Saul halo kuandu Samuel fó sai sé mak Jeová hili atu sai liurai ba Israel. Samuel kose mina ba Saul no ema seluk la hatene kona-ba neʼe. Samuel dehan ba Saul: “Halo buat neʼebé ó-nia liman bele halo, tanba Maromak loos hamutuk ho ó.” Tuirmai, profeta Samuel halibur povu atu fó sai ba sira kona-ba ema neʼebé Maromak hili. Maibé, kuandu nia fó sai Saul nia naran, Saul la iha. Saul subar an tanba nia moe. Maromak Jeová hatudu Saul iha neʼebé, no ema simu nia nuʼudar sira-nia liurai.—1 Sam 10:7, 20-24.

Saul halo funu

Lakleur deʼit, Saul hatudu katak nia bele serbí nuʼudar liurai neʼebé diʼak. Kuandu ema Amon ameasa atu ataka Israel nia sidade ida, “Maromak nia espíritu book Saul”. Nuneʼe, ho kbiit nia bolu Israel nia soldadu sira atu halibur hamutuk, nia organiza sira, no depois  nia lori sira atu halo funu hasoru ema Amon. Kuandu Saul manán funu neʼe, nia fó glória ba Maromak, hodi dehan: “Ohin Maromak Jeová salva Israel.”—1 Sam 11:1-13.

Saul hatudu katak nia iha hahalok diʼak no Maromak haraik bensaun ba nia. Nia mós hatudu katak forsa atu manán inimigu sira mai husi Maromak Jeová. Maibé, se ema Israel no sira-nia liurai hakarak atu kontinua hetan susesu, sira presiza halo buat ida neʼebé importante tebes. Samuel hatete ba povu Israel: “Se imi taʼuk ba Jeová no loloos serbí nia no halo tuir nia lian, no imi la kontra hasoru Jeová nia mandamentu, imi no mós liurai neʼebé sei ukun imi mak ema neʼebé halo tuir Jeová, imi-nia Maromak.” Se ema Israel hatudu laran-metin ba Maromak, sira bele fiar metin kona-ba saida? Samuel hatete: “Jeová sei la husik ninia povu tan ninia naran boot, tanba Jeová deside tiha atu halo imi sai ninia povu.”—1 Sam 12:14, 22.

Halo tuir Maromak mak buat neʼebé importante liu atu Maromak bele simu ita. Kuandu Maromak Jeová nia atan sira halo tuir ninia mandamentu, nia haraik bensaun ba sira. Maibé, saida mak bele akontese se sira la halo tuir Maromak Jeová?

“Ó halo buat neʼebé beik”

Buat neʼebé Saul halo ba ema Filístia book sira atu ataka ema Israel ho tropa neʼebé boot liu. Ema Filístia nia tropa neʼebé barak “hanesan rai-henek neʼebé iha tasi-ibun” halo funu hasoru Saul. “No mane Israel haree katak sira hetan susar, tanba povu hasoru susar; no povu subar an iha fatuk-kuak no iha rai-kuak no iha fatuk aas no iha rai-okos no iha bee-matan sira.” (1 Sam 13:5, 6) Saida mak Saul sei halo?

Profeta Samuel hatete ba Saul atu hasoru malu iha Gilgal, iha neʼebé Samuel atu hasaʼe sakrifísiu. Saul hein iha neʼebá, maibé Samuel tarde, no Saul nia tropa komesa ona atu namkari. Tan neʼe, Saul hanoin atu nia rasik hasaʼe sakrifísiu. Kuandu nia foin halo ida-neʼe, Samuel toʼo mai. Hatene tiha kona-ba buat neʼebé Saul halo, Samuel hatete ba nia: “Ó halo buat neʼebé beik. Ó la halo tuir mandamentu neʼebé Jeová, ó-nia Maromak, haruka ó atu halo. Tanba, se ó halo tuir ona, Jeová sei halo ó-nia ukun metin iha Israel toʼo tempu neʼebé la bele sura. Maibé agora ó-nia ukun sei la tahan. Jeová sei hetan duni ba nia an ema ida neʼebé monu loos ba ninia laran; no Jeová sei foti nia nuʼudar ulun-naʼin ba ninia povu, tanba ó la halo tuir buat neʼebé Jeová haruka ó atu halo.”—1 Sam 10:8; 13:8, 13, 14.

Maromak haruka Saul atu hein ba Samuel atu hasaʼe sakrifísiu. Maski nuneʼe, Saul la hatudu fiar ba Maromak no la halo tuir buat neʼebé Maromak hatete. Klaru katak Saul nia hahalok neʼe la hanesan Gideão, neʼebé uluk sai ulun ba Israel nia tropa sira! Maromak haruka Gideão atu hamenus ninia tropa sira husi 32.000 toʼo 300, no Gideão halo tuir duni. Tanbasá? Tanba nia iha fiar ba Maromak Jeová. Ho Maromak nia ajuda, Gideão manán tropa naʼin-135.000 neʼebé mai atu ataka Israel. (Juíz 7:1-7, 17-22; 8:10) Maromak Jeová mós prontu atu ajuda Saul. Maibé, tanba Saul la halo tuir Maromak, ema Filístia ataka no hadau Israel nia rikusoin.—1 Sam 13:17, 18.

Kuandu ita hasoru susar ruma, oinsá mak ita halo desizaun? Ema balu neʼebé ladún iha fiar hanoin katak halo tuir matadalan husi Bíblia mak laʼós dalan neʼebé matenek. Kuandu Samuel la iha, karik Saul hanoin buat neʼebé nia halo mak matenek. Maibé, ba ema neʼebé hakarak Maromak atu simu sira, buat neʼebé importante liu mak halo desizaun tuir Maromak nia matadalan.

Maromak Jeová la simu tan Saul

Kuandu Saul halo funu hasoru ema Amalec, nia halo sala ida tan neʼebé boot. Uluk, Maromak tesi lia hasoru ema Amalec tanba sira ataka ema Israel kuandu sira sai husi rai-Egiptu.  (Êx 17:8; Deut 25:17, 18) Liután neʼe, ema Amalec hamutuk ho nasaun seluk ataka Maromak nia povu durante juis sira-nia tempu. (Juíz 3:12, 13; 6:1-3, 33) Tan neʼe, Maromak hanoin fali sira-nia sala no haruka Saul atu fó kastigu ba sira.—1 Sam 15:1-3.

Duké halo tuir Maromak nia ukun-fuan atu halakon ema Amalec no sira-nia rikusoin hotu, Saul kaer sira-nia liurai atu sai nuʼudar dadur no foti sira-nia animál neʼebé diʼak liu. Kuandu Samuel husu nia kona-ba ida-neʼe, saida mak Saul halo? Saul koko atu duun nia povu, hodi dehan: “Povu sente hanoin ba animál neʼebé diʼak liu husi bibi sira no karau sira, tanba sira hakarak atu halo sakrifísiu ba Jeová.” Klaru katak Saul la halo tuir Maromak, maski karik nia planu atu hasaʼe animál sira-neʼe nuʼudar sakrifísiu. Agora, Saul laʼós tan ‘ema kiʼik iha ninia matan rasik’. Tan neʼe, Maromak nia profeta fó sai katak Saul la halo tuir Maromak. Samuel hatutan tan hodi dehan: “Jeová gosta buat karan no sakrifísiu liu fali halo tuir ninia liafuan ka lae? Haree toʼok! Halo tuir diʼak liu fali sakrifísiu . . . Tanba ó la simu Jeová nia liafuan, nuneʼe nia mós la simu ó atu sai liurai.”—1 Sam 15:15, 17, 22, 23.

Kuandu Maromak Jeová hasai ninia espíritu santu no bensaun husi Saul, iha tempu neʼe “espíritu aat” komesa atu domina Israel nia liurai primeiru. Saul komesa sai laran-moras no hanoin aat kona-ba David, ida neʼebé ikusmai Maromak Jeová foti nuʼudar liurai. Dala balu Saul koko atu oho David, no tanba Saul haree katak “Jeová hamutuk ho David”, Bíblia dehan: “Saul sai nafatin David nia inimigu.” Saul duni tuir David atu kaer nia, no Saul mós haruka ninia tropa sira atu oho amlulik naʼin-85 no mós ema seluk. Sin, Maromak Jeová iha razaun barak atu husik Saul!—1 Sam 16:14; 18:11, 25, 28, 29; 19:10, 11; 20:32, 33; 22:16-19.

Kuandu ema Filístia ataka fali nasaun Israel, Saul buka ajuda husi matan-dook. Maibé ida-neʼe saugati deʼit. Iha loron tuirmai, nia hetan kanek todan iha funu no oho an. (1 Sam 28:4-8; 31:3, 4) Bíblia koʼalia kona-ba Israel nia liurai primeiru, neʼebé la halo tuir, hodi dehan: “Nuneʼe Saul mate tanba nia la laran-metin kuandu nia la hatudu fiar hodi kontra Jeová kona-ba Jeová nia liafuan neʼebé nia la halo tuir, no mós tanba nia husu konsellu husi matan-dook ida. No nia la husu konsellu husi Jeová.”—1 Crôn 10:13, 14.

Saul nia ezemplu aat hatudu ho klaru katak halo tuir Maromak Jeová diʼak liu fali hasaʼe sakrifísiu ruma ba nia. Apóstolu João hatete: “Ita-nia domin ba Maromak mak neʼe: katak ita halo tuir nia ukun-fuan sira. Nia ukun-fuan la susar mai ita.” (1 Joao 5:3) Tan neʼe, keta haluha katak atubele sai belun ho Maromak ita tenke halo tuir nia nafatin.

[Dezeñu iha pájina 21]

Kuandu Saul komesa atu ukun, nia ema haraik-an

[Dezeñu iha pájina 23]

Tanbasá mak Samuel dehan ba Saul katak “halo tuir diʼak liu fali sakrifísiu”?