Uza didiʼak imi-nia moris nuʼudar ema neʼebé la kaben
Uza didiʼak imi-nia moris nuʼudar ema neʼebé la kaben
“Ema neʼebé bele simu neʼe, simu bá.”—MT 19:12.
1, 2. (a) Oinsá mak Jesus, Paulo, no ema seluk haree moris nuʼudar ema neʼebé la kaben? (b) Tanbasá ema balu la sente katak moris nuʼudar ema neʼebé la kaben mak hanesan prezente ida?
ITA la duvida katak moris kaben nian mak prezente folin-boot ida husi Maromak. (Prov 19:14) Maski nuneʼe, ema kristaun barak neʼebé la kaben mós sente haksolok ho sira-nia moris. Irmaun ida naran Harold, neʼebé tinan 95 no nunka kaben, hatete: “Maski haʼu kontente atu hamutuk ho ema seluk no hatudu laran-luak ba sira, maibé kuandu haʼu mesak haʼu nunka sente mesamesak. Haʼu bele duni moris kontente nuʼudar ema neʼebé la kaben.”
2 Tuir loloos, Jesus Kristu no apóstolu Paulo haree moris nuʼudar ema neʼebé la kaben hanesan kmanek ka prezente husi Maromak. (Lee Mateus 19:11, 12; 1 Korinto 7:7.) Maski nuneʼe, klaru katak ema balu la kaben laʼós tanba sira hakarak moris hanesan neʼe, maibé dala ruma situasaun mak halo susar ba sira atu hetan kaben neʼebé diʼak. Ka, depois kaben tiha ba tinan barak, ema balu moris mesak fali karik tanba sira soe malu ka karik sira-nia kaben mate. Entaun, oinsá mak moris nuʼudar ema neʼebé la kaben bele sai hanesan prezente? No oinsá mak ema kristaun bele uza didiʼak sira-nia moris nuʼudar ema neʼebé la kaben?
Prezente neʼebé espesiál
3. Ema kristaun neʼebé la kaben bele iha oportunidade atu halo saida deʼit?
3 Baibain ema neʼebé la kaben, iha tempu barak liu no livre liu fali ema neʼebé kaben. (1 Kor 7:32-35) Buat sira-neʼe fó oportunidade ba sira atu aumenta liután sira-nia serbisu haklaken, atu hatudu domin barak liu ba ema seluk, no mós atu hakbesik liután ba Maromak Jeová. Tan neʼe, ema kristaun balu hafolin moris nuʼudar ema neʼebé la kaben no deside atu kontinua moris hanesan neʼe. Ema kristaun seluk la iha kaben laʼós tanba sira hakarak, maibé tanba situasaun ruma halo sira moris hanesan neʼe. Sira hanoin didiʼak no halo orasaun kona-ba sira-nia situasaun, no sira haree katak ho Maromak Jeová nia ajuda, sira bele moris ho laran-kontente. Nuneʼe, sira simu sira-nia situasaun no uza didiʼak sira-nia moris nuʼudar ema neʼebé la kaben.—1 Kor 7:37, 38, MF.
4. Tanbasá mak ema neʼebé la kaben bele sente katak sira iha parte iha Maromak nia serbisu?
4 Ema kristaun neʼebé klosan hatene katak kaben ka la kaben laʼós kritériu atu Maromak Jeová no ninia organizasaun bele hafolin sira. Maromak hadomi ita ida-idak. (Mt 10:29-31) La iha buat ida ka ema ida neʼebé bele haketak ita husi Maromak nia domin. (Rom 8:38, 39) Maski ita kaben ka la kaben, ita iha razaun barak atu fiar katak ita iha parte iha Maromak nia serbisu.
5. Saida mak ema neʼebé la kaben presiza halo atu uza didiʼak nia moris?
5 Maski nuneʼe, hanesan ema ida presiza hakaʼas an atu sai matenek atu toka múzika ka halo desportu ruma, ita mós presiza hakaʼas an atu uza didiʼak ita-nia moris nuʼudar ema neʼebé la kaben. Entaun ema neʼebé la kaben, maski sira idade boot ka kiʼik, irmaun ka irmán, sira rasik mak hakarak ka tanba situasaun, oinsá mak sira bele sente kontente ho sira-nia moris neʼe? Mai ita hanoin kona-ba ezemplu diʼak balu husi ema kristaun iha tempu uluk no haree saida mak ita bele aprende husi sira.
Moris la kaben kuandu sei joven
6, 7. (a) Filipe nia oan feto-raan naʼin-haat simu knaar espesiál saida? (b) Iha dalan saida deʼit mak Timóteo uza didiʼak nia moris nuʼudar ema neʼebé la kaben? Bensaun saida mak nia simu tanba nia prontu atu serbí Maromak iha tempu joven?
6 Iha apóstolu sira-nia tempu mane ida naran Filipe iha oan feto-raan naʼin-haat neʼebé apoia nia atu haklaken evanjellu. (Apos 21:8, 9) Atu halo profesia mak hanesan prezente ida neʼebé Maromak fó liuhusi ninia espíritu santu, no feto-raan sira-neʼe hetan knaar hanesan neʼe no ida-neʼe kumpre liafuan sira iha Joel 2:28, 29.
7 Timóteo mak mane joven ida neʼebé uza didiʼak ninia moris nuʼudar ema neʼebé la kaben. Ninia inan Eunice no ninia avó-feto Luisa hanorin nia husi kiʼik kedas kona-ba “sagrada eskritura”. (2 Tim 1:5; 3:14, 15) Karik sira sai ema kristaun kuandu Paulo vizita sira-nia sidade Listra ba dala primeiru, maizumenus iha tinan 47. Tinan rua depois neʼe, kuandu Paulo vizita Listra ba dala segundu, karik Timóteo nia tinan maizumenus 20 ona. Maski nia idade kiʼik no foin sai ema kristaun ba tempu uitoan deʼit, maibé katuas sira iha Listra no mós Ikónio “koʼalia didiʼak kona-ba nia”. (Apos 16:1, 2) Tan neʼe, Paulo konvida Timóteo atu serbisu hamutuk ho nia. (1 Tim 1:18; 4:14) Maski ita la hatene loloos se ikusmai Timóteo kaben ka lae, maibé ita hatene katak nuʼudar joven nia simu ho laran Paulo nia konvite, no ba tinan barak nia serbí ho kontente nuʼudar misionáriu no katuas kristaun neʼebé la kaben.—Flp 2:20-22.
8. Saida mak ajuda João Marcos atu tau uluk Maromak nia serbisu? Bensaun saida deʼit mak nia hetan?
8 Kuandu João Marcos sei joven, nia mós uza ninia tempu klosan ho didiʼak. Nia, ninia inan Maria, no nia primu Barnabé serbí iha kongregasaun Jerusalém husi tempu neʼebé kongregasaun neʼe harii. Karik Marcos nia família iha moris diʼak, tanba sira iha uma rasik iha sidade neʼe, no mós iha atan ida. (Apos 12:12, 13) Maski nuneʼe, nuʼudar joven Marcos la hanoin atu halo kontente nia an deʼit. Nia mós la buka deʼit atu moris kontente hodi harii nia família rasik. Tanba ransu hamutuk ho apóstolu sira, karik ida-neʼe ajuda nia atu haburas hakarak atu serbí nuʼudar misionáriu. Tan neʼe, ho laran-manas nia laʼo hamutuk ho Paulo no Barnabé kuandu sira halo sira-nia viajen misionáriu nian ba dala primeiru, no nia tulun sira. (Apos 13:5) Tuirmai nia mós halo viajen hamutuk ho Barnabé, no nia kontinua hatudu laran-manas hodi serbí hamutuk ho Pedro iha Babilónia. (Apos 15:39; 1 Ped 5:13) Maski ita la hatene ba tinan hira mak nia moris nuʼudar ema neʼebé la kaben, maibé ita hatene katak ema barak koñese nia nuʼudar ema neʼebé prontu atu serbí ema seluk no halo buat barak iha Maromak nia serbisu.
9, 10. Oportunidade saida deʼit mak joven kristaun sira iha atu aumenta sira-nia serbisu ba Maromak? Fó toʼok ezemplu ida.
9 Ohin loron mós, joven barak iha kongregasaun prontu atu uza sira-nia moris nuʼudar ema neʼebé la kaben atu aumenta liután sira-nia serbisu ba Maromak. Hanesan Marcos no Timóteo, sira haree sira-nia situasaun nuʼudar oportunidade atu ‘serbí Naʼi hodi la fahe sira-nia neon’. (1 Kor 7:35) Sin, sira neʼebé la kaben iha duni oportunidade barak. Sira bele serbí nuʼudar pioneiru, serbí iha fatin neʼebé presiza haklaken-naʼin, aprende língua foun, ajuda atu harii Reuniaun-Fatin ka sukursál, tuir Eskola Treinu Atan Kristaun, ka serbí iha Betel. Se ita sei joven no seidauk kaben, ita aproveita oportunidade neʼebé ita iha ka lae?
10 Irmaun ida naran Mark hahú serbí nuʼudar pioneiru kuandu nia seidauk tinan 20, nia mós tuir Eskola Treinu Atan Kristaun no nia serbí iha rai oioin. Hodi hanoin fali kona-ba ninia serbisu tempu-tomak durante tinan 25, nia hatete: “Haʼu hakaʼas an atu apoia ema hotu iha kongregasaun, hodi haklaken ho sira, hodi vizita sira nuʼudar bibi-atan, hodi konvida sira atu han hamutuk ho haʼu, no mós hodi konvida ema atu halimar hamutuk hodi hametin malu. Halo buat sira-neʼe halo haʼu haksolok tebes.” Hanesan Mark nia liafuan hatudu, buat neʼebé halo ita haksolok liu mak kuandu ita fó, laʼós deʼit simu buat ruma husi ema seluk. No hodi uza ita-nia tempu tomak atu halaʼo Maromak nia serbisu, ida-neʼe fó ita oportunidade barak atu halo nuneʼe. (Apos 20:35) Maski joven sira ohin loron iha matenek, esperiénsia ka hakarak neʼebé la hanesan, maibé sira ida-idak bele halo buat barak iha Naʼi nia serbisu.—1 Kor 15:58.
11. Buat diʼak saida deʼit mak ita bele hetan se ita la ansi atu kaben?
11 Maski ikusmai joven barak hakarak atu kaben, maibé iha razaun balu kona-ba tansá diʼak atu la ansi atu kaben. Paulo fó laran-manas ba joven sira atu hein toʼo sira liutiha tempu foin-saʼe nian, tanba iha tempu neʼe hakarak seksuál nian sai makaʼas liu. (1 Kor 7:36, MF) Tuir loloos presiza duni tempu atu komprende didiʼak ita-nia an no hetan esperiénsia iha ita-nia moris hodi bele hili kaben neʼebé diʼak. Halo juramentu kaben nian mak desizaun neʼebé boot tebes, no tenke halo tuir toʼo mate.—Ecle 5:2-5.
Moris la kaben kuandu idade boot ona
12. (a) Oinsá mak Ana uza didiʼak ninia situasaun? (b) Nia hetan bensaun diʼak saida?
12 Iha evanjellu Lucas koʼalia kona-ba feto ida naran Ana. Depois kaben tiha ba tinan hitu, nia laʼen mate, no klaru katak neʼe halo nia triste tebes. Ita la hatene loloos se sira iha oan ka lae no ita mós la hatene se nia hanoin atu kaben fali ka lae. Maibé, husi Bíblia ita hatene katak kuandu nia tinan 84, nia nafatin feto-faluk ida. Husi buat neʼebé Bíblia hatete, ita bele haree katak Ana uza didiʼak ninia situasaun neʼe atu hakbesik liután ba Maromak Jeová. “Nia la husik templu, maibé serbí Maromak kalan loron, hodi halo jejún no hamulak.” (Lc 2:36, 37) Sin, ninia adorasaun ba Maromak Jeová mak buat neʼebé importante liu iha ninia moris. Atu halo nuneʼe nia presiza hakaʼas an no hatudu laran-metin, maibé nia hetan bensaun neʼebé diʼak tebes. Nia haree Jesus neʼebé sei kiʼik hela, no nia mós iha oportunidade atu fó sai ba ema seluk katak lakleur tan Mesias neʼe sei lori salvasaun.—Lc 2:38.
13. (a) Saida mak hatudu katak Dorcada apoia kongregasaun ho laran-manas? (b) Oinsá mak Dorcada nia hahalok diʼak no laran-diʼak lori bensaun ba nia?
13 Feto ida naran Dorcada, ka Tabita, hela iha Jope, sidade ida iha parte oeste husi Jerusalém. Bíblia la fó-hatene katak nia iha laʼen, tan neʼe karik iha tempu neʼebá nia la kaben. Dorcada “halo diʼak barak no fó ezmola barak”. Nia suku hatais barak atu fó ba ema neʼebé faluk no kiak, no ida-neʼe halo ema barak hadomi tebes nia. Tan neʼe, kuandu nia derrepente deʼit sai moras no mate, kongregasaun tomak husu namanas ba Pedro atu halo nia moris fali. Kuandu ema iha Jope rona kona-ba ninia moris-hiʼas, sira barak sai fiar-naʼin. (Apos 9:36-42) Dorcada karik ajuda ona sira balu liuhusi ninia laran-diʼak neʼebé nia hatudu.
14. Saida mak book ema kristaun neʼebé la kaben atu hakbesik liu ba Maromak Jeová?
14 Ohin loron, ema barak iha kongregasaun laran moris nuʼudar ema neʼebé la kaben ka faluk maski tinan boot ona hanesan ho Ana no Dorcada. Ema balu karik seidauk hetan ema diʼak atu sai nia kaben. Ema seluk soe malu ho nia kaben ka sai faluk tan nia kaben mate. Sira-nia situasaun neʼe halo sira aprende atu sadere liután ba Maromak Jeová tanba sira la iha laʼen ka feen atu fahe sira-nia sentimentu. (Prov 16:3) Irmán ida neʼebé la kaben, naran Silvia, serbí iha Betel ba tinan 38 liu no nia haree nia situasaun nuʼudar bensaun ida. Nia dehan: “Dala ruma haʼu sente kole tanba haʼu sempre ajuda ema seluk, no haʼu hanoin: ‘Sé mak atu fó laran-manas ba haʼu?’” Maibé nia hatutan tan: “Haʼu fiar katak Maromak Jeová hatene buat neʼebé haʼu presiza diʼak liu fali haʼu, no ida-neʼe ajuda haʼu atu hakbesik liu ba nia. Haʼu sente katak Maromak sempre fó laran-manas mai haʼu iha dalan oioin.” Sin, kuandu ita hakbesik ba Maromak Jeová, nia sempre hatudu fali nia domin mai ita hodi halo ita sente kmaan.
15. Oinsá mak ema kristaun neʼebé la kaben bele ‘loke sira-nia an’ atu hatudu domin liután?
15 Ema kristaun neʼebé moris nuʼudar ema neʼebé la kaben iha oportunidade kapás atu ‘loke sira-nia an’ hodi hatudu domin liután. (Lee 2 Korinto 6:11-13.) Irmán ida neʼebé la kaben, naran Jolene, serbí Maromak tempu-tomak ba tinan 34 ona. Nia dehan: “Haʼu hakaʼas an atu iha relasaun diʼak ho ema hotu, laʼós deʼit ho sira neʼebé iha tinan hanesan haʼu. Moris nuʼudar ema neʼebé la kaben fó oportunidade diʼak ba haʼu atu hatudu domin ba Maromak Jeová, ba família, ba irmaun-irmán sira, no mós ba viziñu sira. Nuʼudar haʼu-nia idade aumenta, haʼu sente kontente liu kona-ba haʼu-nia situasaun nuʼudar ema neʼebé la kaben.” Ferik-katuas sira, ema moras, inan ka aman neʼebé mesak atu haboot sira-nia oan, joven sira, no sira seluk iha kongregasaun hafolin duni apoiu neʼebé sira simu husi ema neʼebé la kaben. Sin, kuandu ita hatudu domin ba ema seluk, ida-neʼe halo ita sente kontente ho ita-nia an. Ita mós bele ‘loke ita-nia an’ hodi hatudu domin liután ba ema seluk ka lae?
La kaben ba moris tomak
16. (a) Tanbasá mak Jesus la kaben durante nia moris tomak? (b) Oinsá mak Paulo uza didiʼak ninia moris nuʼudar ema neʼebé la kaben?
16 Jesus la kaben tanba nia hakarak prepara nia an atu halaʼo no kumpre knaar neʼebé Maromak fó ba nia. Nia sempre laʼo husi sidade ida ba sidade seluk atu halo serbisu neʼe. Loroloron nia hahú ninia serbisu husi dadeer-saan no kontinua toʼo kalan boot. Ikusmai nia mós fó nia moris nuʼudar sakrifísiu. Moris nuʼudar ema neʼebé la kaben ajuda nia atu kumpre ninia serbisu. Apóstolu Paulo laʼo rai ba kilómetru rihun ba rihun, no nia hasoru susar boot oioin nuʼudar nia halaʼo ninia serbisu haklaken. (2 Kor 11:23-27) Bíblia la hatete se Paulo uluk kaben ka lae, maibé klaru katak Paulo la iha feen kuandu nia simu knaar atu serbí nuʼudar apóstolu, no nia hili atu kontinua moris nuʼudar ema neʼebé la kaben. (1 Kor 7:7; 9:5) Jesus no Paulo fó laran-manas ba ema seluk atu halo tuir sira-nia ezemplu, tanba sira hatene katak Maromak nia serbisu importante tebes. Maski nuneʼe, sira la fó ukun-fuan katak Maromak nia atan labele kaben.—1 Tim 4:1-3.
17. Oinsá mak ema balu ohin loron halo tuir Jesus no Paulo nia ezemplu? Tanbasá mak ita bele fiar katak Maromak Jeová sei la haluha sira-nia hakaʼas-an?
17 Ema balu ohin loron mós ho hakarak rasik hili atu la kaben hodi bele halo buat barak liután iha Maromak nia serbisu. Harold, neʼebé temi uluk, serbí ho haksolok iha Betel ba tinan 56 liu. Nia hatete: “Toʼo tempu neʼebé haʼu serbí iha Betel ba tinan 10, haʼu haree ona kaben-naʼin barak husik Betel tanba sira-nia kaben moras ka tanba sira presiza tau matan ba sira-nia inan-aman neʼebé moras. Haʼu-nia inan-aman mate tiha ona. Haʼu gosta tebes atu serbí iha Betel, no haʼu lakohi atu kaben tanba haʼu taʼuk atu lakon serbisu neʼe.” Tinan balu liubá Margaret, neʼebé serbí kleur ona nuʼudar pioneiru, mós dehan: “Maski haʼu iha oportunidade atu kaben durante haʼu-nia moris, maibé tanba haʼu kontente ho haʼu-nia serbisu, haʼu la kaben. Haʼu uza haʼu-nia liberdade nuʼudar ema neʼebé la kaben atu envolve an barak liu iha serbisu haklaken, no ida-neʼe halo haʼu haksolok tebes.” Ita fiar duni katak Maromak Jeová sei nunka haluha ema neʼebé ho hakarak rasik tau uluk adorasaun loos iha sira-nia moris.—Lee Isaías 56:4, 5. *
Uza didiʼak ita-nia situasaun
18. Oinsá mak ema seluk bele fó laran-manas no fó ajuda ba ema kristaun neʼebé la kaben?
18 Ema kristaun hotu neʼebé hakaʼas an atu uza didiʼak sira-nia moris nuʼudar ema neʼebé la kaben atu serbí Maromak Jeová ho laran tomak, merese duni atu ita gaba no fó laran-manas ba sira. Ita hadomi sira ida-idak no hafolin serbisu neʼebé sira halo ba kongregasaun. Sira sei nunka sente mesak se ita sai nuʼudar sira-nia “maun-alin, biin-feton, inan, oan”.—Lee Marcos 10:28-30.
19. Saida mak ita bele halo atu uza didiʼak ita-nia moris nuʼudar ema neʼebé la kaben?
19 Maski ita mak ema neʼebé la kaben tanba ita hili rasik, ka tanba situasaun, ami hein katak ezemplu sira husi Bíblia no husi tempu agora bele ajuda ita atu fiar katak ita bele duni halaʼo moris neʼebé kontente no halo buat barak iha Maromak nia serbisu. Ita bele kompara moris la kaben ho prezente ida. Prezente balu ita hein namanas atu simu, no prezente seluk ita hetan maski la hein atu simu. Prezente balu ita hafolin kedas, no prezente seluk ita hafolin depois uza tiha ba tempu balu. Tuir loloos buat barak depende ba dalan neʼebé ita hanoin. Saida mak ita bele halo atu uza didiʼak ita-nia moris nuʼudar ema neʼebé la kaben? Hakbesik liután ba Maromak Jeová, halo buat barak iha nia serbisu, no loke ita-nia an atu hatudu domin ba ema seluk. Hanesan moris kaben nian, moris nuʼudar ema neʼebé la kaben bele lori bensaun barak kuandu ita haree situasaun neʼe tuir Maromak nia haree no uza didiʼak prezente neʼe.
[Nota–rodapé]
^ par. 17 Isaías 56:4: “Tanba ida-neʼe mak buat neʼebé Jeová hatete ona ba mane neʼebé kapa tiha no neʼebé halo tuir haʼu-nia loron Sábadu sira no neʼebé hili ona buat neʼebé haʼu gosta no neʼebé kaer metin ba haʼu-nia aliansa: 5 ‘Haʼu mós sei fó ba sira naran ida no monumentu ida iha haʼu-nia uma no iha haʼu-nia didin laran, neʼe mak buat ruma neʼebé diʼak liu fali oan-mane no oan-feto. Haʼu sei fó ba sira naran ida ba tempu neʼebé la bele sura, naran neʼebé sei la lakon.’”
Ita hanoin-hetan?
• Iha dalan saida deʼit mak moris nuʼudar ema neʼebé la kaben bele sai hanesan prezente?
• Oinsá mak moris nuʼudar ema neʼebé la kaben bele lori bensaun iha tempu joven?
• Ema kristaun neʼebé la kaben iha oportunidade saida atu hakbesik ba Maromak Jeová no atu loke sira-nia an hodi hatudu domin liután?
[Pergunta estudu nian]
[Dezeñu iha pájina 18]
Ita uza didiʼak oportunidade sira neʼebé ita iha atu halo Maromak nia serbisu ka lae?
