Serbí Maromak Jeová ho haksolok maski hasoru susar oioin

Esperiénsia husi Maatje de Jonge-van den Heuvel

A GORA haʼu tinan 98. Haʼu serbí Maromak Jeová ho laran-haksolok ba tinan 70 ona. Maski nuneʼe, haʼu mós hasoru susar oioin neʼebé koko haʼu-nia fiar. Durante Funu Mundiál Segundu, haʼu tama komarka. Dala ida kuandu haʼu iha hela komarka laran, haʼu sai laran-tun tebes no tan neʼe haʼu halo desizaun ida neʼebé ikusmai haʼu hakribi duni. Tinan balu depois neʼe, haʼu mós hasoru susar boot ida tan. Maski nuneʼe, haʼu nafatin agradese ba Maromak Jeová tanba haʼu iha oportunidade atu serbí nia maski hasoru susar oioin.

Iha fulan-Outubru 1940, iha buat ida neʼebé troka iha haʼu-nia moris. Iha tempu neʼebá haʼu hela iha Hilversum, sidade ida neʼebé dook maizumenus kilómetru 24 iha parte súl husi sidade Amsterdaun iha rai-Olanda. Iha tempu neʼebá mós governu Nazi mak ukun rai-Olanda. No haʼu kaben ona ba tinan lima ho Jaap de Jonge, laʼen neʼebé hadomi ninia família, no ami iha oan-feto ida neʼebé ami hadomi tebes, nia naran Willy, nia tinan tolu. Ami hela besik família ida neʼebé kiak, no susar ba sira atu hetan ai-han atu fó ba sira-nia oan naʼin-ualu. Maski nuneʼe, sira mós fó fatin ba mane-klosan ida atu hela ho sira no sira mós fó hahán ba mane neʼe. Entaun haʼu hanoin: ‘Tansá sira aumenta tan todan ba sira-nia an?’ Kuandu haʼu lori hahán balu atu fó ba sira, haʼu foin hatene katak mane neʼe mak pioneiru ida. Nia esplika ba haʼu kona-ba Maromak nia governu no bensaun neʼebé governu neʼe sei lori mai. Buat neʼebé haʼu rona book tebes haʼu-nia laran, no haʼu simu kedas lia-loos. Iha tinan neʼebé hanesan, haʼu dedika haʼu-nia an ba Maromak Jeová no hetan batizmu. Tinan ida depois neʼe, haʼu-nia laʼen mós hetan batizmu.

Maski haʼu seidauk komprende buat barak husi Bíblia, maibé haʼu hatene katak hodi sai Testemuña ida, haʼu sai parte ba organizasaun neʼebé governu bandu. Haʼu mós hatene katak Testemuña barak tama ona iha komarka tanba sira haklaken mensajen kona-ba Maromak nia Ukun. Maski nuneʼe, haʼu hahú kedas atu haklaken uma ba uma. Haʼu no haʼu-nia laʼen mós fó fatin ba pioneiru sira no ba katuas sira neʼebé vizita kongregasaun atu hela iha ami-nia uma. Ami-nia uma mós sai nuʼudar fatin atu rai livru sira neʼebé esplika kona-ba Bíblia, neʼebé irmaun-irmán sira lori husi Amsterdaun. Sira-nia bisikleta tula livru barak, no sira taka ida-neʼe ho lona. Irmaun-irmán sira-neʼe hatudu duni domin no aten-brani! Sira tau sira-nia moris iha perigu laran atubele ajuda sira-nia maluk kristaun.—1 Joao 3:16.

“Amá sei fila fali lalais ka?”

Maizumenus fulan neen depois haʼu hetan batizmu, polísia naʼin-tolu mai ami-nia uma. Sira tama iha ami-nia uma laran hodi halo revista. Maski sira la hetan armáriu ida neʼebé nakonu ho livru sira neʼebé esplika kona-ba Bíblia, maibé sira hetan livru balu neʼebé ami subar iha kama okos. Iha tempu neʼe kedas, sira haruka haʼu atu tuir sira ba postu polísia nian iha Hilversum. Kuandu haʼu hakoʼak haʼu-nia oan Willy atu fó  adeus, nia husu: “Amá, amá sei fila fali lalais ka?” Haʼu hatán: “Sin, amá sei fila fali lalais.” Maibé, tuir loloos, haʼu foin hasoru no hakoʼak fali haʼu-nia oan depois fulan 18 neʼebé nakonu ho susar.

Polísia sira lori haʼu iha komboiu laran atu bá Amsterdaun atu investiga haʼu. Ema neʼebé investiga koko atu halo haʼu fó sai katak irmaun naʼin-tolu husi Hilversum mak Testemuña ba Jeová. Haʼu hatete: “Haʼu la hatene sira, maibé haʼu hatene ida deʼit. Nia mak mane neʼebé halo serbisu hodi lori susubeen ba ami.” No ida-neʼe loos; irmaun neʼe lori duni susubeen. Haʼu hatutan tan: “Maibé se nia Testemuña ba Jeová ka lae, imi tenke husu nia, laʼós haʼu.” Kuandu haʼu lakohi atu fó sai buat seluk tan, sira basa haʼu-nia oin no hatama haʼu iha sela laran, iha neʼebé haʼu hela ba fulan rua. Bainhira haʼu-nia laʼen hatene fatin neʼe, nia lori hahán no ropa balu ba haʼu. Tuirmai, iha fulan-Agostu 1941, polísia lori haʼu ba komarka boot ida naran Ravensbrück, komarka neʼe ba feto sira. Ida-neʼe dook maizumenus kilómetru 80 iha parte norte husi sidade Berlin, iha rai-Alemaña.

“Keta triste demais, haʼu-nia alin”

Kuandu ami toʼo fatin neʼe, polísia sira fó-hatene ami katak se ami asina surat ida neʼebé hatudu katak ami nega ami-nia fiar, ami bele fila fali ba uma. No klaru katak, haʼu la asina surat neʼe. Tan neʼe, haʼu tenke fó ba polísia haʼu-nia sasán neʼebé haʼu lori no sira haruka haʼu tama ba hariis-fatin hodi hasai haʼu-nia roupa, iha fatin neʼe mós haʼu hasoru irmán balu neʼebé mai husi rai-Olanda. Polísia sira fó ba ami roupa komarka nian neʼebé iha mós hena kiʼik ho lidun tolu ho kór-uvas, no sira mós fó bikan ida, kopu ida, no kanuru ida. Kalan primeiru, sira hatama ami iha uma komarka nian ida neʼebé temporáriu. Iha fatin neʼe mak ba dala primeiru haʼu tanis. Ho lian triste haʼu hatete: “Saida mak sei akontese? Haʼu sei hela iha-neʼe toʼo bainhira?” Tuir loloos iha tempu neʼebá haʼu-nia relasaun ho Maromak Jeová seidauk metin, tanba haʼu foin hatene lia-loos ba fulan balu. Sei iha buat barak neʼebé haʼu presiza aprende. Loron tuirmai kuandu ami forma hodi rona ema bolu ami-nia naran, irmán ida husi rai-Olanda karik haree katak haʼu triste tebes, tan neʼe nia hakbesik haʼu hodi hatete: “Keta triste demais haʼu-nia alin, haksolok bá! Saida mak bele halo aat ba ita?”

Depois neʼe, ema lori ami ba fatin seluk iha komarka neʼe, iha neʼebé irmán barak husi Alemaña no Olanda simu ami ho diʼak. Irmán balu husi rai-Alemaña hela ona iha fatin neʼe ba tinan ida liu. Loloos, hamutuk ho sira hametin haʼu no halo haʼu sente haksolok fali. Haʼu mós kontente atu haree katak fatin neʼebé irmán sira hela mak moos liu fali fatin seluk iha komarka neʼe nia laran. Laʼós moos deʼit, maibé ema barak mós hatene katak ami-nia fatin la iha naʼok-teen, la uza liafuan aat, no la istori malu. Maski ami hasoru susar oioin, maibé ami-nia fatin mak hanesan rai kiʼik neʼebé moos iha tasi klaran neʼebé foʼer tebes.

Moris iha komarka

Iha komarka ami presiza serbisu barak, maibé han uitoan deʼit. Dadeer-dadeer ami tenke hadeer iha tuku lima, no lakleur depois neʼe ema komesa bolu naran. Maski udan ka loron-manas, guarda komarka nian haruka ami hamriik iha liʼur maizumenus ba oras ida. Iha tuku lima lokraik, depois serbisu makaʼas ba loron tomak, ami tenke hamriik fali atu rona ema bolu ami-nia naran. Depois neʼe ami han sopa uitoan hamutuk ho paun, tuirmai ami bá toba. Ami kole tebes!

Loron-loron, husi segunda toʼo sábadu haʼu serbisu iha toos, iha neʼebé haʼu koʼa trigu, keʼe  kleʼan liután fatin bee nian, no hamoos fahi-luhan. Maski serbisu neʼe mak todan no foʼer, haʼu bele halo ida-neʼe loroloron tanba haʼu sei joven no iha forsa. No mós, nuʼudar haʼu halo serbisu haʼu kanta knananuk neʼebé iha mensajen husi Bíblia, ida-neʼe hametin haʼu-nia fiar. Maski nuneʼe, loroloron haʼu hanoin tebes haʼu-nia laʼen no haʼu-nia oan.

Maski ami simu hahán uitoan deʼit, maibé ami irmán hotu koko atu rai paun uitoan loron-loron, hodi nuneʼe ami bele iha hahán liután iha loron-domingu kuandu ami iha oportunidade atu halibur hamutuk hodi koʼalia kona-ba informasaun balu husi Bíblia. Maski ami la iha livru neʼebé esplika kona-ba Bíblia, maibé haʼu rona didiʼak ba irmán sira husi rai-Alemaña neʼebé idade ona nuʼudar sira koʼalia kona-ba informasaun husi Bíblia. Ami mós selebra Memoriál hodi hanoin-hetan fali Jesus nia mate.

Laran-tun, maibé hetan laran-manas

Dala ruma, guarda sira haruka ami atu halo serbisu neʼebé apoia funu neʼebé governu Nazi halo. Maibé, tanba ema kristaun neutrál iha buat polítiku nian, irmán hotu ho aten-brani lakohi halo serbisu neʼe, no haʼu halo tuir sira-nia ezemplu. Guarda sira fó kastigu mai ami hodi la fó ami ai-han ba loron balu no haruka ami atu hamriik durante oras barak hodi rona sira bolu ami-nia naran. Dala ida, iha tempu malirin, sira xave-metin ami iha uma komarka nian ba loron 40, no iha fatin neʼe la iha buat ida atubele hamanas ami.

Guarda sira hatete beibeik mai ami Testemuña ba Jeová katak se ami asina surat ida neʼebé hatudu katak ami nega ami-nia fiar, sira sei husik ami atubele fila ba uma. Depois haʼu hela iha Ravensbrück tinan ida liu ona, haʼu sai laran-tun tebes. Haʼu-nia hakarak atu hamutuk fali ho haʼu-nia laʼen no oan sai makaʼas tebes. Tan neʼe, haʼu bá hasoru guarda sira atu husu sira fó surat ida neʼebé deklara katak haʼu laʼós tan Estudante Bíblia (ka Testemuña ba Jeová), no haʼu asina surat neʼe.

Kuandu irmán sira hatene buat neʼebé haʼu halo, sira balu komesa hadook an husi haʼu. Maibé, iha irmán naʼin-rua husi rai-Alemaña, naran Hedwig no Gertrud, hakbesik haʼu no sira halo haʼu sente katak sira hadomi haʼu nafatin. Nuʼudar ami serbisu hamutuk atu hamoos fahi-luhan, sira esplika mai haʼu katak importante tebes atu laran-metin nafatin ba Maromak Jeová no atu nafatin hatudu ita-nia domin ba nia hodi la husik ita-nia fiar. Irmán sira-neʼe hanoin haʼu no hatudu domin ba haʼu hanesan oan ida, ida-neʼe book tebes haʼu-nia laran. * Haʼu hatene katak buat neʼebé haʼu halo ona mak sala, no haʼu hakarak atu halo surat neʼebé haʼu asina ona sai lavale. Kalan ida, haʼu hatete ba irmán ida kona-ba haʼu-nia desizaun atu fó-hatene ba guarda sira katak surat neʼebé haʼu asina la vale ona. Guarda ida karik rona haʼu-nia liafuan, tan neʼe, iha kalan neʼe kedas, sira haruka haʼu sai husi komarka boot neʼe no saʼe komboiu hodi fila fali ba haʼu-nia rai, Olanda. Haʼu sei hanoin-hetan guarda ida nia oin kuandu nia hatete mai haʼu: “Maski ó sai husi fatin neʼe, ó nafatin Bibelforscher ida (Estudante Bíblia nian).” Haʼu hatán hodi hatete: “Sin, se Maromak Jeová hakarak ida-neʼe.” Maski nuneʼe, haʼu hanoin: ‘Oinsá mak haʼu bele halo surat neʼebé haʼu asina ona sai lavale?’

Iha surat neʼebé haʼu asina, hatete: “Ho surat neʼe, haʼu promete katak haʼu sei nunka hola parte fali ba Asosiasaun Estudante Bíblia nian.” Maski nuneʼe, lakleur depois haʼu fila ba uma iha fulan-Janeiru 1943, haʼu komesa fali atu halo serbisu haklaken. Haʼu hatene katak se governu Nazi nia ema kaer fali haʼu kuandu haʼu haklaken, sira sei fó kastigu makaʼas liután.

Atu hatudu ba Maromak Jeová katak haʼu hakarak duni atu laran-metin ba nia, haʼu ho haʼu-nia laʼen fó fatin ba irmaun sira neʼebé lori livru no ba irmaun sira neʼebé vizita kongregasaun atu hela iha ami-nia uma. Haʼu agradese tebes atu hetan oportunidade ida tan atu hatudu haʼu-nia domin ba Maromak Jeová no ba ninia povu!

Susar boot ida tan

Fulan balu antes funu ramata, haʼu ho haʼu-nia laʼen hasoru susar boot ida tan. Iha  fulan-Outubru 1944, derrepente deʼit ami-nia oan-feto sai moras. Willy hetan moras difteria. Lakleur deʼit ninia moras sai aat liután, no loron tolu liu tiha, nia mate. Iha tempu neʼe, nia tinan hitu deʼit.

Ami sente katak lakon ami-nia oan mak susar neʼebé boot tebes. Tuir loloos, susar neʼebé haʼu sente hodi lakon haʼu-nia oan mak boot liu fali susar hotu neʼebé haʼu hasoru iha komarka Ravensbrück. Maski nuneʼe, iha tempu susar sira-neʼe, ami sempre hetan kmaan hodi hanoin liafuan iha Salmo 16:8 neʼebé hatete: “Haʼu sempre tau Maromak Jeová iha haʼu-nia oin. Tanba nia iha haʼu-nia liman loos, la iha buat ida neʼebé sei halo aat mai haʼu.” Haʼu ho haʼu-nia laʼen fiar metin ba Maromak Jeová nia promesa kona-ba moris-hiʼas. Ami tahan nafatin iha lia-loos no sempre laran-manas atu haklaken lia-foun diʼak. Haʼu-nia laʼen sempre ajuda haʼu atu serbí Maromak Jeová ho laran haksolok toʼo nia mate iha tinan 1969.

Bensaun no ksolok

Durante tinan barak neʼebé liu ona, buat ida neʼebé fó ksolok mai haʼu mak sempre halibur ho Maromak nia atan sira neʼebé serbí nia tempu-tomak. Hanesan mós iha tempu funu nian, ami sempre loke ami-nia uma ba katuas sira neʼebé vizita kongregasaun no sira-nia feen atu hela. Kaben-naʼin ida, Maarten no Nel Kaptein, neʼebé halo serbisu neʼe, hela iha ami-nia uma ba tinan 13! Kuandu Nel sai moras tebes, haʼu iha oportunidade atu tau matan ba nia iha ami-nia uma ba fulan tolu toʼo nia mate. Hodi hamutuk ho sira no hodi ransu ho irmaun-irmán sira seluk, ida-neʼe ajuda haʼu atu haksolok ho dame no unidade neʼebé Maromak nia povu iha ohin loron.

Buat diʼak ida iha haʼu-nia moris mak haʼu hetan konvite ida iha tinan 1995 atu asiste selebrasaun iha Ravensbrück. Iha neʼebá haʼu hasoru irmán ida neʼebé hamutuk ho haʼu iha komarka, no haʼu mós seidauk hasoru nia ba tinan 50 liu! Hamutuk fali ho sira mak esperiénsia neʼebé haʼu sei nunka haluha no book tebes haʼu-nia laran. No ida-neʼe mós oportunidade diʼak ba ami atu fó laran-manas ba malu hodi hein ba tempu neʼebé ita-nia família no belun neʼebé mate ona sei moris hiʼas fali.

Iha Roma 15:4, apóstolu Paulo hatete katak hodi tahan “terus no ho ksolok neʼebé mai husi Eskritura, ita bele hetan esperansa”. Haʼu agradese tebes ba Maromak Jeová tanba fó haʼu esperansa neʼe, neʼebé ajuda haʼu atu serbí nia ho haksolok maski hasoru susar oioin.

[Nota–rodapé]

[Dezeñu iha pájina 10]

Ho haʼu-nia laʼen Jaap, iha tinan 1930

[Dezeñu iha pájina 10]

Ami-nia oan-feto, naran Willy, kuandu nia tinan hitu

[Dezeñu iha pájina 12]

Iha tinan 1995, haʼu asiste selebrasaun neʼebé book tebes haʼu. Haʼu mak iha liña primeiru, ema segundu husi liman karuk