Badinas nafatin iha serbisu haklaken

“Badinas nafatin ba Naʼi nia serbisu.”—1 KOR 15:58.

1. Konvite saida mak Jesus fó ba ninia dixípulu sira?

IHA tinan 30 nia rohan, kuandu Jesus halo nia viajen hodi laʼo liu rai-Samaria, nia para atu deskansa iha bee-matan ida besik sidade Sikar. Iha neʼebá Jesus hatete ba nia dixípulu sira: “Foti imi-nia matan hodi haree ba toʼos neʼebé prontu ona atu silu.” (Joao 4:35) Tuir loloos, iha neʼe Jesus konvida ninia dixípulu sira atu hola parte iha serbisu atu buka no halibur ema neʼebé laran loos atu sai mós ninia dixípulu. Sira iha serbisu barak atu halo, maibé sira iha tempu uitoan deʼit!

2, 3. (a) Saida mak hatudu katak ita moris iha tempu koʼa nian? (b) Iha lisaun neʼe, ita sei koʼalia kona-ba saida?

² Jesus nia liafuan kona-ba serbisu iha toʼos mós importante mai ita ohin loron. Ita moris iha mundu neʼebé hanesan toʼos ida neʼebé “prontu ona atu silu” ka atu koʼa. Tinan-tinan, ema rihun ba rihun simu konvite atu aprende kona-ba lia-loos neʼebé bele fó moris, no sira barak hetan batizmu atu sai dixípulu. Nuneʼe, ita iha knaar espesiál atu hola parte iha serbisu importante liu hotu, neʼebé ita-nia Toʼos-Naʼin, Maromak Jeová, mak tau matan. Ita “badinas nafatin” iha serbisu neʼe ka lae?—1 Kor 15:58.   

³ Kuandu Jesus halaʼo ninia serbisu haklaken iha mundu durante tinan tolu ho balu, nia prepara ninia dixípulu sira ba serbisu atu koʼa. Iha lisaun neʼe ita sei koʼalia kona-ba pontu importante tolu neʼebé Jesus hanorin ba ninia dixípulu sira. Pontu ida-idak sei koʼalia kona-ba hahalok neʼebé ita presiza hatudu nuʼudar ita hakaʼas an atu halaʼo ita-nia serbisu atu halo dixípulu. Mai ita koʼalia kona-ba hahalok sira-neʼe ida ba ida.

Haraik-an importante

4. Oinsá mak Jesus hanorin katak haraik-an importante?

⁴ Hanoin toʼok kona-ba ida-neʼe: Jesus nia dixípulu sira foin haksesuk malu kona-ba ida neʼebé mak boot liu. Karik husi sira-nia oin bele haree katak sira la fiar malu no laran-moras ba malu. Tan neʼe Jesus bolu labarik ida atu hamriik iha sira-nia leet. Hodi hateke ba labarik kiʼik neʼe, Jesus hatete: “Ema neʼebé haraik-an [ka “ema neʼebé halo nia an kiʼik”, Byington] hanesan labarik neʼe, nia mak boot liu iha reinu lalehan.” (Lee Mateus 18:1-4.) Duké iha hanoin hanesan mundu nian, neʼebé haree deʼit mak ba ema nia kbiit, riku, no pozisaun, dixípulu sira presiza komprende katak se sira hakarak sai boot, sira tenke ‘halo sira-nia an kiʼik’ iha ema seluk nia oin. Maromak Jeová sei haraik bensaun no sei uza sira se sira hatudu haraik-an neʼebé loos.

5, 6. Tanbasá mak ita tenke haraik an atubele badinas nafatin iha serbisu haklaken? Fó toʼok ezemplu.

⁵ Ohin loron, ema barak iha mundu uza sira-nia moris tomak atu hetan kbiit, rikusoin, no pozisaun. Tan neʼe sira ladún iha tempu atu aprende kona-ba Maromak no atu serbí nia. (Mt 13:22) Maibé Maromak Jeová nia povu la hanesan neʼe, sira kontente atu ‘halo sira-nia an kiʼik’ iha ema nia oin atu Toʼos-Naʼin bele simu sira no haraik bensaun ba sira.—Mt 6:24; 2 Kor 11:7; Flp 3:8.

⁶ Hanoin toʼok ezemplu husi Francisco neʼebé serbí nuʼudar katuas iha Amérika Súl. Kuandu nia sei joven, nia para universidade atu serbí nuʼudar pioneiru. Nia hatete: “Kuandu haʼu atu kaben, tuir loloos se haʼu hakarak, haʼu bele hetan serbisu neʼebé diʼak atu haʼu no haʼu-nia feen  bele hetan osan barak hodi bele moris diʼak. Maibé, ami foti desizaun atu moris simples no kontinua atu serbí hamutuk nuʼudar pioneiru. Ikusmai, ami iha oan naʼin-haat no ida-neʼe aumenta liután ami-nia responsabilidade. Maibé Maromak Jeová ajuda ami atu kaer metin ba ami-nia desizaun.” Francisco hatutan tan: “Ba tinan 30 ona, haʼu kontente atu serbí nuʼudar katuas no atu hetan knaar espesiál barak tan. Maski ami moris simples, maibé ami nunka sente katak ami lakon buat ida.”

7. Oinsá mak Ita rasik bele halo tuir konsellu iha Roma 12:16?

⁷ Se ita la simu hahalok “loko an” neʼebé mundu neʼe hatudu, maibé hakaʼas an atu hatudu haraik-an, ita mós bele hetan bensaun barak no hetan knaar espesiál iha serbisu koʼa nian.—Rom 12:16; Mt 4:19, 20; Lc 18:28-30.

Badinas lori bensaun

8, 9. (a) Konta toʼok ho liafuan badak Jesus nia ai-knanoik kona-ba osan talenta sira. (b) Ai-knanoik neʼe bele fó laran-manas liuliu ba sé?

⁸ Hahalok badinas mak hahalok seluk tan neʼebé ita presiza atubele hola parte ho laran tomak iha serbisu koʼa nian. Jesus hatudu ida-neʼe iha ninia ai-knanoik kona-ba osan talenta sira. * Ai-knanoik neʼe kona-ba ema ida, neʼebé antes atu bá rai dook, husik hela nia rikusoin ba ninia atan naʼin-tolu. Atan primeiru simu osan talenta lima, atan segundu simu osan talenta rua, no atan ida ikus simu osan talenta ida. Depois sira-nia naʼi bá tiha, atan primeiru no segundu ho badinas “fila liman” kedas. Maibé, atan ida ikus “baruk-teen”. Nia hakoi ninia osan iha rai. Kuandu sira-nia naʼi fila mai, nia fó kolen ba atan primeiru no segundu hodi fó sira “buat barak atu tau matan”. Maibé ba atan ida ikus, nia foti fali osan neʼebé nia fó no duni sai atan neʼe husi ninia uma.—Mt 25:14-30.

⁹ Karik ita-nia laran hakarak duni atu halo tuir atan sira neʼebé badinas iha Jesus nia ai-knanoik, no atu halo buat barak liután iha serbisu atu halo dixípulu. Maibé oinsá se ita-nia situasaun la husik ita atu halo nuneʼe? Karik tanba problema ekonomia ita presiza serbisu tempu naruk atu hetan buat neʼebé ita-nia família presiza. Karik ita la iha ona forsa hanesan joven sira no ita-nia saúde ladún diʼak ona. Se nuneʼe, Jesus nia ai-knanoik kona-ba osan talenta sira iha mensajen neʼebé bele fó laran-manas ba ita.

10. Iha Jesus nia ai-knanoik, oinsá mak atan sira-nia naʼi hatudu laran-diʼak? Oinsá mak ida-neʼe fó laran-manas ba Ita?

¹⁰ Iha Jesus nia ai-knanoik, atan sira-nia naʼi rekoñese katak atan ida-idak iha kbiit neʼebé la hanesan. Nia hatudu ida-neʼe kuandu nia fó osan talenta ba atan “ida-ida  tuir nia kbiit”. (Mt 25:15) Tan neʼe, atan sira-nia naʼi la hakfodak kuandu atan primeiru manán osan barak liu fali atan segundu. Maski nuneʼe, sira-nia naʼi hafolin atan rua neʼe nia badinas, no tan neʼe nia bolu sira nuʼudar “atan diʼak no laran loos” no nia fó kolen neʼebé hanesan ba sira. (Mt 25:21, 23) Nuneʼe mós, Toʼos-Naʼin, Maromak Jeová, hatene ita-nia situasaun no buat neʼebé ita bele halo iha ninia serbisu. Nia sei hafolin duni ita-nia hakaʼas-an atu serbí nia ho laran tomak no nia sei fó kolen ba ita.—Mc 14:3-9; lee Lucas 21:1-4.

11. Fó toʼok ezemplu ida neʼebé hatudu katak badinas maski hasoru susar bele lori bensaun barak.

¹¹ Ezemplu husi irmán Selmira husi rai-Brazíl hatudu katak ita bele sai badinas iha Maromak nia serbisu maski ita moris iha situasaun neʼebé susar. Tinan ruanulu liubá, naʼok-teen tiru mate Selmira nia laʼen, tan neʼe nia mesak tenke ha-boot oan naʼin-tolu. Nia halo serbisu atu hamoos ema nia uma, ida-neʼe envolve uza oras barak, no mós saʼe transporte públiku neʼebé sempre nakonu. Maski nia hasoru susar sira-neʼe, nia halo planu didiʼak hodi bele serbí nuʼudar pioneiru regulár. Ikusmai, ninia oan naʼin-rua mós serbí nuʼudar pioneiru hamutuk ho nia. Selmira hatete: “Toʼo agora, ema naʼin-20 liu estuda Bíblia ho haʼu no sira sai ona haʼu-nia ‘família’. Haʼu kontente tebes tanba sira sai haʼu-nia belun neʼebé hadomi haʼu. Ida-neʼe hanesan rikusoin neʼebé la bele sosa ho osan.” Tebes duni, Toʼos-Naʼin haraik duni bensaun ba Selmira nia badinas no nia hakaʼas-an!

12. Oinsá mak ita bele badinas iha serbisu haklaken?

¹² Se ita-nia situasaun la husik ita atu uza tempu barak liu iha serbisu haklaken, ita bele aproveita tempu neʼebé ita iha hodi hakaʼas an atu hetan rezultadu diʼak iha serbisu neʼe. Kuandu ita halo tuir informasaun sira neʼebé ita hetan iha Reuniaun Serbisu nian, ita sei aumenta ita-nia matenek atu haklaken no sei ajuda ita atu koko dalan seluk atu haklaken. (2 Tim 2:15) No mós, karik ita bele para atividade ruma neʼebé ladún importante ka halo ida-neʼe iha tempu seluk, atu nuneʼe ita bele apoia beibeik kongregasaun nia arranju kona-ba serbisu haklaken.—Kol 4:5.

13. Saida mak ita presiza halo atu badinas nafatin?

¹³ Hanoin-hetan katak ita bele sai badinas se ita hadomi no hafolin buat hotu neʼebé Maromak halo ba ita. (Sal 40:8) Iha Jesus nia ai-knanoik, atan ida ikus taʼuk ninia naʼi, no haree nia nuʼudar ema laran-aat no neʼebé husu buat neʼebé ema la bele fó. Tan neʼe, duké uza osan talenta atu aumenta ninia naʼi nia rikusoin, nia hakoi ida-neʼe iha rai. Atu ita la hatudu hahalok hanesan atan neʼe, ita presiza haburas nafatin relasaun diʼak ho ita-nia Toʼos-Naʼin, Maromak Jeová. Ita mós presiza fó tempu atu estuda no hanoin kleʼan kona-ba Maromak nia hahalok sira neʼebé furak, hanesan domin, pasiénsia, no laran-luak. Halo buat sira-neʼe sei book ita-nia laran atu halo buat hotu neʼebé ita bele iha Maromak nia serbisu.—Lc 6:45; Flp 1:9-11.

Ita tenke moos

14. Serbisu-naʼin sira iha Maromak nia toʼos tenkesér halo saida?

¹⁴ Hodi temi liafuan sira husi Eskritura Lia-Ebraiku, apóstolu Pedro fó sai Maromak nia hakarak ba nia atan sira iha rai, nia hatete: “maibé, nuʼudar Ida neʼebé bolu imi mak santu, imi mós hakaʼas an atu sai santu iha imi-nia hahalok tomak; basá hakerek nanis ona, ‘Ema sei hanaran imi santu, basá haʼu santu.’” (1 Ped 1:15, 16; Lev 19:2; Deut 18:13) Liafuan sira-neʼe hatudu ho klaru katak serbisu-naʼin iha Maromak nia toʼos presiza duni atu sai moos iha buat morál no iha sira-nia adorasaun. Ita bele sai moos hodi halo buat balun atu fase ita-nia an. Saida mak bele ajuda ita atu halo ida-neʼe? Buat neʼebé ajuda ita mak lia-loos husi Maromak nia liafuan.

15. Lia-loos husi Maromak nia liafuan iha kbiit atu halo saida?

¹⁵ Bíblia kompara lia-loos husi Maromak nia liafuan ho bee neʼebé uza atu hamoos. Porezemplu, apóstolu Paulo hakerek kona-ba kongregasaun ema kose-mina nian neʼebé moos ona iha Maromak nia oin, sira hanesan noiva feto-raan ida ba Kristu. Nia hatete katak Kristu  hamoos kongregasaun neʼe “iha bee . . .  husi nia liafuan”, atu nuneʼe kongregasaun “la iha buat foʼer eh aat”. (Ef 5:25-27) Jesus mós koʼalia kona-ba Maromak nia liafuan neʼebé nia haklaken nuʼudar buat neʼebé iha kbiit atu hamoos ema. Kuandu koʼalia ba nia dixípulu, Jesus hatete: “Imi moos ona tanba liafuan neʼebé haʼu hatete ona ba imi.”(Joao 15:3) Nuneʼe lia-loos husi Maromak nia liafuan iha kbiit duni atu halo ema moos iha buat morál no iha adorasaun. Atu Maromak simu ita-nia adorasaun, ita tenke husik Maromak nia lia-loos atu hamoos ita.

16. Oinsá mak ita bele moos nafatin iha Maromak nia oin?

¹⁶ Tan neʼe, atu sai serbisu-naʼin iha Maromak nia toʼos, ulukliu ita presiza hasees an husi hahalok hotu neʼebé la moos no foʼer iha Maromak nia oin. Sin, atu bele kontinua halaʼo knaar espesiál neʼe, ita tenkesér kaer metin nafatin ba Maromak Jeová nia matadalan kona-ba morál no adorasaun. (Lee 1 Pedro 1:14-16.) Hanesan ita sempre tau matan ba ita-nia isin atu nafatin moos, ita mós tenke husik lia-loos husi Maromak nia liafuan atu hamoos ita-nia hahalok no hanoin. Ida-neʼe envolve lee Bíblia no tuir reuniaun kristaun sira. Neʼe envolve mós hakaʼas an atu halo tuir Maromak nia matadalan sira iha ita-nia moris. Hodi halo buat sira-neʼe sei ajuda ita atu funu hasoru ita-nia hakarak neʼebé sala no hadook an husi hahalok foʼer mundu neʼe nian. (Sal 119:9; Tgo 1:21-25) Sin, ita haksolok tebes atu hatene katak ho ajuda husi lia-loos iha Maromak nia liafuan, ita bele sai “moos ona”, neʼe inklui sai moos husi sala neʼebé boot.—1 Kor 6:9-11.

17. Atu nafatin moos, ita tenke halo tuir Bíblia nia konsellu saida?

¹⁷ Ita husik lia-loos husi Maromak nia liafuan atu hamoos Ita-nia moris ka lae? Porezemplu, se irmaun ida fó konsellu ba Ita kona-ba perigu husi haree filme ka lee livru neʼebé konta kona-ba hahalok foʼer ka violénsia, Ita sei simu ka lae? (Sal 101:3) Ita kuidadu atu ransu ho kolega eskola ka kolega serbisu neʼebé iha fiar la hanesan ho Ita ka lae? (1 Kor 15:33) Ita hakaʼas an tebes atu kontrola Ita-nia hanoin ka hahalok ruma neʼebé bele halo Ita lamoos iha Maromak Jeová nia oin ka lae? (Kol 3:5) Ita haketak an husi buat polítiku mundu neʼe nian, no husi hakarak atu apoia ho laran-manas Ita-nia nasaun atu manán jogu iha desportu ruma ka lae?—Tgo 4:4.

18. Oinsá mak moos iha Maromak nia oin sei ajuda ita iha serbisu koʼa nian?

¹⁸ Hodi halo tuir konsellu sira-neʼe, ida-neʼe sei lori rezultadu diʼak barak. Jesus kompara ninia dixípulu kose-mina sira ho ai-sanak husi uvas-hun, hodi hatete: “Sanak hotu neʼebé la fó fuan, [haʼu-nia Aman] hasai tiha, no sanak neʼebé fó fuan Nia hamoos didiʼak atu fó fuan liután.” (Joao 15:2) Nuʼudar ita husik bee lia-loos nian husi Bíblia atu hamoos ita, ita sei fó fuan barak liután.

Bensaun agora no iha futuru

19. Bensaun saida deʼit mak Jesus nia dixípulu sira hetan tanba sira hakaʼas an atu halo serbisu koʼa nian?

¹⁹ Dixípulu sira neʼebé halo tuir buat neʼebé Jesus hanorin, ikusmai simu kbiit husi espíritu santu iha Pentekostes 33, no ida-neʼe ajuda sira atu fó sasin “toʼo rai nia rohan”. (Apos 1:8) Sira mós serbí iha grupu administradór, serbí nuʼudar misionáriu no nuʼudar katuas neʼebé vizita kongregasaun. Liután neʼe, Maromak uza sira atu fó sasin kona-ba lia-foun diʼak “ba sasán hotu iha lalehan okos”. (Kol 1:23) Sira simu bensaun barak tebes, no sira mós fó ksolok duni ba ema seluk!

20. (a) Bensaun saida deʼit mak ita hetan ona tanba badinas iha serbisu haklaken? (b) Saida mak Ita rasik hakarak halo?

 ²⁰ Loos duni, kuandu ita hatudu haraik-an, badinas, no kaer metin ba matadalan husi Maromak nia Liafuan, ita sei nafatin kontente atu hola parte ho laran tomak iha serbisu koʼa nian neʼebé halaʼo daudauk. Maski ema barak buka buat mundu neʼe nian no hakaʼas an atu hetan moris kontente, sira nafatin la kontente, maibé ita nuʼudar Maromak nia povu sente kontente neʼebé loos. (Sal 126:6) Importante liu mak “iha Naʼi [ita-nia] serbisu sei la sai leet deʼit”. (1 Kor 15:58) Toʼos-Naʼin, Maromak Jeová, sei haraik bensaun barak mai ita tanba serbisu neʼebé ita halo no ‘domin neʼebé ita hatudu ba nia’.—Ebr 6:10-12.

[Nota–rodapé]

Ita hanoin-hetan?

Nuʼudar ita hakaʼas an atu badinas iha serbisu haklaken . . .

• tanbasá mak importante atu hatudu haraik-an?

• oinsá mak ita bele badinas nafatin?

• tanbasá mak importante atu moos nafatin iha Maromak nia oin?

[Pergunta estudu nian]

[Dezeñu iha pájina 17]

Haraik-an bele ajuda ita atu moris simples hodi tau uluk Maromak nia Reinu iha ita-nia moris