Saúde
Maski Bíblia laʼós livru médiku, maibé Bíblia iha matadalan kona-ba oinsá atu tau matan ba ita-nia saúde. Hanoin toʼok kona-ba prinsípiu balu neʼebé bele ajuda ita atu halaʼo moris neʼebé saudavel.
TAU MATAN BA ITA-NIA ISIN
BÍBLIA NIA PRINSÍPIU: “La iha mane ida neʼebé odi ninia isin rasik, maibé nia fó-han no hafolin ninia isin.”—Éfeso 5:29.
NEʼE KATAK SÁ: Bíblia nia prinsípiu neʼe book ita atu hakaʼas an tau matan ba ita-nia saúde. Relatóriu ida hatudu katak razaun tanbasá ema barak iha problema ho saúde mak tanba sira rasik nia desizaun kona-ba dalan neʼebé sira halaʼo moris. Tan neʼe, halo desizaun neʼebé diʼak bele ajuda Ita iha saúde neʼebé diʼak.
SAIDA MAK ITA BELE HALO:
-
Hahán. Halo desizaun atu han hahán neʼebé diʼak ba saúde, no hemu bee barak.
-
Ezersísiu. Ezersísiu mak diʼak ba ema nia saúde, maski idade kiʼik ka boot. Ema neʼebé aleijadu ka moras bele hetan benefísiu husi ezersísiu. Maski doutór, família ka belun sira bele anima Ita, maibé Ita rasik mak tenke hakaʼas an atu halo.
-
Toba natoon. Se ema ladún toba ba tempu naruk, sira iha posibilidade atu kona moras boot. Baibain, ema la toba natoon tanba sira rasik nia desizaun. Tan neʼe, hodi hili atu toba natoon, ita mós bele iha moris neʼebé diʼak.
PARA TOMAN AAT SIRA
BÍBLIA NIA PRINSÍPIU: “Mai ita hamoos ita-nia an husi buat hotu neʼebé hafoʼer isin no neon.”—2 Korinto 7:1.
NEʼE KATAK SÁ: Ita-nia saúde sei sai diʼak liután se ita la hafoʼer ita-nia isin ho toman neʼebé perigu, hanesan uza tabaku. Tabaku mak buat ida neʼebé halo ema barak sai moras no mate.
SAIDA MAK ITA BELE HALO: Marka loron neʼebé Ita hakarak husik toman neʼe iha kalendáriu. Iha loron antes neʼe, soe Ita-nia sigarru sira, iskeiru, asbak no buat seluk neʼebé liga ho toman neʼe. Koko atu la bá fatin sira neʼebé ema halo toman neʼe. Fó-hatene Ita-nia desizaun ba Ita-nia família no belun sira atu sira bele apoia Ita.
PRINSÍPIU SELUK HUSI BÍBLIA
Ita bele kontaktu Testemuña ba Jeová ida iha Ita-nia área atu hetan Bíblia ida
HALO BUAT HOTU HO SEGURU.
“Se imi harii uma foun, imi mós tenke halo moru badak iha ninia kakuluk, atu nuneʼe ema la monu husi uma-leten no imi-nia umakain la hetan sala kona-ba ema nia raan.”—DEUTERONÓMIO 22:8.
KONTROLA ITA-NIA HIRUS.
“Ema neʼebé la hirus lalais hatene duni atu tetu didiʼak, maibé ema neʼebé la iha pasiénsia hatudu katak nia beik loos.”—PROVÉRBIOS 14:29.
LABELE HAN BARAK DEMAIS.
‘Keta sai hanesan ema neʼebé han demais.’—PROVÉRBIOS 23:20.
Karik Ita sei gosta
MATAN-MORIS BÁ!
Oinsá atu bele moris kontente—Saúde no adapta ho situasaun foun
Se ita-nia saúde sai ladiʼak, neʼe katak ita la bele moris ho kontente ka lae?
