Fó-hatene mai ami kona-ba Ita-nia an.

Haʼu moris iha tinan 1959, iha sidade Fuzhou, provínsia Jiangxi, iha rai-Xina. Bainhira haʼu tinan ualu, rai-Xina tama ona iha tempu Revolusaun Kultura nian. Haʼu-nia aman mak enjeñeiru, tan neʼe estadu haruka nia atu halo dalan komboiu nian iha rai-fuik neʼebé dook. Durante tinan barak, nia fila ba uma tinan ida dala ida deʼit. Haʼu hela hamutuk ho haʼu-nia inan, neʼebé serbisu nuʼudar mestra eskola primária. Tuir loloos, ami hela iha eskola neʼebé haʼu-nia inan hanorin. Iha tinan 1970, ami presiza muda ba Liufang iha distritu Linchuan. Iha tempu neʼebá, Liufang mak knua ida neʼebé kiak no susar atu hetan hahán.

Ita-nia família fiar saida?

Haʼu-nia aman la interese ba relijiaun no polítiku. Haʼu-nia inan fiar ba Buda. Iha eskola, mestre sira hanorin katak moris hotu mosu liuhusi evolusaun, no haʼu fiar buat neʼebé sira hatete.

Tanbasá mak Ita gosta matemátika?

Haʼu gosta matemátika tanba haʼu gosta buka-hatene buat neʼebé loos liuhusi lójiku. Iha tinan 1976, depois ukun-naʼin Mao Tse-tung neʼebé hahú revolusaun mate, haʼu tama universidade no hili departamentu matemátika. Depois haʼu remata universidade, haʼu-nia serbisu primeiru mak atu halo peskiza matemátika kona-ba enerjia atómika.

Foufoun, Ita sente oinsá kona-ba Bíblia?

Iha tinan 1987, haʼu mai rai-Estadus Unidus atu estuda liután iha Universidade Texas A&M. Haʼu hatene katak ema barak iha Amérika fiar ba Maromak no lee Bíblia. Haʼu  mós rona ona katak Bíblia iha informasaun barak neʼebé ajuda ema atu sai matenek, tan neʼe haʼu sente haʼu tenke lee.

Haʼu haree katak Bíblia nia hanorin balu ajuda duni ema atu hadiʼa sira-nia moris. Maibé tanba susar ba haʼu atu komprende, haʼu la lee tan.

Oinsá mak Ita interese fali ba Bíblia?

Iha tinan 1990, Testemuña ba Jeová ida vizita haʼu-nia uma no hatudu buat neʼebé Bíblia hatete kona-ba futuru neʼebé kapás. Feto neʼe arranja feen-laʼen ida atu ajuda haʼu komprende Bíblia. Haʼu-nia feen Liping mós la fiar Maromak hanesan haʼu, no uluk nia mestra fízika iha eskola sekundária iha rai-Xina, maibé nia mós komesa estuda Bíblia. Ami aprende buat neʼebé Bíblia hatete kona-ba oinsá mak moris hotu hahú. Haʼu foin rona katak Kriadór iha, tan neʼe haʼu deside atu buka-hatene rasik kona-ba ida-neʼe.

Oinsá mak Ita buka-hatene kona-ba Kriadór?

Tanba haʼu estuda matemátika, haʼu hetan ona treinu atu kalkula kona-ba buat ida nia posibilidade atu akontese. Haʼu mós hatene ona katak atu moris bele mosu mesak, tenke iha nanis proteína. Tan neʼe, haʼu koko atu kalkula posibilidade ba proteína ida atu mosu mesak. Proteína mak buat neʼebé komplikadu tebetebes, no atu forma sélula neʼebé moris, tenke iha proteína rihun ba rihun neʼebé tau hamutuk ho loloos. Ikusmai, haʼu rekoñese katak proteína la bele mosu mesak! Haʼu seidauk lee esplikasaun neʼebé apoia teoria evolusaun kona-ba oinsá mak proteína komplikadu sira-neʼe bele mosu mesak. Ikusmai, haʼu fiar katak tenkesér iha Kriadór.

Saida mak halo Ita fiar katak Bíblia mai husi Maromak?

Hodi estuda Bíblia ho Testemuña ba Jeová, haʼu aprende katak Bíblia fó sai profesia barak neʼebé ikusmai sai loos. Haʼu mós hetan rezultadu diʼak oioin hodi halo tuir Bíblia nia matadalan sira. Haʼu hanoin: ‘Oinsá mak ema neʼebé hakerek Bíblia iha tinan rihun ba rihun liubá bele fó sai liafuan neʼebé ajuda ema ohin loron?’ Neineik-neineik, haʼu rekoñese katak Bíblia mak Maromak nia Liafuan duni.

Saida deʼit mak halo ita fiar nafatin katak iha duni Kriadór?

Kuandu haʼu hanoin kona-ba natureza, neʼe halo haʼu fiar liután ba Kriadór. Agora daudauk haʼu serbisu halo programa komputadór nian, no haʼu sempre admira kona-ba oinsá mak ita-nia kakutak diʼak liu fali komputadór. Porezemplu, ita-nia kakutak iha kapasidade atu komprende ema seluk nia liafuan maski neʼe inklui fraze neʼebé la kompletu, lian hamnasa, meʼar, gagu, ka logat. Ita ema sente neʼe baibain deʼit, maibé susar tebes atu halo programa neʼebé bele rekoñese ema nia liafuan.

La hanesan ho komputadór, ita-nia kakutak bele rekoñese emosaun, logat, no bele mós identifika ema neʼebé koʼalia daudaun liuhusi ninia lian. Ema neʼebé halo programa komputadór mós estuda hela kona-ba ema nia kakutak nia kapasidade atu rekoñese liafuan hodi bele halo programa komputadór neʼebé hanesan. Haʼu hanoin katak ema neʼebé estuda buat hanesan neʼe loloos estuda Maromak nia serbisu neʼebé furak tebes.