Ema neʼebé la rende an, sai diʼak lalais bainhira hasoru susar ruma. Sira aprende ida-neʼe liuhusi esperiénsia. Hanesan labarik ida bainhira aprende atu laʼo, dala ruma sira tenke monu, Ita-nia oan mós labele aprende oinsá atu susesu se la hasoru susar ruma.

Labarik balu laran-kraik bainhira sira la susesu, hasoru susar, ka ema kritika sira. Sira balu rende an deʼit. Maski nuneʼe, sira presiza komprende faktu sira tuirmai:

• Dala ruma ita la susesu iha buat balu neʼebé ita halo.​—Tiago 3:2.

• Ema hotu hasoru situasaun susar iha sira-nia moris.​—Eclesiastes 9:11.

• Ita bele halo diʼak liután se ema ruma korrije buat neʼebé ita halo.​—Provérbios 9:9.

La rende an sei ajuda Ita-nia oan atu hasoru susar naran deʼit ho fiar an.

Bainhira Ita-nia oan la susesu.

BÍBLIA NIA PRINSÍPIU: “Ema laran-loos bele monu ba dala hitu, nia sei hamriik fali.”​—Provérbios 24:16.

Ajuda Ita-nia oan atu aprende oinsá bele hatene diferensa entre problema neʼebé sériu ka ladún sériu. Porezemplu, saida mak nia sei halo se nia la pasa iha ninia ezame? Karik nia sei rende an no hatete, “Haʼu labele halo buat ida ho loloos!”

Atu hanorin kona-ba la rende an, Ita tenke ajuda Ita-nia oan atu hanoin kona-ba saida mak nia sei halo kuandu nia hasoru fali situasaun hanesan neʼe. Hodi halo nuneʼe sei ajuda nia atu koko hadiʼa problema rasik no la sente kanek.

Iha tempu hanesan neʼe, koko atu la fó solusaun ba oan nia problema. Maibé ajuda nia hodi nia bele hadiʼa rasik. Karik Ita bele husu nia, “Saida mak ó presiza halo atu ó bele komprende buat neʼebé mestre hanorin?”

Bainhira hasoru susar.

BÍBLIA NIA PRINSÍPIU: “Imi la hatene imi-nia moris sei sai oinsá loos iha loron aban.”​—Tiago 4:14.

Buat naran deʼit bele akontese iha ita-nia moris. Ema neʼebé ohin riku karik aban bele sai kiak; ema neʼebé ohin saúde diʼak, aban bele sai moras. Bíblia hatete: “Laʼós ema neʼebé halai lalais mak sempre  manán halai-taru . . . tanba tempu susar no situasaun neʼebé mosu derrepente deʼit kona sira hotu.”​—Eclesiastes 9:11.

Nuʼudar inan-aman, Ita halo ona buat neʼebé Ita bele atu proteje Ita-nia oan husi perigu. Maibé neʼe la dehan katak Ita bele proteje Ita-nia oan husi buat aat hotu neʼebé akontese.

Klaru katak Ita-nia oan seidauk komprende didiʼak problema kona-ba osan no lakon serbisu. Maibé Ita bele ajuda nia hasoru problema sira hanesan lakon belun ida ka ema neʼebé nia hadomi mate. Hodi halo nuneʼe bele ajuda nia iha aban-bainrua bainhira nia sai boot no hasoru problema oioin. *

Bainhira Ita-nia oan hetan konsellu.

BÍBLIA NIA PRINSÍPIU: “Rona ba konsellu . . . atu nuneʼe ó bele sai matenek iha aban-bainrua.”​—Provérbios 19:20.

Konsellu laʼós atu hatún, maibé neʼe hanesan matadalan ba oan atu troka buat neʼebé la diʼak husi nia.

Bainhira Ita hanorin Ita-nia oan atu simu konsellu husi ema seluk, Ita rasik no Ita-nia oan sei hetan benefísiu. Aman ida naran John hatete: “Se oan nunka atu hadiʼa ninia sala, nia sei nunka aprende buat ida. Nia sei hasoru problema seluk tan iha ninia moris, no inan-aman tenke kontinua tuituir nia atu hadiʼa ninia problema sira. Neʼe sei halo susar ba inan-aman rasik no oan nia moris.”

Oinsá Ita bele ajuda oan atu simu benefísiu liuhusi konsellu? Bainhira Ita-nia oan hetan konsellu husi mestre ka ema seluk, keta hatete ba sira katak konsellu neʼe la justu. Maibé, husu toʼok nia:

• “Tuir ó-nia hanoin, tanbasá mak ema neʼe fó konsellu ba ó?”

• “Oinsá mak ó bele halo tuir?”

• “Saida mak ó sei halo kuandu hasoru fali situasaun hanesan neʼe?”

Hanoin-hetan, konsellu sei ajuda Ita-nia oan, laʼós deʼit agora maibé mós iha futuru.