BA JOVEN
9: Identidade
NEʼE KATAK SÁ
Ita-nia identidade laʼós deʼit kona-ba Ita-nia naran no oin. Neʼe inklui Ita-nia morál, fiar, no hahalok. Ita-nia identidade hatudu sai ho loloos Ita mak ema hanesan saida.
TANBASÁ IMPORTANTE
Bainhira Ita kaer metin Ita-nia identidade, Ita sei kaer metin Ita-nia fiar no la halo tuir deʼit Ita-nia kolega sira.
“Ema barak husik ema seluk mak deside roupa neʼebé sira hatais. Neʼe halo sira atu hanesan deʼit ho boneka neʼebé iha loja.”—Adrian.
“Haʼu aprende atu halo buat neʼebé loos maski susar. Haʼu bele hatene belun neʼebé loos liuhusi sira-nia hahalok no hahalok neʼebé haʼu hatudu kuandu hamutuk ho sira.”—Courtney.
BÍBLIA NIA PRINSÍPIU: “Keta halo tuir mundu ohin neʼe, maibé troka imi-nia an hodi hafoun imi-nia hanoin.”—Roma 12:2.
SAIDA MAK ITA BELE HALO
Hanoin kona-ba agora Ita mak ema hanesan saida no Ita hakarak atu sai ema hanesan saida hodi buka-hatene Ita-nia hahalok diʼak, fraku, no fiar. Hatán pergunta sira tuirmai.
Hahalok diʼak: Matenek ka talentu saida mak haʼu iha? Hahalok diʼak saida mak haʼu iha? (Porezemplu: Haʼu mak ema neʼebé laran-luak? Tuir oras? Kontrola an? Badinas?) Buat diʼak saida deʼit mak haʼu halo?
SUJESTAUN: Ita sente susar atu hanoin fali buat diʼak neʼebé Ita halo ona ka lae? Husu ba Ita-nia inan-aman ka belun ida kona-ba buat diʼak saida mak sira haree husi Ita no tanbasá.
BÍBLIA NIA PRINSÍPIU: “Ema ida-idak tenke buka-hatene ninia hahalok rasik, no tuirmai nia sei iha razaun atu haksolok kona-ba ninia an rasik, laʼós hodi kompara nia an ho ema seluk.”—Galásia 6:4.
Fraku: Hahalok diʼak saida mak haʼu presiza atu haburas? Bainhira mak haʼu sente fasil liu atu monu ba tentasaun? Iha dalan saida deʼit mak haʼu presiza kontrola an liután?
BÍBLIA NIA PRINSÍPIU: “Se ita dehan: ‘Ita la iha sala’, ita bosok ita-nia an no lia-loos la hela iha ita.”—1 João 1:8.
Fiar: Haʼu moris tuir prinsípiu saida no tanbasá? Haʼu fiar Maromak ka lae? Saida mak book haʼu atu fiar katak Maromak iha? Hahalok hanesan saida mak la justisa no tanbasá? Saida mak haʼu fiar kona-ba futuru?
BÍBLIA NIA PRINSÍPIU: “Kbiit atu hanoin sei tau matan ba ó, no kbiit atu tetu didiʼak sei proteje ó.”—Provérbios 2:11.
Karik Ita sei gosta
RESPOSTA BA PERGUNTA 10 NEʼEBÉ JOVEN SIRA HUSU
Tuir loloos, haʼu mak ema hanesan saida?
Hodi hatene didiʼak ita-nia prinsípiu, talentu, fraku no planu sira, ida-neʼe bele ajuda ita halo desizaun neʼebé diʼak maski hasoru susar no tentasaun oioin.
