BA INAN-AMAN
6: Fó dixiplina
NEʼE KATAK SÁ
Fó dixiplina katak atu dirije ka hanorin. Dala ruma neʼe inklui korrije oan sira-nia hahalok la diʼak. Maibé baibain, ita treinu ita-nia oan kona-ba morál neʼebé ajuda sira atu halo desizaun diʼak.
TANBASÁ IMPORTANTE
Ohin loron, inan-aman barak ladún fó dixiplina ba sira-nia oan tanba sira taʼuk katak neʼe bele halo oan sira la fiar an. Maski nuneʼe, inan-aman neʼebé matenek halo regra no treinu sira-nia oan atu halo tuir.
“Oan sira presiza hatene saida mak sira bele halo no labele halo, hodi nuneʼe sira bele sai ema neʼebé diʼak. Se sira la hetan dixiplina, sira sai hanesan ró neʼebé la iha kamudi. Ró neʼe sei namlele bá-mai deʼit no ikusmai bele mout.”—Pamela.
SAIDA MAK ITA BELE HALO
Keta troka bá-mai dixiplina. Hanorin oan sira katak sira sei hetan konsekuénsia kuandu la halo tuir regra. Ita mós tenke prontu atu gaba sira bainhira sira halo tuir regra.
“Labarik barak la halo tuir inan-aman, tan neʼe, haʼu gaba beibeik haʼu-nia oan bainhira sira halo tuir. Neʼe halo fasil liu ba sira atu simu dixiplina.”—Christine.
BÍBLIA NIA PRINSÍPIU: “Buat naran deʼit neʼebé ema kari, nia mós sei koʼa ida-neʼe.”—Galásia 6:7.
Tetu didiʼak. Antes atu fó dixiplina, haree ba oan nia tinan, ninia kbiit atu komprende, no sala neʼe boot ka kiʼik deʼit. Tuirmai, fó dixiplina tuir oan nia sala. Porezemplu, se oan uza telefone atu halo buat neʼebé sala, diʼak atu prende sira-nia telefone ba tempu balu. Iha tempu hanesan, diʼak atu la sai hirus lalais kona-ba problema kiʼik.
“Bainhira haʼu-nia oan halo sala, haʼu buka-hatene nia halo ida-neʼe tanba hakarak kontra haʼu ka nia halo la ho neon. Bainhira oan sira halo sala neʼebé sériu, ita presiza duni atu korrije sira, maibé se sala neʼe kiʼik deʼit, la presiza fó dixiplina makaʼas.”—Wendell.
BÍBLIA NIA PRINSÍPIU: “Keta halo imi-nia oan sai laran-hirus, atu nuneʼe sira la sai laran-triste.”—Koloso 3:21.
Hatudu domin. Oan sira sente fasil atu simu no halo tuir dixiplina se sira hatene katak inan-aman hadomi sira.
“Bainhira ami-nia oan-mane halo sala, ami esplika katak se nia prontu atu hadiʼa ninia hahalok, nia bele iha naran diʼak nafatin, no ami hakarak ajuda nia. Ami hatete katak ami orgullu ho desizaun diʼak hotu neʼebé uluk nia halo.”—Daniel.
BÍBLIA NIA PRINSÍPIU: “Domin mak pasiénsia no laran-diʼak.”—1 Korinto 13:4.
Karik Ita sei gosta
MATAN-MORIS BÁ!
