PLANETA MUNDU BELE DURA KA LAE?
Floresta
FLORESTA ka ai-laran mak planeta mundu nia “pulmaun no sistema atu sustenta moris”. Ai-horis sira xupa dióksidu-karbonu neʼebé bele lori perigu ba ita no hasai fali oksijéniu neʼebé importante ba ita atu dada iis. Maizumenus porsentu 80 husi ai-horis no animál sira mak moris iha ai-laran. Se floresta la iha, ita labele moris.
Saida mak akontese ba floresta?
Tinan-tinan, ema tesi ai-hun biliaun ba biliaun, maioria sira uza fatin sira-neʼe atu halo toʼos. Se kompara ho tinan 75 liubá, agora daudaun floresta tropikál porsentu 50 mak la iha tan.
Kuandu floresta lakon, ai-horis no animál sira mós mate.
Ita-nia planeta kria atu rekupera an
Maski ema tesi ai-hun sira, maibé floresta balu nafatin iha abilidade atu rekupera rasik hodi buras fali. Ekolojista sira haree ida-neʼe no admira tebes tanba floresta neʼebé hetan estragu ona bele rekupera lalais. Haree toʼok ezemplu balu tuirmai:
-
Peskizadór sira estuda didiʼak ai-laran neʼebé ema lere tiha atu halo toʼos maibé ikusmai husik mamuk. Sira estuda ai-laran 2.200 iha Amérika no Áfrika Oeste no haree katak ai-laran neʼebé hetan estragu bele komesa rekupera fali durante tinan sanulu nia laran.
-
Tuir revista Science, peskizadór sira hatete katak iha tinan 100 nia laran, ai-laran sira sei buras fali hanesan uluk antes hetan estragu.
-
Foin lalais, sientista sira iha Brazíl estuda kona-ba ai-laran neʼebé hetan estragu ona hodi kompara área neʼebé fuik ho área neʼebé ema hakaʼas an atu kuda fali ai-hun sira.
-
Relatóriu husi National Geographic dehan: “Sientista sira-neʼe deskobre katak ema la presiza kuda fali ai-hun sira.” Iha tinan lima nia laran, área neʼebé ema la book “sai nakonu fali ho ai-horis sira”.
Saida mak ema halo daudaun
Iha mundu tomak, ema hakaʼas an atu proteje ai-laran no hadiʼa parte neʼebé hetan estragu. Rezultadu mak, tuir Nasoins Unidas, durante tinan 25 nia laran “ema la estraga tan ai-laran hanesan uluk”.
Maibé neʼe deʼit la toʼo atu salva floresta. Organizasaun Global Forest Watch fó sai relatóriu katak “iha área tropikál ema kontinua estraga hela ai-laran barak”.
Kompañia sira tesi ai-hun barak maski la hetan lisensa husi governu, no sira manán osan boot husi negósiu neʼe. Sira-nia hahalok kaan-teen mak razaun tanbasá floresta tropikál barak hetan estragu.
Grupu neʼebé tau matan ba floresta halo serbisu hodi tesi ai-hun balu neʼebé tuan no kuda fali ai-oan sira neʼebé foun
Esperansa husi Bíblia
“Maromak Jeová a kuda ai-hun oioin neʼebé diʼak atu haree no diʼak atu sai nuʼudar ai-han.”—Génesis 2:9.
Maromak kria floresta hotu ho kapasidade atu rekupera an hodi nuneʼe ita bele kontinua hetan benefísiu. Nia hakarak mantein floresta no ninia siklu neʼebé furak.
Bíblia fó sai katak Maromak sei hapara ema kaan-teen sira atu labele estraga planeta mundu nia rikusoin, hodi salva planeta neʼe no kriatura moris neʼebé iha laran. Haree informasaun “Maromak promete katak planeta mundu sei dura” iha pájina 15.
a Jeová mak Maromak nia naran.—Salmo 83:18.
