“Prezente diʼak ida-idak no prezente hotu neʼebé kompletu mak husi leten, no tun mai husi ida neʼebé mak Aman ba naroman lalehan nian.” (Tiago 1:17) Eskritura neʼe koʼalia kona-ba ita-nia Aman Maromak Jeová nia laran-luak. Husi prezente hotu neʼebé Maromak fó ona mai ita, iha prezente ida neʼebé mak diʼak liu hotu. Neʼe mak saida? Jesus nia liafuan neʼebé hakerek iha João 3:16, hatete: “Maromak hadomi tebes mundu toʼo fó nia Oan-Mane mesak, atu nuneʼe ema hotu neʼebé hatudu fiar iha nia sei la lakon maibé hetan moris rohan-laek.”

Loos duni, prezente diʼak liu hotu neʼebé Maromak fó mak ninia Oan-Mane mesak. Liuhusi prezente neʼe, ita bele sai livre husi sala no mate. (Salmo [Mazmur] 51:5; João 8:34) Ita ema la iha kbiit atu sai livre husi sala no mate. Maibé, Maromak nia domin book nia atu fó ninia Oan-Mane mesak nuʼudar sakrifísiu hodi sosa fali ita, no fó oportunidade ba ita atu moris ba nafatin. Se nuneʼe, oinsá mak Jesus nia sakrifísiu bele sosa fali ita? Tanbasá mak ida-neʼe importante? No benefísiu saida mak ita bele hetan?

Jesus nia sakrifísiu nia folin bele sosa fali buat neʼebé lakon ona ka halo ita sai livre. Bíblia esplika katak Maromak kria ita-nia inan-aman primeiru, Adão no Eva, ho isin neʼebé perfeitu, sira bele moris ba nafatin iha mundu paraízu hamutuk ho sira-nia oan no bei-oan. (Gênesis [Kejadian] 1:26-28) Maibé Adão no Eva kontra Maromak no lakon buat sira-neʼe hotu. Sira sai sala-naʼin. Tuirmai, saida mak akontese? Bíblia hatete: “Basá liuhusi ema ida mak sala tama iha mundu, no mate tanba sala. Nuneʼe mate habelar ba ema hotu tanba ema hotu sala.” (Roma 5:12) Entaun, Adão no Eva hatutan sala ba sira-nia oan nuʼudar liman-rohan. No konsekuénsia husi sala mak mate.

Folin atu sosa fali ema tenke hanesan ho buat neʼebé lakon ona. Bainhira Adão la halo tuir Maromak, nia halo sala no rezultadu mak nia lakon ninia moris neʼebé perfeitu. Bíblia esplika katak ikusmai Adão nia bei-oan sira sai atan ba sala no mate. Entaun, atu bele sai livre husi sala no mate, ema perfeitu ida presiza mate atu sosa fali moris perfeitu neʼebé Adão halakon. Só Jesus nia moris deʼit mak bele sosa fali ema. (Roma 5:19; Éfeso 1:7) Maromak domin nian halo arranju atu sosa fali ita, tan neʼe mak ita bele iha esperansa atu moris ba nafatin iha rai.—Apokalipse 21:3-5.

Jesus nia sakrifísiu mak prezente neʼebé diʼak liu hotu, no bele fó oportunidade ba ita atu moris ba nafatin. Ita aprende ona iha pájina haat no lima, kona-ba pontu haat neʼebé bele ajuda ita atu fó prezente neʼebé halo ema kontente. Agora mai ita haree oinsá Maromak kumpre pontu haat neʼe bainhira nia fó Jesus nuʼudar prezente.

Prezente neʼebé ita hakarak. Ita ema iha hakarak neʼebé makaʼas atu moris ba nafatin. (Eclesiastes [Pengkhotbah] 3:11) Maski nuneʼe ita rasik la iha kbiit atu kumpre hakarak neʼe, maibé Maromak nia arranju atu sosa fali ita bele kumpre ida-neʼe. Bíblia hatete: “Tanba sala nia kolen mak  mate, maibé prezente neʼebé Maromak fó mak moris rohan-laek liuhusi Kristu Jesus ita Naʼi.”—Roma 6:23.

Prezente neʼebé ita presiza. Ema la iha kbiit atu sosa fali sira-nia an husi sala. Bíblia esplika: “Folin ba ema nia moris mak karun tebes, toʼo sira la iha kbiit atu selu folin neʼe.” (Salmo [Mazmur] 49:8) Ita presiza duni Maromak nia ajuda atu bele sai livre husi sala no mate. Maromak sosa fali ita liuhusi “folin neʼebé Kristu Jesus selu ona”.—Roma 3:23, 24.

Tempu neʼebé loos. Bíblia hatete mai ita: “Kristu mate ba ita kuandu ita sei sala-naʼin hela.” (Roma 5:8) Tanba Maromak fó prezente “kuandu ita sei sala-naʼin hela”, neʼe hatudu katak Jeová hadomi tebes ita maski ita sala-naʼin. Maski ita presiza tahan hasoru rezultadu oioin husi sala, maibé prezente neʼe fó mai ita esperansa.

Razaun neʼebé loos no la hanoin an deʼit. Saida mak book Maromak atu fó ninia Oan-Mane mesak nuʼudar sakrifísiu? Bíblia dehan: “Iha dalan neʼe mak Maromak hatudu nia domin mai ita, basá nia haruka ninia Oan-Mane mesak ba mundu atu ita bele hetan moris liuhusi nia. Maromak nia domin mak neʼe, laʼós katak ita hadomi ona Maromak, maibé nia hadomi ita.”—1 João 4:9, 10.

Iha dalan saida deʼit mak Ita bele hatudu katak Ita hafolin prezente diʼak liu hotu neʼebé Maromak fó? Hanoin-hetan Jesus nia liafuan iha João 3:16 neʼebé hatete katak só sira neʼebé “hatudu fiar” ba Jesus mak sei hetan salvasaun. Tuir Bíblia, se ita iha fiar “ita sei laran-metin katak ita-nia esperansa sei sai loos”. (Ebreu 11:1) Atu bele iha fiar hanesan neʼe, Ita presiza iha koñesimentu neʼebé loos. Tan neʼe, Ita presiza aprende kona-ba Maromak Jeová neʼebé fó ona prezente mai Ita, no mós buka-hatene saida mak ita presiza halo atu bele moris ba nafatin.

Ita bele aprende kona-ba buat sira-neʼe hodi estuda informasaun kona-ba Bíblia iha ami-nia sítiu www.jw.org/tdt. Testemuña ba Jeová sei kontente atu ajuda Ita. Bainhira Ita aprende no hetan benefísiu oioin husi Jesus nia sakrifísiu, ida-neʼe sei book Ita atu hatudu agradese hodi dehan: “Obrigadu ba Maromak liuhusi Jesus Kristu ita Naʼi!”—Roma 7:25.