Tuir livru Gênesis, livru primeiru husi Bíblia, Maromak fó mandamentu ida ba Adão hodi dehan: “Ai-fuan husi ai-hun hotu iha jardín neʼe, ó bele han toʼo bosu. Maibé kona-ba ai-hun koñesimentu kona-ba buat diʼak no aat, ó labele han ninia fuan, tanba iha loron neʼebé ó han ai-fuan neʼe, ó sei mate duni.” (Gênesis [Kejadian] 2:16, 17) Liafuan neʼe hatudu ho klaru katak se Adão halo tuir Maromak, nia sei la mate, maibé moris ba nafatin iha jardín Eden.

Buat neʼebé triste mak, bainhira Eva fó ba Adão ai-fuan neʼebé Maromak bandu, Adão hili atu han ai-fuan neʼe hodi la halo tuir Maromak nia mandamentu. (Gênesis [Kejadian] 3:1-6) Rezultadu husi Adão nia desizaun kona ita hotu neʼebé moris ohin loron. Apóstolu Paulo hatete: “Liuhusi ema ida mak sala tama iha mundu, no mate tanba sala. Nuneʼe mate habelar ba ema hotu tanba ema hotu sala.” (Roma 5:12) “Ema ida” iha eskritura neʼe mak Adão. Maibé “sala” saida mak Adão halo? Tanbasá mak sala neʼe lori mate?

Adão halo sala hodi hili atu la halo tuir Maromak nia ukun-fuan. (1 João 3:4) No hanesan Maromak hatete ona ba Adão, kastigu ba sala mak mate. Maibé, se Adão halo tuir Maromak nia mandamentu no ninia oan sira mós halo nuneʼe, sala sei la iha, no mate mós sei la iha. Maromak kria ema laʼós atu moris ba tempu uitoan no depois mate, Ninia hakarak mak atu ema moris ba nafatin.

 Hanesan Bíblia hatete, “mate habelar ba ema hotu”, la iha ema ida mak bele nega realidade neʼe. Entaun, depois ita mate, parte ruma husi ita sei moris hela ka lae? Ema barak hatán “sin”, no sira esplika katak ita iha klamar neʼebé nunka mate. Se nuneʼe duni, neʼe katak Maromak bosok Adão. Oinsá? Se ema mate nia klamar sei moris hela iha fatin ruma, neʼe katak Maromak la kumpre ninia liafuan hodi fó kastigu-mate ba Adão. Maibé Bíblia hatete: “Maromak nunka bosok.” (Ebreu 6:18) Tuir loloos, Satanás mak bosok Eva bainhira nia hatete: “Imi sei la mate.”—Gênesis (Kejadian) 3:4.

Neʼe hamosu pergunta ida: Se hanorin kona-ba mate-klamar mak bosok, entaun, saida mak akontese depois ita mate?

Livru Gênesis esplika kona-ba oinsá mak Maromak kria ema primeiru, hodi dehan: “Maromak Jeová halo mane ida husi rai-rahun no huu iis moris nian ba ninia inus, no nia sai ema neʼebé moris.” Liafuan orijinál husi lia-ebraiku neʼebé tradús nuʼudar “ema neʼebé moris” mak nefes, no liafuan neʼe signifika katak “kriatura neʼebé dada iis”.—Gênesis (Kejadian) 2:7.

Bíblia la hatete katak Maromak kria ema ho klamar neʼebé nunka mate. Tuir loloos, maski ita lee Bíblia tomak, ita sei nunka hetan liafuan hanesan “klamar neʼebé nunka mate”.

Se nuneʼe, tanbasá mak relijiaun barak hanorin kona-ba klamar neʼebé nunka mate? Atu hetan resposta, mai ita buka-hatene ema antigu sira-nia fiar, hahú husi tempu Ejitu antigu.

Matenek-naʼin gregu ida naran Heródoto neʼebé moris tinan 2.500 liubá, hatete katak ema Ejitu mak “ema primeiru neʼebé hanorin kona-ba  klamar neʼebé nunka mate”. Ema Babilónia antigu mós fiar ida-neʼe. Matenek-naʼin gregu sira mós habelar hanorin neʼe iha rai-Grésia, no depois liurai Alexandre Boot manán Médiu Oriente iha tinan 332 molok Kristu, hanorin neʼe habelar liután iha área hotu neʼebé rai-Grésia mak ukun.

Iha Jesus no apóstolu sira-nia tempu, grupu relijiaun judeu nian naran Essene no Farizeu hanorin katak ema iha klamar neʼebé moris ba nafatin. Livru ida kona-ba ema judeu nia istória (The Jewish Encyclopedia) hatete katak ema judeu sira adota ideia neʼe husi ema gregu, liuliu husi Plato nia filozofia. Matenek-naʼin judeu ida naran Josefo neʼebé moris iha apóstolu sira-nia tempu mós hatete katak, hanorin neʼe laʼós husi Eskritura Sagrada, maibé husi “ema gregu nia fiar” neʼebé bazeia ba istória oioin neʼebé sira mak inventa deʼit.

Tanba influénsia husi kultura gregu nian sai buras, ema neʼebé temi sira-nia an nuʼudar Kristu nia dixípulu mós komesa simu hanorin falsu neʼe. Jona Lendering, matenek-naʼin kona-ba istória, hatete: “Plato hanoin katak, uluk ita-nia klamar moris iha fatin neʼebé diʼak, no depois klamar neʼe moris iha mundu neʼebé aat. Neʼe halo fasil ba ema kristaun atu kahur ho sira rasik nia fiar.” Ikusmai, hanorin kona-ba klamar neʼebé la mate sai igreja nia doutrina neʼebé importante.

Apóstolu Paulo fó ona avizu ida hodi dehan: “Tempu sei mai kuandu ema balu sei husik hela fiar hodi rona fali ba liafuan la loos neʼebé haree hanesan mai husi Maromak, no mós rona ba anju aat sira-nia hanorin.” (1 Timóteo 4:1) Liafuan neʼe loos duni! Doutrina kona-ba klamar neʼebé nunka mate mak “anju aat sira-nia hanorin”. Neʼe la mai husi Bíblia, maibé mai husi relijiaun falsu no filozofia antigu.

Jesus hatete: “Imi sei hatene lia-loos, no lia-loos sei halo imi livre.” (João 8:32) Kuandu ita hatene lia-loos husi Bíblia, ita bele sai livre husi hanorin falsu no toman oioin neʼebé relijiaun barak habelar ona. Liután neʼe, lia-loos husi Maromak nia Liafuan halo ita livre husi lisan no kostume oioin kona-ba mate.—Haree kaixa “ Ema mate sira iha neʼebé?”

Maromak kria ema laʼós atu moris ba tinan 70 ka 80 deʼit iha mundu neʼe no depois lori sira ba fatin seluk. Tuir loloos, nia hakarak ema atu moris ba nafatin iha mundu neʼe. Neʼe hatudu ninia domin mai ita, no nia sei la husik buat ida hanetik nia atu kumpre ida-neʼe. (Malaquias [Maleakhi] 3:6) Maromak promete: “Ema laran-loos sira sei simu rai, no sira sei moris ba nafatin iha neʼebá.”—Salmo (Mazmur) 37:29.