Ita hotu mak família ida tanba mai husi ema primeiru Adão. Maski membru ida-idak iha família laran tenke hatudu domin no respeitu ba malu, maibé susar atu hetan domin neʼe. Neʼe laʼós buat neʼebé Maromak hakarak.

“Imi tenke hadomi imi-nia maluk hanesan imi-nia an rasik.”​—LEVÍTICO 19:18.

“Hadomi nafatin imi-nia inimigu.”​—MATEUS 5:44.

Haree toʼok saida mak Maromak hatete kona-ba domin iha 1 Korinto 13:4-7:

“Domin mak pasiénsia no laran-diʼak.”

Hanoin toʼok: Ita sente oinsá kuandu ema hatudu pasiénsia no laran-diʼak ba Ita no la hirus kuandu Ita halo sala?

“Domin la laran-moras.”

Hanoin toʼok: Ita sente oinsá kuandu ema seluk deskonfia ka laran-moras ba ita?

Domin “la buka diʼak ba ninia an rasik”.

Hanoin toʼok: Ita sente oinsá kuandu ema seluk respeitu Ita-nia hanoin no la obriga Ita atu halo tuir deʼit sira-nia opiniaun?

Domin “la hanoin fali buat aat neʼebé nia simu”.

Hanoin toʼok: Maromak prontu fó perdua ba ema neʼebé hakribi sala. “Nia sei nunka buka deʼit sala, no nia sei la sai hirus ba nafatin.” (Salmo 103:9) Ita agradese tebes kuandu ema fó perdua ita. Tan neʼe ita tenke prontu atu fó perdua ba ema neʼebé halo sala hasoru ita.​—Salmo 86:5.

Domin “la haksolok ho hahalok la loos”.

Hanoin toʼok: Bainhira buat neʼebé aat akontese ba ita, ita lakohi ema seluk kontente ho ida-neʼe. Tan neʼe ita mós la kontente kuandu ema seluk hasoru susar, maski ema neʼe hatudu hahalok la diʼak mai ita.

Atu simu Maromak nia bensaun, ita tenke hadomi ema hotu iha dalan hanesan neʼe. Dalan diʼak atu halo nuneʼe mak hodi ajuda sira neʼebé presiza ajuda.