Ita koʼalia uitoan ona kona-ba orákulu iha Delfos neʼebé fó sai informasaun la loos ba Liurai Creso no ikusmai liurai lakon funu hasoru liurai Pérsia. Tuir loloos, Bíblia temi profesia ida neʼebé iha ligasaun ho Liurai Ciro husi Pérsia no buat hotu iha profesia neʼe sai loos.

Maizumenus tinan 200 antes Liurai Ciro moris, profeta Ebreu ida naran Isaias fó-hatene nanis kona-ba Ciro no esplika oinsá nia sei manán sidade Babilónia.

Isaias 44:24, 27, 28: “Jeová . . . dehan nuneʼe . . . ‘Haʼu mak dehan ba bee neʼebé kleʼan: “Sai maran bá, no haʼu sei halo maran ó-nia mota sira hotu”; Haʼu mak dehan kona-ba Ciro: “Nia mak haʼu-nia bibi-atan, no nia sei kumpre duni haʼu-nia hakarak hotu”; Haʼu mak dehan kona-ba Jeruzalein: “Ema sei harii fali sidade neʼe”, no kona-ba templu: “Ema sei tau fali ó-nia fundasaun.”’”

Istória-naʼin ida husi rai-Grésia naran Heródoto esplika katak Ciro nia tropa sira halo Mota Eufrates neʼebé suli ba sidade Babilónia atu suli fali ba fatin seluk. Ciro nia planu neʼe ajuda ninia tropa sira atu tama ba sidade Babilónia liuhusi mota. Depois manán tiha sidade, Ciro husik livre ema Judeu sira neʼebé sai dadur iha rai-Babilónia, no sira fila fali ba Jeruzalein atu harii sidade neʼebé rahun ona tinan 70 liubá.

Isaias 45:1: “Tuirmai neʼe mak liafuan husi Jeová ba Ciro, ema neʼebé nia hili ona, neʼebé Nia kaer ninia liman-loos atu domina nasaun sira iha ninia oin, atu manán liurai sira, atu loke sidade nia portaun sira iha ninia oin, hodi nuneʼe sidade nia portaun sira labele taka metin.”

Tropa Pérsia tama ba sidade neʼe liuhusi sidade nia portaun boot, neʼebé nakloke deʼit iha tempu neʼebá. Se ema Babilónia hatene kona-ba Ciro nia planu atu ataka sidade, sira sei taka portaun hotu neʼebé liga ho mota. Maibé tanba sira la hatene, sira husik deʼit portaun nakloke.

Neʼe mak profesia ida iha Bíblia neʼebé sai loos ona. a Baibain siʼikdór sira-nia liafuan bazeia ba maromak falsu sira, maibé Bíblia nia profesia mai husi Ida neʼebé hatete: “Husi uluk kedas haʼu fó-hatene nanis buat neʼebé sei mosu, no husi tempu uluk haʼu fó sai buat sira neʼebé seidauk akontese.”​—Isaias 46:10.

 Só Maromak loos deʼit, neʼebé naran Jeová, mak bele koʼalia hanesan neʼe. Ninia naran signifika “Nia mak halo sai”. Neʼe hatudu ho klaru katak nia iha kbiit atu hatene kona-ba futuru no uza ida-neʼe atu kumpre ninia hakarak. Neʼe halo ita fiar katak nia sei kumpre ninia promesa hotu.

Ita hakarak hatene ka lae Bíblia nia profesia kona-ba ita-nia tempu ohin loron? Maizumenus tinan 2.000 liubá, Bíblia fó sai nanis katak “problema barak neʼebé susar atu tahan” sei mosu “iha loron ikus sira”. Loron ikus kona-ba saida? Neʼe la koʼalia kona-ba mundu ka ema, neʼe koʼalia kona-ba problema, terus no susar neʼebé ema hasoru ona tinan rihun ba rihun. Mai ita haree profesia balu neʼebé esplika kona-ba “loron ikus sira”.

2 Timóteo 3:1-5: “Iha loron ikus sira . . . , ema sei hadomi deʼit sira-nia an, hadomi osan, gaba an, loko an, koʼalia aat Maromak no ema, la halo tuir inan-aman, la hatene fó agradese, la hatudu laran-metin, la hadomi malu, la rona malu, koʼalia aat hodi hafoʼer ema seluk nia naran, la kontrola an, siʼak, la hadomi buat neʼebé diʼak, traidór, ulun-toos, foti an, hadomi deʼit ksolok duké hadomi Maromak, iha ema nia oin sira hatudu hahalok katak sira adora Maromak, maibé sira la moris tuir sira-nia adorasaun.”

Ita rasik haree ka lae katak ohin loron hahalok aat sira-neʼe aumenta ba daudaun? Ohin loron ema barak hadomi deʼit sira-nia an, hadomi osan no foti an ka lae? Ita haree ka lae katak ema barak ulun-toos no lalais atu diskute malu? Karik, Ita mós haree ema barak la hatudu respeitu ba sira-nia inan-aman no hadomi deʼit ksolok duké Maromak. Situasaun neʼe sai aat ba beibeik loron ba loron.

Mateus 24:6, 7: “Imi sei rona kona-ba funu iha fatin oioin . . . Nasaun ida sei kontra nasaun seluk no ukun ida sei kontra ukun seluk.”

Husi tinan 1914, ema barak maizumenus millaun 100 liu mak mate tanba funu, neʼe barak liu fali populasaun husi nasaun oioin. Hanoin toʼok ema nia terus, susar no matan-been tanba ema barak mate iha funu. Maibé nasaun sira aprende husi sira-nia sala no la halo tan funu ka lae?

Mateus 24:7: “Rai hamlaha.”

Programa Alimentar Mundiál (WFP) hatete: “Maski iha hahán natoon ba ema hotu iha mundu tomak, maibé ema millaun 815 mak toba ho hamlaha kalan-kalan. No ema barak liu kona malnutrisaun.” Tinan-tinan maizumenus labarik millaun tolu mak mate tanba hamlaha.

Lucas 21:11: “Sei mosu rai-nakdoko makaʼas.”

Tinan-tinan, maizumenus mosu rai-nakdoko dala 50.000 neʼebé ema bele sente. Tinan-tinan, maizumenus iha rai-nakdoko atus ida neʼebé harahun uma sira, no mós mosu rai-nakdoko ida neʼebé makaʼas tebetebes. Relatóriu ida hatete katak husi tinan 1975 toʼo 2000, rai-nakdoko halo ona ema naʼin-471.000 mate.

Mateus 24:14: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, depois neʼe, mundu nia rohan sei mai.”

Testemuña ba Jeová hamutuk millaun ualu liu haklaken liafuan diʼak kona-ba Maromak nia Ukun iha rai 240. Sira haklaken liafuan diʼak iha sidade boot, área neʼebé dook, ai-laran, no mós iha foho. Profesia ida-neʼe fó sai nanis katak bainhira serbisu neʼe kompletu tuir Maromak nia hakarak, “mundu nia rohan sei mai”. Neʼe katak sá? Neʼe katak ema nia ukun hotu sei lakon no Maromak nia Ukun mak sei troka. Saida mak Maromak nia Ukun sei halo? Atu hatene liután, lee informasaun tuirmai.