1. Jeová nia povu hasoru susar saida deʼit?

ITA hasoru daudaun susar ruma ka lae? Karik irmaun ka irmán ida hakanek Ita-nia laran. (Tgo 3:2) Ka karik Ita-nia kolega serbisu ka kolega eskola goza Ita tanba Ita serbí Jeová. (1 Ped 4:3, 4) Ka Ita-nia família koko hanetik Ita atu la tuir reuniaun ka bá haklaken. (Mt 10:35, 36) La fasil atu tahan susar sira-neʼe no karik Ita hanoin atu para deʼit serbí Jeová. Maibé Ita bele fiar metin katak Jeová sei fó Ita matenek no kbiit atu tahan susar oioin.

2. Tuir Roma 15:4, oinsá lee Bíblia bele ajuda ita?

² Iha Bíblia, Jeová fó sai kona-ba oinsá ema la perfeitu sira tahan susar. Tanbasá? Atu ita bele aprende husi sira. Jeová dirije apóstolu Paulo atu fó sai ida-neʼe iha Roma 15:4. (Lee.) Bainhira ita lee istória sira iha Bíblia, neʼe bele ajuda ita sente kmaan no iha esperansa. Maibé atu hetan benefísiu, la toʼo atu lee deʼit Bíblia. Ita presiza husik Eskritura sira atu book ita-nia hanoin no sentimentu. Bainhira ita hasoru susar, saida mak ita bele halo atu hetan matadalan? Ita bele halo tuir hakat haat tuirmai neʼe: (1) Halo orasaun, (2) Imajina, (3) Medita, no (4) Aplika. Mai ita koʼalia kona-ba oinsá ita bele halo tuir hakat sira-neʼe. * Tuirmai ita sei uza hakat sira-neʼe atu aprende kona-ba  akontesimentu sira iha Liurai David no apóstolu Paulo nia moris.

3. Antes lee Bíblia, Ita presiza halo saida no tanbasá?

³ (1) Halo orasaun. Antes lee Bíblia, husu Jeová atu ajuda Ita haree oinsá Ita bele hetan benefísiu husi buat neʼebé Ita lee. Porezemplu, se Ita buka matadalan kona-ba oinsá atu tahan hasoru problema ida, husu Jeová atu ajuda Ita hetan Bíblia nia prinsípiu neʼebé bele ajuda Ita atu halo desizaun.—Flp 4:6, 7; Tgo 1:5.

4. Oinsá Ita bele halo Bíblia nia istória sai moris?

⁴ (2) Imajina. Jeová fó ba ita kbiit atu imajina buat oioin. Atu bele halo Bíblia nia istória sai moris, koko imajina situasaun iha istória neʼe no imajina Ita mak ema neʼebé iha istória neʼe. Imajina buat neʼebé nia haree no mós sente.

5. Medita katak sá? Oinsá Ita bele medita?

⁵ (3) Medita. Medita signifika Ita hanoin didiʼak kona-ba buat neʼebé Ita lee no hanoin oinsá atu aplika informasaun neʼe. Bainhira Ita medita, neʼe ajuda Ita atu liga pontu sira no ajuda Ita komprende liután buat neʼebé Ita lee. Bainhira lee Bíblia no la medita, neʼe hanesan hateke ba bloku sira maibé la hada bloku sira-neʼe atu sai uma ida. Bainhira Ita medita, neʼe hanesan Ita hada bloku sira toʼo sai uma ida. Atu ajuda Ita medita, Ita bele buka resposta ba pergunta sira hanesan: ‘Ema iha istória neʼe halo saida atu rezolve ninia problema? Oinsá Jeová ajuda nia? Oinsá buat neʼebé haʼu aprende bele ajuda haʼu atu tahan susar?’

6. Tanbasá ita presiza aplika buat neʼebé ita aprende?

⁶ (4) Aplika. Jesus hatete katak se ita la aplika buat neʼebé ita aprende, ita mak hanesan ema ida neʼebé harii ninia uma iha rai-henek leten. Nia serbisu makaʼas, maibé saugati deʼit. Tanbasá? Tanba bainhira udan boot no bee saʼe ninia uma sei monu. (Mt 7:24-27) Nuneʼe mós, se ita halo orasaun, imajina no medita maibé la aplika buat neʼebé ita aprende, ita-nia hakaʼas an mak saugati deʼit. Ikusmai, ita-nia fiar sei ladún metin atu tahan bainhira ita hasoru susar no ema fó-terus ita. Maibé se ita estuda no aplika buat neʼebé ita aprende, neʼe sei ajuda ita atu halo desizaun diʼak, iha dame no mós iha fiar neʼebé metin. (Isa 48:17, 18) Agora mai ita uza hakat haat sira-neʼe atu aprende husi akontesimentu ida iha Liurai David nia moris.

7. Agora ita sei koʼalia kona-ba istória saida?

⁷ Ita-nia belun ka família ida hakanek Ita-nia laran ka lae? Se nuneʼe, Ita bele hetan ajuda hodi estuda kona-ba Liurai David nia oan-mane Absalão. Absalão la laran-metin ba ninia aman David no nia koko atu hadau ukun husi Liurai David.—2 Sam 15:5-14, 31; 18:6-14.

8. Ita bele halo saida atu Jeová ajuda Ita?

⁸ (1) Halo orasaun. Hanoin kona-ba istória neʼe, no fó sai ba Jeová kona-ba buat neʼebé Ita sente tanba ema trata aat Ita. (Sal 6:6-9) Fó sai ida-neʼe ho klaru. Tuirmai husu Jeová atu ajuda Ita hetan prinsípiu neʼebé bele ajuda Ita atu tahan susar neʼe.

9. Saida mak akontese entre David no Absalão?

⁹ (2) Imajina. Hanoin kona-ba akontesimentu sira iha istória neʼe no imajina oinsá neʼe afeta Liurai David. Absalão uza tinan barak atu book ema hadomi nia. (2 Sam 15:7) Iha tempu neʼebé loos tuir ninia hanoin, nia haruka espiaun sira ba rai-Izraél tomak atu book  povu hodi simu nia nuʼudar liurai. Nia mós book David nia belun diʼak ida no konsellu-naʼin naran Ahitofel atu apoia nia. Nia halo ninia an sai liurai no tuirmai nia koko atu kaer no oho David neʼebé karik moras todan iha tempu neʼebá. (Sal 41:1-9) David hatene kona-ba neʼe no halai sai husi Jeruzalein. Ikusmai, Absalão nia tropa funu hasoru David nia tropa. Absalão nia tropa lakon funu no Absalão mate.

10. Saida mak karik David bele halo?

¹⁰ Tuirmai, imajina David sente oinsá kona-ba buat hotu neʼebé akontese. Nia hadomi Absalão no tau fiar ba Ahitofel. Maibé sira naʼin-rua la laran-metin ba nia. Sira mós hakanek ninia laran no koko atu oho nia. Karik David mós bele hanoin katak ninia belun seluk apoia Absalão no nia la tau fiar tan ba sira. Karik nia bele hanoin an deʼit no hakarak halai sai mesak husi Jeruzalein. Ka nia bele sai laran-kraik tebes. Maibé nia la halo buat sira-neʼe. Nia tahan hasoru susar neʼe. Oinsá nia bele halo nuneʼe?

11. Saida mak David halo iha situasaun susar neʼe?

¹¹ (3) Medita. Saida mak Ita bele aprende husi istória neʼe? Hanoin kona-ba pergunta tuirmai: “Saida mak David halo atu rezolve ninia problema?” David la pániku no la halo desizaun ho ansi. Nia mós la sai taʼuk demais toʼo neʼe hanetik nia atu halo desizaun. Duké halo nuneʼe, nia halo orasaun atu husu ajuda husi Jeová. Nia mós husu ajuda husi ninia belun. Nia mós la demora atu kumpre ninia desizaun. No maski nia laran-kanek maibé nia nafatin tau fiar ba ema seluk no la rai odi. Nia kontinua tau fiar ba Jeová no ba ninia belun sira.

12. Oinsá Jeová ajuda David?

¹² Oinsá Jeová ajuda David? Bainhira Ita halo riset kona-ba istória neʼe, Ita sei aprende katak Jeová fó kbiit ba David atu bele tahan susar neʼe. (Sal 3:1-8; introdusaun) Jeová haraik bensaun ba David nia desizaun. Jeová mós apoia David nia belun sira bainhira sira halo funu atu proteje David.

13. Se ema ida hakanek Ita-nia laran, oinsá Ita bele banati-tuir David? (Mateus 18:15-17)

¹³ (4) Aplika. Husu ba Ita-nia an: ‘Oinsá haʼu bele banati-tuir David?’ Halo kedas buat ruma atu rezolve Ita-nia problema. Ita bele aplika hakat ida-idak husi Jesus nia konsellu iha Mateus kapítulu 18 ka halo tuir prinsípiu husi eskritura neʼe. (Lee Mateus 18:15-17.) Maibé keta halo desizaun ho ansi bainhira Ita sente hirus. Ita presiza halo orasaun ba Jeová atu ajuda Ita sente kalma no ajuda Ita hatene atu halo saida iha situasaun neʼe. Keta lakon fiar ba Ita-nia belun sira, maibé sai prontu atu simu ajuda husi sira. (Prov 17:17) No importante liu mak halo tuir Jeová nia matadalan iha Bíblia.—Prov 3:5, 6.

14. Iha situasaun saida mak 2 Timóteo 1:12-16; 4:6-11, 17-22 bele anima ita?

¹⁴ Ita-nia família kontra Ita tanba serbí Jeová ka lae? Ka Ita hela iha rai neʼebé governu bandu Testemuña nia atividade balu ka atividade hotu ka lae? Se nuneʼe, Ita bele hetan anima hodi lee 2 Timóteo 1:12-16 no 4:6-11, 17-22. * Paulo hakerek Eskritura sira-neʼe bainhira nia iha komarka.

15. Ita bele halo orasaun kona-ba saida?

 ¹⁵ (1) Halo orasaun. Antes Ita lee Eskritura sira-neʼe, fó sai Ita-nia problema ba Jeová no buat neʼebé Ita sente. Fó sai ida-neʼe ho klaru. Tuirmai husu Jeová atu ajuda Ita komprende didiʼak prinsípiu sira husi Paulo nia istória no oinsá neʼe bele ajuda Ita tahan hasoru susar.

16. Esplika toʼok Paulo nia situasaun.

¹⁶ (2) Imajina. Imajina katak Ita iha Paulo nia situasaun. Paulo iha komarka laran iha Roma no ema kesi nia ho korrente. Neʼe laʼós dala primeiru nia tama komarka, maibé agora nia hatene katak nia sei hetan kastigu-mate. Ninia maluk balu husik hela nia no nia mós sente kole.—2 Tim 1:15.

17. Saida mak karik Paulo bele halo?

¹⁷ Karik Paulo bele tau fokus ba ninia pasadu hodi hanoin katak se nia la sai ema Kristaun, nia sei la tama komarka. Karik nia bele sai hirus ba maluk Kristaun iha provínsia Ázia neʼebé husik hela nia. No karik nia mós bele lakon fiar ba ninia belun sira seluk. Maibé nia la halo buat sira-neʼe. Tanbasá nia bele fiar katak ninia belun sira sei laran-metin ba nia no Jeová sei fó kolen ba nia?

18. Saida mak Paulo halo iha situasaun susar neʼe?

¹⁸ (3) Medita. Hanoin kona-ba pergunta: “Oinsá Paulo rezolve ninia problema?” Maski lakleur tan Paulo sei hetan kastigu-mate, maibé nia la haluha buat neʼebé importante liu, neʼe mak fó glória ba Jeová. Nia mós kontinua hanoin kona-ba oinsá nia bele anima ema seluk. Nia mós sadere ba Jeová hodi halo orasaun beibeik. (2 Tim 1:3) Duké tau fokus ba ema sira neʼebé husik hela nia, nia hatudu agradese ba belun sira neʼebé ajuda nia ho laran-metin. Paulo mós kontinua estuda Maromak nia Liafuan. (2 Tim 3:16, 17; 4:13) Importante liu mak nia fiar metin katak Jeová no Jesus hadomi nia. Jeová no Jesus la husik hela nia no sira sei fó kolen ba nia.

19. Oinsá Jeová ajuda Paulo?

¹⁹ Jeová fó-hatene ba Paulo katak ema sei fó-terus ba Paulo tanba nia sai ema Kristaun. (Após 21:11-13) Oinsá Jeová ajuda Paulo? Jeová hatán Paulo nia orasaun no fó kbiit ba nia. (2 Tim 4:17) Jeová ajuda Paulo fiar katak nia sei simu kolen neʼebé nia hakaʼas an atu simu. Jeová mós uza Paulo nia belun sira atu ajuda nia.

20. Tuir Roma 8:38, 39, tanbasá Paulo bele tahan susar? Oinsá ita bele banati-tuir nia?

²⁰ (4) Aplika. Husu ba Ita-nia an: ‘Oinsá haʼu bele banati-tuir Paulo?’ Hanesan Paulo, ema mós sei fó-terus ba ita tanba serbí Jeová. (Mc 10:29, 30) Atu bele laran-metin nafatin kuandu hasoru susar, ita presiza sadere ba Jeová liuhusi orasaun no estuda beibeik Bíblia. No ita mós presiza kontinua hanoin-hetan katak buat neʼebé importante liu mak atu fó glória ba Jeová. Ita bele fiar metin katak Jeová sei nunka husik ita no la iha buat ida mak bele haketak ita husi ninia domin.—Lee Roma 8:38, 39; Ebr 13:5, 6.

21. Saida mak ajuda irmán Aya no irmaun Hector atu tahan hasoru susar sira?

²¹ Ezemplu sira husi Bíblia bele ajuda ita atu tahan hasoru situasaun susar naran deʼit. Porezemplu, irmán pioneiru ida iha rai-Japaun naran Aya esplika katak istória kona-ba Jonas ajuda  nia atu manán ninia taʼuk atu haklaken iha fatin públiku. Irmaun joven ida husi rai-Indonézia naran Hector neʼebé ninia inan-aman la serbí Jeová esplika katak Rute nia ezemplu book nia atu aprende kona-ba Jeová no serbí Jeová.

22. Oinsá Ita bele hetan benefísiu husi vídeo drama ka série “Banati-tuir sira-nia fiar”?

²² Iha neʼebé mak Ita bele hetan informasaun liután kona-ba fiar-naʼin sira husi Bíblia neʼebé bele hametin Ita? Ita bele haree vídeo sira, rona drama lee Bíblia nian no mós lee série “Banati-tuir sira-nia fiar” neʼebé bele halo Bíblia nia istória sira sai moris. * Antes Ita haree, rona no lee istória sira-neʼe, husu Jeová atu ajuda Ita hetan lisaun importante neʼebé Ita bele aplika. Imajina katak Ita mak ema neʼebé iha istória neʼe. Medita kona-ba buat neʼebé Jeová nia atan sira halo no oinsá Jeová ajuda sira atu tahan hasoru susar. Tuirmai, aplika buat neʼebé Ita aprende. Hatudu agradese ba Jeová tanba nia ajuda ona Ita. Ita bele halo nuneʼe liuhusi buka dalan atu ajuda no anima ema seluk.

23. Tuir Isaias 41:10, 13, Jeová promete atu halo saida?

²³ Iha mundu neʼebé Satanás mak kontrola, ita bele hasoru problema neʼebé susar atu tahan no dala ruma ita la hatene atu halo saida. (2 Tim 3:1) Maibé ita la presiza laran-taridu ka taʼuk. Jeová hatene susar neʼebé ita hasoru. Bainhira ita presiza ajuda, nia promete atu kaer metin ita-nia liman ho ninia liman-loos. (Lee Isaias 41:10, 13.) Ita bele fiar katak Jeová sei ajuda ita no Bíblia bele fó ita kbiit atu tahan susar naran deʼit.