Akontesimentu neʼe halo haʼu taʼuk tebes no troka haʼu-nia moris tanba neʼe book haʼu atu buka Maromak. Antes haʼu konta kona-ba buat neʼebé akontese tuirmai, haʼu sei konta uluk kona-ba haʼu-nia moris kuandu sei labarik no oinsá ida-neʼe afeta haʼu-nia hanoin no book haʼu atu buka Maromak.

Haʼu moris iha tinan 1937, iha sidade Guesnain iha rai-Fransa nia parte norte. Ema barak iha sidade neʼe halo serbisu atu keʼe anar-fatuk, inklui mós haʼu-nia apá. Apá hanorin haʼu tanbasá importante atu halo serbisu makaʼas. Nia mós hanorin haʼu atu odi hahalok neʼebé la justisa. Serbisu-naʼin barak serbisu iha kondisaun neʼebé ladún diʼak no neʼe book nia atu defende sira. Nia hakarak hadiʼa serbisu-naʼin nia situasaun. Tan neʼe, nia hola parte iha organizasaun neʼebé luta ba serbisu-naʼin nia direitu. Nia mós la kontente ho amlulik sira neʼebé laran-makerek. Amlulik barak moris diʼak, maski nuneʼe sira husu hahán no osan husi serbisu-naʼin sira neʼebé kiak. Apá odi tebes amlulik  sira-nia hahalok, tan neʼe nia la hanorin haʼu kona-ba relijiaun. Tuir loloos, ami nunka koʼalia kona-ba Maromak.

Nuʼudar haʼu sai boot, haʼu mós komesa odi hahalok neʼebé la justisa. Haʼu odi bainhira ema trata aat ema estranjeiru sira neʼebé hela iha rai-Fransa. Haʼu tebe-bola hamutuk ho ema estranjeiru sira-nia oan no haʼu kontente tebes atu halimar ho sira. No haʼu-nia amá mak ema Polaka, laʼós ema Franseza. Haʼu hakarak ema husi rasa oioin atu moris hamutuk ho dame no hatudu hahalok justisa.

Governu Fransa haruka haʼu atu tama militár iha tinan 1957. Tan neʼe mak haʼu iha rai-Arjélia hanesan buat neʼebé haʼu konta ohin. Depois haʼu dehan, “Maromak! Oh Maromak!”, haʼu haree kuda-burru fuik, laʼós soldadu inimigu. Haʼu sente kmaan tebes. Maski nuneʼe, akontesimentu neʼe no mós funu halo haʼu hanoin kona-ba tanbasá ita moris. Maromak hanoin ita ka lae? Ita bele moris ho dame ka lae?

Bainhira haʼu foti feriadu no vizita haʼu-nia inan-aman, haʼu hasoru Testemuña ida. Nia fó haʼu Bíblia Katólika (La Sainte Bible) iha lian Fransés no haʼu komesa lee bainhira haʼu filafali ba rai-Arjélia. Eskritura neʼebé book haʼu-nia laran mak Apokalipse 21:3, 4: “Maromak nia tenda hamutuk ho ema . . . Nia sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras.” * Neʼe halo haʼu hakfodak loos. No haʼu hanoin: ‘Neʼe bele akontese ka?’ Iha tempu neʼebá, haʼu la hatene buat ida kona-ba Maromak no mós Bíblia.

Depois haʼu remata serbisu militár iha tinan 1959, haʼu hasoru Testemuña ida naran François. Nia hanorin haʼu lia-loos barak husi Bíblia. Porezemplu, nia hatudu Maromak nia naran Jeová iha Bíblia laran. (Sal 83:18) Nia mós esplika katak Jeová sei halakon hahalok la justisa husi mundu, halo mundu sai paraízu no kumpre liafuan iha Apokalipse 21:3, 4.

Hanorin sira-neʼe mak lójiku no kona haʼu-nia laran. Haʼu sai hirus tebes ba amlulik sira no hakarak atu fó sai sira-nia hanorin neʼebé la mai husi Bíblia. Haʼu-nia hanoin nafatin hanesan apá nian no hakarak atu kontra hahalok neʼebé la justisa. Haʼu lakohi hein, haʼu hakarak hadiʼa kedas situasaun.

François no maluk Testemuña seluk ajuda haʼu atu kontrola haʼu-nia hirus. Sira esplika katak ema Kristaun nia knaar laʼós atu tesi-lia ba ema, maibé atu fó esperansa ba sira liuhusi liafuan diʼak kona-ba Maromak nia Ukun. Jesus rasik halo nuneʼe no nia mós haruka ninia dixípulu atu halo ida-neʼe. (Mt 24:14; Lc 4:43) Haʼu mós presiza aprende atu koʼalia ho laran-diʼak no hatudu respeitu ba ema, maski haʼu la konkorda ho sira-nia fiar. Bíblia hatete: “Naʼi nia atan la presiza istori malu, maibé presiza hatudu laran-diʼak ba ema hotu.”—2 Tim 2:24.

Haʼu halo mudansa no hetan batizmu nuʼudar Testemuña ba Jeová iha tinan 1959 iha reuniaun boot ba loron ida. Iha neʼebá,  haʼu hasoru irman Angèle no haʼu gosta nia. Haʼu komesa vizita ninia kongregasaun no ami kaben iha tinan 1960. Nia mak feto neʼebé laran-diʼak, feen neʼebé diʼak no prezente folin-boot husi Jeová.—Prov 19:14.

Durante tinan barak, haʼu aprende lisaun importante sira husi irmaun sira neʼebé matenek no iha esperiénsia. Porezemplu, haʼu aprende katak atu bele halaʼo knaar susar ho susesu, ita presiza haraik an no aplika matadalan husi Provérbios 15:22 neʼebé dehan: “Buat hotu sei laʼo ho diʼak kuandu ema barak fó konsellu.”

Iha tinan 1964, haʼu komesa haree katak liafuan sira-neʼe mak loos duni. Iha tinan neʼe, haʼu komesa serbí nuʼudar katuas área no vizita kongregasaun sira atu anima no hametin irmaun-irmán sira. Iha tempu neʼebá, haʼu tinan 27 no haʼu ladún iha esperiénsia. Tan neʼe, haʼu hakaʼas an atu kontinua aprende husi haʼu-nia sala sira. Haʼu aprende lisaun importante husi konsellu-naʼin sira neʼebé matenek no iha esperiénsia.

Haʼu hanoin-hetan ezemplu ida. Kuandu haʼu vizita tiha kongregasaun ida iha París, irmaun maduru ida husu atu koʼalia ho haʼu. No haʼu hatán: “Sin, bele.”

Nia husu: “Louis, doutór ajuda sé, ema neʼebé moras ka ema neʼebé saúde diʼak?”

Haʼu hatán: “Ema neʼebé moras.”

Nia hatete: “Loos duni. Maibé haʼu nota katak ó uza tempu barak atu ransu ho irmaun-irmán neʼebé maduru, hanesan katuas kongregasaun. Ami-nia kongregasaun iha irmaun-irmán barak neʼebé laran-kraik, foun iha lia-loos ka moedór. Sira sei hafolin tebes se ó gasta tempu ho sira. Karik ó mós bele han iha sira-nia uma.”

Irmaun neʼe nia konsellu mak diʼak tebes no haʼu hafolin ida-neʼe. Ninia domin ba Jeová nia bibi sira book duni haʼu-nia laran. Tan neʼe, maski la fasil atu simu konsellu neʼe, maibé haʼu komesa aplika kedas buat neʼebé nia koʼalia. Haʼu agradese tebes ba Jeová tanba fó irmaun sira hanesan neʼe.

Iha tinan 1969 no tinan 1973, haʼu hetan knaar atu tau matan ba Departamentu Hahán nian iha reuniaun boot internasionál rua  neʼebé halaʼo iha Colombes, París. Iha reuniaun boot iha tinan 1973, ami tenke prepara hahán ba loron lima ba ema naʼin-60.000. Haʼu la hatene oinsá ami bele halo ida-neʼe. No dala ida tan, buat neʼebé ajuda ami atu susesu mak halo tuir matadalan iha Provérbios 15:22 kona-ba husu konsellu ba ema neʼebé matenek. Tan neʼe, haʼu husu matadalan husi irmaun maduru neʼebé iha esperiénsia atu tau matan hahán. Sira balu mak faʼan naʼan, kuda modo, koziñeiru no negósiu-naʼin. Hodi serbisu hamutuk, ami bele kumpre knaar susar neʼe.

Iha tinan 1973, haʼu no Angèle simu konvite atu serbí iha Betel iha rai-Fransa. Haʼu-nia knaar primeiru iha Betel mak susar tebes. Haʼu presiza buka dalan atu haruka publikasaun ba irmaun-irmán sira iha rai-Kamaroins iha Áfrika. Husi tinan 1970 toʼo 1993 governu bandu ita-nia serbisu iha neʼebá. Neʼe halo haʼu hanoin barak. Karik irmaun neʼebé tau matan ba serbisu haklaken iha rai-Fransa nota ida-neʼe, nia anima haʼu hodi dehan: “Irmaun-irmán sira iha rai-Kamaroins presiza tebes ai-han espirituál. Mai ita fó han sira!” No ami halo nuneʼe duni.

Haʼu halo viajen ba rai oioin neʼebé viziñu ho rai-Kamaroins atu hasoru katuas kongregasaun husi rai-Kamaroins. Irmaun sira-neʼe aten-brani no matenek no sira ajuda haʼu halo arranju atu haruka ita-nia publikasaun ba rai-Kamaroins hodi nuneʼe irmaun-irmán sira bele simu ai-han espirituál beibeik. Jeová haraik bensaun ba ami-nia hakaʼas an. Durante tinan 20, irmaun-irmán sira iha rai-Kamaroins nunka falta Livru Haklaken ida no mós Ita-nia Serbisu Kristaun neʼebé fó sai fulan-fulan.

Husi tempu neʼebé ami namora, haʼu haree Angèle iha relasaun diʼak ho Jeová. No bainhira ami kaben, haʼu bele haree ida-neʼe liután.  Porezemplu, iha ami-nia loron kazamentu, iha kalan neʼe Angèle husu haʼu atu halo orasaun kona-ba ami-nia hakarak atu serbí Jeová liután nuʼudar feen-laʼen. Jeová hatán ami-nia orasaun.

Angèle mós ajuda haʼu atu tau fiar liután ba Jeová. Porezemplu, iha tinan 1973, ami simu konvite atu serbí iha Betel, no haʼu dada an atu simu knaar neʼe tanba haʼu gosta serbí nuʼudar katuas área. Maibé Angèle fó-hanoin katak ami dedika ona ami-nia moris ba Jeová. Tan neʼe, ami presiza halo tuir buat neʼebé organizasaun husu ami atu halo. (Ebr 13:17) Haʼu konkorda ho Angèle. Entaun ami bá Betel. Angèle mak feen neʼebé matenek, iha hanoin neʼebé loos no hadomi tebes Jeová. Hahalok diʼak sira-neʼe hametin duni ami-nia relasaun nuʼudar feen-laʼen no ajuda ami atu halo desizaun neʼebé diʼak.

Maski ami idade ona, maibé Angèle kontinua sai feen neʼebé diʼak no apoia haʼu. Porezemplu, atu bele tuir eskola teokrátiku neʼebé halaʼo iha lian Inglés, haʼu no Angèle hakaʼas an atu aprende liután lian Inglés. Tan neʼe, ami muda ba kongregasaun neʼebé koʼalia lian Inglés, maski iha tempu neʼebá ami tinan 70 liu. Haʼu serbí nuʼudar membru husi Komisaun ba Sukursál Fransa, tan neʼe susar ba haʼu atu buka tempu hodi aprende língua foun. Maibé ami naʼin-rua ajuda malu. Agora ami tinan 80 liu no ami kontinua prepara ba reuniaun iha lian Inglés no lian Fransés. Ami mós hakaʼas an atu hola parte iha reuniaun no mós serbisu haklaken iha ami-nia kongregasaun. Jeová haraik bensaun ba ami-nia hakaʼas an atu aprende lian Inglés.

Ami hetan bensaun ida iha tinan 2017. Ami hetan priviléjiu atu tuir Eskola ba Membru Komisaun Sukursál nian ho Sira-nia Feen neʼebé halaʼo iha Sentru Edukasaun husi Watchtower iha Patterson, Novaiorke.

Jeová mak Mestre Boot. (Isa 30:20) Tan neʼe, ita hotu maski idade ona ka joven hetan edukasaun diʼak. (Deut 4:5-8) Haʼu nota katak joven neʼebé rona ba Jeová no mós rona ba irmaun-irmán neʼebé iha esperiénsia, bele laʼo ba oin no laran-metin ba Jeová. Provérbios 9:9 hatete: “Fó matadalan ba ema matenek, no nia sei sai matenek liután. Hanorin ema neʼebé iha hahalok loos, no nia sei aumenta tan buat neʼebé nia aprende.”

Dala ruma, haʼu hanoin fali kona-ba buat neʼebé akontese tinan 60 liubá iha rai-Arjélia. Iha kalan neʼebá, haʼu nunka hanoin katak haʼu sei iha moris neʼebé kontente hanesan agora. Haʼu aprende buat barak husi ema seluk. Jeová fó moris kontente ba haʼu no mós Angèle. Tan neʼe, ami hakaʼas an atu kontinua aprende husi ami-nia Aman iha lalehan no mós husi irmaun-irmán neʼebé matenek, iha esperiénsia no hadomi Maromak.