1. Prezente saida deʼit mak ita simu husi Jesus?

 LA IHA ema ida mak laran-luak liu fali Jesus. Bainhira iha rai, Jesus uza ninia kbiit atu halo milagre oioin hodi ajuda ema. (Lc 9:​12-17) Nia fó ninia moris ba ita nuʼudar prezente. (João 15:13) Husi tempu neʼebé Jesus moris hiʼas, nia kontinua ajuda ita. Hanesan nia promete ona, nia husu Jeová atu haraik espíritu santu atu hanorin no fó kmaan mai ita. (João 14:​16, 17, nota; 16:13) No liuhusi reuniaun kongregasaun, Jesus kontinua treinu ita atu ajuda ema sai ninia dixípulu.—Mt 28:​18-20.

2. “Mane sira nuʼudar prezente” iha Éfeso 4:​7, 8 inklui sesé deʼit?

² Haree toʼok prezente seluk tan neʼebé Jesus fó. Apóstolu Paulo hakerek katak depois Jesus saʼe tiha ba lalehan, nia fó “mane sira nuʼudar prezente”. (Lee Éfeso 4:​7, 8.) Paulo esplika katak Jesus fó prezente neʼe atu apoia kongregasaun iha dalan oioin. (Éf 1:​22, 23; 4:​11-13) Ohin loron, ‘mane sira neʼebé nuʼudar prezente’ inklui atan ba kongregasaun, katuas kongregasaun, no katuas área. a Klaru katak sira hotu la perfeitu, tan neʼe sira mós halo sala. (Tgo 3:2) Maibé ita-nia Naʼi Jesus Kristu uza sira atu ajuda ita. Sira mak prezente mai ita.

3. Fó toʼok ezemplu oinsá ita hotu bele apoia irmaun sira neʼebé “nuʼudar prezente”.

³ Jesus fó knaar ba mane sira-neʼe atu hametin kongregasaun. (Éf 4:12) Maibé ita hotu bele apoia sira atu halaʼo responsabilidade importante neʼe. Karik ita bele kompara  neʼe hanesan harii Reuniaun-Fatin. Ema balu halo serbisu konstrusaun, no ema seluk apoia hodi prepara hahán, ajuda ho transporte, no serbisu seluk tan. Hanesan neʼe mós ita hotu bele apoia atan ba kongregasaun, katuas sira, no katuas área liuhusi liafuan no hahalok. Mai ita haree benefísiu saida mak ita hetan husi sira-nia serbisu badinas, no oinsá ita bele hatudu agradese ba sira no Jesus, ida neʼebé fó mane sira-neʼe “nuʼudar prezente”.

ATAN BA KONGREGASAUN “FÓ AJUDA”

4. Oinsá mak atan ba kongregasaun iha apóstolu sira-nia tempu “fó ajuda” ba kongregasaun?

⁴ Iha apóstolu sira-nia tempu, mane balu hetan knaar nuʼudar atan ba kongregasaun. (1 Tim 3:8) Karik sira mak ida neʼebé Paulo temi nuʼudar ema neʼebé “fó ajuda”. (1 Kor 12:28) Atan ba kongregasaun sira iha tempu neʼebá halaʼo knaar importante oioin, hodi nuneʼe katuas sira bele fokus atu hanorin no tau matan ba bibi sira. Porezemplu, karik sira ajuda atu halo kópia ba Eskritura sira ka karik sosa materiál neʼebé presiza atu halo kópia.

5. Ohin loron, saida deʼit mak atan ba kongregasaun halo atu ajuda kongregasaun?

⁵ Hanoin toʼok kona-ba serbisu balu neʼebé atan ba kongregasaun halo iha Ita-nia kongregasaun. (1 Ped 4:10) Karik sira hetan knaar atu tau matan kongregasaun nia osan ka área haklaken, hameno livru ba haklaken-naʼin sira, tau matan ba ekipamentu áudio no vídeo, serbí nuʼudar atendente, ka ajuda tau matan ba Reuniaun-Fatin. Knaar sira-neʼe mak importante atu kongregasaun bele laʼo ho didiʼak. (1 Kor 14:40) Atan kongregasaun balu dirije parte iha Reuniaun Moris Kristaun no Haklaken ka hatoʼo diskursu públiku. Sira mós hetan knaar atu tau matan ba grupu haklaken. Dala ruma katuas ida bele husu atan ba kongregasaun ida atu akompaña nia halaʼo vizita nuʼudar bibi-atan.

6. Fó toʼok razaun balu tanbasá ita agradese ba atan kongregasaun nia serbisu badinas.

⁶ Oinsá mak atan kongregasaun nia serbisu lori benefísiu? Irmán Beberly b iha Bolívia hatete: “Tanba sira-nia serbisu, haʼu bele hetan buat diʼak barak iha reuniaun sira. Haʼu bele kanta, fó komentáriu, rona diskursu, no aprende husi vídeo no dezeñu sira. Sira mós tau matan ba reuniaun atu seguru nafatin, no ajuda ema seluk atu tuir reuniaun liuhusi vídeo konferénsia. Depois reuniaun, sira hatudu ezemplu kona-ba hamoos, ajuda tau matan kongregasaun nia osan, no mós prepara livru sira. Haʼu agradese tebes ba sira!” Irmán Leslie iha Kolómbia neʼebé ninia laʼen katuas kongregasaun, hatete: “Haʼu-nia laʼen presiza tebes atan kongregasaun nia ajuda. Se sira la iha, nia sei okupadu tebes. Haʼu agradese ba sira-nia badinas no prontu atu fó ajuda.” Klaru katak ita hotu sente hanesan neʼe.—1 Tim 3:13.

7. Oinsá ita bele hatudu agradese ba atan kongregasaun sira? (Haree mós foto.)

⁷ Maski karik ita sente agradese ba atan kongregasaun sira, maibé Bíblia husu ita atu “hatudu agradese”. (Kol 3:15) Katuas kongregasaun ida iha Finlándia naran Cristovão halo nuneʼe. Nia dehan: “Haʼu haruka karta ka mensajen  neʼebé temi eskritura no pontu espesífiku ida neʼebé haʼu hafolin tebes husi atan kongregasaun neʼe.” Pascal no Jael neʼebé hela iha Novakaledónia halo orasaun espesífiku kona-ba atan kongregasaun sira. Pascal hatete: “Ami sempre halo orasaun kona-ba atan kongregasaun sira hodi hatoʼo agradese ba Jeová, no husu Jeová atu ajuda sira.” Jeová rona orasaun hanesan neʼe, no neʼe lori benefísiu ba kongregasaun.—2 Kor 1:11.

KATUAS KONGREGASAUN HALO “SERBISU MAKAʼAS”

8. Tanbasá Paulo hakerek katak katuas sira iha apóstolu sira-nia tempu “serbisu makaʼas”? (1 Tesalónika 5:​12, 13)

⁸ Katuas kongregasaun iha apóstolu sira-nia tempu serbisu makaʼas ba kongregasaun. (Lee 1 Tesalónika 5:​12, 13; 1 Tim 5:17) Sira “dirije” kongregasaun, reuniaun sira, no halo desizaun nuʼudar grupu katuas. Sira mós “fó konsellu” ho domin ba maluk Kristaun sira hodi bele proteje kongregasaun. (1 Tes 2:​11, 12; 2 Tim 4:2) Klaru katak sira mós serbisu makaʼas atu tau matan ba sira-nia família no sira rasik nia presiza espirituál.—1 Tim 3:​2, 4; Tito 1:​6-9.

9. Ohin loron, katuas kongregasaun sira iha responsabilidade saida?

⁹ Katuas sira ohin loron mós okupadu. Sira mak haklaken-naʼin. (2 Tim 4:5) Sira ho badinas dirije serbisu haklaken, organiza área haklaken, no treinu ita atu haklaken no hanorin iha dalan neʼebé diʼak. Sira mós nuʼudar juís neʼebé laran-diʼak no la todan ba sorin. Bainhira ema Kristaun ida halo sala neʼebé sériu, katuas sira hakaʼas an ajuda nia atu hadiʼa fali ninia relasaun ho Jeová. Iha tempu neʼebé hanesan, sira tau matan ba kongregasaun atu moos nafatin. (1 Kor 5:​12, 13; Gal 6:1) Katuas sira-nia knaar importante liu mak nuʼudar bibi-atan. (1 Ped 5:​1-3) Sira prepara didiʼak diskursu hodi uza Eskritura sira, hakaʼas an atu koñese ema hotu iha kongregasaun, no halo vizita nuʼudar bibi-atan. Katuas balu mós ajuda iha serbisu konstrusaun no tau matan ba Reuniaun-Fatin, organiza reuniaun boot, no serbí iha Komisaun neʼebé Komunika ho Ospitál no Grupu neʼebé Vizita Pasiente. Katuas sira serbisu makaʼas atu ajuda ita!

10. Fó toʼok razaun balu tanbasá ita agradese ba katuas sira-nia serbisu badinas.

¹⁰ Jeová fó-hatene nanis katak bibi-atan sira sei tau matan ita ho didiʼak, hodi nuneʼe ita sei “la taʼuk no mós la laran-taridu”. (Jer 23:4) Irmán Johanna iha Finlándia sente duni katak liafuan sira-neʼe mak loos kuandu ninia amá kona moras neʼebé sériu. Nia dehan: “Haʼu sente susar atu fó sai haʼu-nia sentimentu ba ema seluk, maibé iha katuas ida neʼebé haʼu ladún koñese, nia rona mai haʼu ho pasiénsia, halo orasaun ho haʼu, no halo haʼu fiar metin katak Jeová hadomi haʼu. Haʼu ladún hanoin-hetan saida mak nia hatete, maibé haʼu hanoin-hetan katak haʼu sente seguru. Haʼu fiar katak Jeová haruka nia atu ajuda haʼu iha tempu neʼebé loos.” Oinsá mak katuas sira iha Ita-nia kongregasaun ajuda Ita?

11. Oinsá mak ita bele hatudu agradese ba katuas sira? (Haree mós foto.)

¹¹ Jeová hakarak ita atu hatudu domin no agradese ba katuas sira “tanba sira-nia serbisu”. (1 Tes 5:​12, 13) Irmán Henrietta iha Finlándia dehan: “Katuas sira prontu atu ajuda ema, maibé neʼe la dehan  katak sira iha tempu no enerjia barak, ka sira rasik la hasoru susar. Dala ruma haʼu hatete ba sira: ‘Hakarak hatene? Ita mak katuas neʼebé diʼak tebes. Haʼu hakarak Ita hatene ida-neʼe.’” Irmán Sera iha Túrkia hatete: “Katuas sira presiza hetan anima atu bele kontinua halo sira-nia serbisu. Tan neʼe, ita bele hakerek karta ba sira, konvida sira han, ka haklaken ho sira.” Iha ka lae katuas ida neʼebé ajuda ona Ita, no Ita sente agradese tebes? Buka dalan atu hatudu sai ida-neʼe.—1 Kor 16:18.

KATUAS ÁREA HAMETIN KONGREGASAUN

12. Iha apóstolu sira-nia tempu, katuas sira halo arranju saida atu hametin kongregasaun? (1 Tesalónika 2:​7, 8)

¹² Jesus Kristu mós fó mane sira neʼebé serbí “nuʼudar prezente” iha dalan seluk tan. Jesus dirije katuas sira iha Jeruzalein atu haruka Paulo, Barnabé, no mane seluk tan atu bá vizita kongregasaun sira. (Após 11:22) Tanbasá? Objetivu mak atu hanesan ho atan no katuas kongregasaun sira, neʼe mak atu hametin kongregasaun. (Após 15:​40, 41) Mane sira-neʼe halo sakrifísiu oioin, no dala ruma tau sira-nia moris iha perigu laran atu hanorin no anima ema seluk.—Lee 1 Tesalónika 2:​7, 8.

13. Katuas área nia knaar balu mak saida?

¹³ Katuas área sira presiza halo viajen barak. Sira balu halo viajen kilómetru atus ba atus entre kongregasaun sira. Semana-semana katuas área hatoʼo diskursu, halo vizita nuʼudar bibi-atan, dirije enkontru katuas, pioneiru, no grupu haklaken. Katuas área mós prepara diskursu no organiza asembleia  no reuniaun boot sira. Sira hanorin iha eskola pioneiru, halo arranju ba reuniaun espesiál ho pioneiru sira, no halaʼo knaar urjente ruma neʼebé sira simu husi sukursál.

14. Fó toʼok razaun balu tanbasá ita agradese ba katuas área nia serbisu badinas?

¹⁴ Katuas área lori benefísiu saida deʼit ba kongregasaun? Irmaun ida iha Turkia fó komentáriu kona-ba katuas área nia vizita. Nia hatete: “Bainhira sira vizita, neʼe sempre motiva haʼu atu uza haʼu-nia tempu hodi ajuda irmaun-irmán sira. Haʼu hasoru ona katuas área barak, no la iha ida mak halo haʼu sente katak sira okupadu demais ka lakohi atu dada lia.” Irmán Johanna neʼebé temi ona haklaken hamutuk ho katuas área, dehan: “Maski ami la hasoru ema ida iha haklaken, maibé haʼu sempre hanoin-hetan kona-ba loron neʼe. Haʼu-nia alin-feto naʼin-rua muda ona, no haʼu saudades tebes sira. Katuas área ho laran-diʼak anima no ajuda haʼu haree katak iha Jeová nia serbisu, distánsia mak temporáriu deʼit, maibé iha mundu foun ita sei iha oportunidade barak atu hamutuk.” Irmaun-irmán barak iha memória diʼak bainhira hamutuk ho katuas área.—Após 20:37–21:1.

15. (a) Tuir 3 João 5-8, oinsá ita bele hatudu agradese ba katuas área? (Haree mós foto.) (b) Tanbasá ita presiza hatudu agradese ba irmán neʼebé ninia laʼen iha knaar, no oinsá atu halo nuneʼe? (Haree kaixa “ Hanoin-hetan sira-nia feen”.)

¹⁵ Apóstolu João anima Gaio atu hatudu laran-diʼak ba maluk sira neʼebé visita nia no “ajuda sira iha dalan neʼebé halo Maromak kontente”. (Lee 3 João 5-8.) Ita mós bele halo nuneʼe hodi konvida  katuas área han hamutuk no apoia arranju atu haklaken durante vizita. Irmán Leslie neʼebé temi ona ohin hatudu agradese iha dalan seluk tan. Nia hatete: “Haʼu halo orasaun atu Jeová tau matan ba sira. Haʼu no haʼu-nia laʼen hakerek karta ba sira hodi fó-hatene sira oinsá sira-nia vizita ajuda ami.” Hanoin-hetan, katuas área mós hasoru susar oioin no sente kole hanesan ho ita. Dala ruma, sira sai moras, laran-taridu, no mós laran-kraik. Karik Ita-nia liafuan neʼebé fó kmaan ka prezente kiʼik ruma mak sai resposta ba sira-nia orasaun!—Prov 12:25.

ITA PRESIZA “MANE SIRA NUʼUDAR PREZENTE”

16. Tuir Provérbios 3:​27, pergunta saida deʼit mak irmaun sira bele husu ba sira-nia an?

¹⁶ Kongregasaun hotu iha mundu tomak presiza irmaun barak liután atu serbí “nuʼudar prezente”. Se Ita mak irmaun neʼebé batizmu ona, Ita “iha kbiit atu ajuda” ka lae? (Lee Provérbios 3:27.) Ita bele hakaʼas an atu kumpre kritéria atu serbí nuʼudar atan ba kongregasaun ka lae? Se Ita mak atan kongregasaun, Ita hakaʼas an atu sai katuas kongregasaun ka lae? c Ita bele ka lae halo mudansa iha Ita-nia moris hodi bele tuir Eskola ba Haklaken-Naʼin Tempu-Tomak? Eskola neʼe sei treinu ita atu bele halaʼo liután serbisu neʼebé Jesus fó mai ita. Se Ita sente katak Ita seidauk kumpre kritéria, husu Jeová nia espíritu santu atu ajuda Ita kumpre knaar naran deʼit neʼebé Ita iha.—Lc 11:13; Após 20:28.

17. Irmaun sira neʼebé “nuʼudar prezente” fó prova saida kona-ba ita-nia Liurai Kristu Jesus?

¹⁷ Irmaun sira neʼebé Jesus hili “nuʼudar prezente” fó prova duni katak Jesus dirije daudaun ita iha loron ikus sira. (Mt 28:20) Ita agradese tebes tanba iha Liurai ida neʼebé domin, laran-diʼak, hatene ita-nia situasaun, no fó irmaun sira neʼebé kumpre kritéria atu tau matan ita. Tan neʼe, buka oportunidade atu hatudu agradese ba irmaun sira-neʼe nia serbisu badinas. No keta haluha atu fó agradese ba Jeová, tanba nia mak Hun ba “prezente diʼak ida-idak no prezente hotu neʼebé perfeitu”.—Tgo 1:17.