1. Maromak nia Liafuan hanorin saida mai ita?

ITA bele hetan solusaun ba problema hotu tanba Jeová mak ita-nia Mestre Boot. (Isa 30:20, 21) Ninia Liafuan hanorin ita atu “iha kbiit, no sai prontu hodi halo serbisu diʼak hotu”. (2 Tim 3:17) Kuandu ita moris tuir Bíblia nia hanorin, ita bele sai matenek liu fali ema neʼebé dehan katak diʼak atu moris tuir “matenek mundu neʼe nian”.—1 Kor 3:19; Sal 119:97-100.

2. Ita sei aprende saida iha lisaun neʼe?

² Baibain mundu nia matenek bele book ita atu halo tuir hakarak isin nian. Karik ita sente susar atu kontrola ita-nia hanoin no hahalok atu la hanesan ho ema iha mundu neʼe. Tan neʼe, Bíblia esplika: “Kuidadu bá atu ema ida la kaer imi hanesan dadur liuhusi filozofia no hanorin bosok neʼebé la iha folin, neʼebé tuir deʼit ema nia lisan.” (Kol 2:8) Iha lisaun neʼe, ita sei aprende oinsá ema komesa tau fiar ba lia-bosok rua neʼebé Satanás hanorin. Iha situasaun ida-idak, ita sei haree tanbasá mundu nia matenek mak buat beik no oinsá mak Maromak nia Liafuan mak diʼak liu fali buat hotu neʼebé mundu neʼe oferese.

3-4. Oinsá mak ema nia hanoin kona-ba morál troka iha Estadus Unidus maizumenus tinan 100 liubá?

³ Iha Estadus Unidus, maizumenus tinan 100 liubá, iha mudansa boot ho ema nia hanoin kona-ba hahalok seksuál. Antes neʼe, ema barak fiar katak só ema neʼebé kaben ona mak bele halo relasaun seksuál no ema la koʼalia kona-ba relasaun seksuál iha ema seluk nia oin. Maibé ema nia hanoin kona-ba morál troka no ema komesa simu deʼit hahalok oioin.

 ⁴ Entre tinan 1920 no 1929, ema nia hahalok no hanoin kona-ba relasaun seksuál troka. Peskizadór ida hatete: “Filme, teatru, múzika, livru no iklan sira komesa fó sai buat seksuál nian.” Durante tempu neʼe, dalan neʼebé ema balu dansa mós book ema seluk atu hanoin kona-ba buat seksuál no mós ema komesa uza roupa neʼebé la hatudu respeitu. Bíblia hatete nanis ona katak iha loron ikus sira, ema sei “hadomi deʼit ksolok”.—2 Tim 3:4.

5. Husi tinan 1960, saida mak akontese ho ema nia hanoin kona-ba morál?

⁵ Husi tinan 1960, hahalok omoseksuál, soe-malu, no mós ema neʼebé hela hamutuk maski la kaben aumenta ba beibeik. Liután neʼe televizaun, múzika no média fó sai momoos kona-ba hahalok seksuál. Rezultadu mak saida? Matenek-naʼin ida hakerek katak se ema la iha tan morál neʼebé diʼak, neʼe sei lori rezultadu aat barak. Porezemplu, família barak naksobu, inan ka aman husik hela família, ema hetan moras depresaun ka ema sai toman atu haree pornografia. Liután neʼe, hahalok seksuál neʼebé livre hamosu moras oioin, hanesan AIDS. Neʼe mak evidénsia neʼebé hatudu katak mundu nia matenek mak buat neʼebé beik.—2 Ped 2:19.

6. Tanbasá mak hanoin neʼebé sala kona-ba buat seksuál tuir duni Satanás nia hakarak?

⁶ Satanás hakarak ema atu iha hanoin neʼebé sala kona-ba buat seksuál. Ita bele fiar katak nia sente kontente kuandu ema halo sala seksuál no la hatudu respeitu ba Maromak nia arranju kaben nian. (Éf 2:2) Se ema ida halo sala seksuál, nia la hafolin prezente neʼebé Maromak fó ba ema atu bele iha oan. Karik nia mós sei la simu moris rohan-laek.—1 Kor 6:9, 10.

7-8. Tanbasá Bíblia nia morál kona-ba hahalok seksuál mak diʼak liu fali mundu nia hanoin?

⁷ Ema neʼebé moris tuir mundu nia matenek la hafolin Bíblia nia matadalan kona-ba morál, no hatete katak Bíblia la lójiku. Ema sira-neʼe karik husu: ‘Se Maromak mak kria ita ho hakarak seksuál nian, tanbasá nia haruka ita atu kontrola ida-neʼe?’ Sira hanoin sala katak ema tenke halo tuir deʼit sira-nia hakarak. Maibé Bíblia nia hanorin kona-ba morál halo ema iha dignidade tanba hanorin ema atu luta hasoru hakarak neʼebé sala.  (Kol 3:5) Liután neʼe, Jeová mós halo arranju kaben nian atu ema bele kumpre hakarak seksuál nian iha dalan neʼebé loos. (1 Kor 7:8, 9) Liuhusi arranju neʼe, feen no laʼen bele halo relasaun seksuál ho ksolok no la presiza hanoin barak katak sira halo hahalok la morál.

⁸ La hanesan ho mundu nia matenek, Bíblia hanorin ita atu iha hanoin neʼebé loos kona-ba relasaun seksuál. Bíblia hatete katak relasaun seksuál bele lori ksolok. (Prov 5:18, 19) Maibé, Bíblia mós hatete: “Imi ida-idak tenke hatene oinsá atu kontrola imi-nia isin rasik hodi bele santu nafatin no iha dignidade, atu la kaan hahalok seksuál neʼebé labele kontrola hanesan ema husi nasaun sira neʼebé la hatene Maromak.”—1 Tes 4:4, 5.

9. (a) Maizumenus tinan 100 liubá, Jeová nia povu hetan matadalan saida atu ajuda sira moris tuir matenek husi Maromak nia Liafuan? (b) Eskritura 1 João 2:15, 16 fó konsellu matenek saida? (c) Tuir lista iha Roma 1:24-27, hahalok la morál saida deʼit mak ita labele simu?

⁹ Maizumenus tinan 100 liubá, Jeová nia povu la husik deʼit lia-bosok husi ema sira neʼebé “la hatene morál neʼebé loos” atu afeta sira-nia hanoin no hahalok. (Éf 4:19) Jeová nia povu hakaʼas an atu kaer metin ba Jeová nia morál. Revista Watch Tower 15 Maiu 1926 hatete katak “mane no feto presiza hatudu hahalok moos no iha hanoin neʼebé moos, liuliu kona-ba ema neʼebé seksu la hanesan”. Maski mundu nia morál troka beibeik maibé Jeová nia povu kontinua moris tuir matenek husi Maromak nia Liafuan. (Lee 1 João 2:15, 16.) Ita agradese tebes tanba Maromak fó ninia Liafuan ba ita. Ita mós agradese tebes ba Jeová tanba nia prepara ai-han espirituál iha tempu neʼebé loos atu ajuda ita la simu mundu nia matenek kona-ba morál. *—Lee Roma 1:24-27.

10-11. Bíblia fó-hanoin saida mai ita kona-ba loron ikus?

¹⁰ Bíblia fó-hanoin ita katak durante loron ikus, ema sei “hadomi deʼit sira-nia an”. (2 Tim 3:1, 2) Tan neʼe, ita la hakfodak kuandu haree ema iha mundu hatudu hahalok hanesan neʼe. Ensiklopédia ida hatete katak husi tinan 1970, ema hakerek livru barak neʼebé fó konsellu kona-ba oinsá atu hetan moris susesu. Livru balu hatete katak ema presiza kontente ho sira-nia an no la presiza troka sira-nia hahalok. Hanoin toʼok ezemplu ida, livru ida anima ema atu hadomi sira-nia an rasik tanba sira mak bonita liu, no diʼak liu hotu. Livru neʼe mós hatete katak ema bele deside rasik sira-nia hahalok no halo tuir deʼit sira-nia hakarak.

¹¹ Hanoin hanesan neʼe laʼós buat neʼebé foun loos ka lae? Satanás anima Eva atu halo buat neʼebé hanesan. Satanás hatete ba Eva katak nia bele “sai hanesan Maromak hodi hatene buat diʼak no aat”. (Gén 3:5) Ohin loron, ema barak hanoin katak sira mak diʼak liu no ema seluk la presiza hatete ba sira buat neʼebé loos no sala, inklui mós Maromak. Ita bele haree ida-neʼe liuhusi ema nia hanoin kona-ba moris kaben nian.

12. Mundu habelar hanoin saida kona-ba moris kaben nian?

¹² Bíblia haruka laʼen no feen atu hatudu respeitu ba malu no ba sira-nia juramentu  kaben nian. Bíblia anima kaben-naʼin sira atu hakaʼas an hatudu laran-metin ba malu, hodi dehan: “Mane ida sei husik ninia inan-aman no nia sei hela hamutuk ho ninia feen, no sira sei sai isin ida deʼit.” (Gén 2:24) Maibé mundu neʼe habelar hanoin neʼebé la hanesan, hodi hatete katak feen ka laʼen presiza tau fokus ba sira-nia hakarak rasik. Livru ida kona-ba soe-malu hatete katak iha rai balu, ema troka liafuan ba juramentu. Duké promete katak sira sei moris hamutuk toʼo mate, sira promete atu moris hamutuk durante tempu neʼebé sira sei hadomi malu. Hanoin sala hanesan neʼe sobu família barak no hakanek ema nia laran. Klaru katak mundu nia hanoin kona-ba moris kaben nian mak beik duni.

13. Tanbasá mak Jeová hakribi ema neʼebé foti an?

¹³ Bíblia hatete: “Jeová hakribi ema hotu neʼebé foti an iha laran.” (Prov 16:5) Tanbasá Jeová hakribi ema neʼebé foti an? Razaun ida mak tanba ema sira neʼebé foti an hadomi deʼit sira-nia an hanesan Satanás. Porezemplu, Maromak uza Jesus atu kria buat hotu. Maibé ho foti an, Satanás fiar katak Jesus tenke hakneʼak hodi adora nia. (Mt 4:8, 9; Kol 1:15, 16) Maski ema neʼebé foti an sente katak sira matenek, maibé Maromak haree sira nuʼudar ema beik.

14. Oinsá mak Roma 12:3 ajuda ita atu iha hanoin neʼebé loos kona-ba ita-nia an?

¹⁴ Bíblia ajuda ita atu iha hanoin neʼebé loos kona-ba ita-nia an rasik. Bíblia hatete katak la sala atu hadomi ita-nia an iha dalan neʼebé loos. Jesus hatete katak “hadomi imi-nia maluk hanesan imi-nia an rasik”, neʼe katak ita mós presiza fó atensaun ba ita-nia an rasik. (Mt 19:19) Maski nuneʼe, Bíblia la hanorin ita atu haree ita-nia an boot liu fali ema seluk. Bíblia hatete: “Keta halo buat ida hodi buka atu manán deʼit ka foti an, maibé ho  haraik an hodi haree ema seluk boot liu fali imi.”—Flp 2:3; lee Roma 12:3.

15. Saida mak halo Ita fiar katak Bíblia nia konsellu atu iha hanoin neʼebé loos kona-ba ita-nia an mak diʼak?

¹⁵ Ohin loron, ema barak neʼebé matenek hatete katak Bíblia nia konsellu atu iha hanoin neʼebé loos kona-ba ita-nia an mak beik. Sira hatete katak se Ita hanoin katak ema seluk mak boot liu fali Ita, sira sei aproveita Ita. Maibé tuir loloos, saida mak rezultadu husi hahalok hanoin an deʼit neʼebé Satanás nia mundu hatudu? Ita rasik hanoin oinsá? Ema neʼebé hanoin an deʼit sente kontente ka lae? Sira-nia família moris kontente ka lae? Sira iha belun neʼebé loos ka lae? Sira iha relasaun neʼebé besik ho Maromak ka lae? Husi buat neʼebé Ita haree, ida-neʼebé mak lori rezultadu diʼak liu, halo tuir mundu nia matenek ka halo tuir matenek husi Maromak nia Liafuan?

16-17. Ita agradese kona-ba saida no tanbasá?

¹⁶ Ita bele kompara ema neʼebé halo tuir konsellu husi ema neʼebé matenek tuir mundu neʼe ho ema oin-foun ida neʼebé husu diresaun ba ema oin-foun seluk neʼebé laʼo lakon dalan. Jesus koʼalia kona-ba ema neʼebé matenek tuir ema seluk nia haree, no dehan: “Sira hanesan ema matan-delek neʼebé hatudu dalan ba matan-delek seluk. Entaun, se matan-delek ida lori matan-delek seluk, sira naʼin-rua sei monu ba rai-kuak.” (Mt 15:14) Loos duni, mundu nia matenek mak buat beik ba Maromak.

¹⁷ Bíblia nia konsellu neʼebé matenek sempre “diʼak atu hanorin, atu fó konsellu, atu korrije, no atu fó dixiplina tuir hahalok loos”. (2 Tim 3:16, nota) Ita agradese tebes ba Jeová tanba liuhusi ninia organizasaun, nia proteje ita husi mundu nia matenek. (Éf 4:14) Ai-han espirituál neʼebé nia prepara fó kbiit mai ita atu kaer metin ba matadalan husi ninia Liafuan. Ita kontente tebes tanba Jeová fó mai ita matenek no matadalan husi Bíblia.