1. Tanbasá mak ema balu la estuda mesak?

OHIN LORON, ema barak serbisu makaʼas atu hetan sira-nia presiza. Ita-nia irmaun-irmán barak mós presiza serbisu makaʼas atu bele sustenta sira-nia família. Irmaun-irmán balu presiza uza oras barak atu bá-mai serbisu-fatin. Irmaun-irmán seluk halo serbisu todan atu bele sustenta sira-nia família. Kuandu serbisu remata, sira sente kole tebetebes. Tanba kole demais sira la iha tan forsa atu estuda mesak.

2. Tempu saida mak diʼak ba Ita atu estuda?

² Tuir loloos, ita tenke buka tempu atu bele estuda didiʼak Maromak nia Liafuan no mós ita-nia publikasaun sira. Neʼe importante tebes se ita hakarak atu iha relasaun diʼak ho Maromak no moris ba nafatin. (1 Tim 4:15) Ema balu hadeer sedu no estuda bainhira tempu hakmatek no sira-nia neon sei fresku hela. Ema seluk uza minutu balu iha kalan atu estuda no medita bainhira la iha buat seluk dada sira-nia atensaun.

3-4. Grupu Administradór halo mudansa saida no tanbasá?

³ Karik Ita mós konkorda katak buka tempu atu estuda mak importante duni. Maibé, ita presiza estuda kona-ba saida? Karik Ita hanoin: ‘Iha publikasaun barak tebes, susar atu lee hotu buat sira-neʼe.’ Ema balu konsege lee publikasaun no haree vídeo sira hotu, maibé susar ba irmaun-irmán barak atu buka tempu. Grupu Administradór komprende ho situasaun neʼe, tan neʼe foin daudauk sira deside atu hamenus informasaun neʼebé ita simu iha livru sira no iha sítiu.

 ⁴ Porezemplu, Buku Tahunan Saksi-Saksi Yehuwa la iha tan, tanba ita bele hetan esperiénsia sira iha sítiu jw.org^® no mós iha programa JW Broadcasting^®. Agora revista Matan-moris bá! no Livru Haklaken públiku fó sai dala tolu deʼit tinan ida. Mudansa neʼe laʼós atu fó tempu barak liután mai ita atu halo atividade sira neʼebé la liga ho ita-nia adorasaun ba Jeová. Maibé mudansa neʼe nia objetivu mak atu fó tempu ba ita atu tau fokus ba “buat sira neʼebé importante liu”. (Flp 1:10) Mai ita koʼalia hamutuk kona-ba oinsá mak Ita bele tau uluk buat neʼebé importante no oinsá mak Ita bele hetan benefísiu husi Ita-nia estuda mesak.

5-6. Ita presiza estuda didiʼak publikasaun saida deʼit?

⁵ Ita presiza estuda uluk kona-ba saida? Ita tenke uza tempu atu estuda Maromak nia Liafuan loroloron. Agora, versíkulu sira ba programa atu lee Bíblia iha Reuniaun ba Moris Kristaun no Haklaken mós hamenus ona, atu nuneʼe ita bele iha tempu atu medita no halo riset kona-ba neʼe. Diʼak atu la lee liu deʼit versíkulu sira, maibé ita presiza husik Bíblia nia mensajen book ita-nia laran hodi hakbesik liután ba Jeová.—Sal 19:14.

⁶ Ita bele estuda didiʼak kona-ba saida tan? Ita mós presiza prepara Livru Haklaken estudu nian, livru ba Estudu Bíblia iha Kongregasaun no mós informasaun seluk ba reuniaun loron baileet. Ita mós presiza lee edisaun ida-idak husi revista Matan-moris bá! no Livru Haklaken.

7. Ita presiza sai laran-kraik ka lae se ita labele lee no haree informasaun hotu iha ita-nia sítiu no JW Broadcasting? Esplika toʼok.

⁷ Karik Ita hanoin: ‘Haʼu bele halo nuneʼe, maibé oinsá ho informasaun sira neʼebé mosu iha sítiu jw.org no mós iha JW Broadcasting? Neʼe barak demais.’ Hanoin toʼok ai-knanoik neʼe: Iha merkadu iha modo oioin, maski nuneʼe ema neʼebé bá kompras sei la sosa modo hotu, loos ka lae? Sira sei sosa deʼit modo balu. Nuneʼe mós Ita lalika sai laran-kraik se Ita labele lee no haree informasaun hotu iha ita-nia sítiu sira. Lee ka haree buat neʼebé Ita bele. Agora mai ita koʼalia kona-ba estuda katak sá no oinsá mak ita bele hetan benefísiu husi ita-nia estuda.

8. Hakat saida deʼit mak ita bele halo bainhira estuda Livru Haklaken? Oinsá ida-neʼe lori benefísiu mai Ita?

⁸ Bainhira ita estuda, ita laʼós lee lalais no riska deʼit resposta sira, maibé ita tau fokus ba buat neʼebé ita lee atu nuneʼe ita bele aprende buat neʼebé importante. Bainhira prepara Livru Haklaken estudu nian, ita bele lee uluk informasaun badak kona-ba lisaun neʼe. Tuirmai, lee no hanoin kona-ba títulu, subtítulu sira no pergunta atu halo rezumu. Tuirmai lee didiʼak lisaun tomak. Tau atensaun ba fraze primeiru husi parágrafu ida-idak. Ida-neʼe sei ajuda Ita komprende parágrafu ida nia objetivu. Bainhira Ita lee lisaun ida, hanoin kona-ba oinsá informasaun iha parágrafu ida-idak liga ho subtítulu no lisaun nia tema. Ita mós bele hakerek liafuan sira no informasaun foun neʼebé Ita hakarak buka-hatene liután.

9. (a) Tanbasá no oinsá mak ita presiza tau atensaun ba eskritura sira bainhira estuda Livru Haklaken? (b) Tuir Josué 1:8, saida mak ita presiza halo kuandu ita lee eskritura sira?

 ⁹ Estuda Livru Haklaken ajuda ita atu komprende Bíblia. Tan neʼe, tau atensaun ba eskritura ida-idak, liuliu eskritura sira neʼebé sei lee kuandu estuda iha kongregasaun. Haree didiʼak oinsá liafuan ka fraze sira iha eskritura apoia pontu importante iha parágrafu. Liután neʼe, Ita mós presiza medita kona-ba eskritura neʼebé Ita lee no oinsá Ita bele aplika ida-neʼe iha Ita-nia moris rasik.—Lee Josué 1:8.

10. Tuir Ebreu 5:14, tanbasá inan-aman presiza uza tempu atu hanorin oan sira oinsá atu estuda no halo riset?

¹⁰ Inan-aman sira hakarak sira-nia oan sente kontente bainhira halaʼo Adorasaun Família nian. Inan-aman presiza halo planu didiʼak kona-ba informasaun neʼebé sira hakarak atu fahe durante tempu Adorasaun Família nian, maski nuneʼe sira la presiza halo arranju atu halo atividade espesiál kada semana. Inan-aman bele haree programa fulan-fulan nian iha JW Broadcasting hamutuk ho sira-nia oan ka dala ruma halo projetu espesiál hamutuk, hanesan halo Noé nia ró, maibé inan-aman mós presiza hanorin oan sira oinsá atu estuda. Oan sira presiza aprende oinsá atu prepara ba reuniaun ka oinsá atu halo riset kona-ba problema neʼebé mosu iha eskola. (Lee Ebreu 5:14.) Se oan sira uza tempu balu iha uma atu estuda tópiku balu husi Bíblia, fasil liu ba sira atu komprende informasaun neʼebé hatoʼo iha reuniaun sira, no reuniaun boot sira, maski vídeo sira la iha. Maibé, tempu neʼebé inan-aman uza atu estuda hamutuk oan sira depende ba oan sira-nia tinan no kbiit atu komprende.

11. Tanbasá mak importante atu hanorin ita-nia estudante Bíblia sira kona-ba oinsá atu estuda mesak?

¹¹ Ita-nia estudante Bíblia mós presiza aprende oinsá atu estuda. Bainhira sira foin aprende Bíblia, ita sente kontente se sira prepara ba sira-nia estuda ka reuniaun sira hodi riska sira-nia livru. Maibé ita mós presiza hanorin sira oinsá atu halo riset no oinsá sira bele estuda mesak. Atu nuneʼe, bainhira problema mosu, sira sei la husu deʼit ba maluk iha kongregasaun kona-ba saida mak sira tenke halo, tanba sira hatene ona oinsá atu hetan informasaun husi ita-nia publikasaun sira neʼebé bele ajuda sira.

12. Tanbasá mak ita estuda?

¹² Se Ita mak ema neʼebé la gosta estuda, karik Ita hanoin katak Ita sei nunka gosta atu estuda. Saida mak bele ajuda Ita? Ita bele hahú hodi estuda ba tempu badak no tuirmai bele aumenta Ita-nia tempu atu estuda. Hanoin kona-ba tanbasá mak Ita estuda. Razaun importante mak tanba ita hakarak atu hakbesik liután ba Jeová. Karik razaun seluk tan mak atu hatán ba pergunta neʼebé ema husu ka halo riset kona-ba problema neʼebé ita hasoru daudaun.

13. (a) Esplika hakat saida deʼit mak joven ida presiza halo atu defende ninia fiar iha eskola. (b) Oinsá mak Ita bele aplika konsellu husi Koloso 4:6?

¹³ Porezemplu, se Ita mak eskola oan, karik Ita-nia kolega eskola goza ita tanba la kanta inu nasionál. Ita hakarak esplika Bíblia nia hanorin ba sira. Maibé karik Ita sente la iha matenek atu halo nuneʼe. Entaun Ita presiza halo estuda mesak. Ita iha razaun rua atu halo nuneʼe: (1) atu hametin Ita-nia fiar katak Ita tenke ketak nafatin husi mundu neʼe no (2) atu aumenta Ita-nia matenek atu esplika Ita-nia fiar. (João 17:16; 1 Ped 3:15) Husu ba Ita-nia an: ‘Tanbasá mak haʼu-nia kolega sira dehan katak sira tenke kanta inu nasionál?’ Tuirmai halo riset kona-ba neʼe hodi uza ita-nia publikasaun sira. Karik Ita sei hakfodak tanba fasil deʼit atu esplika kona-ba Ita-nia fiar. Ema barak fiar katak sira tenke kanta inu nasionál tanba ema seluk haruka sira atu halo nuneʼe. Se Ita buka-hetan faktu ida ka rua no esplika neʼe ba ema seluk, karik Ita bele ajuda ema neʼebé hakarak atu aprende lia-loos.—Lee Koloso 4:6.

14-16. (a) Saida mak Ita bele halo atu komprende liután livru sira iha Bíblia? (b) Esplika toʼok oinsá eskritura neʼebé temi iha parágrafu laran bele ajuda Ita atu komprende liután livru Amós. (Haree mós kaixa “ Imajina sira-nia moris!”)

¹⁴ Imajina katak iha reuniaun tuirmai, ita sei lee no aprende kona-ba livru kiʼik iha Bíblia neʼebé profeta mak hakerek. Karik Ita ladún hatene buat barak kona-ba livru neʼe. Tan neʼe, hakat primeiru mak haburas Ita-nia hakarak atu aprende liután kona-ba livru neʼe. Oinsá mak Ita bele halo ida-neʼe?

¹⁵ Primeiru, husu ba Ita-nia an: ‘Saida mak haʼu hatene kona-ba ema neʼebé hakerek livru neʼe? Nia mak sé? Nia hela iha neʼebé? Ninia serbisu mak saida?’ Informasaun kona-ba hakerek-naʼin nia moris bele ajuda ita komprende tanbasá nia uza liafuan ruma ka ai-knanoik ruma. Bainhira Ita lee Bíblia haree didiʼak liafuan sira neʼebé bele ajuda Ita komprende kona-ba hakerek-naʼin neʼe.

¹⁶ Tuirmai, diʼak atu buka-hatene bainhira mak livru neʼe hakerek. Ita bele haree ida-neʼe iha “Tabela ba livru sira iha Bíblia” husi Bíblia Sagrada Tradusaun Mundu Foun. Ita mós bele haree lista ba profeta no liurai sira iha Apéndise A6. Se Ita estuda daudaun kona-ba livru profesia nian, diʼak atu aprende kona-ba situasaun iha tempu neʼebá. Profeta neʼe presiza korrije ema nia hahalok aat no atividade saida? Sé mak moris iha tempu hanesan ho nia? Atu bele komprende didiʼak, Ita presiza haree versíkulu seluk husi livru seluk iha Bíblia. Hanoin toʼok ezemplu ida, atu komprende kona-ba profeta Amós moris iha situasaun hanesan saida, ita bele haree referénsia  marjinál ba Amós 1:1, neʼebé temi versíkulu sira iha 2 Reis no 2 Krónikas. Se hakarak, Ita mós bele lee buat neʼebé profeta Oseias hakerek, nia moris iha tempu neʼebé hanesan ho Amós. Livru sira-neʼe bele ajuda Ita atu komprende diʼak liután situasaun iha tempu neʼebá.—2 Reis 14:25-28; 2 Krón 26:1-15; Os 1:1-11; Amós 1:1.

17-18. Uza ezemplu iha parágrafu ka Ita-nia ezemplu rasik atu hatudu oinsá informasaun neʼebé haree ladún importante bele ajuda Ita atu estuda Bíblia ho kontente?

¹⁷ Bainhira lee Bíblia, diʼak se Ita iha hakarak atu aprende liután. Porezemplu, karik Ita lee daudaun livru Zacarias kapítulu 12, neʼebé fó sai nanis kona-ba Mesias nia mate. (Zac 12:10) Iha versíkulu 12, Ita lee katak “Natan nia família” sei tanis makaʼas ba Mesias nia mate. Duké lee liu deʼit versíkulu sira-neʼe, Ita bele para no husu ba Ita-nia an: ‘Natan nia família iha ligasaun saida ho Mesias? Iha neʼebé mak haʼu bele hetan informasaun liután?’ Ita komesa halo riset. Referénsia marjinál lori Ita ba 2 Samuel 5:13, 14, iha neʼebá Ita aprende katak Natan mak Liurai David nia oan-mane ida. Referénsia marjinál ida tan lori Ita ba Lucas 3:23, 31, neʼebé hatudu katak Jesus mai husi Natan nia liña jerasaun liuhusi Maria. * Tuirmai Ita hakarak atu buka-hatene liután. Ita hatene ona katak Bíblia fó sai nanis katak Jesus sei mai husi David nia liña jerasaun. (Mt 22:42) Maibé hanoin-hetan David iha oan-mane naʼin-20 liu. Tan neʼe ita admira tebes atu haree Zacarias fó sai nanis kona-ba Natan nia umakain neʼebé sei tanis bainhira Jesus mate.

 ¹⁸ Hanoin toʼok ezemplu seluk. Kapítulu primeiru husi livru Lucas hatete katak anju Gabriel bá vizita Maria no fó-hatene kona-ba oan-mane neʼebé nia sei koʼus, hodi dehan: “Nia sei sai ema importante no ema sei bolu nia nuʼudar Maromak neʼebé Aas Liu Hotu nia Oan-Mane. No Maromak Jeová sei fó ninia aman David nia kadunan ba nia. Nia sei ukun nuʼudar Liurai ba Jacob nia umakain ba nafatin.” (Lc 1:32, 33) Karik ita sei tau fokus ba Gabriel nia mensajen neʼebé hatete katak ema sei bolu Jesus “Maromak neʼebé Aas Liu Hotu nia Oan-Mane”. Maibé, hanoin-hetan, Gabriel mós hatete katak Jesus sei “ukun nuʼudar Liurai”. Karik ita hanoin: ‘Maria hanoin saida bainhira rona ida-neʼe? Nia hanoin katak Jesus sei troka Liurai Herodes nia fatin ka ukun-naʼin seluk neʼebé ukun Izraél ka lae?’ Se Jesus sai liurai, Maria sei sai liurai-feto, no ninia família sei moris iha palásiu. Maibé loloos, Bíblia la hatete katak Maria temi buat sira-neʼe ba anju Gabriel. Ita nunka lee iha Bíblia katak Maria husu ba Jesus kona-ba pozisaun iha Maromak nia Ukun, hanesan dixípulu rua seluk halo. (Mt 20:20-23) Ida-neʼe ajuda hametin ita-nia fiar katak Maria mak feto neʼebé haraik an tebetebes.

19-20. Tuir Tiago 1:22-25 no 4:8, tanbasá mak ita estuda Bíblia?

¹⁹ Hanoin-hetan katak ita-nia razaun primeiru atu estuda Maromak nia Liafuan no publikasaun sira mak atu sai besik liután ba Jeová. Ita mós hakarak atu haree ho klaru liután ‘ita mak ema oinsá’ no mudansa saida mak ita presiza halo hodi bele halo Maromak kontente. (Lee Tiago 1:22-25; 4:8.) Tan neʼe antes ita estuda, ita presiza husu Jeová atu haraik ninia espíritu santu ba ita. Ita presiza husu ba Jeová atu ajuda ita hetan benefísiu husi buat neʼebé ita estuda no buka-hatene mudansa saida mak ita presiza halo.

²⁰ Mai ita hotu sai hanesan Maromak nia atan neʼebé temi iha Salmo 1:2, 3: “Nia gosta tebes Jeová nia ukun-fuan. Nia lee no medita Ninia ukun-fuan loron no kalan. . . . Nia sei hetan susesu iha buat hotu neʼebé nia halo.”