1. Saida mak Maromak nia atan sira hakarak atu halo, no tanbasá? (Haree dezeñu iha livru oin.)

KRISTU JESUS fó mandamentu ba ninia dixípulu sira atu “bá no hanorin ema husi nasaun hotu atu sai . . . dixípulu”. (Mt 28:19) Maromak nia atan hotu neʼebé laran-metin hakarak aprende oinsá sira bele “kumpre didiʼak” serbisu neʼe. (2 Tim 4:5) Serbisu neʼe mak importante, folin-boot, no urjente liu duké serbisu seluk. Maibé, dala ruma susar atu uza tempu barak iha serbisu neʼe tuir ita-nia hakarak.

2. Ita hasoru situasaun saida deʼit bainhira kumpre ita-nia serbisu ba Maromak?

² Iha mós atividade importante seluk neʼebé gasta tempu no enerjia. Karik loroloron ita presiza serbisu ba oras barak atu manán osan hodi tau matan ba ita no ita-nia família. Karik ita hasoru susar tanba ita ka ita-nia família moras, hetan depresaun, ka iha problema saúde tanba idade ona. Oinsá mak ita bele kumpre didiʼak ita-nia serbisu ba Maromak bainhira ita hasoru situasaun susar sira hanesan neʼe?

3. Ita bele aprende saida husi Jesus nia liafuan iha Mateus 13:23?

³ Se ita-nia situasaun hanetik ita atu uza tempu barak hodi halo Jeová nia serbisu, ita la presiza sente laran-kraik. Jesus hatene katak laʼós ema hotu iha abilidade atu fó fuan neʼebé hanesan, katak fó tempu no enerjia neʼebé hanesan hodi haklaken. (Lee Mateus 13:23.) Jeová hafolin tebes buat hotu neʼebé ita halo iha ninia serbisu tuir ita-nia kbiit. (Ebr 6:10-12) Karik ita mós sente katak ita-nia situasaun permite atu halo buat barak tan. Iha lisaun neʼe, ita sei aprende oinsá mak ita bele tau uluk Maromak nia serbisu, halaʼo moris neʼebé simples, aumenta ita-nia matenek atu haklaken no hanorin. Maibé, kumpre didiʼak ita-nia serbisu ba Maromak katak sá?

4. Kumpre didiʼak ita-nia serbisu ba Maromak katak sá?

 ⁴ Atu kumpre didiʼak ita-nia serbisu ba Maromak, ita tenke hola parte beibeik iha serbisu haklaken no hanorin tuir ita-nia kbiit. Maibé neʼe la depende deʼit ba tempu neʼebé ita uza. Buat neʼebé importante ba Jeová mak ita-nia motivu. Ita halo serbisu ba Maromak * ho moris tomak tanba ita hadomi Jeová no ita-nia maluk. (Mc 12:30, 31; Kol 3:23) Serbí Maromak ho moris tomak signifika katak ita uza ita-nia forsa no enerjia atu halo ninia serbisu. Bainhira ita hafolin priviléjiu atu haklaken, ita sei hakaʼas an atu fahe liafuan diʼak ba ema barak.

5-6. Konta toʼok ezemplu kona-ba oinsá ema ida neʼebé iha tempu uitoan deʼit bele tau uluk serbisu haklaken iha ninia moris.

⁵ Imajina toʼok mane joven ida neʼebé gosta atu toka viola. Nia gosta uza oportunidade hotu neʼebé nia iha atu toka viola. Ikusmai, nia hetan serbisu atu toka viola iha restaurante ida iha findesemana. Maibé, osan neʼebé nia hetan labele taka ninia presiza. Entaun, nia serbisu iha loja ida husi loron-segunda toʼo loron-sesta. Maski nia uza tempu barak liu iha loja, maibé nia gosta liu múzika. Nia hakarak tebes aumenta ninia matenek atu toka no sai tokadór. No nia hafolin tebes oportunidade hotu neʼebé nia iha hodi toka múzika maski ba tempu uitoan deʼit.

⁶ Nuneʼe mós, karik Ita la iha tempu barak atu haklaken. Maski nuneʼe Ita gosta tebes atu haklaken. Ita hakaʼas an atu aumenta Ita-nia matenek atu fahe liafuan diʼak iha dalan neʼebé book ema nia laran. Tanba Ita presiza halo buat barak, karik Ita hanoin oinsá mak Ita bele tau uluk serbisu haklaken iha Ita-nia moris.

7-8. Oinsá mak ita bele banati-tuir Jesus nia hanoin kona-ba serbisu ba Maromak?

⁷ Jesus hatudu ezemplu diʼak hodi iha hanoin neʼebé loos kona-ba serbisu ba  Maromak. Buat neʼebé importante liu iha ninia moris mak atu koʼalia kona-ba Maromak nia Ukun. (João 4:34, 35) Nia laʼo kilómetru atus ba atus atu haklaken ba ema barak. Nia aproveita oportunidade hotu atu koʼalia ba ema iha fatin públiku no iha ema nia uma. Jesus tau uluk serbisu ba Maromak iha ninia moris.

⁸ Ita bele banati-tuir Kristu hodi buka dalan atu koʼalia kona-ba liafuan diʼak iha tempu no fatin naran deʼit. Ita prontu atu halo sakrifísiu hodi bele halo serbisu haklaken. (Mc 6:31-34; 1 Ped 2:21) Ema balu iha kongregasaun serbí nuʼudar pioneiru tempu-tomak, regulár ka estra. Ema seluk aprende atu koʼalia língua seluk ka muda ba área neʼebé presiza haklaken-naʼin. Maibé, haklaken-naʼin baibain mós kumpre buat barak hodi haklaken tuir sira-nia kbiit. Jeová la husu ita atu halo buat neʼebé liu fali ita-nia kbiit. Nia hakarak ita hotu atu halo serbisu ba nia ho kontente nuʼudar ita haklaken “liafuan diʼak kmanek” husi ita-nia “Maromak neʼebé kontente”.​—1 Tim 1:11; Deut 30:11.

9. (a) Oinsá mak Paulo tau uluk serbisu haklaken maski nia tenke halo serbisu atu manán osan? (b) Apóstolu 28:16, 30, 31 fó sai Paulo nia sentimentu saida kona-ba ninia serbisu ba Maromak?

⁹ Apóstolu Paulo hatudu ezemplu diʼak kona-ba tau uluk Maromak nia serbisu iha ninia moris. Bainhira nia iha Korinto durante ninia viajen nuʼudar misionáriu ba dala segundu, nia iha osan uitoan deʼit no tenke serbisu atu halo tenda. Maibé, Paulo la haree serbisu neʼe nuʼudar buat importante liu. Nia halo serbisu neʼe atu bele apoia nia hodi haklaken liafuan diʼak ba ema Korinto no “la simu kolen” husi sira. (2 Kor 11:7) Maski Paulo tenke halo serbisu atu manán osan, maibé nia kontinua tau uluk Maromak nia serbisu, no nia haklaken Sábadu-Sábadu. Kuandu Paulo nia situasaun troka, nia bele tau fokus liután ba serbisu haklaken. Nia “uza nia tempu tomak hodi haklaken Maromak nia liafuan no fó sasin ba ema Judeu sira atu hatudu katak Jesus mak Kristu”. (Após 18:3-5; 2 Kor 11:9) Liutiha neʼe, bainhira Paulo sai dadur iha ninia uma rasik iha Roma ba tinan rua, nia haklaken ba ema neʼebé vizita nia no nia hakerek karta sira. (Lee Apóstolu 28:16, 30, 31.) Paulo lakohi husik buat ida sai importante liu fali ninia serbisu haklaken. Nia hakerek: “Tanba ami simu serbisu neʼe . . . ami la rende an.” (2 Kor 4:1) Hanesan Paulo, maski ita presiza uza tempu atu halo serbisu hodi manán osan, maibé ita mós bele nafatin tau uluk serbisu haklaken iha ita-nia moris.

10-11. Oinsá mak ita bele kumpre didiʼak ita-nia serbisu haklaken se ita iha problema saúde?

¹⁰ Se ita labele haklaken husi uma ba uma tanba sai idade ka iha problema saúde, maski nuneʼe ita bele haklaken iha dalan seluk. Haklaken-naʼin sira iha apóstolu sira-nia tempu haklaken ba ema iha fatin oioin. Sira aproveita oportunidade hotu atu koʼalia kona-ba lia-loos iha fatin hotu neʼebé sira bele hetan ema, hanesan husi uma ba uma, iha fatin públiku no la formál. (Após 17:17; 20:20) Se ita iha problema saúde no labele laʼo, karik ita bele tuur iha fatin públiku hodi bele haklaken ba ema neʼebé laʼo bá-mai. Ka karik ita bele haklaken la formál, hakerek karta, ka haklaken liuhusi  telefone. Haklaken-naʼin barak neʼebé iha problema saúde, hetan ksolok hodi haklaken iha dalan sira-neʼe.

¹¹ Maski ita iha problema saúde, ita bele kumpre didiʼak ita-nia serbisu haklaken. Hanoin fali apóstolu Paulo nia ezemplu. Nia dehan: “Tanba iha situasaun hotu haʼu hetan forsa liuhusi nia neʼebé fó kbiit mai haʼu.” (Flp 4:13) Paulo presiza forsa neʼe bainhira nia sai moras durante ninia viajen nuʼudar misionáriu. Nia esplika ba ema Kristaun iha Galásia: “Tanba haʼu moras mak haʼu hetan oportunidade primeiru atu fó sai liafuan diʼak ba imi.” (Gal 4:13) Nuneʼe mós, Ita-nia problema saúde karik fó Ita oportunidade atu fó sai liafuan diʼak ba ema seluk hanesan doutór, enfermeiru, no ema neʼebé tau matan Ita. Karik ema sira-neʼe bá serbisu bainhira haklaken-naʼin sira vizita.

12. “Matan simples” signifika saida?

¹² Jesus hatete: “Matan mak ahi-oan ba ó-nia isin. Tan neʼe, se ó-nia matan haree momoos [ka “matan simples”, nota.], ó-nia isin-lolon tomak sei nabilan.” (Mt 6:22) Ninia liafuan neʼe signifika saida? Nia hakarak ita atu halaʼo moris simples ka tau fokus ba planu ka objetivu ida deʼit, no la husik buat ida fahe ita-nia atensaun. Jesus rasik hatudu ezemplu diʼak hodi tau fokus ba ninia serbisu haklaken, no nia hanorin ninia dixípulu atu kontinua tau fokus ba Jeová nia serbisu no ninia Ukun. Ita banati-tuir Jesus hodi tau uluk serbisu haklaken no “kontinua buka uluk Maromak nia Ukun no buat neʼebé loos tuir Maromak nia haree”.​—Mt 6:33.

13. Saida mak bele ajuda ita atu tau fokus ba serbisu haklaken?

 ¹³ Dalan ida atu tau fokus ba serbisu haklaken mak hodi halo moris simples atu nuneʼe ita bele uza tempu barak liu atu ajuda ema seluk hatene no hadomi Jeová. * Porezemplu, ita bele hamenus oras serbisu nian hodi ita bele uza tempu barak liután atu haklaken durante loron baileet ka lae? Ita bele hamenus atividade halimar nian neʼebé gasta tempu barak liu ka lae?

14. Kaben-naʼin ida halo mudansa saida hodi sira bele uza tempu barak liu ba serbisu ba Maromak?

¹⁴ Katuas kongregasaun ida naran Elias no ninia feen halo nuneʼe. Nia hatete: “Ami labele foti kedas pioneiru, maibé ami bele halo mudansa atu uza tempu barak liután iha serbisu haklaken. Entaun ami halo mudansa kiʼik sira hodi aumenta ami-nia serbisu haklaken. Porezemplu, ami hamenus osan neʼebé ami gasta, hamenus buat neʼebé agora ami haree nuʼudar atividade la importante, no ami husu ami-nia patraun atu troka ami-nia oras serbisu. Rezultadu mak ami bele hola parte atu haklaken iha kalan, aumenta ami-nia estudante Bíblia, no bele aumenta tan loron rua atu haklaken fulan-fulan durante loron baileet. Neʼe halo ami kontente tebes!”

15-16. Tuir 1 Timóteo 4:13, 15, oinsá mak ita bele kontinua aumenta ita-nia matenek nuʼudar haklaken-naʼin? (Haree mós kaixa “ Planu neʼebé ajuda haʼu atu kumpre haʼu-nia serbisu ba Maromak”.)

¹⁵ Dalan seluk atu kumpre didiʼak ita-nia serbisu haklaken mak atu aumenta  ita-nia matenek hodi haklaken. Ema neʼebé halo serbisu ruma presiza simu treinu beibeik atu aumenta sira-nia koñesimentu no matenek. Nuneʼe mós ho haklaken-naʼin sira. Ita presiza kontinua aprende oinsá atu sai matenek liu iha serbisu haklaken.​—Prov 1:5; lee 1 Timóteo 4:13, 15.

¹⁶ Entaun, oinsá mak ita bele kontinua aumenta ita-nia matenek kona-ba haklaken? Hodi tau atensaun didiʼak ba matadalan neʼebé ita simu semana-semana iha ita-nia reuniaun Moris Kristaun no Haklaken. Reuniaun neʼe fó treinu neʼebé folin-boot atu ajuda ita aumenta ita-nia matenek atu halo serbisu haklaken. Porezemplu, bainhira aprezentadór fó konsellu ba sira neʼebé halaʼo knaar eskola nian, ita bele rona sujestaun neʼebé bele ajuda ita aumenta ita-nia matenek hodi haklaken. Ita bele aplika sujestaun sira-neʼe bainhira ita haklaken. Ita bele husu ajuda ka haklaken hamutuk ho katuas neʼebé tau matan ba ita-nia grupu ka haklaken-naʼin seluk neʼebé iha esperiénsia, pioneiru ida, ka katuas área. Bainhira ita aumenta ita-nia matenek hodi uza buat oioin iha Ekipamentu Hanorin nian, ita sei sente kontente liu atu haklaken no hanorin.

17. Ita sente oinsá bainhira Ita kumpre didiʼak Ita-nia serbisu ba Maromak?

¹⁷ Ita iha priviléjiu boot tanba ita bele sai Jeová nia “maluk serbisu-naʼin”! (1 Kor 3:9) Bainhira Ita “buka-hatene loloos buat sira neʼebé importante liu” no tau fokus ba Ita-nia serbisu ba Maromak, Ita sei “serbí Jeová ho haksolok”. (Flp 1:10; Sal 100:2) Nuʼudar Maromak nia atan, Ita bele iha konfiansa katak nia sei fó Ita kbiit atu kumpre Ita-nia serbisu ba nia maski hasoru susar oioin ka problema saúde. (2 Kor 4:1, 7; 6:4) Maski Ita uza tempu uitoan ka barak atu haklaken, maibé Ita “iha razaun atu haksolok” bainhira Ita halo serbisu haklaken ho moris tomak. (Gal 6:4) Bainhira Ita kumpre didiʼak Ita-nia serbisu ba Maromak, Ita hatudu domin ba Jeová no Ita-nia maluk. ‘Hodi halo nuneʼe mak Ita sei salva Ita-nia an rasik no mós ema sira neʼebé rona Ita.’​—1 Tim 4:16.