1-2. Tanbasá Ita la presiza sente laran-kraik se Ita seidauk prontu atu hetan batizmu? (Haree foto iha livru oin.)

 SE ITA hakarak hetan batizmu, neʼe mak planu neʼebé diʼak tebes. Maibé Ita prontu ona ka lae? Se Ita hanoin katak Ita prontu no katuas kongregasaun sira mós hanoin nuneʼe, entaun keta dada an atu hetan batizmu iha oportunidade tuirmai. Se Ita hetan batizmu, Ita sei moris kontente hodi serbí Jeová.

² Maibé oinsá se ema ruma fó-hatene Ita katak Ita presiza kontinua laʼo ba oin antes Ita bele hetan batizmu? Ka Ita rasik rekoñese ida-neʼe. Se nuneʼe, keta sai laran-kraik. Ita bele laʼo ba oin no kumpre planu atu hetan batizmu maski Ita mak joven hela ka ferik-katuas ona.

3. Ema-boot husi Etiópia husu saida ba Filipe no neʼe hamosu pergunta saida? (Apóstolu 8:36, 38)

³ Lee Apóstolu 8:36, 38. Ema-boot ida husi Etiópia husu ba Filipe: “Saida mak hanetik haʼu atu hetan batizmu?” Ema Etiópia neʼe hakarak tebes atu hetan batizmu, maibé nia prontu ona atu hetan batizmu ka lae?

4. Saida mak hatudu katak ema Etiópia hakarak kontinua aprende?

⁴ Ema Etiópia neʼe “bá Jeruzalein atu adora Maromak”. (Após 8:27) Tan neʼe karik nia simu ona relijiaun Judeu nian. Ita bele fiar katak nia aprende ona kona-ba Jeová husi Eskritura Lian Ebraiku. Maski nuneʼe, nia hakarak aprende liután. Tuir loloos, bainhira Filipe hasoru ema-boot neʼe iha dalan, ema-boot neʼe halo daudaun saida? Nia lee profeta Isaias nia liafuan. (Após 8:28) Neʼe mak lia-loos  neʼebé kleʼan iha Bíblia. Ema-boot neʼe sente katak la toʼo atu aprende deʼit buat báziku, nia hakarak kontinua aprende kona-ba Jeová.

5. Ema Etiópia halo saida ho informasaun neʼebé nia aprende?

⁵ Ema Etiópia neʼe mak ema-boot iha liurai-feto Kandase nia okos no “nia tau matan ba liurai-feto neʼe nia rikusoin tomak”. (Após 8:27) Tan neʼe karik nia okupadu tebes no iha responsabilidade oioin. Maski nuneʼe, nia uza tempu atu adora Jeová. Nia laʼós deʼit aprende lia-loos, maibé nia mós halo tuir buat neʼebé nia aprende. Tan neʼe, nia halo viajen husi Etiópia toʼo Jeruzalein atu bele adora Jeová iha templu. Presiza tempu no osan barak atu halo viajen neʼe, maibé nia prontu atu halo buat naran deʼit atu bele adora Jeová.

6-7. Oinsá mak ema Etiópia nia domin ba Maromak sai boot liután?

⁶ Filipe hanorin lia-loos importante oioin ba ema Etiópia neʼe, lia-loos neʼe inklui mós hanorin katak Jesus mak Mesias. (Após 8:34, 35) Bainhira ema-boot neʼe aprende buat neʼebé Jesus halo ona ba nia, neʼe book tebes ninia laran. Entaun nia halo saida? Nia bele kontinua halo tuir deʼit relijiaun Judeu nian neʼebé ema respeitu. Maibé ninia domin ba Jeová no ninia Oan-Mane sai boot liután. Ida-neʼe book nia atu halo desizaun importante hodi hetan batizmu nuʼudar Jesus Kristu nia dixípulu. Filipe haree katak mane neʼe prontu ona, tan neʼe nia fó batizmu ba mane neʼe.

⁷ Se Ita halo tuir ema Etiópia nia ezemplu, Ita bele sai prontu atu hetan batizmu. Ita bele hatete ho fiar metin: “Saida mak hanetik haʼu atu hetan batizmu?” Mai ita aprende kona-ba oinsá Ita bele halo buat neʼebé ema Etiópia halo. Nia kontinua aprende, nia halo tuir buat neʼebé nia aprende no ninia domin ba Maromak sai boot liután.

8. João 17:3 haruka ita atu halo saida?

⁸ Lee João 17:3 no nota-rodapé. Jesus nia liafuan iha eskritura neʼe book ona ita barak atu estuda Bíblia. Maibé liafuan sira-neʼe mós anima ita atu kontinua aprende Bíblia. Ita sei nunka para atu “kontinua hetan koñesimentu kona-ba . . . Maromak loos mesak deʼit”. (Ecle 3:11) Ita sei kontinua aprende kona-ba Jeová ba nafatin. Bainhira ita aprende liután, ita mós sei hakbesik liután ba Jeová.​—Sal 73:28.

9. Depois aprende tiha lia-loos báziku sira, ita presiza halo saida?

 ⁹ Bainhira ita komesa aprende kona-ba Jeová, ita aprende deʼit hanorin báziku husi Bíblia. Iha apóstolu Paulo nia karta ba ema Ebreu, nia hatete katak hanorin báziku mak hanesan “buat báziku”. Maibé neʼe la dehan katak “hanorin báziku” mak la importante. Nia esplika katak hanorin sira-neʼe mak hanesan susubeen neʼebé bebé hemu. (Ebr 5:12; 6:1) Nia mós anima ema Kristaun hotu atu laʼo ba oin no aprende kona-ba lia-loos kleʼan husi Bíblia. Ita haburas ona hakarak atu aprende lia-loos kleʼan husi Bíblia ka lae? Ita prontu atu laʼo ba oin no kontinua aprende kona-ba Jeová no ninia hakarak ka lae?

10. Tanbasá susar ba ema balu atu estuda?

¹⁰ Ita barak sente susar atu estuda. Ita rasik sente nuneʼe ka lae? Iha eskola, Ita aprende oinsá atu lee no estuda ho didiʼak ka lae? Ita gosta estuda no aprende ka lae? Ka Ita hanoin katak Ita la iha matenek atu aprende husi livru sira? Se nuneʼe, Ita la mesak, ema seluk mós sente nuneʼe. Maibé Jeová bele ajuda Ita. Nia mak perfeitu no Mestre diʼak liu hotu.

11. Oinsá Jeová hatudu katak nia mak “Mestre Boot”?

¹¹ Jeová bolu ninia an nuʼudar “Mestre Boot”. (Isa 30:20, 21) Nia mak Mestre neʼebé hatudu pasiénsia, laran-diʼak no komprende ita. Nia tau fokus ba ita-nia hahalok diʼak. (Sal 130:3) No nia nunka husu ita atu halo buat neʼebé liu fali ita-nia kbiit. Hanoin-hetan, nia mak kria ita-nia kakutak, no neʼe mak prezente furak ida husi nia. (Sal 139:14) Jeová kria ita ho hakarak atu aprende. Ita-nia Kriadór hakarak ita atu gosta no kontinua aprende ba nafatin. Tan neʼe, diʼak atu “haburas hakarak” atu aprende lia-loos husi Bíblia. (1 Ped 2:2) Halo planu neʼebé Ita bele kumpre, no halo oráriu atu lee no estuda Bíblia beibeik no halo tuir Ita-nia oráriu. (Jos 1:8) Ho Jeová nia ajuda, Ita sei komesa gosta liután atu lee no aprende kona-ba Jeová.

12. Tanbasá ita presiza estuda kona-ba Jesus nia moris no haklaken?

¹² Uza tempu beibeik atu medita kona-ba Jesus nia moris no haklaken. Ita presiza banati-tuir Jesus ho didiʼak, se ita hakarak serbí Jeová, liuliu iha tempu susar neʼe. (1 Ped 2:21) Jesus koʼalia nakloke kona-ba susar sira neʼebé ninia dixípulu sira sei hasoru. (Lc 14:27, 28) Maski nuneʼe, nia iha konfiansa katak ninia dixípulu neʼebé loos bele kontinua laran-metin ba Maromak hanesan ho nia. (João 16:33) Estuda kona-ba Jesus nia moris no halo planu atu bele banati-tuir nia loroloron.

13. Ita presiza kontinua husu saida husi Jeová no tanbasá?

¹³ Koñesimentu mesak deʼit la toʼo. Ita presiza koñesimentu tanba neʼe bele ajuda Ita aprende liután kona-ba Jeová no haburas hahalok hanesan domin no fiar ba nia. (1 Kor 8:1-3) Nuʼudar Ita aprende kona-ba Jeová, kontinua husu nia atu ajuda Ita aumenta Ita-nia fiar. (Lc 17:5) Nia sei hatán orasaun sira-neʼe ho laran-luak. Fiar neʼebé bazeia ba koñesimentu loos kona-ba Maromak sei ajuda Ita atu kontinua laʼo ba oin.​—Tgo 2:26.

14. Oinsá mak apóstolu Pedro hatudu katak importante atu halo tuir buat neʼebé ita aprende? (Haree mós dezeñu.)

¹⁴ Apóstolu Pedro fó sai katak importante tebes ba Kristu nia dixípulu atu kontinua halo tuir buat neʼebé sira aprende.  Nia temi kona-ba Noé nia istória iha Bíblia. Jeová hatete ba Noé katak nia sei halakon ema aat liuhusi rai-nabeen. Maibé hatene deʼit ida-neʼe la toʼo atu salva Noé no ninia família husi rai-nabeen neʼebé atu mai. Pedro hatete katak antes Rai-Nabeen akontese, “Noé harii daudaun ró boot”. (1 Ped 3:20) Sin, Noé no ninia família halo tuir buat neʼebé sira aprende husi Maromak liuhusi harii ró boot. (Ebr 11:7) Tuirmai, Pedro kompara buat neʼebé Noé halo ho batizmu. Pedro hakerek: “Batizmu mós hanesan ho akontesimentu neʼe, no agora batizmu salva imi.” (1 Ped 3:21) Ita bele kompara buat neʼebé Ita halo agora daudaun atu prepara ba batizmu ho serbisu neʼebé Noé no ninia família halo durante tinan barak atu harii ró boot. Saida mak Ita presiza halo atu prontu ba batizmu?

15. Oinsá mak Ita bele hatudu katak Ita arrepende an ho laran?

¹⁵ Buat primeiru neʼebé ita presiza halo mak arrepende ita-nia sala ho laran. (Após 2:37, 38) Bainhira ita arrepende an ho laran, neʼe sei book ita atu halo mudansa. Ita para ona ka lae atu halo buat neʼebé Jeová la gosta hanesan halaʼo moris neʼebé la morál, uza tabaku ka uza liafuan foʼer ka tolok? (1 Kor 6:9, 10; 2 Kor 7:1; Éf 4:29) Se Ita seidauk para, kontinua hakaʼas an atu halo mudansa. Koʼalia ho ema neʼebé estuda Bíblia ho Ita ka husu ajuda no matadalan husi katuas kongregasaun ida. Se Ita mak joven ida no hela ho inan-aman, husu sira atu ajuda Ita husik tiha toman aat ruma neʼebé hanetik Ita atu hetan batizmu.

16. Toman diʼak atu halo atividade espirituál inklui saida deʼit?

¹⁶ Importante mós atu iha toman diʼak atu halo atividade espirituál. Ida-neʼe inklui asiste no hola parte iha reuniaun sira. (Ebr 10:24, 25) Bainhira Ita kumpre ona kritéria atu bá haklaken, hakaʼas an atu haklaken beibeik. Kuandu Ita haklaken beibeik, neʼe sei ajuda Ita atu gosta liután serbisu neʼe. (2 Tim 4:5) Se Ita mak joven ida no hela ho inan-aman, husu ba Ita-nia an: ‘Haʼu-nia inan-aman tenke fó-hanoin haʼu atu asiste reuniaun sira no bá  haklaken ka lae? Ka haʼu iha inisiativu atu halo atividade sira-neʼe?’ Bainhira Ita iha inisiativu atu halo buat sira-neʼe, Ita hatudu sai Ita-nia fiar, domin no mós agradese ba Jeová. Ita “hatudu hahalok santu no laran-metin ba Maromak”, neʼe mak prezente sira neʼebé Ita bele fó ba Jeová. (2 Ped 3:11; Ebr 13:15) Prezente hotu neʼebé ita prontu atu fó ba Jeová ho laran sei halo nia kontente. (Kompara ho 2 Korinto 9:7.) Ita halo buat sira-neʼe tanba ita kontente atu fó buat diʼak liu hotu ba Jeová.

17-18. Hahalok importante saida mak sei ajuda Ita laʼo ba oin no hetan batizmu? Tanbasá? (Provérbios 3:3-6)

¹⁷ Nuʼudar Ita kontinua laʼo ba oin atu hetan batizmu, Ita sei hasoru susar sira. Karik ema balu sei hatún Ita tanba Ita-nia fiar foun, karik sira mós sei kontra no fó-terus Ita. (2 Tim 3:12) Bainhira Ita hakaʼas an atu husik toman aat ruma, karik dala ruma Ita sei monu fali ba Ita-nia toman neʼe. Ka karik Ita lakon pasiénsia no sente estrese tanba presiza tempu kleur liu atu bele kumpre Ita-nia planu. Saida mak bele ajuda Ita tahan? Hahalok importante ida mak domin ba Jeová.

¹⁸ Ita-nia domin ba Jeová mak hahalok neʼebé furak tebes. (Lee Provérbios 3:3-6.) Bainhira Ita iha domin neʼebé boot ba Jeová, neʼe sei ajuda Ita tahan susar sira ho susesu. Bíblia temi beibeik kona-ba Jeová nia domin neʼebé laran-metin ba ninia atan sira. Tan neʼe nia sei nunka husik hela ninia atan sira no nunka para atu hadomi sira. (Sal 100:5) Maromak kria Ita tuir ninia ilas. (Gén 1:26) Oinsá mak Ita bele banati-tuir ninia domin?

19. Oinsá mak Ita bele haburas agradese ba buat neʼebé Jeová halo ona ba Ita? (Galásia 2:20)

¹⁹ Hahú hodi haburas agradese. (1 Tes 5:18) Loroloron husu ba Ita-nia an: ‘Oinsá Jeová hatudu ona domin mai haʼu?’ Tuirmai fó obrigadu ba Jeová liuhusi orasaun. Ita bele temi buat espesífiku neʼebé nia halo ona mai Ita. Rekoñese katak Jeová halo buat diʼak ba Ita tanba nia hadomi Ita. Apóstolu Paulo mós rekoñese ida-neʼe kona-ba Jeová. (Lee Galásia 2:20.) Husu ba Ita-nia an: ‘Haʼu hakarak hatudu fali domin ba Jeová ka lae?’ Domin ba Jeová sei ajuda Ita tahan tentasaun no mós susar sira ho susesu. Domin sei book  Ita atu kontinua halo atividade espirituál beibeik no loroloron hatudu katak Ita hadomi Ita-nia Aman Jeová.

20. Ita presiza halo saida atu dedika an ba Jeová? Desizaun neʼe importante ka lae? Esplika toʼok.

²⁰ Tuirmai, Ita-nia domin ba Jeová sei book Ita atu halo orasaun espesiál ida. Ita sei dedika an ba Maromak. Hanoin-hetan, bainhira Ita dedika an tiha ba Jeová, Ita iha oportunidade furak ida atu sai ninian ba nafatin. Ita promete atu serbí nia iha tempu diʼak no mós iha tempu susar. Ita nunka presiza halo fali promesa neʼe. Bainhira ita dedika an, ita halo desizaun neʼebé sériu. Maibé hanoin toʼok ida-neʼe: Ita halo desizaun barak iha Ita-nia moris, desizaun balu diʼak tebes, maibé desizaun diʼak liu neʼebé Ita bele halo mak atu dedika an ba Jeová. (Sal 50:14) Satanás sei koko halo fraku Ita-nia domin ba Jeová tanba nia hakarak Ita atu husik Ita-nia integridade. Keta husik Satanás manán! (Job 27:5) Ita-nia domin boot ba Jeová sei ajuda Ita moris tuir Ita-nia dedikasaun no hakbesik liután ba Ita-nia Aman iha lalehan.

21. Tanbasá ita bele dehan katak batizmu laʼós hakat ikus maibé hakat primeiru?

²¹ Depois Ita dedika an ba Jeová, koʼalia ho katuas kongregasaun kona-ba hakat importante tuirmai. Maibé keta haluha katak batizmu laʼós hakat ikus. Batizmu mak hakat primeiru iha Ita-nia moris atu serbí Jeová ba nafatin. Tan neʼe, hametin Ita-nia domin ba Jeová agora. Halo planu oioin atu Ita-nia domin bele sai boot liután loron ba loron. Ida-neʼe sei book Ita atu hetan batizmu. Loron neʼebé Ita hetan batizmu mak loron neʼebé furak tebes. Ami hein katak Ita sei kontinua hametin Ita-nia domin ba Jeová no ninia Oan-Mane ba nafatin!