1-2. (a) Iha kalan antes Jesus mate, nia halo saida? (b) Iha lisaun neʼe, ita sei buka-hatene pergunta saida deʼit?

 IHA kalan 14 Nisan, tinan 33 EC, Jesus hatene katak lakleur tan, Judas sei faʼan nia, no tuirmai nia sei hetan tesi-lia, terus, no mate. Nia foin remata han-kalan ikus ho apóstolu sira neʼebé laran-metin iha sala iha andár-leten. Jesus fó lia-menon ikus atu hametin apóstolu sira. No antes sira sai husi fatin neʼe, Jesus hatoʼo orasaun neʼebé importante tebes. Ita bele lee kona-ba orasaun neʼe iha João kapítulu 17.

² Iha lisaun neʼe, ita sei haree pontu balu neʼebé ita bele aprende husi Jesus nia orasaun. Antes Jesus mate, nia hanoin barak liu kona-ba saida? Saida mak importante ba Jesus bainhira nia halaʼo ninia knaar iha mundu? Mai ita buka-hatene resposta ba pergunta sira-neʼe.

“HAʼU FÓ SAI TIHA ONA ITA-NIA NARAN BA SIRA”

3. Jesus nia liafuan “haʼu fó sai tiha ona Ita-nia naran ba sira” katak sá? (João 17:​6, 26)

³ Iha Jesus nia orasaun, nia hatete: “Haʼu fó sai tiha ona Ita-nia naran ba sira.” Tuir loloos, Jesus temi dala rua katak nia fó sai ona Jeová nia naran ba ninia dixípulu sira. (Lee João 17:​6, 26.) Neʼe katak sá? Neʼe katak Jesus nia dixípulu sira seidauk hatene Maromak nia naran ka lae? Lae. Jesus nia dixípulu sira mak ema Judeu, tan neʼe sira hatene ona katak Maromak nia naran mak  Jeová. Naran neʼe mosu dala rihun ba rihun iha Eskritura Lian Ebraiku. Entaun, Jesus la presiza hanorin tan kona-ba Maromak nia naran mak Jeová. Tan neʼe, kuandu Jesus hatete: “Haʼu fó sai tiha ona Ita-nia naran ba sira”, neʼe katak nia hanorin sira kona-ba signifikadu husi Maromak nia naran. Jesus ajuda ona sira atu hatene didiʼak kona-ba Jeová, inklui Jeová nia hakarak, buat neʼebé Nia halo, no Ninia hahalok. La iha ema ida mak hatene Jeová diʼak liu fali Jesus.

4-5. (a) Oinsá ema ida nia naran bele sai importante liután? Fó toʼok ezemplu. (b) Oinsá Jesus nia dixípulu sira bele “hatene” Jeová diʼak liután?

⁴ Nuʼudar ezemplu, imajina toʼok iha Ita-nia kongregasaun iha irmaun katuas ida naran David no nia mak doutór. Ita koñese irmaun neʼe tinan barak ona. Loron ida, Ita hetan moras todan. Ita bá ospitál no doutór neʼebé salva Ita mak irmaun katuas neʼe. Agora, Ita koñese irmaun neʼe diʼak liután, no kuandu Ita rona ema temi irmaun neʼe nia naran, Ita hanoin kedas buat hotu neʼebé irmaun neʼe halo ba Ita! Ita haree irmaun David laʼós deʼit nuʼudar katuas kongregasaun, maibé mós nuʼudar doutór neʼebé salva Ita.

⁵ Iha dalan neʼebé hanesan, Jesus nia dixípulu sira hatene ona Jeová nia naran. Maibé naran neʼe sai importante liután ba sira tanba Jesus ajuda sira atu koñese Jeová diʼak liután. Tanbasá ita bele dehan nuneʼe? Tanba Jesus haleno ninia Aman nia hahalok liuhusi buat hotu neʼebé nia koʼalia no halo. Tan neʼe, dixípulu sira bele “hatene” Jeová diʼak liután hodi rona ba Jesus nia hanorin no haree dalan neʼebé nia trata ema seluk.—João 14:9; 17:3.

“ITA-NIA NARAN NEʼEBÉ ITA FÓ ONA MAI HAʼU”

6. Jesus nia liafuan “Ita-nia naran neʼebé Ita fó ona mai haʼu” katak sá? (João 17:​11, 12)

⁶ Jesus halo orasaun kona-ba dixípulu sira, hodi dehan: “Tau matan ba sira tanba Ita-nia naran neʼebé Ita fó ona mai haʼu.” (Lee João 17:​11, 12.) Neʼe katak Jesus mós bolu nuʼudar Jeová ka lae? Lae. Bainhira Jesus temi kona-ba Jeová nia naran, nia hatete “Ita-nia naran”. Tan neʼe, Jesus la bolu ninia an nuʼudar Jeová. Entaun, Jesus nia liafuan “Ita-nia naran neʼebé Ita fó ona mai haʼu” katak sá? Primeiru, Jesus mak Jeová nia reprezentante. Nia koʼalia no halo buat kmanek oioin hodi ninia Aman nia naran. (João 5:43; 10:25) Segundu, naran Jesus signifika “Jeová mak fó salvasaun”. Tan neʼe, Jesus nia naran iha ligasaun metin ho Jeová nia naran.

7. Oinsá mak Jesus bele koʼalia hodi Jeová nia naran? Fó toʼok ezemplu.

⁷ Hanoin toʼok ezemplu tuirmai: Ukun-naʼin ida bele haruka ninia embaixadór atu koʼalia hodi reprezenta nia. Tan neʼe, buat neʼebé embaixadór koʼalia mak hanesan deʼit ho buat neʼebé ukun-naʼin neʼe koʼalia. Nuneʼe mós, Jesus reprezenta Jeová no koʼalia ba ema hodi Jeová nia naran.—Mt 21:9; Lc 13:35.

8. Oinsá mak Jesus “lori” Jeová nia naran antes mai mundu? (Éxodo 23:​20, 21)

⁸ Bíblia temi Jesus nuʼudar “Liafuan” tanba Jeová uza nia atu koʼalia ba anju sira no ema kona-ba saida mak Jeová hakarak sira atu hatene no halo. (João 1:​1-3) Karik Jesus mak anju neʼebé Jeová haruka atu dirije ema Izraél kuandu sira iha rai-fuik. Bainhira Jeová haruka povu Izraél atu halo tuir anju neʼe,  Nia hatete: “Tanba nia [anju neʼe] lori haʼu-nia naran.” a (Lee Éxodo 23:​20, 21.) Jesus “lori” Jeová nia naran, neʼe katak nia reprezenta Jeová no nia mak ida neʼebé prinsipál atu halo santu Jeová nia naran no prova katak buat hotu neʼebé Jeová halo mak loos.

“AMAN, FÓ GLÓRIA BA ITA-NIA NARAN”

9. Oinsá Jesus hatudu katak Jeová nia naran mak importante? Esplika toʼok.

⁹ Hanesan ita aprende ona, antes Jesus mai mundu, Jeová nia naran mak importante liu ba Jesus. No bainhira iha rai, nia hatudu katak nia hanoin liu kona-ba Jeová nia naran liuhusi buat hotu neʼebé nia halo. Bainhira nia besik atu mate, nia hatete: “Aman, fó glória ba Ita-nia naran.” Jeová hatán kedas ho lian boot husi lalehan: “Haʼu fó glória tiha ona no haʼu sei fó glória tan.”—João 12:28.

10-11. (a) Oinsá mak Jesus fó glória ba Jeová nia naran? (Haree mós dezeñu.) (b) Tanbasá mak Jeová nia naran presiza sai santu?

¹⁰ Jesus mós fó glória ba ninia Aman nia naran. Oinsá? Dalan ida mak hodi fó sai ninia Aman nia hahalok furak sira ba ema seluk. Maibé laʼós neʼe deʼit. Jesus mós presiza halo santu Jeová nia naran no prova katak buat hotu neʼebé Jeová halo mak loos. Jesus hatudu katak Jeová  nia naran mak importante tebes bainhira nia hanorin ninia dixípulu sira kona-ba oinsá atu halo orasaun. Nia hatete: “Ami Aman iha lalehan, halo Ita-nia naran sai santu.”—Mt 6:9.

¹¹ Tanbasá mak Jeová nia naran presiza sai santu? Tanba iha jardín Eden, Diabu Satanás hafoʼer Maromak Jeová nia naran ho lia-bosok. Satanás hatete katak Jeová mak bosok-teen no lakohi Adão ho Eva atu hetan buat neʼebé diʼak. (Gén 3:​1-5) Satanás mós fó sai katak Jeová nia dalan atu ukun mak la loos. Lia-bosok neʼe hafoʼer Jeová nia naran ka reputasaun. Liután neʼe, iha Job nia tempu, Satanás hatete katak ema serbí Jeová laʼós tanba hadomi nia, maibé tanba hakarak hetan buat diʼak. Satanás mós hatete katak la iha ema ida mak hadomi Jeová ho laran, no ema sei la serbí tan Jeová bainhira hasoru susar. (Job 1:​9-11; 2:4) Tan neʼe, presiza tempu atu hatudu sai ho klaru kona-ba sé mak bosok-teen, Jeová ka Satanás.

‘HAʼU ENTREGA HAʼU-NIA MORIS’

12. Tanba hadomi Jeová nia naran, Jesus prontu atu halo saida?

¹² Tanba hadomi Jeová, Jesus hakarak halo buat hotu neʼebé nia bele atu halo santu Jeová nia naran. Jesus hatete: ‘Haʼu entrega haʼu-nia moris.’ (João 10:​17, 18) Sin, nia prontu mate tanba Jeová nia naran. b Ema primeiru Adão ho Eva kontra Jeová no halo tuir Satanás. Maibé Jesus prontu mai mundu, no prova katak nia hadomi Jeová. Jesus halo ida-neʼe hodi halo tuir Jeová ho laran-metin. (Ebr 4:15; 5:​7-10) Nia kontinua laran-metin toʼo mate iha ai-riin terus nian. (Ebr 12:2) Iha dalan hanesan neʼe mak nia prova katak nia hadomi Jeová no Ninia naran.

13. Tanbasá Jesus mak ida neʼebé diʼak liu atu prova katak Satanás mak bosok-teen? (Haree mós dezeñu.)

¹³ Buat hotu neʼebé Jesus halo fó prova katak Satanás mak bosok-teen, laʼós Jeová! (João 8:44) La iha kriatura ida mak hatene Jeová diʼak liu fali Jesus. Se iha buat ruma neʼebé Satanás koʼalia kona-ba Jeová mak loos, klaru katak Jesus mós hatene kona-ba neʼe. Maibé Jesus kontinua defende Jeová nia naran. Maski iha tempu neʼebé Jeová  la proteje tan Jesus, maibé Jesus prontu mate duké fila kotuk ba ninia Aman.—Mt 27:46. c

“HAʼU HALO HOTU ONA SERBISU NEʼEBÉ ITA FÓ MAI HAʼU”

14. Oinsá mak Jeová fó kolen ba Jesus nia laran-metin?

¹⁴ Iha kalan antes Jesus mate, nia halo orasaun: “Haʼu halo hotu ona serbisu neʼebé Ita fó mai haʼu atu halo.” Nia fiar metin katak Jeová sei fó kolen tanba ninia laran-metin. (João 17:​4, 5) No Jesus nia fiar ba Jeová mak la saugati deʼit. Jeová la husik Jesus nafatin iha rate laran. (Após 2:​23, 24) Nia fó moris-hiʼas ba Jesus no fó pozisaun neʼebé aas liu iha lalehan. (Flp 2:​8, 9) Ikusmai, Jesus komesa ukun nuʼudar Liurai ba Maromak nia Ukun. Saida mak Ukun neʼe sei halo? Parte segundu husi orasaun Ami Aman dehan: “Halo Ita-nia Ukun toʼo mai rai. Halo Ita-nia hakarak sai loos iha rai, hanesan iha lalehan.”—Mt 6:10.

15. Saida tan mak Jesus sei halo?

¹⁵ Lakleur tan, Jesus sei halo funu hasoru Maromak nia inimigu sira no halakon ema aat iha Armagedon. (Apok 16:​14, 16; 19:​11-16) Tuirmai, nia sei soe tun Satanás ba “rai-kuak neʼebé kleʼan tebes”. (Apok 20:​1-3) Jesus sei lori dame no halo ema sai perfeitu durante ninia Ukun ba Tinan Rihun Ida. Nia sei fó moris-hiʼas ba ema mate no halo mundu tomak sai paraízu. Jeová nia hakarak sei sai realidade!—Apok 21:​1-4.

16. Moris sei sai oinsá iha Jesus nia Ukun ba Tinan Rihun Ida nia rohan?

¹⁶ Moris sei sai oinsá iha Jesus nia Ukun ba Tinan Rihun Ida nia rohan? Ema sei sai perfeitu, sala la iha tan, no ema la presiza tan Jesus nia sakrifísiu  atu bele hetan perdua. Ema la presiza tan mediadór atu ajuda sira hakbesik ba Jeová. No “inimigu ikus neʼebé nia sei halakon mak mate [tanba Adão nia sala]”. Rate sei sai mamuk tanba ema mate hetan ona moris-hiʼas. Ema hotu iha mundu sei sai perfeitu.—1 Kor 15:​25, 26.

17-18. (a) Saida mak sei akontese bainhira Jesus nia Ukun ba Tinan Rihun Ida remata? (b) Jesus sei halo saida bainhira ninia ukun remata? (1 Korinto 15:​24, 28) (Haree mós dezeñu.)

¹⁷ Saida tan mak sei akontese bainhira Jesus nia Ukun ba Tinan Rihun Ida remata? Iha tempu neʼebá, buat furak ida sei akontese. Asuntu kona-ba halo santu Jeová nia naran sei remata. Oinsá? Iha jardín Eden, Satanás hatete katak Jeová mak bosok-teen no Nia la ukun ema ho domin. Husi tempu neʼebá, Jeová nia atan sira kontinua halo santu Jeová nia naran. No kuandu Jesus nia Ukun ba Tinan Rihun Ida remata, Jeová nia naran sei sai santu iha dalan neʼebé kompletu. Sei la iha tan duvida katak Jeová mak Aman neʼebé domin.

¹⁸ Ikusmai, kriatura hotu sei hatene katak buat hotu neʼebé Satanás hatete kona-ba Jeová mak la loos. Saida mak Jesus sei halo bainhira ninia ukun remata? Nia sei halo tuir Satanás hodi kontra hasoru Jeová ka lae? Lae! (Lee 1 Korinto 15:​24, 28.) Jesus sei entrega Ukun neʼe ba ninia Aman. Nia sei hakruʼuk ba Jeová nia ukun. Sin, la hanesan Satanás, Jesus prontu atu entrega ninia kbiit tomak tanba nia hadomi Jeová.

19. Jesus haree Jeová nia naran mak oinsá?

¹⁹ Tan neʼe mak Jeová prontu fó Ninia naran ba Jesus! Jesus prova ona katak nia bele reprezenta ninia Aman iha dalan neʼebé perfeitu. Entaun, Jesus haree Jeová nia naran mak oinsá? Neʼe mak buat neʼebé importante liu hotu ba Jesus. Nia prontu mate tanba Jeová nia naran, no nia sei prontu atu entrega fali buat hotu ba Jeová bainhira ninia Ukun ba Tinan Rihun Ida remata. Oinsá ita bele banati-tuir Jesus nia ezemplu? Iha lisaun tuirmai, ita sei aprende kona-ba neʼe.