HANOIN fali ba loron neʼebé solok liu hotu iha Ita-nia moris. Loron neʼe mak loron saida? Ita-nia loron kazamentu ka loron neʼebé Ita-nia oan primeiru foin moris? Ka loron neʼe mak loron neʼebé Ita dedika an ba Jeová no hetan batizmu? Karik neʼe mak loron ida neʼebé importante no kontente liu hotu iha Ita-nia moris tomak. Tanba iha loron neʼe, irmaun-irmán sira mós kontente tebes hodi haree Ita hakarak hatudu ba ema hotu katak Ita hadomi duni Maromak ho Ita-nia laran, moris, neon, no kbiit tomak!—Marcos 12:30.

Ita bele fiar katak hahú husi loron batizmu, Ita mós hetan solok barak liután hodi serbí Jeová. Maibé, haklaken-naʼin balu lakon ona sira-nia solok neʼe. Tanbasá mak ida-neʼe bele akontese? Ita iha razaun saida deʼit atu bele kontinua serbí Jeová ho solok?

Jeová promete katak, lakleur tan ninia Ukun sei halakon mundu aat neʼe no lori fali ninia mundu foun mai. Rona liafuan sira-neʼe halo ita kontente tebes. Tan neʼe mak Sofonias (Zefanya) 1:14 hatete: “Jeová nia loron boot besik ona. Loron neʼe besik ona, no mai lalais loos!” Maibé, tanba ita hein kleur liu fali tempu neʼebé ita hanoin katak loron neʼe sei mai, neʼe bele halakon ita-nia solok neʼebé uluk ita iha no neʼe mós bele hamenus ita-nia laran-manas atu serbí Jeová.—Provérbios (Amsal) 13:12.

Ransu ho irmaun-irmán sira bele fó anima ita no ajuda ita atu kontinua serbí Jeová ho solok. Karik tanba Jeová nia atan sira-nia hahalok diʼak mak uluk dada ita tama lia-loos, no ajuda ita hodi hakarak serbí Maromak ho solok. (1 Pedro 2:12) Maibé oinsá se ita haree iha irmaun ka irmán ida hetan dixiplina husi kongregasaun tanba nia la halo tuir Maromak nia Ukun-Fuan balu? Iha situasaun hanesan neʼe, karik ema balu neʼebé tama lia-loos tanba sira haree Jeová nia atan sira-nia hahalok diʼak, bele sai laran-tun no lakon sira-nia solok.

Sasán mundu nian mós bele halakon ita-nia solok. Diabu Satanás bele uza ninia mundu hodi bosok ita katak ita presiza tan sasán barak, maibé tuir loloos ita la presiza sasán sira-neʼe. Tan neʼe diʼak atu rona ba Jesus nia avizu neʼe: “Ema ida la bele sai atan ba naʼi-ulun rua, tanba nia sei odi ida no hadomi ida seluk, ka sei apoia ida no hakribi ida seluk. Imi la bele sai atan ba Maromak no ba Rikusoin.” (Mateus 6:24) Ita la bele serbí  Jeová ho solok se ita mós hakarak atu halibur sasán sira husi Satanás nia mundu aat neʼe.

Ba ema neʼebé hadomi Jeová, serbí nia laʼós buat todan. (1 João 5:3) Jesus hatete: “Mai besik haʼu, imi hotu neʼebé kole tan serbisu makaʼas no neʼebé lori naha todan. Haʼu sei fó kmaan ba imi. Sai haʼu-nia dixípulu no aprende husi haʼu, tan haʼu laran-maus no haraik-an, no imi sei hetan kmaan. Basá sai haʼu-nia dixípulu laʼós buat neʼebé susar, no buat neʼebé haʼu husu imi atu lori la todan.” (Mateus 11:28-30) Loos duni, sai kristaun neʼebé loos fó kmaan no lori solok ba ita. Ita iha duni razaun barak atu serbí Jeová ho kontente. Agora mai ita koʼalia kona-ba razaun importante tolu neʼebé lori solok ba ita hodi serbí Jeová.—Habacuque (Habakuk) 3:18.

Ida neʼebé ita serbí mak moris nia Hun, Maromak kontente nian. (Apóstolu 17:28; 1 Timóteo 1:11) Ita presiza hatene katak ita iha tanba ita-nia Kriadór. Tan neʼe, maski ita hetan batizmu ba tinan barak ona mós ita hakarak kontinua atu serbí Jeová ho kontente.

Haree toʼok kona-ba Héctor nia ezemplu. Irmaun neʼe serbí Jeová nuʼudar katuas neʼebé vizita kongregasaun ba tinan 40 ona. Maski idade mós nia sei kontinua serbí Jeová ho kontente. (Salmo [Mazmur] 92:12-14) Ninia feen nia moras fó impaktu ba nia atu halaʼo atividade adorasaun nian, maibé nia nunka lakon ninia solok. Nia dehan: “Maski haʼu sente triste bainhira haree haʼu-nia feen nia moras sai aat ba beibeik no atu tau matan ba nia mós laʼós buat kmaan mai haʼu, maibé haʼu la husik susar sira-neʼe halakon haʼu-nia solok atu serbí nafatin Jeová. Hatene katak haʼu-nia moris mai husi Jeová, Ida-neʼebé kria ema tanba ninia hakarak, neʼe ajuda haʼu atu hadomi liu Jeová no serbí nia ho laran tomak. Haʼu hakaʼas an hodi haklaken beibeik, no tau haʼu-nia esperansa ba Maromak nia Ukun, hodi nuneʼe haʼu la bele lakon haʼu-nia solok.”

Jeová fó ona Jesus nia sakrifísiu, hatene kona-ba neʼe halo ita moris ho kontente. Eskritura hatete: “Maromak hadomi tebes mundu toʼo fó nia Oan-Mane mesak, atu nuneʼe ema hotu neʼebé hatudu fiar iha nia sei la lakon maibé hetan moris rohan-laek.” (João 3:16) Loos duni, liuhusi tau fiar ba Jeová nia arranju domin neʼe mak ita-nia sala bele hetan perdua no ita bele hetan moris ba nafatin. Ita agradese tebes ba Jeová tan razaun neʼe. No tanba agradese ba Jesus nia sakrifísiu mak book ita atu serbí Jeová ho solok, loos ka lae?

Irmaun ida naran Jesús, nia hela iha Méxiku, nia dehan: “Uluk, haʼu hanesan serbisu nia atan.  Dala ruma, haʼu serbisu husi loron toʼo kalan-boot maski laiha ema ida mak obriga haʼu atu halo nuneʼe. Haʼu halo hanesan neʼe tan deʼit osan. Maibé, ikusmai haʼu aprende kona-ba Jeová no oinsá nia haruka ninia Oan-Mane mate ba ema. Haʼu hakarak tebes atu serbí nia. Tan neʼe haʼu deside dedika haʼu-nia moris ba Jeová, no sai husi haʼu-nia serbisu neʼebé haʼu halaʼo ona ba tinan 28 hodi haʼu bele serbí Jeová tempu-tomak.” Komesa husi tempu neʼebá irmaun neʼe serbí Jeová ho solok tebes.

Hahalok santu lori solok, laʼós triste. Sei hanoin-hetan ita moris oinsá antes ita aprende kona-ba Jeová? Apóstolu Paulo fó-hanoin ba ema kristaun sira iha Roma katak uluk sira atan ba sala, maibé ikusmai sira ‘sai livre ona husi sala no sai atan ba Maromak, ida-neʼe lori sira ba moris santu’, neʼebé lori mós ba moris rohan-laek nian. (Roma 6:17-22) Ita mós moris tuir dalan neʼebé santu, dalan neʼebé livre husi rezultadu aat neʼebé mai husi hahalok la morál no violénsia. Ida-neʼe mak moris neʼebé solok duni!

Mai ita haree toʼok ezemplu ida kona-ba Jaime. Nia mak ema neʼebé la fiar katak Maromak iha no nia fiar ba evolusaun. Nia atleta bokse ida. Bainhira nia foin tuir reuniaun sira, nia gosta tebes haree irmaun-irmán sira hatudu domin ba malu. Jaime presiza husu uluk ba Jeová atu ajuda nia iha fiar ba Jeová hodi nia bele troka ninia dalan moris neʼe. Jaime hatete: “Neineik-neineik haʼu hetan duni razaun tanbasá haʼu bele fiar katak Aman neʼebé domin, Maromak laran-sadiʼa nian iha duni. Moris tuir Jeová nia morál neʼebé loos proteje duni haʼu. Se haʼu mak seidauk troka, karik haʼu mós mate ona hanesan haʼu-nia maluk atleta bokse balu. Tempu sira neʼebé haʼu uza hodi serbí Jeová mak tempu neʼebé haksolok liu hotu.”

Ita tenkesér sente oinsá nuʼudar ita hein daudauk ba mundu aat neʼe nia rohan? Hanoin kona-ba liafuan sira husi eskritura neʼe: “Ema neʼebé kari ho espíritu sei koʼa moris rohan-laek husi espíritu neʼe.” Tan neʼe, “mai ita la para atu halo buat neʼebé diʼak, tanba se ita la sai baruk, ita sei koʼa iha tempu neʼebé loos”. (Galásia 6:8, 9) Mai ita kontinua tahan ho Jeová nia ajuda, no hakaʼas an atu haburas hahalok sira neʼebé mak sei ajuda ita moris liu “terus boot”, no kontinua atu serbí Jeová ho solok maski ita hasoru susar oioin.—Apokalipse 7:9, 13, 14; Tiago 1:2-4.

Ita bele fiar katak ita la tahan ho saugati deʼit, tanba Maromak hatene ita-nia domin no serbisu neʼebé ita halo ba nia no ba ninia naran. Se ita mak kontinua serbí Jeová ho solok, ita mós bele koʼalia liafuan neʼebé David hatete: “Haʼu sempre hanoin kona-ba Jeová. Tanba nia iha haʼu-nia liman sorin loos, haʼu sei nunka sai nakdedar. Tan neʼe haʼu-nia laran haksolok, haʼu-nia moris tomak kontente. No haʼu hela ho seguru.”—Salmo (Mazmur) 16:8, 9.