Ita bele ka lae hatán ba pergunta sira tuirmai neʼebé bazeia ba Livru Haklaken 2022:

Ita sei hetan bensaun saida se ita uza tempu atu koʼalia no rona ba Jeová no mós hanoin kona-ba nia?

Ita sei halo desizaun diʼak, sai mestre diʼak, ita-nia fiar sai metin liután, no hadomi liután Jeová.​—w22.01, p. 30-31.

Aprende atu tau fiar ba Jeová no ba ema neʼebé nia hili bele lori benefísiu saida?

Agora mak tempu atu aprende tau fiar ba Maromak nia dalan sira hodi la duvida ho katuas sira-nia matadalan no desizaun sira. Bainhira terus boot hahú, ita sei prontu atu halo tuir, maski karik ita sente matadalan neʼebé ita simu mak oin-seluk.​—w22.02, p. 4-6.

Anju ida hakarak hatoʼo saida bainhira nia koʼalia ba Zacarias kona-ba “Zorobabel kaer tali-prumu”? (Zac 4:8-10)

Vizaun neʼe fó kmaan ba Maromak nia povu katak sira sei harii duni templu simples ida no Maromak kontente ho ida-neʼe.​—w22.03, p. 16-17.

Oinsá atu sai “nuʼudar ezemplu . . . liuhusi [ita-nia] koʼalia”? (1 Tim 4:12)

Ita koʼalia ho laran-diʼak no respeitu bainhira haklaken, kanta ho laran tomak, fó komentáriu beibeik iha reuniaun, koʼalia ho onestu no hametin ema seluk no mós hadook an husi liafuan aat oioin.​—w22.04, p. 6-9.

Tanbasá Apokalipse 13:1, 2 temi animál fuik ida deʼit ho karaterístiku hotu husi animál fuik haat (ka ukun sira) neʼebé temi iha Daniel kapítulu 7?

Animál fuik iha Apokalipse 13 la reprezenta ukun ida deʼit, hanesan Roma. Maibé neʼe reprezenta governu hotu iha mundu tomak neʼebé ukun ema toʼo agora.​—w22.05, p. 9.

Saida mak dalan importante liu atu hatudu katak ita tau fiar ba Jeová nia justisa?

Se ema ida insulta ita, hakanek ita-nia laran, ka halo sala hasoru ita, koko toʼok atu la rai hirus no odi, maibé entrega ida-neʼe ba Jeová. Nia sei hadiʼa problema hotu neʼebé mosu tanba ema nia sala.​—w22.06, p. 10-11.

Irmaun neʼebé hatoʼo orasaun iha reuniaun tenke hanoin-hetan saida?

Labele uza orasaun atu fó konsellu ka atu fó avizu ba kongregasaun. Labele “uza liafuan barabarak” liuliu bainhira halo orasaun atu loke reuniaun. (Mt 6:7)​—w22.07, p. 24-25.

Iha dalan oinsá mak “sira neʼebé halo hahalok aat” sei hetan “moris-hiʼas atu hetan tesi-lia”? (João 5:29)

Sira sei la hetan kastigu bazeia ba sira-nia hahalok iha pasadu. Jesus sei ezamina sira-nia hahalok depois sira hetan tiha moris-hiʼas.​—w22.09, p. 18.

Irmaun Rutherford hatete saida iha reuniaun boot iha fulan-Setembru tinan 1922?

Iha reuniaun boot iha Cedar Point, Ohio, Estadus Unidus, nia fó sai: “Haree bá, Liurai neʼe ukun daudaun ona! Imi mak ninia atan sira neʼebé atu fó sai kona-ba neʼe. Tan neʼe, haklaken, haklaken, haklaken, kona-ba Liurai no ninia Ukun!”​—w22.10, p. 3-5.

Tuir Isaias kapítulu 30, saida mak dalan tolu neʼebé Jeová ajuda ita atu tahan?

Kapítulu 30 hatudu katak Jeová (1) rona no hatán ba ita-nia orasaun, (2) fó matadalan mai ita, no (3) fó bensaun ba ita agora no iha futuru.​—w22.11, p. 9.

Oinsá mak liafuan iha Salmo 37:10, 11, 29 sai loos ona iha tempu antigu no mós sei sai loos iha futuru?

David nia liafuan sira hatudu bensaun neʼebé ema Izraél hetan, hanesan iha Salomão nia ukun. Jesus koʼalia kona-ba paraízu iha futuru no nia mós temi versíkulu 11. (Mt 5:5; Lc 23:43)​—w22.12, p. 8-10, 14.