LISAUN ESTUDU 16
KNANANUK 87 Mai, simu kmaan bá!
Diʼak ba ita atu hakbesik ba malu!
“Haree bá! Diʼak tebes no kmanek loos bainhira maun-alin sira hela hamutuk ho unidade!”—SAL 133:1.
OBJETIVU
Buka-hatene oinsá atu hakbesik ba malu no bensaun saida deʼit mak ita hetan kuandu ita halo nuneʼe.
1-2. Saida mak importante ba Jeová, no nia hakarak ita atu halo saida?
BUAT ida neʼebé importante tebes ba Jeová mak dalan neʼebé ita trata ema seluk. Jesus hatete katak ita tenke hadomi ita-nia maluk hanesan ita-nia an rasik. (Mt 22:37-39) Neʼe inklui hatudu laran-diʼak ba ema neʼebé la serbí Jeová. Bainhira ita hatudu laran-diʼak, ita banati-tuir Maromak Jeová neʼebé “halo loro-matan saʼe ba ema aat no mós ba ema diʼak, no halo udan tun ba ema laran-loos no mós ba ema aat”.—Mt 5:45.
2 Jeová hadomi ema hotu, maibé liuliu sira neʼebé halo buat neʼebé loos. (João 14:21) Nia hakarak ita banati-tuir nia. Nia haruka ita atu hatudu katak ita ‘hadomi tebetebes’ irmaun-irmán sira. (1 Ped 4:8; Rom 12:10) Bainhira ita hanoin kona-ba hatudu domin hanesan neʼe, karik ita hanoin kona-ba sentimentu neʼebé ita hatudu ba família ka belun ida neʼebé ita hadomi.
3. Saida mak ita tenke hanoin-hetan kona-ba domin?
3 Domin mak hanesan ai-horis ida, presiza atu tau matan hodi nia bele kontinua buras. Apóstolu Pau fó konsellu ba ema Kristaun sira: “Kontinua hadomi malu hanesan maun-alin.” (Ebr 13:1) Jeová hakarak ita atu kontinua haburas ita-nia domin ba malu. Iha lisaun neʼe, ita sei koʼalia kona-ba tanbasá ita presiza hakbesik liután ba maluk fiar-naʼin sira no oinsá ita bele kontinua halo ida-neʼe.
TANBASÁ PRESIZA HAKBESIK LIUTÁN BA MALU
4. Tuir Salmo 133:1, oinsá mak ita bele kontinua hafolin unidade entre irmaun-irmán sira? (Haree mós foto.)
4 Lee Salmo 133:1. Ita konkorda ho hakerek-naʼin ba salmo neʼebé dehan katak habelun ho sira neʼebé hadomi Jeová mak “diʼak tebes” no “kmanek loos”. Maibé hanesan ema ida bele deʼit la hafolin ai-hun furak neʼebé nia haree loroloron, ita mós bele deʼit haree unidade furak entre irmaun-irmán sira mak hanesan buat baibain deʼit. Ita haree beibeik ita-nia irmaun-irmán sira, karik dala barak iha semana ida. Oinsá mak ita bele kontinua hafolin sira? Ita-nia domin ba irmaun-irmán sira sei sai boot se ita uza tempu atu hanoin kona-ba oinsá mak ema ida-idak iha folin ba kongregasaun no mós mai ita.
Hafolin unidade neʼebé furak entre irmaun-irmán sira (Haree parágrafu 4)
5. Bainhira ema seluk haree domin entre Jeová nia povu, oinsá neʼe bele book sira?
5 Ema balu neʼebé foin tuir reuniaun ba dala primeiru admira kona-ba domin neʼebé ita hatudu ba malu. Neʼe bele halo sira hanoin katak sira hetan ona lia-loos. Jesus hatete: “Se imi hadomi malu, ema hotu sei hatene katak imi mak haʼu-nia dixípulu.” (João 13:35) Hanoin toʼok esperiénsia husi Chaithra, universidade oan neʼebé estuda ho Testemuña ba Jeová. Nia simu konvite atu tuir reuniaun boot. Depois tuir tiha ba loron primeiru, nia hatete ba ninia mestra Bíblia: “Haʼu-nia inan-aman nunka hakoʼak haʼu. Maibé iha reuniaun boot neʼe, ema naʼin-52 mak hakoʼak haʼu iha loron ida deʼit! Haʼu sente Jeová nia domin liuhusi família espirituál neʼe. Haʼu hakarak sai parte ba família neʼe.” Chaithra kontinua halo mudansa no hetan batizmu iha tinan 2024. Sin, bainhira ema foun haree ita-nia hahalok diʼak, inklui domin neʼebé ita hatudu ba malu, dala barak neʼe book sira atu serbí Jeová.—Mt 5:16.
6. Oinsá mak hakbesik ba irmaun-irmán sira bele proteje ita?
6 Bainhira ita hakbesik ba irmaun-irmán sira, neʼe bele proteje ita. Paulo anima maluk Kristaun sira: “Kontinua fó aten-brani ba malu loroloron . . . atu nuneʼe imi labele sai ulun-toos tanba sala nia kbiit atu lohi imi.” (Ebr 3:13) Se ita sente laran-kraik tanba susar atu kontinua halo buat neʼebé loos, karik Jeová bele book irmaun-irmán sira neʼebé nota kona-ba neʼe atu ajuda ita tuir ita-nia presiza. (Sal 73:2, 17, 23) Ajuda hanesan neʼe mak diʼak duni mai ita.
7. Saida mak ligasaun entre domin no unidade? (Koloso 3:13, 14)
7 Ita sai parte ba grupu husi ema sira neʼebé hakaʼas an atu hatudu domin ba malu, tan neʼe ita hetan bensaun barak. (1 João 4:11) Porezemplu, domin book ita atu “kontinua hatudu pasiénsia ba malu”, no neʼe haburas unidade entre maluk Kristaun sira. (Lee Koloso 3:13, 14; Éf 4:2-6) Tan neʼe, iha reuniaun sira, ita bele sente domin neʼebé ita labele hetan iha fatin seluk iha mundu neʼe.
HATUDU RESPEITU BA MALU
8. Oinsá mak Jeová ajuda ita atu iha unidade?
8 Unidade neʼebé ita iha mak hanesan milagre ida. Jeová halo ida-neʼe akontese maski ita la perfeitu. (1 Kor 12:24, 25) Bíblia hatete: “Maromak rasik hanorin ona imi atu hadomi malu.” (1 Tes 4:9) Neʼe katak liuhusi Bíblia, Jeová fó-hatene ita ho klaru saida mak ita presiza halo atu bele hakbesik liután ba malu. Ita bele simu hanorin husi Maromak rasik liuhusi aprende ninia matadalan sira ho didiʼak no aplika ida-neʼe. (Ebr 4:12; Tgo 1:25) No neʼe mak buat neʼebé Testemuña ba Jeová hakaʼas an atu halo.
9. Saida mak ita aprende husi Roma 12:9-13 kona-ba hatudu respeitu ba malu?
9 Oinsá mak Bíblia hanorin ita atu hakbesik liután ba malu? Hanoin toʼok saida mak Paulo hatete kona-ba neʼe iha Roma 12:9-13. (Lee.) Liafuan “buka uluk atu hatudu respeitu ba malu” katak sá? Ita presiza buka oportunidade atu hatudu katak ita “hadomi malu tebetebes” iha dalan oioin, hanesan hodi fó perdua ba malu, hatudu laran-diʼak, no laran-luak. (Éf 4:32) Ita la presiza hein irmaun-irmán sira mak hakbesik uluk mai ita. Ita bele “buka uluk” atu halo ida-neʼe. Jesus hatete: “Kontente liu atu fó duké simu.”—Após 20:35.
10. Oinsá mak ita bele badinas atu “hatudu respeitu ba malu”? (Haree mós foto.)
10 Interese mak depois Paulo fó-hatene ita kona-ba buka uluk atu hatudu respeitu ba malu, nia mós anima ita atu “sai badinas bá, keta sai baruk-teen”. Ema neʼebé badinas mak ema neʼebé prontu halo serbisu makaʼas. Bainhira simu knaar ruma, nia halo ida-neʼe ho didiʼak. Provérbios 3:27, 28 hatete: “Keta tahan netik buat diʼak ba ema neʼebé merese atu simu ajuda se ó iha kbiit atu ajuda.” Tan neʼe, bainhira ita haree ema seluk presiza ajuda, ita sei halo buat naran deʼit neʼebé ita bele atu ajuda ema neʼe. Ita sei la dada tempu no hanoin katak husik ema seluk mak ajuda nia.—1 João 3:17, 18.
Ita presiza buka uluk atu ajuda irmaun-irmán sira neʼebé presiza (Haree parágrafu 10)
11. Saida mak bele ajuda ita atu hakbesik ba malu?
11 Dalan seluk atu hatudu respeitu ba malu mak hodi lalais atu fó perdua ba ema neʼebé hakanek ita-nia laran. Éfeso 4:26 hatete: “Keta husik loro-matan tun bainhira imi sei hirus hela.” Tanbasá? Versíkulu 27 hatete katak se ita halo nuneʼe, ita sei “fó oportunidade ba Diabu”. Iha Bíblia, Jeová fó-hanoin beibeik ita atu fó perdua ba malu. Koloso 3:13 anima ita atu “kontinua . . . fó perdua ba malu ho laran tomak”. Dalan ida neʼebé diʼak liu atu hakbesik ba malu mak hodi fó perdua. Bainhira ita halo nuneʼe, ita ajuda ‘kaer metin nafatin unidade neʼebé ita hetan ona liuhusi espíritu hodi moris iha dame laran’. (Éf 4:3) Klaru katak bainhira ita fó perdua ba ema seluk, ita ajuda Jeová nia povu atu haburas dame no unidade.
12. Oinsá mak Jeová ajuda ita atu fó perdua ba ema seluk?
12 Klaru katak dala ruma ita sente susar atu fó perdua ba ema neʼebé hakanek ita. Maibé ita bele halo ida-neʼe ho ajuda husi Maromak nia espíritu. Depois Bíblia anima ita atu “hadomi malu tebetebes hanesan maun-alin rasik” no atu “sai badinas”, Bíblia mós fó-hanoin ita atu ‘sai laran-manas ho Maromak nia espíritu’. (Rom 12:11) Tan neʼe, Maromak nia espíritu bele ajuda ita atu hadomi malu tebetebes no prontu fó perdua ba malu ho laran. Tan neʼe, ita harohan ba Jeová atu ajuda ita.—Lc 11:13.
“LABELE HAKETAK MALU”
13. Saida mak bele haketak ita?
13 Kongregasaun harii husi “ema oioin” neʼebé mai husi situasaun moris la hanesan. (1 Tim 2:3, 4) Tan neʼe, karik ita ida-idak iha desizaun neʼebé la hanesan kona-ba buat balu, hanesan hatais no hadiʼa an, tratamentu saúde, ka atividade halimar nian. Se ita la kuidadu, diferensa sira-neʼe bele haketak ita. (Rom 14:4; 1 Kor 1:10) Tanba Maromak hanorin ona ita atu hadomi malu, ita tenke kuidadu hodi la obriga ema seluk atu halo tuir ita-nia desizaun.—Flp 2:3.
14. Ita presiza koko beibeik atu halo saida, no tanbasá?
14 Ita mós bele hametin unidade iha kongregasaun hodi koko atu fó kmaan no hametin ema seluk iha tempu hotu. (1 Tes 5:11) Foin lalais neʼe, ema barak neʼebé la ativu ka hasai husi kongregasaun fila fali mai kongregasaun. Ita simu sira ho domin! (2 Kor 2:8) Haree toʼok saida mak akontese ba irmán ida neʼebé la ativu durante tinan sanulu no tuir fali reuniaun. Nia hatete: “Irmaun-irmán sira hasé haʼu hodi hatudu oin-midar no kaer liman ho haʼu.” (Após 3:19) Oinsá mak buat simples hanesan neʼe kona nia? Nia hatete: “Neʼe halo haʼu sente katak Jeová ajuda haʼu atu kontente fali.” Se ita koko atu anima ema seluk, Kristu bele uza ita atu fó kmaan ba ema neʼebé “kole tanba serbisu makaʼas no lori naha todan”.—Mt 11:28, 29.
15. Saida tan mak ita bele halo atu haburas unidade? (Haree mós foto.)
15 Dalan ida tan atu haburas unidade mak liuhusi ita-nia liafuan. Job 12:11 hatete: “Tilun koko liafuan sira hanesan nanál koko hahán, loos ka lae?” Hanesan ema neʼebé matenek atu teʼin sempre koko ninia hahán nia gostu antes oferese ba ema seluk, ita mós presiza hanoin didiʼak ita-nia liafuan antes koʼalia. (Sal 141:3) Ita-nia objetivu mak atu koʼalia liafuan neʼebé hametin, fó kmaan, no lori “benefísiu ba sira neʼebé rona”.—Éf 4:29.
Hanoin uluk Ita-nia liafuan antes koʼalia (Haree parágrafu 15)
16. Liuliu sé mak presiza hakaʼas an atu koʼalia liafuan neʼebé hametin malu?
16 Liuliu laʼen no inan-aman sira presiza hakaʼas an atu koʼalia iha dalan neʼebé bele hametin malu. (Kol 3:19, 21; Tito 2:4) Katuas kongregasaun mós presiza sai ema neʼebé fó kmaan no hametin Jeová nia bibi sira. (Isa 32:1, 2; Gal 6:1) Lia-dadolin ida husi Bíblia dehan: “Liafuan neʼebé koʼalia iha tempu neʼebé loos mak furak tebetebes!”—Prov 15:23.
DOMIN “HO HAHALOK NO LIA-LOOS”
17. Oinsá mak ita bele hatene katak ita-nia domin ba irmaun-irmán sira mai duni husi laran?
17 Apóstolu João anima ita atu “hatudu domin laʼós ho liafuan ka ibun deʼit, maibé ho hahalok no lia-loos”. (1 João 3:18) Domin neʼebé ita hatudu ba irmaun-irmán sira tenke mai husi laran. Oinsá atu halo ida-neʼe? Kuandu ita gasta tempu liután ho irmaun-irmán sira, ita sei sai besik liután ba malu no ita-nia domin sei sai metin liután. Tan neʼe, halo buat ruma atu gasta tempu hamutuk ho ema seluk iha reuniaun sira no mós iha serbisu haklaken. Uza Ita-nia tempu atu vizita sira. Kuandu ita halo nuneʼe, ita hatudu katak “Maromak rasik hanorin ona [ita] atu hadomi malu”. (1 Tes 4:9) No ita mós bele hatete: “Diʼak tebes no kmanek loos bainhira maun-alin sira hela hamutuk ho unidade!”—Sal 133:1.
KNANANUK 90 Fó laran-manas ba malu
