“Testemuña sira hatudu laran-diʼak ba ema no mós ba haʼu-nia asu sira. Loron ida, irmán Elaine neʼebé haklaken ho karrosa, fó biskuit ba haʼu-nia asu sira. No tempu ida-idak neʼebé haʼu laʼo ho haʼu-nia asu sira, asu sira sempre hakbesik ba karrosa atu hetan biskuit.

“Fulan balu liutiha, Testemuña sira nafatin fó biskuit ba haʼu-nia asu sira no haʼu mós koʼalia uitoan ho sira. Maibé haʼu lakohi koʼalia barak ho sira. Haʼu tinan 70 liu, no haʼu ladún hatene sira fiar saida. Igreja Protestante barak halo haʼu la kontente, tan neʼe haʼu hanoin katak diʼak liu estuda Bíblia mesak.

“Durante tempu neʼe, haʼu mós haree Testemuña sira haklaken ho karrosa iha fatin oioin iha sidade. Sira mós hatudu laran-diʼak. Sira sempre uza Bíblia atu hatán haʼu-nia pergunta sira. Tan neʼe haʼu komesa konfia sira.

“Loron ida, irmán Elaine husu: ‘Ita fiar katak animál sira mak prezente husi Maromak ka lae?’ Haʼu hatán: ‘Sin.’ Tuirmai nia lee Isaias 11:6-9. Hahú husi tempu neʼebá, haʼu hakarak aprende kona-ba Bíblia, maski nuneʼe haʼu lakohi foti publikasaun ruma.

“Iha loron sira tuirmai, haʼu koʼalia ho irmán Elaine no ninia laʼen Brent. Ami koʼalia ba tempu uitoan deʼit, maibé haʼu aprende buat oioin. Sira fó sujestaun ba haʼu atu lee livru Mateus toʼo Apóstolu atu bele komprende hahalok saida mak ema Kristaun presiza hatudu. Haʼu halo nuneʼe duni. Lakleur, haʼu hahú estuda Bíblia ho Brent no Elaine. Neʼe mak iha tinan 2016 nia klaran.

“Semana-semana, haʼu hein namanas ba haʼu-nia estudu Bíblia no mós reuniaun sira iha Reuniaun-Fatin. Haʼu sente kontente tanba bele aprende saida mak Bíblia hanorin. Tinan ida liutiha, haʼu hetan batizmu nuʼudar Testemuña ida. Agora haʼu tinan 79 no haʼu kontente tebes tanba hetan ona relijiaun neʼebé loos. Jeová haraik bensaun mai haʼu hodi ajuda haʼu sai parte ba ninia família.”