1. Oinsá mak Maromak nia povu hatudu domin ba malu?

MAROMAK nia povu mak família espirituál ida neʼebé hatudu domin. (1 João 4:16, 21) Dala ruma sira halo sakrifísiu neʼebé boot ba sira-nia irmaun-irmán sira, maibé dala barak liu sira hatudu domin liuhusi buat kiʼik neʼebé sira halo. Porezemplu, karik sira koʼalia buat neʼebé diʼak ba sira-nia irmaun-irmán sira ka haree sira iha dalan neʼebé diʼak. Kuandu ita hanoin ema seluk nia sentimentu, ita “banati-tuir Maromak nuʼudar ninia oan doben sira”.—Éfeso 5:1.

2. Oinsá mak Jesus banati-tuir ninia Aman nia domin?

² Jesus banati-tuir ninia Aman iha dalan neʼebé perfeitu. Nia sempre hatudu laran-diʼak ba ema seluk. Nia dehan: “Mai besik haʼu, imi hotu neʼebé kole tan serbisu makaʼas no neʼebé lori naha todan. Haʼu sei fó kmaan ba imi.” (Mateus 11:28, 29) Se ita banati-tuir Jesus hodi “hanoin ema kiʼik sira”, ita sei halo kontente Jeová, no ita mós sei sai kontente. (Salmo [Mazmur] 41:1) Iha lisaun neʼe, ita sei haree oinsá ita bele hatudu katak ita hanoin ema seluk nia sentimentu hanesan ita-nia família, irmaun-irmán  sira, no ema neʼebé ita hasoru iha haklaken-fatin.

3. Oinsá mak laʼen bele hatudu katak nia hanoin feen nia sentimentu? (Haree dezeñu iha leten.)

³ Laʼen sira presiza hatudu ezemplu kona-ba hanoin família nia sentimentu. (Éfeso 5:25; 6:4) Bíblia hatete katak laʼen sira tenke hanoin no komprende sira-nia feen. (1 Pedro 3:7) Laʼen neʼebé komprende ninia feen la hanoin katak nia diʼak liu ninia feen, maski nia iha buat barak mak la hanesan ninia feen. (Gênesis [Kejadian] 2:18) Nia mós presiza hanoin feen nia sentimentu no hatudu dignidade no respeitu. Feen ida husi rai-Kanadá koʼalia kona-ba ninia laʼen hodi hatete: “Nia nunka hanoin haʼu-nia sentimentu la importante ka hatete: ‘Ó labele sente hanesan neʼe.’ Nia sempre rona didiʼak ba haʼu. Kuandu nia ajuda haʼu hadiʼa haʼu-nia hanoin ruma, nia sempre halo ida-neʼe ho laran-diʼak.”

4. Oinsá mak laʼen hatudu katak nia hanoin ninia feen nia sentimentu iha dalan neʼebé nia haree feto seluk?

⁴ Laʼen neʼebé hanoin ninia feen nia sentimentu nunka hatudu oin-moris ka hatudu interese neʼebé sala ba feto seluk. Nia mós la halo hanesan neʼe liuhusi média sosiál ka internét. (Jó [Ayub] 31:1) Nia hatudu laran-metin ba ninia feen tanba nia hadomi ninia feen, hadomi Jeová no odi buat neʼebé aat.—Lee Salmo (Mazmur) 19:14; * 97:10. *

5. Oinsá mak feen bele hatudu katak nia hanoin ninia laʼen nia sentimentu?

⁵ Kuandu laʼen banati-tuir ninia ulun, Jesus Kristu nia ezemplu kona-ba hatudu domin, neʼe sei halo fasil ba ninia feen atu hatudu “respeitu kleʼan” ba nia. (Éfeso 5:22-25, 33) No kuandu feen hatudu respeitu ba nia, feen sei hakaʼas an atu komprende laʼen nia sentimentu se laʼen okupadu ho knaar iha kongregasaun ka hanoin barak kona-ba problema ruma. Laʼen ida iha rai-Bretaña hatete: “Dala ruma haʼu-nia feen haree husi haʼu-nia hahalok katak haʼu hanoin daudauk kona-ba buat ruma. Depois nia sei aplika prinsípiu husi Provérbios 20:5, maski nia presiza hein toʼo tempu neʼebé loos atu husu kona-ba haʼu-nia hanoin, maibé ikusmai ami koʼalia kona-ba ida-neʼe, se laʼós kona-ba buat neʼebé haʼu la bele koʼalia ba nia.”

6. Oinsá mak ita hotu bele fó laran-manas ba labarik sira atu hanoin ema seluk, no neʼe lori benefísiu saida ba labarik sira?

⁶ Kuandu inan-aman hanoin kona-ba sira ida-idak nia sentimentu, sira sei hatudu ezemplu neʼebé diʼak ba oan. Sira mós presiza hanorin oan atu hanoin ema seluk. Porezemplu, inan-aman bele hanorin oan atu la bele halai iha Reuniaun-Fatin. Ka kuandu ransu atu han hamutuk ho ema seluk, sira bele hatete ba oan atu hein toʼo ema boot suru uluk. Tuir loloos ema hotu iha kongregasaun bele fó ajuda ba inan-aman sira. Porezemplu, kuandu labarik ida halo buat neʼebé diʼak, hanesan loke odamatan ba ema seluk, ita tenke gaba nia. Halo nuneʼe sei ajuda labarik neʼe sente diʼak no aprende katak “kontente liu atu fó duké simu”.—Apóstolu 20:35.

7. Oinsá Jesus hatudu nia hanoin mane tilun-diuk ida nia sentimentu, no ita bele aprende saida husi Jesus nia ezemplu neʼe?

⁷ Loron ida kuandu Jesus iha área Dekápolis nian, “ema lori ba Jesus mane ida neʼebé diuk no nanál toos”. (Marcos 7:31-35)  Jesus kura nia, maibé laʼós iha ema nia oin. Tanbasá? Tanba ema neʼe tilun-diuk, karik nia sente moe iha ema barak nia oin. Jesus komprende ninia sentimentu, no “nia lori mane neʼe dook” no kura nia iha neʼebá. Maski ita la bele halo milagre, maibé ita tenke hanoin kona-ba irmaun-irmán sira-nia presiza no sentimentu no hatudu laran-diʼak ba sira. Apóstolu Paulo dehan: “Mai ita hanoin malu hodi ajuda malu atu hatudu domin no hahalok diʼak.” (Ebreu 10:24) Jesus komprende mane tilun-diuk nia sentimentu no hatudu laran-diʼak ba nia. Jesus hatudu ezemplu diʼak tebes ba ita.

8, 9. Oinsá mak ita bele hatudu katak ita hanoin sira neʼebé idade no aleijadu? Fó toʼok ezemplu balu.

⁸ Hanoin ema idade no aleijadu sira-nia sentimentu. Hahalok importante liu hotu husi kongregasaun mak domin, laʼós badinas atu kumpre buat barak. (João 13:34, 35) Domin book ita atu hakaʼas an hodi ajuda irmaun-irmán sira neʼebé idade ka aleijadu atu bá tuir reuniaun no haklaken. Ita ajuda sira maski iha tempu neʼebé ladún diʼak ba ita ka sira la bele halo buat barak. (Mateus 13:23) Michael uza kadeira roda, nia agradese tebes ba ajuda neʼebé nia hetan husi família no irmaun-irmán sira husi kongregasaun. Nia dehan: “Tanba domin neʼebé sira hatudu, haʼu konsege tuir reuniaun barak no haklaken beibeik. Haʼu gosta liuliu haklaken públiku.”

⁹ Iha Betel barak, iha irmaun-irmán laran-metin sira neʼebé idade ka laʼo ladún diʼak ona. Irmaun sira neʼebé tau matan hatudu domin hodi halo arranju ba sira atu haklaken liuhusi karta ka telefone. Bill idade 86, nia hakerek karta ba ema sira neʼebé hela iha fatin dook, nia hatete: “Ami agradese tebes ba priviléjiu atu bele hakerek karta.” Nancy neʼebé besik idade 90 hatete: “Haʼu nunka hanoin katak hakerek karta mak hanesan hatama surat ba envelope deʼit. Neʼe mak dalan ida atu haklaken. Ema presiza hatene kona-ba lia-loos!” Ethel moris iha tinan 1921, nia dehan: “Haʼu-nia isin moras beibeik. Dala ruma hatais roupa deʼit mós susar tebes ba haʼu.” Maski nuneʼe, nia gosta haklaken liuhusi telefone no hetan vizita fali neʼebé diʼak. Barbara idade 85 hatete: “Haʼu sente susar tebes atu haklaken beibeik tanba haʼu-nia saúde ladún diʼak. Maibé haklaken liuhusi telefone ajuda haʼu atu koʼalia ho ema seluk. Obrigadu Jeová!” Maizumenus iha tinan ida nia laran, grupu ida husi ema neʼebé idade uza oras 1.228 atu haklaken, hakerek karta 6.265, telefone ema naʼin–2.000 liu, no fahe publikasaun hamutuk 6.315. Ita bele fiar katak sira-nia hakaʼas-an halo Jeová kontente tebes.—Provérbios (Amsal) 27:11.

10. Oinsá mak ita bele ajuda irmaun-irmán sira hetan benefísiu husi reuniaun?

¹⁰ Hanoin ema seluk kuandu tuir reuniaun sira. Ita hakarak ajuda irmaun-irmán sira atu hetan benefísiu liután husi reuniaun, tan neʼe ita presiza hanoin sira-nia sentimentu. Oinsá? Dalan ida mak toʼo iha reuniaun tuir oras atu la atrapalla ema seluk. Dala ruma buat balu bele akontese neʼebé halo ita toʼo tarde. Maibé se ita mak toman atu toʼo tarde beibeik, ita tenke hanoin oinsá mak ida-neʼe bele fó impaktu ba irmaun-irmán sira no mudansa saida mak ita bele halo atu hatudu katak ita hanoin ita-nia irmaun-irmán sira. Hanoin-hetan mós katak Jeová no Jesus mak konvida ita atu tuir reuniaun. (Mateus 18:20) Tan neʼe ita tenke hatudu respeitu ba sira hodi toʼo sedu.

11. Tanbasá mak irmaun sira neʼebé iha parte iha reuniaun tenke halo tuir matadalan neʼebé temi iha 1 Korinto 14:40?

¹¹ Se ita hanoin irmaun-irmán sira-nia sentimentu, ita sei halo tuir Bíblia nia matadalan: “Halo buat hotu iha dalan neʼebé  loloos no momoos.” (1 Korinto 14:40) Irmaun sira neʼebé iha parte iha reuniaun halo tuir matadalan neʼe atu ramata sira-nia parte tuir oras. Halo nuneʼe hatudu katak sira hanoin oradór tuirmai no mós kongregasaun tomak nia presiza. Ema balu presiza laʼo dook atu fila ba uma. Balu presiza uza transporte públiku. No balu tan karik iha kaben neʼebé laʼós fiar-naʼin hein sira atu fila lalais ba uma.

12. Tanbasá mak katuas kongregasaun sira merese ita-nia respeitu no domin? (Haree kaixa “ Hanoin irmaun sira-nia sentimentu neʼebé dirije ita”.)

¹² Katuas kongregasaun sira serbisu makaʼas ba kongregasaun no haklaken, tan neʼe sira merese ita-nia respeitu no domin. (Lee 1 Tesalónika 5:12, 13.) Ita rasik mós agradese tebes ba buat hotu neʼebé sira halo ba Ita, loos ka lae? Ita bele hatudu Ita-nia agradese liuhusi halo tuir no apoia sira, tanba “sira kontinua tau matan ba [Ita-nia] moris nuʼudar ema neʼebé sei hatán ba Maromak”.—Ebreu 13:7, 17.

13. Ita bele aprende saida husi dalan neʼebé Jesus haree ema?

¹³ Iha profesia ida kona-ba Jesus, Isaías hatete: “Nia sei la halo tohar duʼut-kain neʼebé kleʼuk ona, no nia sei la hamate ahi-oan neʼebé besik atu mate.” (Isaías [Yesaya] 42:3) Jesus nia domin ba ema book nia atu hanoin ema. Nia komprende sentimentu husi ema sira neʼebé laran-kraik no fraku hanesan “duʼut-kain” ka “ahi-oan neʼebé besik atu mate”, tan neʼe nia hatudu laran-diʼak no pasiénsia ba sira. Labarik mós gosta  hamutuk ho Jesus. (Marcos 10:14) Ita la iha kbiit atu komprende ka hanorin ema hanesan Jesus. Maibé ita bele hatudu ita hanoin ema seluk iha haklaken-fatin liuhusi dalan neʼebé ita koʼalia ba sira, bainhira, no tempu hira.

14. Tanbasá mak ita presiza hanoin kona-ba dalan neʼebé ita koʼalia ba ema?

¹⁴ Ita tenke koʼalia iha dalan oinsá? Ohin loron, ulun-naʼin sira iha sistema ekonomia, polítika no relijiaun mak nakonu ho korrupsaun, la hanoin ema no “hanehan” ema barak iha mundu neʼe. (Mateus 9:36) Rezultadu mak ema barak la fiar malu no lakon esperansa. Tan neʼe mak liafuan neʼebé ita uza no mós ita-nia lian, presiza hatudu katak ita laran-diʼak no hanoin ema. Ema barak hakarak rona ba ita-nia mensajen laʼós tan deʼit ita uza didiʼak Bíblia, maibé tanba ita mós hatudu interese no respeitu ba sira.

15. Iha dalan saida deʼit mak ita hatudu katak ita hanoin ema nia sentimentu iha ita-nia haklaken-fatin?

¹⁵ Iha dalan oioin ita bele hatudu ba ema iha ita-nia haklaken-fatin katak ita hanoin sira-nia sentimentu. Kuandu husu pergunta ruma, presiza husu ho didiʼak no hatudu respeitu. Pioneiru ida serbí iha fatin neʼebé ema barak moedór, tan neʼe nia koko atu la husu pergunta neʼebé hamoe sira se sira la hatene resposta. Porezemplu, nia la husu pergunta hanesan: “Ita hatene Maromak nia naran ka lae?” ka “Ita hatene Maromak nia Ukun mak saida?” Duké halo nuneʼe, nia dehan: “Haʼu aprende husi Bíblia katak Maromak iha naran rasik. Haʼu bele hatudu ba Ita kona-ba naran neʼe?” Ita la bele uza dalan hanesan neʼe iha fatin hotu tanba ema no kultura la hanesan. Maibé ita presiza hatudu beibeik laran-diʼak no respeitu ba ema iha ita-nia haklaken-fatin. Atu halo nuneʼe, ita presiza hatene didiʼak sira.

16, 17. Oinsá mak ita bele hatudu laran-diʼak (a) kuandu vizita ema? (b) kona-ba tempu hira atu koʼalia ho sira?

¹⁶ Bainhira mak tempu diʼak atu vizita ema? Kuandu ita haklaken husi uma ba uma, ema bele hakfodak tanba sira la konvida ita. Tan neʼe importante atu vizita ema iha tempu neʼebé sira hakarak koʼalia ho ita. (Mateus 7:12) Porezemplu, ema iha Ita-nia haklaken-fatin sempre hadeer tarde iha findesemana ka lae? Se nuneʼe, karik diʼak atu hahú haklaken iha dalan, haklaken públiku, ka halo vizita fali ba ema neʼebé Ita hatene katak hakarak koʼalia ho ita.

¹⁷ Ita presiza koʼalia ba tempu hira? Ema barak okupadu, tan neʼe diʼak atu vizita sira lalais deʼit, liuliu se ita foin hasoru ema neʼe. Diʼak atu koʼalia badak deʼit duké koʼalia kleur. (1 Korinto 9:20-23) Kuandu ema haree katak ita komprende sira-nia situasaun, karik loron seluk sira sei hakarak koʼalia ho ita. Kuandu ita hatudu hahalok sira neʼebé mai husi Maromak nia espíritu, ita sei sai “Maromak nia maluk serbisu-naʼin”. Karik Jeová mós sei uza ita atu ajuda ema aprende kona-ba lia-loos.—1 Korinto 3:6, 7, 9.

18. Kuandu ita hanoin ema seluk nia sentimentu, ita sei hetan bensaun saida deʼit?

¹⁸ Mai ita hakaʼas an atu hatudu katak ita hanoin ema seluk nia sentimentu iha família, kongregasaun, no haklaken-fatin. Kuandu ita halo nuneʼe, ita sei hetan bensaun oioin agora no iha futuru. Salmo 41:1, 2 hatete: “Ksolok ba ema neʼebé hanoin ema kiʼik sira; Jeová sei salva nia iha tempu susar. . . . Ema sei fó sai katak nia mak ema neʼebé kontente iha rai.”