Oinsá mak Zacarias nia vizaun ajuda Ita?
“Fila fali mai haʼu, . . . no haʼu sei fila fali ba imi.”—ZACARIAS (ZAKHARIA) 1:3.
KNANANUK: 6, 20
1-3. (a) Bainhira Zacarias hahú ninia serbisu nuʼudar profeta, Jeová nia povu nia situasaun oinsá? (b) Tanbasá mak Jeová husu ninia povu atu fila fali ba nia?
SURAT-TAHAN lulun ida semo daudauk, feto ida tuur iha fatin sukat nia laran, no feto naʼin-rua semo iha anin ho liras hanesan manu-segoña nia liras. Neʼe mak buat balu neʼebé Zacarias haree iha ninia vizaun. (Zacarias [Zakharia] 5:1, 7-9) Tanbasá mak Jeová fó vizaun sira-neʼe ba nia profeta atu haree? Iha tempu neʼebá, ema Izraél moris daudauk iha situasaun hanesan saida? No tanbasá mak diʼak ba ita atu hatene vizaun sira-neʼe?
2 Tinan 537 molok Kristu mak tempu neʼebé haksolok tebes ba Jeová nia povu. Ema Babilónia kaer sira ba tinan 70, maibé agora sira sai livre ona! Sira kontente tebes atu fila fali ba Jeruzalein hodi harii fali templu hodi bele adora Jeová iha neʼebá. Tinan ida liutiha, ema Izraél konsege tau fali templu nia fundasaun. Povu kontente tebes no sira “haklalak ho lian makaʼas toʼo ema iha fatin dook tebes mós bele rona”. (Esdras [Ezra] 3:10-13) Maibé ema komesa kontra makaʼas kona-ba projetu neʼe, no neʼe halo ema Izraél sira sai laran-tun tebes toʼo sira para husi serbisu atu harii templu neʼe. Sira tau fokus fali atu harii sira rasik nia uma no halo toʼos. Tinan 16 liutiha, Jeová nia templu seidauk ramata. Maromak nia povu presiza fó-hanoin atu fila fali ba Jeová no la bele hanoin kona-ba sira-nia an deʼit. Jeová hakarak sira atu adora nia ho laran-manas no aten-brani.
3 Tan neʼe iha tinan 520 molok Kristu, Jeová haruka ninia profeta Zacarias hodi ajuda povu atu hanoin-hetan fali tanbasá mak Jeová halo sira livre husi Babilónia. Zacarias nia naran signifika “Jeová hanoin-hetan”. Maski ema Izraél sira haluha ona buat neʼebé Jeová halo ba sira, maibé Jeová hanoin-hetan nafatin kona-ba ninia povu. (Lee Zacarias [Zakharia] 1:3, 4. *) Jeová promete atu ajuda sira harii fali adorasaun neʼebé loos. Maibé Jeová mós fó avizu ba sira katak sira tenke fó buat neʼebé diʼak liu hotu hodi Jeová simu sira-nia adorasaun. Mai ita koʼalia kona-ba Zacarias nia vizaun rua, no vizaun sira-neʼe mak vizaun ba dala neen no ba dala hitu. Ita sei haree oinsá Jeová fó laran-manas ba ema Izraél no oinsá mak vizaun rua neʼe bele ajuda ita ohin loron.
MAROMAK TESI LIA BA SIRA NEʼEBÉ NAʼOK
4. Zacarias haree saida iha ninia vizaun? Tanbasá mak surat-tahan lulun nia sorin rua hakerek nakonu ho mensajen? (Haree dezeñu primeiru iha pájina 21.)
4 Livru Zacarias kapítulu 5 hahú ho vizaun ida neʼebé úniku tebes. (Lee Zacarias [Zakharia] 5:1, 2. *) Zacarias haree surat-tahan lulun ida semo daudauk. Surat-tahan lulun neʼe naruk besik metru sia no luan metru haat ho balu. Surat-tahan lulun neʼe nakloke hela ho mensajen ida. (Zacarias [Zakharia] 5:3) Mensajen neʼe kona-ba tesi-lia neʼebé sériu. Iha tempu antigu, baibain ema hakerek liafuan balu iha surat-tahan lulun nia laran deʼit. Maibé tanba mensajen neʼe importante tebes, surat-tahan lulun nia sorin ida no sorin seluk mós hakerek nakonu ho mensajen neʼe.
Ema kristaun tenke hasees an husi hahalok naʼok hotu (Haree parágrafu 5-7)
5, 6. Jeová sente oinsá kona-ba hahalok naʼok naran deʼit?
5 Lee Zacarias (Zakharia) 5:3, 4. * Ema hotu tenke hatán ba Maromak kona-ba sira-nia hahalok hotu, liuliu Jeová nia povu tanba sira lori Jeová nia naran. Sira hadomi nia no sira hatene katak hahalok naʼok sei hafoʼer Jeová nia naran. (Provérbios [Amsal] 30:8, 9) Ema balu hanoin katak la sala atu naʼok se sira iha razaun neʼebé loos. Maibé razaun naran deʼit neʼebé halo ema naʼok, neʼe hatudu sai katak ninia hakarak kaan-teen mak importante liu fali Jeová, Ninia naran, no Ninia ukun-fuan.
6 Iha Zacarias 5:3, 4 hatete katak malisan “sei tama ba naʼok-teen sira-nia uma” no malisan neʼe “sei hela iha uma sira-neʼe nia laran no han tiha uma sira-neʼe”. Jeová sei tesi-lia ba ninia povu nia hahalok sala sira. Maski ema neʼebé naʼok bele subar husi polísia, patraun, katuas kongregasaun, ka inan-aman, maibé nia la bele subar husi Jeová. Maromak Jeová fó garantia katak nia sei kaer toman hahalok naʼok naran deʼit. (Ebreu 4:13) Ita haksolok tebes bele moris hamutuk ho ema sira neʼebé hakaʼas an atu “hatudu laran-moos iha buat hotu”!—Ebreu 13:18.
7. Saida mak ita aprende husi vizaun kona-ba surat-tahan lulun neʼebé semo?
7 Hahalok naʼok hotu Jeová la simu. Halo tuir Jeová nia morál sira hodi la hafoʼer ninia naran mak priviléjiu ba ita. Se ita mak moris tuir Jeová nia hakarak, ita sei la hetan tesi-lia husi Jeová hanesan nia sei lori ba ema sira neʼebé la halo tuir nia.
MORIS TUIR ITA-NIA JURAMENTU “LORON BA LORON”
8-10. (a) Juramentu katak sá? (b) Liurai Zedekias la kumpre ninia juramentu kona-ba saida?
8 Mensajen tuirmai husi surat-tahan lulun neʼebé semo mak kona-ba avizu ba sira neʼebé ‘jura falsu hodi Maromak nia naran’. (Zacarias [Zakharia] 5:4) Juramentu mak deklarasaun neʼebé ema halo atu prova katak buat ida loos, ka promete ida neʼebé sériu kona-ba atu halo ka la halo buat ruma.
9 Halo juramentu ida iha Jeová nia naran mak buat neʼebé sériu tebes. Ita bele haree ezemplu ida husi buat neʼebé akontese ba Zedekias, liurai ikus neʼebé ukun iha Jeruzalein. Zedekias halo juramentu ida iha Jeová nia naran katak nia sei hakruʼuk an ba liurai Babilónia. Maibé nia la kumpre ninia juramentu neʼe. Tan neʼe Jeová hatete ba nia katak “nia sei mate iha Babilónia, fatin neʼebé liurai Babilónia halo [Zedekias] sai nuʼudar liurai. Nia kontra ona ninia juramentu no la halo tuir ninia aliansa ho liurai Babilónia”.—Ezequiel (Yehezkiel) 17:16.
10 Liurai Zedekias halo ninia juramentu iha Maromak nia naran, no Jeová hakarak nia kumpre ninia juramentu neʼe. (2 Crônicas [Tawarikh] 36:13) Maibé nia la halo tuir ninia promete hodi husu rai-Ejitu atu ajuda nia sai livre husi Babilónia. Maski nuneʼe, Ejitu la iha kbiit atu ajuda nia.—Ezequiel (Yehezkiel) 17:11-15, 17, 18.
11, 12. (a) Saida mak juramentu importante liu hotu neʼebé ita halo? (b) Iha dalan saida deʼit mak ita-nia dedikasaun kona ita-nia moris loroloron nian?
11 Husi buat neʼebé akontese ba Zedekias, ita aprende katak Jeová rona ba promete neʼebé ita halo. Ita tenke kumpre ita-nia promete sira atu nia simu ita. (Salmo [Mazmur] 76:11) Promete importante liu hotu neʼebé ita halo mak atu dedika an ba Jeová. Bainhira ita dedika an ba nia, ita jura katak maski buat naran deʼit neʼebé sei akontese ba ita-nia moris, ita sei serbí nia nafatin.
12 Oinsá mak ita bele kumpre ita-nia juramentu ba Jeová? Ita hetan koko “loron ba loron”. Ita hatudu katak ita iha relasaun neʼebé metin ho Jeová liuhusi dalan neʼebé ita tahan hasoru koko sira-neʼe. (Salmo [Mazmur] 61:8) Porezemplu, se ema ruma iha serbisu fatin ka eskola hatudu oin-moris ba Ita, Ita sei halo saida? Ita sei hatudu katak Ita hakarak halo tuir Jeová no la fó atensaun ba ema neʼe ka lae? (Provérbios [Amsal] 23:26) Oinsá se iha Ita-nia família Ita mesak deʼit mak adora Jeová, Ita husu Jeová ajuda Ita atu kontinua hatudu hahalok neʼebé diʼak ka lae? Ita fó-agradese ba Jeová loroloron ka lae kona-ba ninia domin no matadalan sira? Ita buka tempu atu lee Bíblia loroloron ka lae? Bainhira ita dedika ita-nia moris ba Jeová, tuir loloos ita promete ba nia atu halo buat sira-neʼe hotu. Se ita mak halo tuir nia hodi fó buat neʼebé diʼak liu hotu ba nia, ita hatudu ba Jeová katak ita hadomi nia no ita mak ninian. Ita-nia adorasaun mak parte husi ita-nia moris. No tanba ita hatudu laran-metin ba Jeová, nia promete atu haraik futuru neʼebé furak ba ita.—Deuteronômio (Ulangan) 10:12, 13.
13. Ita aprende saida deʼit husi Zacarias nia vizaun ba dala neen?
13 Zacarias nia vizaun ba dala neen ajuda ita atu komprende katak, se ita mak hadomi Jeová, ita sei la naʼok no ita sei kumpre promete sira neʼebé ita halo. Ita mós aprende katak, maski ema Izraél sira halo sala barak, maibé Jeová sempre kumpre ninia promesa no nia nunka husik sira. Nia hatene katak sira hasoru daudauk situasaun neʼebé susar tebes tanba sira moris iha inimigu sira-nia leet. Liuhusi Jeová nia ezemplu rasik nia hanorin ita katak ita tenke kumpre ita-nia promesa sira. Ita bele fiar katak Jeová sei ajuda ita atu kumpre ita-nia juramentu sira. Dalan ida neʼebé Jeová ajuda ita mak hodi fó esperansa ba ita kona-ba futuru. Lakleur tan nia sei halakon buat aat hotu husi mundu neʼe. Iha Zacarias nia vizaun tuirmai sei hatudu sai kona-ba esperansa neʼe.
JEOVÁ HALAKON HAHALOK AAT
14, 15. (a) Iha Zacarias nia vizaun ba dala hitu nia haree saida? (Haree dezeñu segundu iha pájina 21.) (b) Feto iha fatin sukat reprezenta saida? Tanbasá mak anju taka metin fatin sukat neʼe?
14 Bainhira Zacarias haree tiha surat-tahan lulun neʼebé semo, anju ida hatete ba nia, “foti matan” ba leten. Tuirmai Zacarias haree fatin sukat ida naran “efa”. (Lee Zacarias [Zakharia] 5:5-8. *) Fatin sukat neʼe iha matan kabuar neʼebé halo husi besi makdadi. Bainhira loke fatin sukat neʼe, Zacarias haree “feto ida tuur iha . . . laran”. Anju neʼe esplika ba Zacarias katak feto neʼe nia naran mak “Hahalok Aat”. Karik Zacarias sente taʼuk bainhira nia haree feto neʼe koko atu sai husi fatin neʼe. Maibé anju soe fali kedas feto neʼe ba fatin sukat laran no taka metin ho matan neʼebé todan. Vizaun neʼe signifika saida?
15 Vizaun neʼe halo ita tau fiar ba Jeová katak nia lakohi iha hahalok aat iha ninia povu nia leet. Se Jeová haree hahalok aat ruma, nia sei halo buat ruma ho lalais atu halakon hahalok neʼe. (1 Korinto 5:13) Neʼe mak buat neʼebé anju hatudu sai hodi taka kedas fatin sukat neʼe ho matan neʼebé todan.
Jeová promete katak adorasaun neʼebé loos sei moos nafatin (Haree parágrafu 16-18)
16. (a) Tuirmai Zacarias haree saida mak akontese ba fatin sukat? (Haree dezeñu terseiru iha pájina 21.) (b) Feto naʼin-rua neʼebé iha liras atu lori fatin sukat ba neʼebé?
16 Tuirmai Zacarias haree feto naʼin-rua iha liras hanesan manu-segoña nia liras. (Lee Zacarias [Zakharia] 5:9-11. *) Feto naʼin-rua neʼe la hanesan ho feto neʼebé iha fatin sukat laran. Sira iha liras neʼebé forte, no sira hiʼit saʼe fatin sukat ho “Hahalok Aat” hodi semo dook tiha. Sira atu lori nia ba neʼebé? Sira lori fatin sukat neʼe ba “rai-Sinear” iha Babilónia. Tanbasá mak sira lori nia ba neʼebá?
17, 18. (a) Tanbasá mak Babilónia “fatin neʼebé loos” ba “Hahalok Aat”? (b) Ita tenke hanoin oinsá kona-ba hahalok aat?
17 Ema Izraél sira neʼebé moris iha Zacarias nia tempu komprende tanbasá Babilónia mak fatin neʼebé loos atu lori “Hahalok Aat” ba neʼebá. Sira hatene katak Babilónia mak sidade neʼebé aat, nakonu ho hahalok la morál no adorasaun falsu. Zacarias ho ema judeu sira neʼebé uluk hela ona iha neʼebá koko makaʼas hodi kontra ema jentiu nia hahalok aat sira-neʼe. Tan neʼe, vizaun neʼe halo ita tau fiar katak Jeová sei proteje adorasaun ba nia atu moos nafatin.
18 Vizaun neʼe mós fó-hanoin ba ema judeu sira katak, sira mós iha responsabilidade atu proteje sira-nia adorasaun ba Jeová atu moos nafatin. Hahalok aat la bele iha Maromak nia povu nia leet. Ohin loron, Jeová lori ona ita ba ninia organizasaun neʼebé moos, no ita sente iha domin no hetan protesaun iha fatin neʼe. Tan neʼe ita ida-idak iha responsabilidade atu proteje organizasaun neʼe atu moos nafatin. Sin, keta husik hahalok aat iha Jeová nia povu nia leet.
POVU NEʼEBÉ MOOS FÓ GLÓRIA BA JEOVÁ
19. Oinsá mak Zacarias nia vizaun sira ajuda ita ohin loron?
19 Zacarias nia vizaun ba dala neen no ba dala hitu fó sai avizu sériu ba sira neʼebé halo hahalok aat. Jeová sei la husik hahalok aat atu hela ba nafatin. Nuʼudar ninia atan, ita tenke odi hahalok aat. Vizaun sira-neʼe mós halo ita tau fiar katak, se ita mak hakaʼas an atu halo buat neʼebé Jeová gosta, nia sei la fó malisan ba ita, maibé nia sei proteje no haraik bensaun mai ita. Maski la fasil atu iha hahalok neʼebé moos iha mundu aat neʼe, maibé ho Jeová nia ajuda ita bele hetan susesu! Saida mak halo ita fiar katak adorasaun neʼebé loos sei hela ba nafatin? Oinsá mak ita hatene katak Jeová sei proteje ninia organizasaun nuʼudar terus boot besik daudauk mai? Ita sei koʼalia kona-ba pergunta sira-neʼe iha lisaun tuirmai.
^ par. 3 Zacarias 1:3, 4 3 “Hatete ba sira: ‘Jeová neʼebé ukun tropa lalehan nian, dehan nuneʼe: “‘Fila fali mai haʼu’, Jeová neʼebé ukun tropa lalehan nian, dehan, ‘no haʼu sei fila fali ba imi’, Jeová neʼebé ukun tropa lalehan nian, dehan.”’ 4 “‘Keta sai hanesan imi-nia aman sira, neʼebé profeta sira iha tempu uluk dehan ba sira: “Jeová neʼebé ukun tropa lalehan nian, dehan nuneʼe: ‘Favór ida, husik tiha imi-nia hahalok aat sira no fila fali mai haʼu.’”’“‘Maibé sira la see tilun ba haʼu, no sira la rona didiʼak ba haʼu.’ Jeová dehan.
^ par. 4 Zacarias 5:1, 2 1 Dala ida tan haʼu foti matan, no haree surat-tahan lulun ida semo daudaun. 2 Nia husu haʼu: “Saida mak ó haree?” Haʼu hatán: “Haʼu haree surat-tahan lulun ida semo daudaun, ninia naruk besik metru sia no luan metru haat ho balu.”
^ par. 5 Zacarias 5:3, 4 3 Tuirmai nia dehan mai haʼu: “Neʼe mak malisan neʼebé sei kona mundu tomak, tanba ema hotu neʼebé naʼok seidauk hetan kastigu, tuir malisan neʼebé hakerek ona iha surat-tahan neʼe nia sorin ida; no ema hotu neʼebé jura falsu seidauk hetan kastigu, tuir malisan neʼebé hakerek ona iha surat-tahan neʼe nia sorin seluk. 4 Jeová neʼebé ukun tropa lalehan nian, dehan: ‘Haʼu haruka malisan neʼe, no neʼe sei tama ba naʼok-teen sira-nia uma no tama ba uma husi ema neʼebé jura falsu hodi haʼu-nia naran; no neʼe sei hela iha uma sira-neʼe nia laran no han tiha uma sira-neʼe no mós ninia ai no fatuk sira.’”
^ par. 14 Zacarias 5:5-8 5 Tuirmai anju neʼebé koʼalia ho haʼu laʼo mai no dehan mai haʼu: “Favór ida, foti matan, no haree saida mak sai mai.” 6 Entaun haʼu husu: “Saida mak neʼe?” Nia hatán: “Neʼe mak fatin sukat efa nian neʼebé sai mai.” Nia hatutan tan: “Ema aat sira iha mundu tomak haree hanesan neʼe.” 7 No haʼu haree fatin sukat neʼe iha matan kabuar neʼebé halo husi besi makdadi, matan neʼe hiʼit saʼe tiha, no iha feto ida tuur iha fatin sukat neʼe nia laran. 8 Entaun nia dehan: “Feto neʼe nia naran mak Hahalok Aat.” Tuirmai nia soe fali feto neʼe ba fatin sukat neʼe nia laran, depois neʼe, nia taka fali ninia matan neʼebé halo husi besi todan.
^ par. 16 Zacarias 5:9-11 9 Tuirmai haʼu hateke saʼe no haree feto naʼin-rua mai daudaun, no sira semo iha anin. Sira iha liras hanesan manu-segoña nia liras. No sira hiʼit saʼe fatin sukat neʼe entre lalehan no rai. 10 Entaun haʼu husu anju neʼebé koʼalia ho haʼu: “Sira lori fatin sukat efa nian neʼe bá neʼebé?” 11 Nia hatán: “Sira lori ba rai-Sinear, iha neʼebá sira atu harii uma ida ba feto neʼe; no bainhira uma neʼe halo hotu ona, sira sei tau nia iha neʼebá iha fatin neʼebé loos.”
