Ita hafolin Jeová nia Liafuan ka lae?
“Kuandu imi simu Maromak nia liafuan, . . . imi simu ida-neʼe, laʼós nuʼudar ema nia liafuan, maibé, nuʼudar Maromak nia liafuan.”—1 TESALÓNIKA 2:13.
KNANANUK: 37, 21
1-3. Problema saida mak karik halo Evódia no Síntike hirus malu, no oinsá mak ita bele hasees an husi problema hanesan neʼe? (Haree dezeñu iha leten.)
ITA hafolin tebes Bíblia tanba neʼe mak livru neʼebé santu husi Maromak. Bíblia iha konsellu barak neʼebé bele ajuda ita atu hasees an husi problema sira. Maibé ita hanoin oinsá kona-ba konsellu sira-neʼe? Hanoin toʼok buat neʼebé akontese ba irmán kose-mina Evódia no Síntike iha apóstolu sira-nia tempu. Bíblia hatete katak sira naʼin-rua hirus malu maibé la dehan kona-ba saida. Karik ita bele halo ezemplu deʼit kona-ba situasaun ida.
2 Karik Evódia konvida irmaun-irmán balu bá han iha ninia uma, maibé nia la konvida Síntike. Ikusmai Síntike rona husi ema seluk katak Evódia konvida sira bá uma. Síntike sai hirus tebes. Karik nia hanoin: ‘Haʼu la fiar katak Evódia la konvida haʼu! Haʼu hanoin nia haree haʼu ninia belun diʼak.’ Síntike sente katak karik Evódia la gosta mak la konvida nia. Tan neʼe Síntike konvida fali irmaun-irmán sira neʼebé uluk Evódia konvida, maibé la konvida Evódia. Karik problema kona-ba sira naʼin-rua mós halo ema seluk iha kongregasaun la kontente. Maibé Bíblia hatete katak apóstolu Paulo fó konsellu ba irmán naʼin-rua neʼe atu hadame malu fali. Karik sira naʼin-rua rona duni ba Paulo hodi kontinua serbí Jeová ho haksolok.—Filipe 4:2, 3.
3 Dala ruma problema hanesan neʼe bele mosu iha kongregasaun. Maibé se ita halo tuir konsellu husi Bíblia, ita bele rezolve problema sira-neʼe, ka problema hanesan neʼe sei la kona ita. No ita hatudu ita hafolin Jeová nia Liafuan liuhusi halo tuir matadalan sira husi Bíblia.—Salmo (Mazmur) 27:11.
BÍBLIA AJUDA ITA KONTROLA SENTIMENTU
4, 5. Bíblia fó matadalan saida kona-ba kontrola ita-nia sentimentu?
4 La fasil atu kontrola ita-nia sentimentu. Se ema ida hakanek ita-nia laran ka trata ita iha dalan neʼebé la diʼak tanba ita-nia kultura, rasa, ka tanba ita-nia oin ka isin, ita bele sente laran-tun ka hirus, liuliu se ema neʼe mak irmaun ka irmán ida. Konsellu saida husi Bíblia mak bele ajuda ita hasoru problema sira-neʼe?
5 Jeová hatene saida mak bele akontese se ita la kontrola ita-nia emosaun. Bainhira ita hirus, fasil atu koʼalia sai liafuan sira ka halo buat ruma neʼebé ikusmai sei halo ita arrepende an. Tan neʼe mak diʼak atu halo tuir Bíblia nia matadalan hodi kontrola ita-nia sentimentu hodi la sai hirus lalais. (Lee Provérbios [Amsal] 16:32; * Eclesiastes [Pengkhotbah] 7:9. *) Bíblia hakarak ita atu fó perdua ba ema. Jesus hatete katak, se ita mak la fó perdua ba ema, Jeová mós sei la fó perdua ba ita. (Mateus 6:14, 15) Oinsá ho Ita? Ita presiza hakaʼas an liután atu hatudu pasiénsia no fó perdua ba ema ho laran ka lae?
6. Tanbasá mak ita tenke kontrola ita-nia emosaun?
6 Se ita la kontrola ita-nia emosaun, karik neʼe bele halo ita rai hirus no ikusmai halo ita odi ema neʼe, ka bele mós book ema balu iha kongregasaun atu halo tuir ita. Maski ita koko atu subar ita-nia hirus ka odi, maibé ikusmai ema seluk sei hatene, no neʼe bele halo irmaun-irmán sira hadook an husi ita. (Provérbios [Amsal] 26:24-26) Se situasaun hanesan neʼe mosu, katuas kongregasaun sei uza Bíblia atu ajuda ita hodi halakon sentimentu hirus no odi, no oinsá atu fó perdua ba ema seluk. Ita sei halo tuir matadalan husi Bíblia ka lae?—Levítico (Imamat) 19:17, 18; Roma 3:11-18.
JEOVÁ MAK DIRIJE ITA
7, 8. (a) Iha dalan saida mak Jeová dirije ninia organizasaun parte rai nian? (b) Bíblia iha matadalan saida deʼit, no tanbasá mak ita tenke halo tuir?
7 Jeová mak hanorin no dirije ninia organizasaun parte rai nian. Oinsá? Nia hili Kristu nuʼudar “ulun ba kongregasaun”, no Kristu hili “atan laran-metin no matenek” atu hanorin no tau matan ba Maromak nia povu. (Mateus 24:45-47; Éfeso 5:23) Atan neʼe hafolin tebes Bíblia hanesan grupu administradór iha apóstolu sira-nia tempu, tanba neʼe mak Maromak nia Liafuan. (Lee 1 Tesalónika 2:13.) Bíblia iha matadalan saida deʼit?
8 Bíblia fó matadalan ba ita atu tuir beibeik reuniaun no simu hanorin ida deʼit. (Ebreu 10:24, 25; 1 Korinto 1:10) Bíblia fó laran-manas ba ita atu “kontinua buka uluknanain Maromak nia Ukun”. No mós haruka ita atu haklaken husi uma ba uma, iha fatin públiku, no iha dalan neʼebé la formál. (Mateus 6:33; 28:19, 20; Apóstolu 5:42; 17:17; 20:20) Maromak nia Liafuan fó matadalan ba katuas sira oinsá atu tau matan ba kongregasaun hodi moos nafatin. (1 Korinto 5:1-5, 13; 1 Timóteo 5:19-21) Jeová mós hakarak ita atu iha isin, hanoin, no hahalok neʼebé moos.—2 Korinto 7:1.
9. Jesus uza sé atu ajuda ita komprende kona-ba Bíblia?
9 Ema balu sente katak sira la presiza ema seluk atu esplika Bíblia ba sira. Maibé hahú husi tinan 1919, Jesus uza “atan laran-metin no matenek” atu ajuda ita komprende kona-ba Bíblia no halo tuir ninia matadalan. Loos duni, halo tuir matadalan sira husi Bíblia bele ajuda kongregasaun atu moos, iha dame no unidade. Tan neʼe, husu ba Ita-nia an, ‘Haʼu hatudu laran-metin ba Jesus hodi halo tuir matadalan husi atan laran-metin ka lae?’
JEOVÁ NIA ORGANIZASAUN LAʼO BA OIN!
10. Ezequiel esplika saida kona-ba Jeová nia organizasaun parte lalehan nian?
10 Maromak nia Liafuan mós esplika kona-ba ninia organizasaun parte lalehan nian. Porezemplu, iha profeta Ezequiel nia vizaun, nia haree Maromak Jeová lori kuda-karreta ida neʼebé muda an lalais tuir ninia hakarak. Kuda-karreta neʼe reprezenta ninia organizasaun parte lalehan nian. (Ezequiel [Yehezkiel] 1:4-28) Jeová nia organizasaun parte lalehan nian neʼe mak dirije ninia organizasaun parte rai nian. Hanesan iha tinan sanulu foin lalais neʼe, Maromak nia organizasaun halo ona mudansa barak, no ita presiza hatene katak Jeová mak book ninia organizasaun atu halo mudansa sira-neʼe. Lakleur tan Jesus ho anju sira sei halakon mundu aat neʼe. Jeová sei uza ninia organizasaun atu halo ninia naran sai santu no sei la iha tan ema atu kritika dalan neʼebé Jeová ukun.
Ita agradese tebes ba irmaun-irmán barak neʼebé fó sira-nia tempu no forsa atu halo serbisu konstrusaun! (Haree parágrafu 11)
11, 12. Jeová nia organizasaun halo ona buat saida deʼit?
11 Mai ita haree toʼok buat balu neʼebé Jeová nia organizasaun halo ona iha loron ikus sira-neʼe. Konstrusaun. Irmaun-irmán atus ba atus serbisu makaʼas hodi harii sede-jerál husi Testemuña ba Jeová iha Warwick, Novaiorke, rai-Estadus Unidus. Irmaun-irmán rihun ba rihun neʼebé halo serbisu voluntáriu mós simu matadalan husi departamentu konstrusaun ba mundu tomak hodi harii Reuniaun-Fatin no sukursál sira. Ita agradese tebes ba irmaun-irmán sira-nia serbisu makaʼas neʼe. Ita bele haree iha mundu tomak Jeová nia povu fó osan atu apoia harii fatin sira-neʼe. Jeová fó duni bensaun ba hahalok haraik-an no laran-metin neʼebé ninia povu hatudu.—Lucas 21:1-4.
12 Edukasaun. Jeová gosta tebes atu hanorin ninia povu! (Isaías [Yesaya] 2:2, 3) Porezemplu, haree toʼok eskola oioin neʼebé nia fó liuhusi ninia organizasaun, hanesan Eskola Serbisu Pioneiru, Eskola ba Haklaken-Naʼin Tempu-Tomak, Eskola Gilead, Eskola ba Ema Betel Foun, Eskola ba Katuas Área ho Sira-nia Feen, Eskola ba Katuas Kongregasaun nian, Eskola ba Katuas no Atan ba Kongregasaun, no Eskola ba Grupu Koordenadór ba Sukursál ho Sira-nia Feen. Ita mós iha sítiu jw.org neʼebé ita bele haree Bíblia no livru seluk iha língua atus ba atus. Iha sítiu neʼe, iha mós informasaun ba labarik, ba família, no notísias sira. Ita uza daudauk jw.org iha serbisu haklaken no iha adorasaun família nian ka lae?
HATUDU LARAN-METIN BA JEOVÁ HODI APOIA NINIA ORGANIZASAUN
13. Jeová nia povu iha responsabilidade atu halo saida?
13 Hodi hola parte iha Jeová nia organizasaun no hatene saida mak nia hakarak ita atu halo mak priviléjiu boot ida. Maibé ita iha responsabilidade atu halo tuir nia no halo buat neʼebé loos. Maski iha mundu neʼe iha ema barak gosta halo buat neʼebé la loos, maibé ba ita, ita tenke banati-tuir Jeová atu “odi buat neʼebé aat”. (Salmo [Mazmur] 97:10) Ita lakohi halo tuir ema neʼebé “dehan katak diʼak mak aat no aat mak diʼak”. (Isaías [Yesaya] 5:20) Ita-nia hakarak mak atu halo Jeová kontente, tan neʼe ita hakaʼas an atu iha moris neʼebé moos iha dalan hotu. (1 Korinto 6:9-11) Tanba Jeová hadomi ita mak nia hakarak ita atu halo tuir Bíblia. Ita hadomi no laran-metin ba Jeová, tan neʼe mak ita hakarak halo tuir ninia matadalan iha uma, iha kongregasaun, serbisu-fatin, eskola, ka fatin naran deʼit. (Provérbios [Amsal] 15:3) Iha dalan saida tan mak ita bele hatudu laran-metin ba Jeová?
14. Oinsá mak inan-aman bele hatudu laran-metin ba Jeová?
14 Hanorin oan. Liuhusi Bíblia Jeová fó matadalan ba inan-aman oinsá atu fó treinu ba sira-nia oan. Ema kristaun tenkesér kuidadu atu la husik mundu nia hanoin book sira hodi haboot oan. (Éfeso 2:2) Porezemplu, iha fatin balu karik aman ida bele hanoin, ‘Iha ami-nia rai, feto mak hanorin oan.’ Maibé Bíblia esplika ho klaru katak responsabilidade atu hanorin oan kona-ba Jeová mak aman nia knaar. (Éfeso 6:4) Inan-aman neʼebé hadomi Jeová hakarak sira-nia oan hanesan Samuel bainhira nia sei kiʼik, atu iha relasaun neʼebé diʼak ho Jeová.—1 Samuel 3:19.
15. Oinsá ita hatudu laran-metin ba Jeová bainhira atu halo desizaun importante ruma?
15 Halo desizaun. Bainhira atu halo desizaun importante ruma, ita hakarak buka-hatene Jeová nia hanoin husi Bíblia no ninia organizasaun, hodi nuneʼe ita hatudu katak ita laran-metin ba nia. Porezemplu, inan-aman balu neʼebé muda ba rai seluk haruka fali sira-nia bebé ba sira-nia inan-aman ka família seluk atu tau matan hodi sira kontinua serbisu no buka osan. Maski neʼe mak desizaun ema ida-idak nian, maibé inan-aman tenke hanoin-hetan katak Maromak sei husu sira atu hatán ba desizaun neʼebé sira halo. (Lee Roma 14:12.) Matenek atu buka uluk Bíblia nia matadalan antes halo desizaun importante kona-ba ita-nia família no serbisu. Ita presiza ajuda husi ita-nia Aman iha lalehan tanba ita la iha kbiit atu hili ita-nia hakat.—Jeremias (Yeremia) 10:23.
16. Inan ida presiza halo desizaun saida, no saida mak ajuda nia hodi halo desizaun neʼebé loos?
16 Feen-laʼen ida muda ba rai seluk no sira iha bebé mane ida, maibé sira planu atu haruka bebé neʼe ba mane nia inan-aman atu tau matan. Iha tempu neʼebá, ninia feen komesa estuda Bíblia ho Testemuña ba Jeová, no nia aprende husi Bíblia katak nia mak iha responsabilidade atu hanorin ninia oan kona-ba Jeová. (Salmo [Mazmur] 127:3; Provérbios [Amsal] 22:6) Inan neʼe halo tuir Bíblia nia matadalan hodi halo orasaun ba Jeová atu husu ninia ajuda. (Salmo [Mazmur] 62:7, 8) Nia mós koʼalia sai ninia problema ba irmán neʼebé estuda ho nia no mós ema seluk iha kongregasaun. Maski ninia família no kolega sira hatete beibeik ba nia atu haruka deʼit bebé neʼe ba ninia banin sira, maibé nia hatene katak neʼe la tuir Bíblia nia matadalan. Ninia laʼen haree katak irmaun-irmán sira hakaʼas an duni atu ajuda ninia feen, neʼe book tebes nia toʼo nia mós hahú estuda no tuir reuniaun sira. Ita bele fiar katak ninia feen sente haksolok tebes bainhira nia haree katak Jeová hatán duni ninia orasaun.
17. Jeová nia organizasaun fó matadalan saida kona-ba estuda Bíblia ho ema?
17 Halo tuir matadalan. Se ita mak laran-metin ba Jeová, ita hakarak halo tuir matadalan neʼebé ita simu husi ninia organizasaun. Porezemplu, hanoin toʼok saida mak ita presiza halo bainhira ita komesa estuda ho ema hodi uza livru Tuir Loloos, Saida mak Bíblia Hanorin? Jeová nia organizasaun fó laran-manas ba ita atu uza minutu balu hodi ajuda ita-nia estudante koñese didiʼak kona-ba Maromak nia organizasaun. Atu halo nuneʼe, ita bele uza vídeo Oinsá mak ami halaʼo reuniaun sira? no broxura Sé mak Halo Jeová nia Hakarak Ohin Loron? Bainhira estuda livru Bíblia Hanorin ramata ona, ita bele uza fali livru “Hela Nafatin iha Maromak nia Domin” hodi ajuda estudante “hamriik metin”, maski nia hetan ona batizmu. (Koloso 2:7) Ita halo tuir daudauk matadalan neʼe husi Jeová nia organizasaun ka lae?
18, 19. Ho razaun saida deʼit mak ita hakarak fó agradese ba Jeová?
18 Ita iha razaun barak atu fó agradese ba Jeová! Razaun ida mak “tanba liuhusi nia mak ita hetan moris, book an no iha”. (Apóstolu 17:27, 28) Nia mós fó ona Bíblia mai ita. No ita hafolin tebes Bíblia hanesan ema kristaun iha Tesalónika, tanba ita hatene katak Maromak nia Liafuan mak prezente furak ida husi Jeová.—1 Tesalónika 2:13.
19 Bíblia ajuda ona ita atu hakbesik ba Jeová no nia mós sei hakbesik ba ita. (Tiago 4:8) Ita fó agradese tebes ba ita-nia Aman iha lalehan tanba nia konvida ita hodi sai parte ba ninia organizasaun. Ita sente hanesan ema neʼebé hakerek salmu, nia hatete: “Fó-agradese ba Jeová, tanba nia mak diʼak; ninia domin neʼebé laran-metin iha ba nafatin.” (Salmo [Mazmur] 136:1) Iha Salmo 136, ita haree versíkulu ida-idak sempre repete liafuan “ninia domin neʼebé laran-metin iha ba nafatin”. Loos duni, se ita mak laran-metin ba Jeová no halo tuir matadalan neʼebé nia fó liuhusi ninia organizasaun, nia sei fó moris rohan-laek ba ita no nia mós sei hatudu ninia laran-metin mai ita ba nafatin!
^ par. 5 Provérbios 16:32 Ema neʼebé la hirus lalais mak diʼak liu fali mane ida neʼebé iha forsa boot, no ema neʼebé kontrola nia hirus mak diʼak liu fali ema neʼebé manán sidade ida.
^ par. 5 Eclesiastes 7:9 Keta sente an lalais, tanba sente an lalais mak hela iha ema beik nia laran.
