1, 2. (a) Inan-aman balu sente oinsá bainhira sira-nia oan hakarak hetan batizmu? (b) Tanbasá mak oradór husu ba ema neʼebé hakarak hetan batizmu se sira dedika an ona ba Jeová ka lae? (Haree dezeñu iha leten.)

MARIA foin tinan sia no ninia inan-aman haree nia hamriik hamutuk ho ema seluk neʼebé atu hetan batizmu. Oradór husu pergunta rua ba sira, no Maria hatán ho lian neʼebé makaʼas no klaru. Tuirmai nia hetan batizmu.

² Maria nia inan-aman orgullu tebes ho sira-nia oan-feto neʼe tanba nia dedika ninia moris ba Jeová no hetan ona batizmu. Maibé antes neʼe, Maria nia inan iha duvida uitoan. Nia hanoin: ‘Karik Maria sei kiʼik liu atu hetan batizmu. Nia komprende ka lae katak dedika an ba Jeová mak buat neʼebé sériu? Nia presiza hein tan ba tempu uitoan hodi hetan batizmu ka lae?’ Inan-aman barak hamosu pergunta hanesan neʼe bainhira sira-nia oan fó-hatene katak sira hakarak hetan batizmu. (Eclesiastes [Pengkhotbah] 5:5) Sin, dedika an ba Jeová no hetan batizmu mak hakat neʼebé importante tebes ba ema kristaun.​—Haree kaixa “ Ita dedika an ona ba Jeová ka lae?”

3, 4. (a) Apóstolu Pedro esplika oinsá hodi hatudu katak batizmu importante tebes? (b) Tanbasá mak Pedro kompara batizmu ho harii arka iha Noé nia tempu?

 ³ Apóstolu Pedro kompara batizmu hanesan harii arka iha Noé nia tempu. Nia dehan: “Batizmu mós hanesan ho situasaun neʼe, no agora batizmu salva imi.” (Lee 1 Pedro 3:20, 21.) Arka mak sai hanesan evidénsia ba ema seluk katak Noé halo duni Maromak nia hakarak ho laran tomak. Noé halo serbisu neʼebé Jeová fó ba nia toʼo ramata. Tanba Noé nia fiar mak Jeová salva nia ho ninia família husi Rai-Nabeen. Pedro halo komparasaun neʼe atu hanorin lisaun saida?

⁴ Bainhira ema haree arka, sira hatene kedas katak Noé hatudu fiar ba Maromak. Hanesan neʼe mós bainhira ema haree ita hetan batizmu, sira hatene kedas katak ita dedika ona ita-nia moris ba Maromak tanba ita hatudu fiar ba Kristu neʼebé hetan ona moris-hiʼas. Hanesan Noé, ema neʼebé hetan batizmu mós halo serbisu neʼebé Maromak fó ba sira atu halo. Jeová mós sei salva ema laran-metin neʼebé hetan ona batizmu bainhira nia halakon mundu aat neʼe, hanesan nia salva Noé husi Rai-Nabeen. (Marcos 13:10; Apokalipse 7:9, 10) Sin, importante tebes atu dedika ita-nia moris ba Jeová no hetan batizmu. Se ema ida mak demora beibeik atu hetan batizmu, karik nia bele lakon ninia oportunidade atu moris ba nafatin.

5. Ita sei koʼalia kona-ba saida iha lisaun neʼe?

⁵ Agora ita hatene ona katak batizmu mak buat neʼebé sériu, tan neʼe mai ita buka-hatene resposta ba pergunta tolu tuirmai: Bíblia hatete saida kona-ba batizmu? Ema ida presiza halo saida antes atu hetan batizmu? Tanbasá mak ita presiza hanoin-hetan beibeik katak batizmu mak buat neʼebé importante tebes bainhira hanorin ita-nia oan ka estudante Bíblia?

6, 7. (a) João Batista fó batizmu ba ema tanba razaun saida? (b) Sé nia batizmu mak úniku tebes, no tanbasá?

⁶ Ema primeiru temi iha Bíblia neʼebé fó batizmu ba ema mak João Batista. (Mateus 3:1-6) Tanbasá mak ema bá buka nia atu hetan batizmu? Neʼe hodi hatudu katak sira arrepende ho laran kona-ba sira-nia sala tanba sira la halo tuir Moisés nia Ukun-Fuan. Maibé batizmu importante liu hotu neʼebé João Batista halo mak fó batizmu ba Jesus, Maromak nia Oan-Mane neʼebé perfeitu. (Mateus 3:13-17) Jesus nunka halo sala, tan neʼe nia la presiza arrepende sala. (1 Pedro 2:22) Entaun, tanbasá mak Jesus presiza hetan batizmu? Neʼe hodi hatudu katak nia prontu ona atu uza ninia moris hodi halo Maromak nia hakarak.​—Ebreu 10:7. 

⁷ Bainhira Jesus halaʼo serbisu haklaken iha rai, ninia dixípulu sira mós fó batizmu ba ema. (João 3:22; 4:1, 2) Ema sira-neʼe hetan batizmu tanba sira mós arrepende kona-ba sira-nia sala hodi la halo tuir Moisés nia Ukun-Fuan. Maibé bainhira Jesus mate no hetan tiha moris-hiʼas, ema sira neʼebé hakarak tuir Kristu presiza hetan batizmu tanba razaun seluk.

8. (a) Bainhira Jesus hetan tiha moris-hiʼas, nia fó mandamentu saida? (b) Tanbasá mak ema kristaun presiza hetan batizmu?

⁸ Iha tinan 33, bainhira Jesus hetan tiha moris-hiʼas, lakleur nia koʼalia ba ema naʼin-500 liu, mane, feto, no karik iha mós labarik sira. Karik iha tempu neʼe mak Jesus hatete: “Neʼe duni, laʼo bá no hanorin ema husi nasaun hotu atu sai haʼu-nia dixípulu, fó batizmu ba sira hodi Aman, Oan no espíritu santu nia naran. Hanorin sira atu halo tuir buat hotu neʼebé haʼu haruka ba imi.” (Mateus 28:19, 20; 1 Korinto 15:6) Jesus fó mandamentu ba ninia dixípulu sira atu ajuda ema seluk sai ninia dixípulu. Ema neʼebé hakarak sai ninia dixípulu tenkesér hetan batizmu. (Mateus 11:29, 30) Atu serbí Maromak iha dalan neʼebé nia simu, ema presiza rekoñese katak Maromak uza daudaun Jesus hodi kumpre ninia hakarak sira. Tuirmai mak ema bele hetan batizmu. Batizmu iha dalan hanesan neʼe deʼit mak Maromak simu. Bíblia temi ezemplu barak neʼebé hatudu katak Jesus nia dixípulu sira iha tempu uluk hatene duni katak importante tebes atu hetan batizmu. Sira nunka hanoin katak sira bele hein no depois mak hetan batizmu.​—Apóstolu 2:41; 9:18; 16:14, 15, 32, 33. 

9, 10. Ita bele aprende saida husi ema Etiópia no Saul kona-ba batizmu?

⁹ Lee Apóstolu 8:35, 36. Ema Etiópia ida neʼebé simu ema judeu sira-nia fiar, nia bá halaʼo adorasaun iha Jeruzalein no fila daudaun ba uma. Jeová nia anju haruka Filipe hodi haklaken ba nia, no Filipe hanorin nia “liafuan diʼak kona-ba Jesus”. Ema Etiópia neʼe halo saida? Nia komprende katak importante tebes atu simu Jesus nuʼudar Naʼi no nia hakarak halo tuir buat neʼebé Jeová hakarak ema kristaun sira halo. Tan neʼe nia hetan kedas batizmu iha tempu neʼebá. 

¹⁰ Ezemplu ida tan mak kona-ba ema judeu ida naran Saul. Maski ema judeu nuʼudar nasaun tomak moris mai dedika an ona ba Jeová, maibé Jeová la simu ona sira tanba la halo tuir nia. Saul fiar an katak ema judeu sira adora nafatin Maromak iha dalan neʼebé loos, tan neʼe nia fó terus ba ema kristaun. Maibé loron ida, Jesus neʼebé hetan ona moris-hiʼas, ida-neʼebé Saul hanoin katak sei mate hela, koʼalia rasik husi  lalehan ba Saul. Saul halo saida? Nia simu kedas ajuda husi Kristu nia dixípulu ida naran Ananias. Bíblia dehan: “Tuirmai nia hamriik no hetan batizmu.” (Apóstolu 9:17, 18; Galásia 1:14) Ikusmai ema hotu koñese nia mak naran apóstolu Paulo. Husi neʼe ita bele haree katak, bainhira Saul komprende ona katak Maromak mak uza daudaun Jesus hodi kumpre ninia hakarak sira, Saul hetan kedas batizmu.​—Lee Apóstolu 22:12-16. 

11. (a) Ohin loron, saida mak book estudante Bíblia sira atu hetan batizmu? (b) Ita sente oinsá bainhira ema ida atu hetan batizmu?

¹¹ Ohin loron mós hanesan kona-ba estudante Bíblia sira, maski joven ka idade. Tanba sira hadomi no fiar buat neʼebé Bíblia hanorin, sira hakarak tebes atu dedika sira-nia moris ba Jeová no hetan batizmu. Baibain iha reuniaun boot sira iha diskursu batizmu nian neʼebé espesiál tebes ba ema neʼebé atu hetan batizmu. Testemuña ba Jeová sira sente kontente tebes bainhira haree estudante Bíblia simu lia-loos no foti desizaun atu hetan batizmu. Inan-aman sira mós sente hanesan neʼe bainhira haree sira-nia oan foti desizaun sira-neʼe. Relatóriu husi serbisu tinan ba 2017 hatudu katak, hamutuk ema naʼin–284.000 liu mak hetan batizmu hodi hatudu katak sira dedika ona sira-nia moris ba Jeová. (Apóstolu 13:48) Sira komprende duni katak, importante tebes ba ema kristaun atu hetan batizmu. Maibé sira presiza halo saida antes atu hetan batizmu?

12. Antes estudante Bíblia atu hetan batizmu, sira tenke halo uluk saida?

¹² Antes estudante Bíblia atu hetan batizmu, sira tenke aprende lia-loos kona-ba Maromak, Maromak nia hakarak ba ema no rai, no Maromak halo ona saida atu salva ema. (1 Timóteo 2:3-6) Tuirmai sira presiza haburas fiar hodi bele ajuda sira halo tuir Maromak nia ukun-fuan sira no hodi la halo tan buat neʼebé Maromak odi. (Apóstolu 3:19) Halo hanesan neʼe importante tebes tanba Jeová sei la simu dedikasaun husi ema neʼebé kontinua halo buat neʼebé nia odi. (1 Korinto 6:9, 10) Maibé iha buat seluk tan. Ema neʼebé hakarak dedika sira-nia moris ba Jeová tenke tuir reuniaun sira, haklaken beibeik, no hanorin lia-loos ba ema. Ema hotu neʼebé hakarak tuir Kristu tenkesér kumpre kritériu neʼe. (Apóstolu 1:8) Estudante Bíblia presiza halo uluk buat sira-neʼe, tuirmai mak sira bele dedika sira-nia moris ba Jeová iha sira rasik nia orasaun no hetan batizmu.

13. Hodi hanoin beibeik katak ema tenkesér hetan batizmu sei book ita atu halo saida?

¹³ Bainhira ajuda ita-nia oan no estudante Bíblia sira atu halo tuir buat sira-neʼe, importante atu hanoin-hetan katak, sesé deʼit neʼebé hakarak sai Jesus nia dixípulu neʼebé loos tenkesér hetan batizmu. Se ita mak hanoin beibeik kona-ba neʼe, ita sei la sente taʼuk atu buka tempu diʼak hodi esplika ba sira katak dedikasaun no batizmu mak buat neʼebé importante tebes. Ita-nia hakarak mak ita-nia oan no estudante Bíblia sira kontinua laʼo ba oin iha lia-loos no hetan batizmu!

14. Tanbasá mak ita la bele obriga ema ida atu hetan batizmu?

¹⁴ Maibé ita hatene katak ita la bele obriga oan ka estudante Bíblia atu hetan batizmu. Jeová lakohi obriga ema atu serbí nia. (1 João 4:8) Tan neʼe mak bainhira ita hanorin ema, ita tenke ajuda sira atu komprende katak importante tebes atu haburas relasaun besik ho Jeová. Hodi nuneʼe, se estudante Bíblia rasik hafolin lia-loos neʼebé nia aprende kona-ba Maromak, ninia hakarak  rasik sei book nia atu moris tuir dalan neʼebé ema kristaun loos moris no hetan batizmu.​—2 Korinto 5:14, 15.

15, 16. (a) Ema tenke toʼo tinan hira mak foin bele hetan batizmu? Esplika toʼok. (b) Tanbasá mak estudante Bíblia tenke hetan batizmu atu sai Testemuña ba Jeová maski nia sarani ona iha relijiaun seluk?

¹⁵ Atu hetan batizmu la haree ba idade. Ema ida-idak la hanesan, balu laʼo ba oin iha lia-loos lalais liu fali ema seluk. Ema barak hetan batizmu iha tempu joven, no sira hatudu laran-metin nafatin ba Jeová toʼo sira idade. Balu idade ona mak foin aprende lia-loos husi Bíblia no hetan batizmu. Balu idade 100 liu!

¹⁶ Iha ferik ida estuda Bíblia. Nia husu ba irmán neʼebé estuda Bíblia ho nia kona-ba nia presiza atu hetan batizmu tan ka lae, tanba nia sarani ona dala barak iha relijiaun oioin. Irmán neʼe esplika eskritura ba nia hodi hatán ninia pergunta neʼe. Bainhira nia komprende katak, hetan batizmu mak kritériu ida husi Bíblia, nia la demora tan atu hetan batizmu maski ninia idade besik 80 ona. Esperiénsia neʼe hanorin saida mai ita? Jeová simu deʼit batizmu husi ema neʼebé hatene lia-loos kona-ba ninia hakarak sira. Tan neʼe mak, maski ita sarani ona iha relijiaun seluk, ita tenke hetan batizmu nafatin atu sai Testemuña ba Jeová.​—Lee Apóstolu 19:3-5.

17. Ema presiza hanoin kona-ba saida iha loron neʼebé nia atu hetan batizmu?

¹⁷ Loron neʼebé ema ida atu hetan batizmu mak loron neʼebé kontente tebes. Maibé neʼe mós tempu neʼebé atu hanoin didiʼak kona-ba dedikasaun no batizmu envolve saida deʼit. Moris nuʼudar ema kristaun neʼebé loos presiza hakaʼas an, tanba Jesus nia dixípulu “la moris tan ba sira-nia an rasik, maibé moris ba ida neʼebé mate ba sira no neʼebé moris hiʼas ona”.​—2 Korinto 5:15; Mateus 16:24.

18. Ita sei koʼalia kona-ba pergunta saida deʼit iha lisaun tuirmai?

¹⁸ Ita aprende ona husi lisaun neʼe katak, atu sai ema kristaun neʼebé loos mak desizaun neʼebé sériu tebes. Tan neʼe mak Maria nia inan husu pergunta ba ninia an neʼebé temi iha leten. Se Ita mak inan-aman ida, karik Ita husu ona Ita-nia an: ‘Haʼu-nia oan prontu duni ka lae atu hetan batizmu? Haʼu-nia oan komprende duni kona-ba Jeová ka lae hodi nia hakarak hetan batizmu? Diʼak ka lae ba haʼu-nia oan atu buka uluk edukasaun no serbisu antes hetan batizmu? Oinsá se haʼu-nia oan monu ba sala bainhira hetan tiha batizmu?’ Ita sei koʼalia kona-ba pergunta sira-neʼe iha lisaun tuirmai, no ita sei haree oinsá mak inan-aman bele iha hanoin neʼebé loos kona-ba batizmu.