Bainhira foti desizaun oinsá atu proteje no defende an, ita halo tuir Bíblia nia prinsípiu. Prinsípiu sira-neʼe hatudu katak sala atu uza armas hanesan pistola, kilat naruk ka kilat seluk atu proteje an husi ema. Atu hatene tanbasá, hanoin toʼok kona-ba pontu sira tuirmai neʼe:

Jeová haree ema nia moris nuʼudar sagradu. Liurai David hakerek kona-ba Jeová hodi dehan: “Ita mak hun ba moris.” (Salmo [Mazmur] 36:9) Tan neʼe, se ema kristaun hakarak defende an ka proteje ninia uma no sasán seluk, nia sei hakaʼas an atu la oho ema, tanba neʼe bele lori sala kona-ba ema nia raan.—Deuteronômio (Ulangan) 22:8; Salmo (Mazmur) 51:14.

Tuir loloos, buat oioin neʼebé ema uza atu defende an bele halo ema mate. Maibé kilat halo fasil liu atu oho ema, maski atu oho ho neon ka la ho neon. * No ema neʼebé atu ataka Ita, sente ona nakdedar, sá tan se nia haree Ita kaer kilat, situasaun bele sai perigu liu no karik rezultadu mak, ema ida bele mate.

Bainhira Jesus dehan ba ninia dixípulu sira atu lori surik iha kalan antes nia mate, ninia hakarak laʼós atu proteje an. (Lucas 22:36, 38) Tuir loloos, Jesus atu hanorin sira lisaun importante ida, katak ninia dixípulu sira la bele uza violénsia, maski iha tempu neʼebé sira hasoru ema-lubun neʼebé kaer armas. (Lucas 22:52) Bainhira Pedro  losu ninia surik atu ataka amlulik boot nia atan, Jesus hatete ba Pedro: “Hatama fali ó-nia surik ba nia fatin.” Depois, Jesus fó sai prinsípiu ida neʼebé ita mós halo tuir ohin loron. Nia dehan: “Ema hotu neʼebé kaer surik sei mate ho surik.”—Mateus 26:51, 52.

Hanesan hatete iha Miquéias (Mikha) 4:3, Maromak nia povu “tuku sira-nia surik hodi sai xarrua no tuku sira-nia diman sai tudik”. Ema kristaun loos sempre hatudu dame. Sira halo tuir mandamentu neʼebé Maromak fó ba apóstolu Paulo atu la “selu aat ho aat ba ema” no “moris iha dame ho ema hotu”. (Roma 12:17, 18) Maski Paulo hasoru situasaun susar oioin, inklui mós “perigu husi naʼok-teen sira”, nia nunka kontra Bíblia nia prinsípiu, tan deʼit atu proteje an. (2 Korinto 11:26) Nia tau fiar ba Maromak no hatene katak halo tuir konsellu husi Bíblia mak “diʼak liu fali armas funu nian”.—Eclesiastes (Pengkhotbah) 9:18.

Ema kristaun haree moris folin-boot liu fali sasán. Ema nia “moris la mai husi buat neʼebé nia iha”. (Lucas 12:15) Tan neʼe, se ita koko ona koʼalia ho laran-maus ba naʼok-teen neʼebé kaer kilat, maibé neʼe la ajuda, ita halo tuir Jesus nia konsellu: “Keta kontra hasoru ema aat.” Karik diʼak atu fó ba naʼok-teen buat neʼebé nia husu. (Mateus 5:39, 40; Lucas 6:29) * (Haree nota iha kraik.) Se ita hatudu an demais, karik bele halo ita sai iska ba kriminozu sira. Tan neʼe, diʼak atu halo tuir Bíblia nia matadalan hodi la “foti-an kona-ba rikusoin”. (1 João 2:16) No se ema hotu iha ita-nia área hatene katak ita mak Testemuña ba Jeová neʼebé hadomi dame, neʼe bele sai nuʼudar protesaun.—Provérbios (Amsal) 18:10.

Ema kristaun respeitu ema seluk nia konxiénsia. (Roma 14:21) Karik irmaun-irmán balu sei hakfodak tebes, no balu mós bele sidi, se sira hatene katak ita iha kilat atu proteje an husi ema seluk. Maski governu fó lisensa atu iha kilat, maibé tanba ita hadomi irmaun-irmán sira, ita sei nunka halo buat ruma neʼebé atu halo sira sidi.—1 Korinto 10:32, 33; 13:4, 5.

Ema kristaun hakarak sai ezemplu diʼak ba ema seluk. (2 Korinto 4:2; 1 Pedro 5:2, 3) Se ema kristaun ida iha kilat atu proteje an husi ema seluk, katuas kongregasaun sei fó konsellu ba nia husi Bíblia. Se ema neʼe nafatin iha kilat, nia la hatudu ezemplu neʼebé diʼak. Tan neʼe, nia la bele kaer responsabilidade ka knaar espesiál iha kongregasaun. Matadalan neʼe mós aplika ba ema kristaun neʼebé ninia serbisu kaer kilat. Karik diʼak atu buka fali serbisu seluk. *

Maski ema kristaun ida mak tenke foti desizaun rasik oinsá atu proteje ninia an, família, sasán, no mós kona-ba serbisu saida mak nia sei halo, maibé bainhira nia foti desizaun, nia tenke hanoin uluk kona-ba Bíblia nia prinsípiu sira. Ita-nia Maromak neʼebé matenek fó prinsípiu sira-neʼe tanba nia hadomi ita. Tan neʼe mak ema kristaun neʼebé hakarak iha relasaun diʼak ho Jeová la rai kilat atu proteje sira-nia an husi ema seluk. Sira hatene katak, se sira mak tau fiar ba Maromak no halo tuir Bíblia nia prinsípiu, sira sei hela ho hakmatek ba nafatin.—Salmo (Mazmur) 97:10; Provérbios (Amsal) 1:33; 2:6, 7.